Pregnancy, Folic acid and Albendazole ကိုယ်ဝန်၊ ဖေါလစ်အက်စစ် နဲ့ သန်ချဆေး

ဆရာ ကျွန်မ ကိုယ်ဝန် ၂၇ ပတ်ပါ။ အသက် ၃၀၊ မန္တလေးမှာနေပါတယ်။ ကျွန်မကိုယ်ဝန် ၂ နေရာ အပ်ပါတယ်။ သွားဖွားအထူးကုဆရာဝန်နဲ့ ဒေသန္တရ ကျန်းမာရေးဌာန နှစ်နေရာ သွားပါတယ် ဆရာဝန်က ကိုယ်ဝန်ဆောင် အားဆေးကို OBIPLUS တရက်ခြားတလုံးနဲ့ Folic acid နေ့စဉ်သောက်ခိုင်းပါတယ်။ ကျန်းမာရေးဌာနက Furamin BC နေ့စဉ် သောက်ခိုင်းပါတယ် ရှင့် Folic acid မှာ 5mg, Furamin Bc မှာ 2mg , OBIPLUS မှာ 1000mcg လို့ ပါပါတယ်။ ကျွန်မသောက်တာ Folic acid ပမာဏ များနေလား သိချင်ပါတယ်ရှင့်။ တန်ဆေးလွန်ဘေးဖြစ်မှာစိုးလို့ပါရှင့်။ နောက်တခု သံချဆေးသောက်သင့်မသောက်သင့် သိချင်ပါတယ်ဆရာ။ ကျွန်မ သွားဖွားအထူးကုဆရာဝန်က နှစ်ပတ်တခါ ဆေးခန်း ပြရပါတယ် ပုံမှန်ဆေးခန်းသွားပါတယ် ဆရာဝန်က သံချဆေး မပေးပါဘူးရှင့်။ ကျန်းမာရေးဌာနကို တလတခါ သွားရပါတယ်။ အခုတလ သံချဆေးလို့ထင်ရတဲ့ ဆေးတလုံး ပေးလိုက်ပါတယ်။ ညအိပ်ရာဝင် ရေများများနဲ့သောက်လို့ မှာလိုက်ပါတယ်။ သောက်သင့်မသောက်သင့်သိချင်ပါတယ်ရှင့်။ (ဆေးကတလုံးတည်းဖြစ်နေလို့ စာတွေဖတ်မရပါရှင့်)

မေးခွန်းထဲက တစ် လေးလုံးကို ပြင်လိုက်ပါတယ်။ ဆရာ့ပို့စ်မှာသုံးတဲ့မေးခွန်းဖြစ်လို့ပါ။ ကိုယ့်ဖေ့စ်ဘွတ်၊ ကိုယ်စာအုပ်၊ ကိုယ့်ကဗျာမှာ ဘယ်လိုရေးကြရေးကြ သဘောပါ။ ပေါ်လစီသတ်ပုံကို သန်ချဆေးတိုက်နေတာ မရသေးဘူးဗျာ။ Smile!

 (ဖေါလစ်-အက်စစ်) ဆိုတာဗီတာမင် ဘီအုပ်စုဝင်ဖြစ်တယ်။ Vitamin B9, Folacin နဲ့ Folate လို့လည်း ခေါ်တယ်။ (ဖေါလစ်-အက်စစ်) နည်းတဲ့ သွေးအားနည်းတာနဲ့ သံဓါတ်နည်း-သွေးအားနည်းရောဂါတွေ ဖြစ်နေသူဟာ မောပန်းနေမယ်။ အားယုတ်နေမယ်။ အစာခြေတာ မကောင်းလို့ ဝမ်းပျက်တတ်တယ်။ စားချင်စိတ် နည်းနေမယ်။ ကိုယ်အလေးချိန် ကျမယ်။ လျှာနာမယ်။ ခေါင်းကိုက်မယ်။ ရင်တုန်မယ်။ သတိမေ့တတ်ပြီး အမူအယာပါ ပြောင်းလာတတ်တယ်။ (အလာဂျီ) အတွက်လဲ သုံးတယ်။ စိတ်ကျနေသူတွေကိုလဲပေးနိုင်တယ်။ စိတ်ရောဂါရှိသူ၊ သတိမေ့တတ်သူတွေကိုလဲ ပေးတယ်။ အဝလွန်သူတွေ အဆီချဘို့အတွက်လည်းသုံးတယ်။ ဆီးချိုကိုလဲ ပေးတယ်။ သွေးဆုံးချိန်မှာလဲ အသုံးကျတယ်။ ကျောက်ကပ်ရောဂါ၊ အရိုးရောဂါ၊ လေးဘက်နာသူတွေကိုလဲ ပေးတယ်။ လူတွေမှာသွေးနီဥနဲ့ DNA ခေါ်တဲ့ မျိုးဗီဇတည်ဆာက်ဘို့ (ဖေါလစ်-အက်စစ်) လိုတယ်။ ဦးနှောက်-အာရုံကြောတွေ အတွက်လဲအသုံးဝင်တယ်။

ယေဘုယျဆိုရင် တနေ့မှာ 0.5-1.0 mg/daily စားဆေး-ထိုးဆေးအဖြစ်ပေးတယ်။ သွေးနီဥ နဲ့ DNA ခေါ်တဲ့ မျိုးဗီဇ တည်ဆောက်ဘို့ (ဖေါလစ်-အက်စစ်) လိုတယ်။ ဦးနှောက်-အာရုံကြောတွေ အတွက်လဲ အသုံးဝင်တယ်။

ကိုယ်ဝန်နဲ့ ဖေါလစ်အက်စစ်
ကိုယ်ဝန်ဆောင်ချိန်မှာ ဖေါလစ်အက်စစ်နည်းနေရင် အထဲကကလေး ဦးနှောက်ဖြစ်ပေါ်တာကို အားနည်းစေမယ်။ Spina bifida ခေါ်တဲ့ ခါးရိုးဆစ်ကနေ မွေးကတည်းက အနာလိုဖြစ်နေတာမျိုးကို တားဆီးနိုင်တယ်။ ကိုယ်ဝန် ပဌမ ၃ လ အတွင်း Folic acid 400 mcg လိုအပ်တယ်။ ကလေးပျက်ကျမှာကိုလည်း တာဆီးပေးမယ်။ မွေးပြီး ကလေး နို့တိုက်ချိန် ဆိုပါစို့ ၆ လအထိ သောက်သင့်တယ်။ အထဲကကလေးမှာ NTD ဆိုတာရှိနေတာကို ဆရာဝန်က သိရင် ဆေးကိုများများ ပေးလိမ့်မယ်။ ကိုယ်ဝန်ဆောင်တွေ 1000 UL လိုပြီး၊ ကလေးတွေ 150-800 IU နဲ့ လူကြီးတွေ 400 UL လိုနိုင်တယ်။ ဖေါလစ်အက်စစ်ကို ကိုယ်ဝန်မယူခင် ၃ လကတည်းကနေစသောက်သင့်တယ်။ တနေ့မှာ 400 micrograms သောက်ပါ။ တကယ်လို့ သင့်မိသားစုထဲမှာ မွေးရာပါချို့ယွင်းချက်နဲ့ မွေးဘူးတဲ့ရာဇဝင်ရှိနေရင် 4000 micrograms အထိပေးနိုင်တယ်။

အားနည်းချက်တွေလဲသိဘို့လိုတယ်။ Folic acid ဆေးပေးလို့ ဗီတာမင် ဘီ ၁၂ နည်းတာကို ဖုံးနေစေတတ်တယ်။ များရင် ငှက်ဖျားဆေးပေးတာကို သက်ရောက်စေတယ်။ ငှက်ဖျားဖြစ်ရာနေရာက ၅ နှစ်အောက် ကလေးတွေပေးလို့ Iron-folic acid အားဆေးပေးတာ အသေအပျောက် ပိုများတာတွေ့ရတယ်။

ပဲနဲ့ အစိမ်းရောင်ဟင်းသီးဟင်းရွက်တွေထဲမှာ ဖောလစ်အက်စစ်ပါနေတယ်။ လိမ္မော်သီးတလုံး = 54mcg; ကြက်ဥပြုတ်တလုံး = 22mcg; သင်္ဘောသီး အလတ်စားတလုံး = 115mcg; ပဲပြုတ် တခွက် = 280 mcg; ဟင်းနုနွယ်ရွက် တခွက် = 260 mcg; ထမင်းဖြူ 3/4 cup = 60mcg; ခရမ်းချဉ်သီးရည် 1 cup = 50mcg; ခေါက်ဆွဲပြုတ် 1 cup = 160mcg ပါတယ်။ အစာထဲက (ဖေါလစ်-အက်စစ်) ကို မပျက်စီးအောင် နူးနပ်သွားအောင် မချက်ပြုတ်သင့်ဘူး။

အသီးအရွက်စားတာကနေ ကင်ဆာကိုကာကွယ်နိုင်တယ်ဆိုတာဟာ လိုတာထက် ပိုပြောနေတယ်လို့လဲ နောက် လေ့လာမှုတွေက ထောက်ပြလာတယ်။ (ဖေါလစ်အက်စစ်) က ရင်သားကင်ဆာနဲ့ အူမကြီးကင်ဆာတွေအတွက် ကောင်းတယ်လို့ အဲဒီသုတေသနက ဆိုလာတယ်။

ကိုယ်ဝန်နဲ့ သန်ချဆေး
သြစတေးလျမှာ ကိုယ်ဝန်မဆောင်မီ တလကစပြီး သန်ချဆေးမသောက်ဘို့ လမ်းညွှန်ထားတယ်။ ယူအက်စ်အေမှာ ကိုယ်ဝန်ဆောင်နေတုန်း မသုံးမဖြစ်မှသာသုံးပါလို့ အကြံပြုထားတယ်။ WHO ကတော့ သုံးနိုင်ပါတယ်လို့ဆိုတယ်။ ဒါပေမယ့် ကိုယ်ဝန်ရင့်မှသာ သုံးပါလို့လည်းဆိုတယ်။ ပဌမ ၃ လမှာ မသင့်ပါ။

Ascariasis, Hookworm, Enterobiasis, Trichostrongyliasis, Capillariasis and moderate T. trichiura သန်ကောင်းအမျိုးမျိုးအတွက်သုံးတယ်။ အသက် ၂ နှစ်အထက် Albendazole 400 mg တကြိမ်တည်းပေးပါ။ Strongyloidiasis and heavy T. trichiura တွေဆိုရင် ၃ ရက်ပေးတယ်။

Albendazole နဲ့ Mebendazole သန်ချဆေးကို မိခင်ကသောက်ရင် နို့ရည်ထဲမှာနည်းနည်းတော့ ရောက်တယ်။ အစာလမ်းကနေစုပ်ယူတာ အလွန်နည်းတယ်။ ဒါကြောင့် နို့တိုက်မိခင်သောက်လို့ စိုးရိမ်စရာမရှိပါ။ နောက်တကြိမ် သောက်စရာလိုရင်တော့ ၃ ပါတ်နေမှသာသောက်သင့်တယ်။

Dr. တင့်ဆွေ

Comments

Popular posts from this blog

ကျန်းမာခြင်းသည် လာဘ်တပါး

Furamin BC သံဓါတ်အားဆေး