မြန်မာနိုင်ငံသားတွေ ဘယ်မှာနေနေ ကျန်းမာကြပါစေ

Photo taken on 19-11-2011 by an Indian photo-journalist at Yamuna Clinic
This Blog is created on 10th October 2014

How to ask ကျန်းမာရေးနဲ့ ဆေးပညာ မေးလိုတာရှိပါက

• ဖေ့စ်ဘွတ် ကွန်မင့်ကနေ မမေးပါနဲ့။
• ဖြစ်တဲ့သူရဲ့ ကျား-မ နဲ့ အသက်ကို အရင်ဆုံးရေးပါ။ နာမည် မလိုအပ်ပါ။
• ဖြစ်နေတာ ၁-၂-၃။ ဖြစ်တာဘယ်လောက်ကြာပြီ။ လိုအပ်ရင် ရာသီ၊ အိမ်ထောင်ရေး၊ ကျန်းမာရေးနောက်ခံ၊ နေတဲ့တိုင်းပြည်။ တိုတိုရှင်းရှင်းသာရေးပါ။
• ဆေးစစ်ချက်တွေနဲ့ ပုံတွေကို အတည့်ပို့ပါ။ လိုတာကိုသာပို့ပါ။ အာလ်ထွာဆောင်းမှာ ပုံမလိုပါ။ မှတ်ချက်သာလိုတယ်။
• SMS အရေးအသားမျိုးကို မဖတ်တတ်ပါ။ မြန်မာစကားကို အင်္ဂလိပ်စာလုံးနဲ့ရေးတာကို မဖတ်ပါ။
• ဖုန်းဆက်ပြီးမေးရင် အချိန်ဇုန်မတူတာရော၊ အသံထွက်လွဲနိုင်တာရောကြောင့် အဆင်မပြေပါ။
• မေးတဲ့သူက မိမိကိုယ်မိမိ သား-သမီးလို့မရေးပါနဲ့။ ဖြေမယ့်ဆရာဝန်ကို ဆရာလို့သာသုံးပါ။
• ဆေးရုံ-ဆေးခန်း-ဆရာဝန်-ဆေးဆိုင်-ဆေးဈေး-ကုန်ကျစရိတ် စတာတွေကို မသိပါ။
• မေးစရာနေရာ (၁) အီးမေးလ် doctortintswe@gmail.com (၂) ဖေ့စ်ဘွတ် https://www.facebook.com/tint.swe.dr (၃) ဖေ့စ်ဘွတ် https://www.facebook.com/drtintswe/
• မေးနည်းစည်းကမ်းအရ မမေးလိုသူများ http://doctortintswe.blogspot.com/ Dr. Tint Swe's Writings မှာ ရှာဖတ်နိုင်ကြပါတယ်။

Sunday, December 11, 2016

Fistula-in-Ano (FIA) ဂရင်ဂျီနာ

MAR 22ND, 11:37AM
ဆရာ ဂရင်ဂျီနာဖြစ်ရင်ခွဲမှပျောက်တာပါလား မခွဲပဲသောက်ဆေးသောက်လို့ ရပါသလား။ ကျေးဇူးပြုပြီးဖြေကြားပေးပါ။ အနာဘုက တလုံးထက်ပိုပြီးပေါက်တတ်ပါလား ဆရာ။

MAR 22ND, 8:12PM
မေးနည်းစည်းကမ်းပို့လိုက်။ ဘလော့မှာလည်း ဖတ်နိုင်။

JUL 3RD, 1:29AM
မင်္ဂလာပါ ဆရာ။ ကျေးဇူးတင်စကားပြောချင်လို့ပါ။ ကျမအမည့့် ပါ။ အသက် (၃၄) နှစ်ရှိပါပြီ။ အပျိုပါ။ ကျမ ဂရင်ဂျီနာဖြစ်တာ (၁) နှစ်ကျော်ပါပြီ။ ဖြစ်ခါစက အနာစိမ်းလို့ပဲထင်ပါတယ်။ စအိုနဲ့ (၁) လက်မအကွာ ညာဘက်မှာပါ။ လိမ်းဆေးလိမ်းတာ(၁) နှစ်ကျော်လို့ မသက်သာတော့ ဆေးခန်းသွားပြမှ ဂရင်ဂျီနာဖြစ်နေကြောင်းသိရ
ပြီး ခွဲစိတ်ရမယ်ပြောပါတယ်။ ခွဲစိတ်ဖို့ ဆေးရုံသို့လည်းသွားခဲ့ပါတယ်။ ခွဲဖို့အတွက် စိတ်ကမရဲတာနဲ့ ဆရာညွှန်ကြာတဲ့ ရေနွေးစိမ်နည်းသုံးခဲ့ပါတယ်။ ဒါနဲ့အဆင်မပြေမှခွဲမယ်လို့ စိတ်ကူးခဲ့ပါတယ်။ ၂၃. ၃.၂၀၁၆ မှစပြီး နေစဉ် တနာရီ ရေနွေးထဲသို့ အိမ်သုံးဆား ထည့်ပြီးစိမ်ပါတယ်။ စိမ်ခါစက သိပ်မသက်သာပါဘူး။ အနာက ချပ်သွားလိုက် ပြည်ပြန်ထွက်လိုက်ပါပဲ။ တခါတခါ အနာဝမှပြည်မထွက်ပဲ စအိုမှထွက်တဲ့ အထိဖြစ်လာပါတယ်။  ရေနွေးစိမ်တာ သုံးလ ပြည့်ခါနီးကစပြီး ပြည်သိပ်မထွက်တော့ပဲ အနာဘေးအသားများ ညိုလာပြီး ခြောက်လာခဲ့ပါတယ်။ ယခု ၆လပိုင်း လကုန်မှစပြီး အနာမှာ ချပ်သွားပြီး ပုံမှန်အသားပြန်ဖြစ်သွားခဲ့ပါတယ်။ ခုလိုမခွဲစိတ်ရပဲသက်သာပျောက်ကင်းတာ ဆရာညွှန်ကြားတဲ့ ရေနွေးစိမ်နည်းကြောင့်ပါ။ ကျေးဇူးတင်ပါတယ်။ ဆရာကျန်းမာပါစေ။ ရေးတာ အမှားပါခဲ့ရင် ခွင့်လွှတ်ပေးပါ။

Today 12, Dec 2016
ကောင်းတယ်။ ဆက်သတိထားနေရမယ်။ ထပ်ပေါက်လာတတ်တယ်။ ဖိထိုင်ရလို့။ နာချင်တာနဲ့ ပိုးသေဆေးတခုခုသောက်ပါ။ ရေနွေးထိုင်ပါ။

ရေနွေးနေ့တိုင်းထိုင်ပါတယ်။ ကျေးဇူးပြုပြီး သောက်ရမဲ့ ပိုးသေဆေး ပြောပြပေးပါဆရာ။ ဆရာ့စာတွေ ဖတ်ရတာ ဗဟုသုတ အများကြီးရရှိပါတယ်။ ဆရာ ကျန်းမာချမ်းသာပါစေ။

ဂရင်ဂျီနာလို့ အရပ်ခေါ်ရောဂါဟာ ရှေးကတည်းကရှိခဲ့တယ်။ စအိုဘေးမှာပေါက်တဲ့အနာက တော်တော်နဲ့မပျောက်တာကို ခေါ်တယ်။ FIA လို့ ဆေးစာအတိုကောက်နဲ့ ခေါ်ပါတယ်။ စအိုကွဲနာကိုလည်း FIA လို့ခေါ်တယ်။ လူ ၁ သိန်းမှာ ၉ ယောက်နီးပါးဖြစ်ကြတယ်။ ယောက်ျားက ၂ ဆ ဖြစ်တယ်။ အသက် ၄ဝ နီးနီးမှာ အဖြစ်များဆုံးပါ။ ကလေးတွေမှာလည်း ဖြစ်ပါတယ်။ ဆေးပညာဖခင်ကြီး ဟစ်ပိုကရေးတီးစ်ကညွှန်းခဲ့ဘူးသလို၊ ပြင်သစ်ဘုရင် လူဝစ်-၁၄ မှာ ဒီရောဂါရှိခဲ့တယ်။

ဝမ်းသွားပေါက် စအိုဘေးမှာ အနာပေါက်ရင် ကြီးကြီး-သေးသေး မပေါ့ပါနဲ့။ မရှက်ပါနဲ့။ ဖိထိုင်တော့ ပြည်-၊ မန်းရည်က ကောင်းကောင်းမထွက်နိုင်ဘူး။ ဒီတော့ အနာက အထဲမှာ လှိုက်စားမယ်။ အထဲဆိုတာ အဆီ၊ အသားတွေ လွန်သွားရင် ဝမ်းတွေကို လှောင်ထားတဲ့ အစာဟောင်းအိမ်အထိရောက်ပြီး၊ အထဲပေါက်တခု ဖြစ်လာမယ်။ အဲလို တူးမြောင်းလို ဖြစ်လာတာကို ဗမာလိုအမျိုးမျိုးခေါ်နေကြတယ်။

မြန်မာအဘိဓာန်က ဂရင်ဂျီနာရော ဂရင်ဂျီနာလို့ပါ ရေးပါတယ်။ ဆရာတော် အရှင်သြဘာသာဘိဝံသစီရင်တဲ့ သုတေသန သရုပ်ပြအဘိဓာန်မှာ ဘဂန္ဓလာ ဂယင်ဂျီနာလို့ ပုံနှိပ်ထားတယ်။ မြောင်းကနေ ဘေးကို လက်တံတွေ ထွက်နိုင်သေးတယ်။ ကွန်ကရစ်တွေနဲ့ မံထားတဲ့ မြောင်းမျိုး မဟုတ်ဘဲ၊ အနာနုတ်ခမ်းသားလို မကျက်နိုင်တဲ့ အသားနုတွေသာဖြစ်တယ်။ စအိုအနားမှာ အပြင်ပေါက်က တခုမက ရှိသလို အထဲပေါက်ကလည်း များနိုင်တယ်။ များလွန်လွန်းလို့ တချို့ ကရွတ်ခွေနဲ့ ထိုင်ရတယ်။

စအိုဘေးမှာ အနာပေါက်လို့ မဟုတ်ဘဲလဲ ဖြစ်သေးတယ်။ ထိခိုက်ဒဏ်ရာ၊ စအိုကွဲနာ (FIA နောက်တမျိုး)၊ တီဘီ၊ ကင်ဆာ၊ ဓါတ်ကင်တာ၊ Steroid ဆေးပေးတာ၊ Chlamydia ပိုးဝင်တာတွေကနေပါ ဖြစ်တတ်တယ်။ HIV နဲ့လဲ ဆက်နေသေးတယ်။ ဂနိုရီးယား၊ Ulcerative colitis, Diverticulitis, Crohn’s disease တွေကြောင့်လည်း ဖြစ်နိုင်တယ်။

သေချာကြည်ရင် အပြင်ပေါက်ကိုသာ မျက်စိနဲ့ မြင်ရမယ်။ ပြည်-မန်းရည်ဆိုတာ ထွက်လာလိုက် ပျောက်လိုက်၊ စအိုထဲ လက်ထည့်စမ်းနည်း PR exam လုပ်ရတယ်။ စအိုထိန်း ကြွက်သားဝိုင်းနဲ့ အဆက်အစပ်ကို စစ်ဆေးရမယ်။ Goodsall rule ဆိုတာကို ခွဲစိတ်ဆရာဝန်တိုင်း အားကိုးကြရတယ်။ အပြင်က ပြွန်ပေါက်ဟာ စအိုပေါက် ရှေ့ပိုင်း တဝက်မှာရှိရင် အထဲ လမ်းဟာ မျဉ်းဖြောင့် စပုတ်တံလို သွားတယ်။ စအိုပေါက် နောက်ပိုင်း တဝက်မှာရှိရင် မျဉ်းကောက်၊ မြင်းခွါပုံလို သွားမယ်။

ဆင်တူရိုးမှား တခြားရောဂါတွေနဲ့ ခွဲခြားရမယ်။ စအိုကွဲနာ၊ အတွင်းလိပ်ခေါင်း၊ အပြင်လိပ်ခေါင်း၊ Periproctal abscess ပြည်တည်နာ၊ Anal polyp စအိုအသားပို၊ Sentinel tag အဝစောင့်အသားပို။ အနာ-အနာတွေက ပျောက်သွားလိုက် ပြန်ပေါ်လိုက်။ ပျောက်သွားတာမဟုတ်ဘဲ မြုံနေတာပါ။ သူ့အလိုလို ပျောက်တယ်ဆိုတာမရှိပါ။ ဆေးကုပါ။

ဆရာဝန်တွေ သင်ကြ-သုံးကြတဲ့ ခွဲစိတ်နည်းတွေထဲမှာ အများဆုံးသုံးနည်းကတော့ Fistulectomy ပြွန်ကို အနာသစ်လုပ်၊ အသားနုကို အခြေကနေ အထက်တက် ကျက်စေတဲ့နည်းပါ။ ပဋိဇီဝဆေး အရင်ပေးရတယ်။ မခွဲခင် တညနဲ့ မနက်ထ ဝမ်းခြူပေး၊ ခါးထုံဆေးနဲ့ ခွဲပါတယ်။ ခွဲပြီးစမှာ ကရိကထတော့ များမယ်။ ၂-၃ ရက် ရာဘာပိုက် တခု ထည့်ထား ပေးပါမယ်။ လေလည်နိုင်အောင်ပေါ့။ အစာကို ရေ-အရည်၊ နောက် ဆန်ပြုတ်-စွပ်ပြုတ်၊ နောက်မှ ထမင်းစားခိုင်းတယ်။ ဝမ်းမဖြစ်အောင် ဆင်ခြင်ခိုင်းတာပါ။ နေ့တိုင်း ဆေးထည့်ပေးမယ်။ ကောင်းသွားပါလိမ့်မယ်။ အခြေခံရောဂါရှိရင်လည်း ကုရပါတယ်။

Fibrin glue injection ဆိုတဲ့ ဆေးထိုးကုနည်းလည်း သုံးလာကြတယ်။ Fistula plug က အဲဒါကို ပိုဆန်းသစ်ထားတဲ့ နည်းပါ။ ၈ဝ% အောင်မြင်တယ်လို့ ဆိုပါတယ်။ Endorectal advancement flap နည်းက အထဲပေါက်ကို ပြုပြင်ပေးတဲ့ ခွဲစိတ်နည်း၊ Anal Fistula Plug နည်းကတော့ အပြင်ပေါက်ကို ပြုပြင်ပေးတဲ့ နောက်သုံး ခွဲစိတ်နည်းပါ။

ပိုးသေဆေးများ
Clindamycin 300-450 mg တနေ့ ၃ ကြိမ်၊ ၅-၇ ရက်။ (သို့)
Cephalexin 250-500 mg တနေ့ ၄ ကြိမ်၊ ၅-၇ ရက်။ (သို့)
Dicloxacillin 250-500 mg တနေ့ ၄ ကြိမ်၊ ၅-၇ ရက်။ (သို့)
Doxycycline 100 mg တနေ့ ၂ ကြိမ်၊ ၅-၇ ရက်။ (သို့)
Trimethoprim-sulfamethoxazole (160 mg/800 mg) DS 1-2 tablets တနေ့ ၂ ကြိမ်၊ ၅-၇ ရက်။

မုဆိုး စိုင်သင်၊ ဆရာဝန်တွေလည်း အကောင်းဆုံးထင်တာနဲ့ ကုပေး၊ ပိုကောင်းတာတွေ့ရင် ပြင်ကြရပါတယ်။

Sitz bath ရေနွေးထိုင်နည်း http://doctortintswe.blogspot.com/2014/11/sitz-bath.html ကိုသေချာပေါက်ဖတ်ပါ။ လိုက်နာပါ။

ဒေါက်တာတင့်ဆွေ
၁၁-၁၂-၂ဝ၁၆

No comments:

Post a Comment

Note: Only a member of this blog may post a comment.