Reliable ယုံကြည်ရလောက်သော
ကျွန်တော့်ကို တချို့နေရာတွေမှာ ယုံကြည်နိုင်တာမှန်တယ်။ နယ်ပယ်အစုံ မဟုတ်ပါ။ တချို့အရာတွေကိုလည်း စိတ်ချထားနိုင်တာမှန်ပါတယ်။ အရာတိုင်းမှာမဟုတ်ပါ။ အားကိုးစရာတချို့လည်းရှိတယ်။ အကုန်မဟုတ်ပါ။ မှိခိုလို့လည်း တစိတ်တပိုင်းရမှာပါ။ အမြဲမဟုတ်ပြန်ပါ။
မနေ့ကပဲ Alprazolam အယ်လ်ပရာဇိုလမ် စိတ်ရောဂါဆေးစာကို တင်တယ်။ ကွန်မင့်မှာ အမေရိကန်ပြည်ထောင်စု ပြည်နယ်တခုမှာ စိတ်ရောဂါအထူးကုလုပ်နေတဲ့ မြန်မာပြည်ကဆရာဝန်တဦးကနေ ကွန်မင့်မှာ ရေးလာပါတယ်။ ကျွန်တော့် စာထဲမှာရေးထားသလို အဲဒီဆေးကို စိတ်ကျရောဂါအတွက် အမေရိကမှာ မပေးတော့ပါ။ မြန်မာပြည်ကလူတွေကို ပညာပေးတာ သတိထားသင့်ပါတယ်တဲ့။
အဲတာနဲ့ ကျွန်တော်လည်း ကိုယ့်စာကိုပြန်စစ်တယ်။ အကိုးအကားယူထားတဲ့ အင်တာနက် လင့်ကို ရှာပါတယ်။ လင့်မှာ ကျွန်တော်ရေးထားတဲ့အတိုင်း အတိအကျပါလို့ အဲဒီဆရာဝန်ဆီ (ချတ်) ကနေသာ စာပြန်ရေးလိုက်ပါတယ်။ ကျွန်တော်ယူတဲ့ ဝဘ်ဆိုက်က နှယ်နှယ်ရရ မဟုတ်ပါ။ သူ့ဆီက စာပြန်လာတယ်။ အင်တာနက်က စိတ်မချရကြောင်း၊ သူတို့ဆို ဂျာနယ်တွေကနေယူရကြောင်း၊ အဲတာလည်း တချို့က မဟုတ်သေးကြောင်း။ သူရေးတဲ့အတွက် ဆောရီးဖြစ်ပါကြောင်း။
ဆေးပညာဆိုတာ အစဉ်အမြဲ တိုးတက် ပြောင်းလဲနေပါတယ်။ တသမတ်တည်း အသေယူထားလို့မရပါ။ ကျွန်တော်က ဆေးပညာရိုးရိုးဘွဲ့လေးတခုသာရတယ်။ မေးကြတာတွေကအစုံ။ အဲတော့ အကိုးအကားတွေလိုက်ရှာဖတ်ရတယ်။ လက်လှမ်းမီတာတွေကို ဆန်ခါတင်ပြီး စာတွေရေးရ ဖြေရတယ်။ ရောဂါအမည်တူပေမယ့် လူတဦးနဲ့တဦး မတူတဲ့သဘောကိုပါ ထောက်ပြပါတယ်။ ခုခေတ်မှာ (ပါဇင်နယ်လိုက်) ဆေးပေးနည်းတွေ ပေါ်လာတယ်။ ဆိုလိုတာက သူတဦးတည်းအတွက် အသင့်တော်ဆုံးဖြစ်တာကို ရွေးတာပါ။
မြန်မာစာနဲ့ထုတ်တဲ့ ကျန်းမာရေးစာအုပ်တွေ (ကျွန်တော်ရေးတာ အပါအဝင်)၊ ဂျာနယ်တွေ၊ ဖေ့စ်ဘွတ်ကွန်မင့်ကနေ ဆေးနည်းပေးတာတွေ၊ အရပ်ထဲ ဟိုလူပြော သည်လူပြောနည်းတွေကို လွယ်လွယ်လေးနဲ့ မျက်စိမှိတ်ယူတဲ့ အကျင့်ကို ပြင်သင့်ကြပါတယ်။
ကျွန်တော့်ဓါတ်ပုံက ပြုံးနေလို့တော့ (ချီးယားဖူးလ်) ဖြစ်ကောင်း ဖြစ်နေမယ်၊ တချို့နေရာတွေမှာ (ရီလိုင်းရေးဘဲလ်) မဖြစ်လောက်ပါ။ ဆောရီး။ ကျွန်တော့်ထက် တော်တဲ့ တတ်တဲ့ဆရာဝန်တွေကို အားကိုးနိုင်ကြပါစေ။
ဒေါက်တာတင့်ဆွေ
၁၃-၁၂-၂ဝ၁၅
၁၃-၁၂-၂ဝ၁၆
Comments
Post a Comment