Pleural Effusions အဆုပ်ဖုံးအိတ်ထဲ အရည်အောင်းနေခြင်း

(အင်္ဂလိပ်စာလုံးတွေကို ကျော်ဖတ်လို့ရပါတယ်။ ဆောရီး။)

မင်္ဂလာပါဆရာ ကျွန်တော့်အဖေက အသက် ၆၁ နှစ်ပါ။ နေမကောင်းဖြစ်လို့ ဆေးခန်းမှာဆေးစစ်တဲ့အချိန်ကြတော့
အဆုတ်မှာရေဝင်ပြီးတော့ နမိုးနီးယားဖြစ်တယ်လို့ပြောပါတယ်။ ဒါပေမယ့် ဆေးရုံက အဖေကို တီဘီဆေးတွေ အတင်းသောက်ခိုင်းပါတယ်။ ဒေသန္တရဆေးပေးခန်းကနေပြီးတော့ဆေးသောက်ဖို့အတွက် အတင်းတိုက်ပါတယ်။ မသောက်ရင် အစကနေပြန်သောက်ရမယ်ဆိုပြီးတော့ခြိမ်းခြောက်ပါတယ်ဆရာ။ မသောက်ဘူးငြင်းတာ လုံးဝမရပါဘူး။ တီဘီမရှိဘဲနဲ့ ဘာလို့များတီဘီဆေးသောက်ခိုင်းရတာပါလဲခင်ဗျာ။ အဖေကအခု တီဘီဆေးတွေသောက်ပြီ တုန်တုန်ချိချိနဲ့ အိပ်ရာထဲလဲနေပါပြီ။ တီဘီဆေးက သောက်ဖို့လိုမလို ရှင်းပြပေးပါဆရာ။ ကျွန်တော့်အဖေအတွက် စိုးရိမ်နေပါတယ်။ အဖေ့ရောဂါက အဆုတ်ထဲရေဝင်ပြီး နမိုးနီးယားဖြစ်တာပါ ဆေးမှတ်တမ်းလဲရှိပါတယ်။ ဆရာကို လေးစားစွာဖြင့် မေးမြန်းပါတယ်။

ကျွန်တော်ကတော့ အဆုံးအဖြတ်မပေးနိုင်ပါ။ ဆောရီး။ ဆေးပညာစာတော့ ပို့ပါမယ်။ ဆေးသုတေသနတွေကို တိုးတက်တဲ့နိုင်ငံတွေမှာ လုပ်နိုင်တာများတယ်။ သိချင်လို့ ဂူဂယ်မှာရှာရင် အဲတာတွေသာ တွေ့မယ်။ တီဘီကို ယူအက်စ်အေမှာ မရှိသလောက်ရှားတယ်။ ဒုက္ခသည်တွေမှာသာ ပါလာတယ်။ ဖြစ်စေနိုင်တဲ့စာရင်းမှာ တချို့စာတမ်းတွေမှာ တီဘီကို ထည့်တောင်မထားပါ။ တီဘီကနေဖြစ်တဲ့ အဆုပ်ဖုံးအိတ်ထဲ အရည်အောင်းနေခြင်းဟာ တီဘီရောဂါထူပြောရာမှာ အဖြစ်များပါတယ်။

၁။ ဆရာ မင်္ဂလာပါရှင့်။ သမီးရဲ့ ယောက္ခမက အခု အသက်က ၆၅ နှစ် (မ)၊ နေမကောင်းဖြစ်ပြီး အခု အဆုတ်ထဲ ရေ၀င်တာလို့ ပြောပါတယ်။ X Ray နှင့် သွေးစစ်ထားပါတယ်။ Result တော့မသိရသေးဘူး။ အဆုတ်ထဲ ဘာလို့ ရေ၀င်တာလဲ၊ ဘာတွေရှောင်ရမလဲ သိချင်လို့ပါဆရာ။ ကျေးဇူးပြုပြီးဖြေပေးပါဆရာ။

၂။ ဆရာ ကျနော်အသက်၂၂ပါ ။ ညာဘက်ခြမ်းနောက်ကျော အောင့်တာ နှစ်နဲ့ချီနေပါပြီ။ အေးတဲ့အချိန်ဆို ပိုအောင့်ပါတယ်။ ဒါနဲ့ ဆရာဝန်ပြကြည့်တော့ ဆရာဝန်က ဓာတ်မှန်ရိုက်ခိုင်းပါတယ်။ စမ်းသပ်ပါတယ်။ အဖြေက အဆုတ်ထဲရေဝင်တာတဲ့။ ရေချိုးရင် အကြာကြီးမချိုးခိုင်းသလို နွေးနွေးထွေးထွေး နေခိုင်းပါတယ်။ ပြီးတော့ အဲဆရာဝန်မှာပဲ ၃-၄ ရက်ပြပြီး ဆေး နေ့တိုင်းထိုး ဆေးသောက်ပါတယ်။ ဒါပေမဲ့ မသက်သာခဲ့ပါဘူး။ ဒီကြားထဲဒီလိုပဲ နေခဲ့တယ်။ ဒါပေမဲ့ မပျောက်ကင်းခဲ့ဘူး။ ပိုက်ဆံအခြေအနေအရရော အချိန်မအားတာရောကြောင့် အဲလိုပစ်ထားခဲ့တာ အခုထိလဲ အောင့်တုန်းပါပဲ။ အခုက ကျနော်က နိုင်ငံခြားမှာ အလုပ်လုပ်နေရတာပါ။ သူများနိုင်ငံဆိုတော့ ပိုက်ဆံသိပ်အကုန်မခံတဲ့ မြန်မာနိုင်ငံသားကို ကောင်းကောင်း မစမ်းသပ်ပေးချင်ပါဘူး။ သူတိူ့ဆီမှာသွားပြရင် ကြွတ်သားရောင်တာဆိုပြီး အရောင်ကျဆေးတွေပဲပေးပါတယ်။

လူတိုင်းရဲ့ ဘယ်နဲ့ညာ အဆုပ်နှစ်ခုလုံးကို ဖုံးပေးထားတဲ့ အဖုံးက အိတ်လိုရှိတယ်။ အင်္ကျီအိတ်ကပ်လိုနေတယ်။ အိပ်ကပ်ထဲမှာ အရည်ပါးပါလေးရှိနေတာက ပုံမှန်ဖြစ်တယ်။ အဲာတာက ရှိသင့်တာထက်များနေရင် အဆုပ်ဖုံးအိတ်ထဲ အရည်အောင်းနေခြင်းရောဂါလို့ ခေါ်ပါတယ်။ ဖြစ်စေတတ်တဲ့ အောက်ခံရောဂါ တခုခုကြောင့်ဖြစ်လာတာပါ။

အကြောင်းခံကလဲ အမျိုးမျိုးရှိပါတယ်။ တချို့ မဆိုးလှပါ။ တချို့က အသက်အန္တရာယ်အထိစိုးရိမ်ရတယ်။
• Congestive heart failure နှလုံး အလုပ်မနိုင်တော့ခြင်း၊
• Pneumonia နူမိုးနီးယား၊
• Liver cirrhosis အသဲခြောက်ခြင်း၊
• End-stage renal disease ကျောက်ကပ် ရောဂါ နောက်ဆုံးအဆင့်၊
• Nephrotic syndrome ကျောက်ကပ်ရောဂါတမျိုး၊
• Cancer ကင်ဆာ၊
• Pulmonary embolism အဆုပ်သွားသွေးကြောပိတ်ခြင်း၊
• Lupus and other autoimmune conditions ခုခံအားစနစ်ကမောက်ကမဖြစ်ခြင်း၊
• Tuberculosis တီဘီရောဂါ၊
• Infection ပိုးဝင်ခြင်း၊
• Hypoalbuminemia အယ်လ်ဗျူမင် နည်းခြင်း၊
• Trauma ထိခိုက်မိခြင်း။

ဘာတွေခံစားရမလဲ
• တချို့မှာ ဘယ်လိုမှမနေပါ။ တချို့မှာ
• Shortness of breath အသက်ရှူမဝခြင်း၊
• Chest pain ရင်ပတ်နာခြင်း၊
• Fever ဖျားခြင်း၊
• Cough ချောင်းဆိုးခြင်း၊
• Hiccups ကျို့ထိုးခြင်း၊
• Rapid breathing အသက်ရှူမြန်ခြင်း၊
• Difficulty breathing အသက်ရှူခက်ခဲခြင်း၊
• Painful breathing (Pleurisy) အသက်ရှူရင်နာခြင်း။

ရောဂါရှိနေမှန်း ဘယ်လိုသိနိုင်မလဲ
• ဆရာဝန်က လက်နဲ့စမ်းတာနဲ့ သံသယဝင်စရာတွေ တွေ့မယ်။ လည်ပင်းအလယ်တည့်တည့်က အထက်-အောက် တန်းနေတဲ့ လေပြွန်ကြီးက တဖက်ဖက်ကို စောင်းနေတာ မြင်နိုင်တယ်။
• ရင်ပတ်နှစ်ဖက်ကို လက်နဲ့ခေါက်ကြည့်ရင် အရည်ရှိနေရာမှာ ထုံသံကြားမယ်။ လေရှိနေတာက လှိုင်သံထွက်ရတယ်။
• နားကြပ်နဲ့နားထောင်ရင် ဖြစ်တဲ့ဘက်မှာ လေအဝင်အထွက် နည်းနေတာကြားရမယ်။
• Chest Plain X-ray ဓါတ်မှန်ရိုက်တာနဲ့ သိမယ်။
• Computed tomography (CT scan) စီတီစကန် လုပ်နိုင်တယ်။
• Ultrasound အာလ်ထွာဆောင်း လုပ်နိုင်တယ်။

ဒုတိယမေးခွန်းထဲက မြန်မာဆရာဝန်ကနေ ဘာဆေးပေးသလဲ မသိရပါ။ ရေချိုးနည်း အဲလိုပြောတယ်ဆိုတာတော့ ဆန်းနေတယ်။ ကျွန်တော့် လူနာတွေကိုတော့ အဲလို မပြောပါ။ နိုင်ငံခြားတိုင်းပြည်မှာဖြစ်နေတာကိုတော့ ဆောရီးသာ ပြောနိုင်ပါတယ်။ ဆောရီး။

အဆုပ်ကိုဖုံးထားတဲ့အလွှာ ၂ ခုရှိတယ်။ ဆက်နေလို့ အိတ်လိုဖြစ်နေတယ်။ အိတ်ထဲမှာ အရည်ပါးပါးလေးရှိနေတယ်။ အဲဒီအရည် ပုံမှန်ထက်များလာကို အလွယ်နဲ့ အဆုပ်ထဲရေဝင်တယ်လို့ပြောကြတာ။ အမှန်က အဆုပ်အပြင်မှာ အရည်များတာသာဖြစ်တယ်။ အခြေခံရောဂါလက္ခဏာတွေပါ ရှိနေမယ်။ အခြေခံရောဂါတွေဆိုတာ အဆုပ်နဲ့ နှလုံး။ ဖြစ်စေတဲ့ အခြေခံရောဂါကိုကုသဘို့က ပဌမဦးစားပေးဖြစ်တယ်။ အရည်ရှိတာသိလာရင် စုပ်ထုတ်နိုင်တယ်။ နည်းအောင်ရော အရည်ကိုစစ်ဆေးဘို့ပါ လုပ်ရတာဖြစ်တယ်။ ကုသရတာကတော့ ဖြစ်စေတဲ့အကြောင်းရင်းအလိုက် ဖြစ်ပါတယ်။

ဖြစ်စေတဲ့အကြောင်းရင်းများ
၁။ Lung infection အဆိုပ်ရောဂါများ။ Pneumonia နူမိုးနီးယား၊ Tuberculosis တီဘီနဲ့ Cancers ကင်ဆာတွေဖြစ်တယ်။
၂။ Heart failure နှလုံးအလုပ်မနိုင်တော့ခြင်း။ လူနာဟာ မျက်နှာခြေလက်တွေရောင်သလို အလုပ်လည်းရောင်မယ်။
၃။ Rheumatoid arthritis ရုမတွိုက်အဆစ်နာနဲ့ (SLE) ရောဂါတွေမှာလည်း ဆက်ဖြစ်တာရှိတတ်တယ်။
၎။ အသည်းခြောက်သူ ပရိုတင်းဓါတ်နည်းရာကနေ ဆက်ဖြစ်နိုင်တယ်။
၅။ ကျောက်ကပ်မကောင်းသူ တချို့မှာလည်း ဆက်ဖြစ်နိုင်တယ်။

တချို့မှာ အဲလိုဖြစ်နေပမဲ့ ဘာမှ မခံစားရဘူး။ အဲတာရှိရင် အသက်ရှူမဝဖြစ်မယ်။ အောင့်နာမယ်။ အရည်များလာရင်တော့ ခံစားရတော့မယ်။ တချို့ကိုယ်နည်းနည်းပူမယ်။

ရင်ပတ်ဓါတ်မှန်ရိုက်ရင် မြင်ရမယ်။ ဓါတ်မှန်မှာ လေရှိတဲ့နေရာက မည်းနေတယ်။ လေမဟုတ်တာက ဖြူနေတယ်။ အရည်ကိုလည်း အဖြူပြင်မြင်ရမယ်။

တီဘီဆိုရင် တီဘီဆေး စနစ်တကျ အနည်းဆုံး (၆) လ ရက်မပျက်ပေးရမယ်။ နူမိုးနီးယားဆိုရင် သင့်တဲ့ပိုးသေဆေး ဆေးပတ်လည်ပေးရမယ်။ ကင်ဆာဆိုရင် ကင်ဆာကုသနည်း (ကင်ဆာဆေး + ဓါတ်ကင်) လုပ်ရပါမယ်။ ဖြစ်စေတဲ့အကြောင်းကိုနိုင်လာတာနဲ့ အဆုပ်အိတ်ထဲအရည်အောင်းတာ သက်သာကောင်းမွန်လာပါမယ်။

အရည်အောင်းတာကများလို့ အနေရခက်မယ်၊ နာမယ်၊ အသက်ရှူခက်မယ်ဆိုရင် အရည်ကို စုပ်ထုတ်ပေးပါမယ်။ pleural fluid aspiration နဲ့ pleural tap လို့ခေါ်တယ်။ အရည်ကိုပါ ဓါတ်ခွဲစစ်ဆေးနိုင်တယ်။ Pleurodesis နည်းဆိုတာ အဆုပ်ဖုံးအိတ်ထဲကို ဆေးထိုးထည့်ပေးနည်းဖြစ်တယ်။ အဖုံးလွှာတွေ ကပ်သွားစေမယ်။ tetracycline, sterile talc နဲ့ bleomycin ဆေးတွေကို သုံးတယ်။ Shunt ထည့်ပေးနည်းလည်းလုပ်တယ်။ Pleuroperitoneal shunt လို့ခေါ်တယ်။ Pleurectomy ခွဲစိတ်နည်းလည်း လိုအပ်သူကို လုပ်ပေးရတယ်။

ဒီရောဂါစာ ရေးပြီးသာမရှိလို့ အသစ်ရေးရတယ်။ အင်တာနက်ကနေ ရီဆာ့ခ်ျလုပ်တာမှာ ဒီရောဂါမျိုးအတွက်က သတိထားရတယ်။ အမေရိကမှာ တီဘီကရှားတော့ နှလုံးရောဂါကနေဆက်ဖြစ်တာကိုသာ ဦးစားပေး ရေးထားတာက များတယ်။ ကျွန်တော်တို့မြန်မာပြည်ကလူနာတွေနဲ့ မကိုက်ပါ။

မြန်မာပြည်မှာ တီဘီကနေဆက်ဖြစ်တာများတယ်။ ကျွန်တော် နယူးဒေလီမှာ ယမုန်နာဆေးခန်းလေးဖွင့်စဉ်က မကြာသေးခင်ကရောက်လာတဲ့ ချင်းပြည်နယ်က အမျိုးသမီးကြီးတယောက်လာပြတော့ နားကြပ်နဲ့စမ်း၊ လက်နဲ့ ခေါက်စမ်းတာနဲ့ အဲဒီရောဂါလို့သိတယ်။ အဆုပ်ထဲမှာလေရှိတယ်။ အပေါ်နံရိုးကြားနေရာလေးတွေကနေ ကိုယ့်လက်ချောင်းတခုပေါ်မှာ နောက်လက်တဖက်ကလက်ချောင်းနဲ့ အထက်ကနေ အောက်ဆီ နံကြားတခုချင်း ခေါက်စမ်းရတယ်။ အောက်မှာလေဆိုရင် လှိုင်သံကြားရမယ်။ အရည်နဲ့ အစိုင်အခဲဆို ထုံသံကြားရမယ်။ ဓါတ်ဆီပေပါကို လက်နဲ့ခေါက်သလိုပါပဲ။

ကျွန်တော့်လူနာက ဆင်းရဲလို့ ပိုက်ဆံပေးပြီး ဓါတ်မှန်သွားရိုက်ခိုင်းရတယ်။ ထင်တဲ့အတိုင်းပဲ။ အဲတာနဲ့ ထုံဆေးလေးထိုးပြီး အရည်တွေကို စုပ်ထုတ်ပေးတယ်။ တီဘီဆေးလည်း စကေးလိုက်တယ်။ နောက်နေ့ သူကဆက်မလာတော့ဘူး။ တပတ် နှစ်ပတ်လောက်နေမှ ပြန်လာတယ်။ ဘာလို့ ဆက်မလာတာလဲဆိုတော့ သက်သာလို့ အလုပ်သွားလုပ်တာတဲ့။

ဒေါက်တာတင့်ဆွေ

Comments

Popular posts from this blog

ကျန်းမာခြင်းသည် လာဘ်တပါး

Furamin BC သံဓါတ်အားဆေး