Blind men and an elephant ဆင်နဲ့ မျက်မမြင်ခြောက်ယောက်
ကွန်မင့်တခု = မျက်မမြင်ခြောက်ယောက်အကြောင်း ကျွန်တော်မသိ၍ တင်လို့ရ တင်ပေးပါဆရာ။
မျက်မမြင်ခြောက်ယောက်နဲ့ ဆင်ပုံပြင်ကို လူတိုင်းကြားဖူး ဖတ်ဖူးကြမှာပါ။ မျက်မမြင်ပုဏ္ဏားခြောက်ယောက်လို့သာ သိကြမယ်ထင်တယ်။ မှန်နိုင်ပါတယ်။ ဒါမှမဟုတ် နီးစပ်တယ်။ ပုံပြင်မူရင်းက အိန္ဒိယတိုက်ငယ်ကနေလာတယ်။ ဟင်ဒူဘာသာ၊ ဗုဒ္ဓဘာသာ၊ ဂျိန်းဘာသာ၊ ဘဟိုင်းယီးဘာသာတွေမှာလည်း မူကွဲပုံပြင်ကိုယ်စီ ရှိကြတယ်။ မြန်မာပြည်မှာက ရှေးပုံပြင်တွေထဲမှ ပုဏ္ဏားလို့သုံးလေ့ရှိတယ်။ ဒီပုံပြင်ဟာ ဥရောပတိုက်ထိရောက်တယ်။ ၁၉ ရာစုမှာ အမေရိကန်ကဗျာဆရာ (ဂျွန် ဂါ့ဖရိ ဆက်ဆီး) က သူ့ကိုယ်ပိုင်မူနဲ့ဖွဲ့တယ်။
မကြာခင်က ကျွန်တော်စာကူသင်နေတဲ့ကျောင်းမှာ အဲဒီပုံပြင်ကိုသင်တယ်။ အဲတာမှာ ပုဏ္ဏားတွေမဟုတ်ပါ။ ဆင်လို့တောင် မရေးပဲ (ဘိ့စ်) တောကောင်ကြီးလို့ ရေးထားတယ်။ တောင်းစားသူတွေတဲ့။ မျက်မမြင်တွေ စမ်းတွေ့ကြတဲ့ အကောင်ကြီးရဲ့ အင်္ဂါအစိတ်အပိုင်း ခြောက်မျိုးကတော့ တူပါတယ်။ နားရွက်ဟာ (ဖင်န်) နဲ့ တူတယ်ဆိုတော့ အဲတာကို ပန်ကာမှတ်တဲ့ ကျောင်းသားက မှတ်တယ်။ Smile!
နှာမောင်းစမ်းမိသူက မြွေလို့ထင်တယ်။ အစွယ်စမ်းသူက လှံထင်တယ်။ အမြီးစမ်းသူက ကြိုးတဲ့။ ကိုယ်ခန္ခာကြီးစမ်းသူက နံရံတဲ့။ ခြေထောက်စမ်းမိသူက သစ်ပင်။ တယောက်တမျိုး ထင်မြင်မှတ်ယူကြတယ်။ သူပြောတာသာမှန်၊ သူများပြောတာ လက်မခံ။ အငြင်းသန်ကြတယ်။ ရန်တွေဖြစ်ကြတယ်။ ကျွန်တော်တို့ပုံပြင်မှာ အဲတာနဲ့ အဆုံးသတ်တယ်။
အမေရိကန်ဗားရှင်း ပုံပြင်မှာ ဆင်မဟုတ်ပေမဲ့ သင်္ခန်းစာပေးတာတော့ သဘောကျတယ်။ မျက်မမြင်တွေ တယောက်နဲ့ တယောက် သူတို့စမ်းတွေ့တာကိုသာ အမှန်ယူပြီး ငြင်းခုန်ရန်ဖြစ်ကြသလို၊ ကျွန်တော်တို့မျက်စိမြင်သူတွေဟာလည်း ကိုယ်မှန်တယ်ထင်တာကို အလျော့မပေးပဲ ငြင်းခုန်ကြတယ်။ ရန်ဖြစ်ကြတယ်။ စစ်ဖြစ်ကြတယ်။
ဒေါက်တာတင့်ဆွေ
၁-၂-၂ဝ၁၇
Comments
Post a Comment