Clematis smilacifolia ရွှေမြို့ကပန်းခွာညို

ပြာသိုလဟာ မြန်မာ့အစဉ်အလာ (၁၂) လရာသီမှာ (၁ဝ) လမြောက်လဖြစ်ပြီး၊ (၃ဝ) ရက် ရက်စုံလဖြစ်တယ်။ ဥတုသုံးလီမှာ ဆောင်းဥတုကျရောက်တယ်။ ဖုသျှနက္ခတ်နဲ့ မိနလဂ်စန်းယှဉ်၊ မကရရာသီ၊ ပုစွန်တာရာ ထွန်းလင်းတယ်။

ပြာ (ပျားဖယောင်း)၊ သိုဝ် (စုဆောင်းသိုလှောင်ခြင်း) လို့ဖွင့်ဆိုကြတယ်။ ပျားဖယောင်းတွေ စုဆောင်းတဲ့လလို့ ဆိုစမှတ်ပြုခဲ့ကြသည်။

ပြာသိုလမှာ ရွာတဲ့မိုးကို မိုးညှင်းညှင်း၊ ဆီးနှင်းရောယှက်၊ နှမ်းတောင်ပျက်လို့ ဖွဲ့ဆိုတယ်။

ကင်းဝန်မင်းကြီးက အတာတန်ခူး၊ နှစ်ဦးညောင်ရေ၊ စာပလွေခင်း၊ ပဉ္စင်းတော်ခံ စာရေးတံနှင့် မြစ်ယံပွဲကြီး၊ ဆီမီးထွန်းချိန်၊ ကထိန်နတ်ကျင်း၊ မြင်းခင်းဆင်ယင်၊ သဘင်မီးပုန်း၊ လူလုံးသဲပုံ၊ စေ့စုံကျင်းပ ဆယ့်နှစ်လ မှတ်ကြရာသီပွဲလို့ ဖွဲ့ဆိုခဲ့လို့ ပြာသိုမှာ မြင်းခင်းပွဲတော်ကျင်းပခဲ့ကြတယ်။

ပင်းယခေတ် ငါးစီးရှင်ကျော်စွာမင်းရဲ့ မြင်းစိုင်းရွှေပြည်ကာချင်းမှာ နွယ်ပန်းခွာညို၊ ပွင့်ပေလို၊ ပြာသိုဆောင်းလလယ်၊ ယရည်သွန်းသွန်း၊ မြင်းသည်ဝန်း၊ လှံချွန်တွန်းတက်ပယ်လို့ ရေးဖွဲ့ခဲ့တယ်။

အမည်မသိရှေးစာဆို၏ ကောက်စိုက်မတေး

ရွှေမြို့က ပန်းခွာညို စာဆိုနှင့်ပေး
စာဆိုနှင့် ခွာညိုပန်းရယ် နန်းမြေထိမွှေး။

ရွှေမြို့နေ မင်းခြေရင်းက ထုံသင်းကိုပေး
လိမ်းမယ်လို့ ပျိုချေတော့ လေပြည်ကမွှေး။

ရွှေမြို့က ငွေပန်းငုံကို လူကြုံတိုင်းပေး
ငွေပန်းငုံ လူကြုံပေးကို သိမ်းပေါင်ကွဲ့လေး။

ရွှေမြို့ကို ဘယ်အခင်းကြောင့် မောင်ဆင်းသလေး
ကွမ်းတုံမြိတ်နှင့် အချိတ်ဝယ်ကွယ် ဆင်းမယ်တဲ့လေး။

ပျို့ခေါင်းကို နေကျော် နားချိန်ကတော်
နားနေရင် ချိန်ချော်ရော့မယ် ငန်းဆော်ပါ့လေး။

ဒေါက်တာတင့်ဆွေ
၁၄-၁-၂ဝ၁၆
၂၂-၁၂-၂ဝ၁၇

Comments

Popular posts from this blog

ကျန်းမာခြင်းသည် လာဘ်တပါး

Furamin BC သံဓါတ်အားဆေး