Greece ဂရိ နဲ့ ဂရိစ်
သူငယ်ချင်း ဆရာဝန်အတွဲ ဂရိကိုသွားလည်နေကြတယ်။ ဖရင်းတယောက်ကလည်း ရေးတယ်။ လူဦးရေ ၅ဝဝ ကျော်ဘဲ နေထိုင်တဲ့ ဂရိတောင်ထိပ်က Olympos မြို့လေးကိုသွားရတာ မြင့်သထက် မြင့်လာလေလေ သက်ရှုမဝလေလေတဲ့။
ကျွန်တော်လည်း ဂရိနိုင်ငံကို ရောက်ဖူးတယ်။ အထင်ကရနေရာတွေကိုတော့ မရောက်ခဲ့ရပါ။ ပြည်ပနိုင်ငံရေးတာဝန်အရ ဟိုနိုင်ငံသည်နိုင်ငံတွေရောက်တိုင်း ဆိုက်ဆင်း ခေါ် လည်ပတ်ကြည့်ရှုတာ အလွန့်အလွန်ရှားတယ်။ မရောက်ခဲ့ရတာ နစ်နာမှန်းသိတော့တယ်။ ရောက်ဖူးရင် ရေးစရာတွေကများမယ်။
ဂရိစ်နိုင်ငံကို ဟယ်လင်းနစ်သမတနိုင်ငံလို့ခေါ်ပါတယ်။ ဟယ်လာဆိုတာ ရှေးဟောင်းဂရိ ဖြစ်တယ်။ (၈) ရာစုကစပြီး လွတ်လပ်တဲ့သီးခြားမြို့ပြနိုင်ငံလေးတွေကို ပိုးလစ်လို့ခေါ်တယ်။ ကျွန်တော်အခုနေရတဲ့ အင်ဒီယာနာပလစ်မြို့မှာ ဂရိပြတိုက်ရှိတယ်။ ရောက်ပါတယ်။
မြို့တော်အေကိုသာ နှစ်ခေါက်ရောက်ပါတယ်။ သွားလာရတဲ့နေရာတိုင်းမှာတော့ ဖတ်ဖူးထားတဲ့ ဂရိမိုင်သော်လော်ဂျီ ခေါ် ဒဏ္ဍာရီတွေထဲက ဇာတ်လမ်းဇာတ်ကွက်တွေကို မြင်နေမိတယ်။ မြေထဲပင်လယ်ရေပြင်ထဲမှာ လှေကြီးတွေ၊ ဒိုင်းတွေနဲ့ သူရဲကောင်းတွေ၊ ခမောက်ဆောင်းထားကြတဲ့ စစ်သားတွေက ကိုယ်ကြပ်အင်္ကျီတွေနဲ့၊ လက်ထဲမှာ ဓါးတွေ၊ လှံတွေနဲ့။ ဂလက်ဒီယေတာ၊ စပါးတားကပ်စ်၊ အေသင်၊ ရောမ၊ ခေါမ့့
အာချီးလိစ်ခြေဖနောင့်ကို ခန္ဓာဗေဒသင်ရကတည်းကသိတယ်။ ထရွိုင်စစ်ပွဲကိုတော့ အပြင်စာတွေဖတ်မှသိတယ်။ ဟိုးမား ရေးဖွဲ့ခဲ့တဲ့ အိလိယဒ် နဲ့ အိုဒက်ဆေး ခေါ်မဟာကဗျာရှည်ကြီးတွေထဲက ဇာတ်ကောင်တွေ၊ ဇီးယပ်စ်နတ်မင်းကြီး၊ နတ်တွေ၊ နတ်မင်းသမီးတွေ၊ လူစွမ်းကောင်းတွေ၊ ဗီလိန်တွေ၊ အမျိုးအမည်မသိတဲ့ သတ္တဝါကောင်တွေ။့့
အိုလံပစ်ပွဲတော်က ဂရိကနေလာတယ်။ ဒီမိုကရေစီလည်း အဲဒီကပဲ။ ဆေးပညာဝေါဟာရတွေထဲမှာလည်း ဂရိ-လက်တင် စာလုံးတွေ အများကြီးပါတယ်။ ဟစ်ပိုကရေးတီးစ်ရဲ့ သမားကျင့်ဝတ်ရွတ်ဆိုရတဲ့အကြောင်း ရေးထားတယ်။ ဆေးပညာသင်္ကေတစာထဲမှာ အက်စ်ကလိပီးယပ်စ်ရဲ့ ဆားပင့် ခေါ် မြွေရစ်ပတ်နေတဲ့တောင်ဝှေး ရေးထားတယ်။
ဗီးနပ်စ်က သောကြာဂြိုဟ်၊ အချစ်နတ်သမီး။ အချစ်ကနေဆက်ဖြစ်တဲ့ရောဂါတွေကို အချစ်နဲ့ဆိုင်သော ရောဂါများလို့ ခေါ်တယ်။ ကျွန်တော်တို့က ကာလသားရောဂါလို့ ခေါ်ခဲ့ကြတာ မမှသမီးတွေမှာလည်း ဖြစ်ကြတယ်။
ဟိုင်ဂျီယာနတ်သမီးက သန့်ရှင်းရေးနဲ့ဆိုင်တယ်။ တကိုယ်ရေသန့်ရှင်းရေးကို ပါဇင်နယ်ဟိုက်ဂျင်းလို့ခေါ်တယ်။ အမျိုးသမီးတွေအတွက် စာတပုဒ်ရေးထားတယ်။
ပုံ = Hygieia ဟိုက်ဂျီယာ နတ်သမီး
ဒေါက်တာတင့်ဆွေ
၁၆-၄-၂ဝ၁၇
Comments
Post a Comment