Home ဟုမ်း
ကွန်မင့်တခု = Tin Linn အင်္ဂလိပ်ကို မကျွမ်းကျင်လို့ပါဆရာ Home နှင့်House ကို မကွဲလို့။ ဆရာ့အိမ်ကိုလွမ်းတယ်လို့ ခံစားရတယ်ခင်ဗျာ။
တညမှာ ညဥ့်နက်မှ တီဗွီကနေပြတဲ့ ရုပ်ရှင်တခုကြည့်ဖြစ်တယ်။ ရုပ်ရှင်ရိုက်ထားတာ နည်းနည်းတော့ကြာပါပြီ။ ဇာတ်လိုက်နာမည်တွေနဲ့ ဇာတ်လမ်းရှည်ကို မပြောတော့ပါ။ ဟီးရိုးလုပ်နေကျမင်းသားကြီးပါတယ်။ လူဆိုးတွေနဲ့ အပြိုင်ပေါ့။ လူဆိုးကလည်း စွမ်းသလားမမေးနဲ့ SWAT တို့ FBI တို့က လိုက်ဖမ်းတာ သူ့ကိုမမိဘူး။ မင်းသားကြီးက အနားယူထားတဲ့ Sheriff လုပ်ရတယ်။ ရှရစ်ဖ်ဆိုတာ အမေရိကန်သုံး။ ဥပဒေ ဘက်တော်သားအရာရှိ။ ရဲပဲဆိုပါစို့။
ဇာတ်လမ်းအဆုံးမှာ သူ့အစွမ်းနဲ့ လူဆိုးကိုဖမ်းနိုင်တယ်။ သူ့ကိုသိပ်မသိသူတွေကမေးတဲ့အခါ လက်ရှိတာဝန်လဲ မရှိဘဲနဲ့ ဘာလို့အဲလို သက်စွန့်ဆံဖျားလုပ်တာလဲအမေးကို သူပြန်ဖြေတဲ့ ဝါကျလေးတကြောင်းကို သဘောကျမိတယ်။
This is my home ဒါ ကျွန်တော့်ဟုမ်းလို့ ဖြေပြီးတော့ ရုပ်ရှင်က The End ဖြစ်သွားပါတယ်။ မြန်မာလို ပြီးပါပြီ၊ (ပီးပါပီ) မဟုတ်ပါ။
Home ကို အကောင်းဆုံးဘယ်လိုဘာသာပြန်မလဲ။ ဟုမ်းကို နေအိမ်လို့ ဘာသာပြန်တာ အများဆုံးဖြစ်မယ်။ တခြား အဓိပ္ပါယ်တွေလည်းရှိတယ်။ နေစရာနေရာ၊ မိသားစုနေတဲ့အိမ်၊ လုံခြုံမှုရှိတဲ့အိမ်၊ နေပျော်ဘွယ်ဖြစ်တဲ့အိမ်၊ နားခိုစရာ၊ တန်ဖိုးထားအပ်တဲ့နေစရာ၊ လူ-အပင်-အကောင်တွေရဲ့ မူရင်းနေရာဒေသ၊ ဌာနချုပ်၊ အသက်ကြီးသူတွေအတွက် သီးသန့်နေစရာ၊ သူနာပြုပေးရာဆေးကုဌာန၊ ကွန်ပြူတာမှာဖန်သားပြင်ရဲ့ အထက်ဘယ်ဒေါင့်နေရာ၊ အပလီကေးရှင်းတခု စတင်ရာနေရာ။ နောက်ပေါ်ဖုန်းမှာလည်း ဟုမ်းကီးပါလာတယ်။
ကျွန်တော်ကတော့ ဟုမ်းဆိုတာ နှစ်သက်တဲ့တိုင်းပြည် သို့ မွေးခဲ့ပြီးနှစ်တွေအကြာကြီးနေခဲ့တဲ့အရပ်ဒေသ ဖြစ်ပါတယ်။ ကျွန်တော်က ရှရစ်ဖ်လိုတော့ မတော်၊ လူစွမ်းကောင်းလည်း မဟုတ်ပါ။ ဒါပေမယ့် လူဆိုးတွေနဲ့တူတဲ့ တာဝန်ရှိသူတွေနဲ့ ရင်ဆိုင်ခဲ့ရတယ်။ ပင်စင်လည်းမရပါ။ အခုထိ တတ်နိုင်တဲ့အရေးအရာလေးတွေ ဆက်လုပ်နေတယ်။ မသိတဲ့သူတွေက ဘာလို့လည်းလို့ မေးကြစေချင်တယ်။ မြန်မာပြည်ဟာ ကျွန်တော့်ဟုမ်း ဖြစ်လို့ပါ။
ဒေါက်တာတင့်ဆွေ
၂၁-၈-၂ဝ၁၄
၂ဝ-၈-၂ဝ၁၆
၁၆-၄-၂ဝ၁၇
Comments
Post a Comment