Language Arts ဘာသာစကား အနုပညာ

ကွန်မင့်ကို ပေါ့တန်တန်ရေးသူတွေရှိသလို လေးလေးနက်နက်ရေးသူတွေလည်း ရှိပါတယ်။ ကျေးဇူး။

Slang ဗန်းစကား (ဘန်းစကား) အောက်က ကွန်မင့်တချို့
• အရမ်းဆိုတဲ့ ကြိယာဝိသေသနကလည်း မကောင်းတဲ့အဓိပ္ပါယ်မှာဘဲ သုံးတာလို့ သိထားပါတယ်။ ဥပမာ အရမ်းညံ့တယ်။ အရမ်းဆိုးတာပဲ။ အရမ်းကာရောပဲ။ အခုခေတ်မှာတော့ အရမ်းကောင်း၊ အရမ်းကြိုက်၊ အရမ်းတော်နဲ့ တပြည်လုံး ရမ်းနေပါတော့တယ်။ နောက်တခုက လုံးဝဆိုတာကလည်း အငြင်းဝါကျမှာသာ သုံးသည်ဟု မှတ်ယူထားပါသည်။ ဥပမာ မိမိတို့နှင့်လုံးဝမပတ်သက်ကြောင်း၊ မိမိတို့လည်း လုံးဝမမြင်ဖူး၊ ယခုအခါတွင် လုံးဝကို အားလုံး အလွန်ဆိုသောသဘောနှင့် သုံးနေကြပါသည်။ လုံးဝကြိုက်တယ်၊ လုံးဝ တာဝန်ယူတယ်ဟု သုံးနှုန်းနေကြပါသည်။

• ဆရာက ဗန်းစကားများကို ဆွေးနွေးပါသည်။ ကျွန်မကတော့ မြန်မာစကားလုံး အဓိပ္ပါယ်ရင်းမြစ်များ တိမ်ကော ပျောက်ကွယ်လာခြင်းကို ဝမ်းနည်းနေကြောင်း ပြောချင်နေမိပါတော့သည်။ မိုက်တယ်ဆိုသော စကားလုံးကို သုံးလာကြသောအခါ မကောင်းသည့်အဓိပ္ပါယ်ဖြစ်ကြောင်း သတင်းစာမဂ္ဂဇင်းများတွင် ရေးသား သတိပေးကြသော်လည်း၊ ယခုအချိန်တွင် အများညီ၍ ဤ ကျွဲ ဖြစ်နေချေပေပြီ။ တနိုင်ငံလုံး တမိုက်တည်း မိုက်နေကြတော့လေသတည်း။ (မိုက်ပါ့ကွာဆိုပြီး ကျွန်တော် ဒေလီမှာနေစဉ်က အတော်သုံးခဲ့ပါတယ်။ အခုနည်းလာပါပြီ။)

• ကြားလိုက်တိုင်းစိတ်ထဲ ကသိကအောက်ဖြစ်ဖြစ်သွားသော စကားလုံးမှာ ဆော့ဖြစ်သည်။ ဆော့လည်း မိုက်လိုပင်၊ မနှစ်မြို့သည့်အဓိပ္ပါယ် အနေနှင့်သာသုံးပါသည်။ သိပ်ဆော့တဲ့ကလေးတွေ တချိန်လုံး ဆော့နေတော့တာပဲ၊ မျောက်ရှုံးအောင်ဆော့တယ်စသည်ဖြင့်ဆိုပြောကာ မြည်တွန်တောက်တီးကြပါသည်။ ကျွန်မတို့ကလေးများကတော့ ကစားကြစို့ စိန်ပြေးတမ်းကစားမယ်ဟေ့။ ကစားကျောင်းဆင်းရင်စသည်ဖြင့်သာ ပြောကြပါသည်။ ယခုတော့ ကလေးအားလုံးက ဆော့မယ်၊ ဂိမ်းဆော့နေတယ် စသည်ဖြင့်သာပြောကြပြီး ကစား ကိုလုံးဝ မသုံးတတ်ကြသလောက်ပါ။ ကျွန်မနားလည်သည်မှာ ဆော့သည် အငြိမ်မနေခြင်းသာဖြစ်သည်။ လက်အငြိမ်မနေ ခြေအငြိမ်မနေ လက်ဆော့ခြေဆော့နဲု့ဟူ၍ သုံးခဲ့ကြသလို မသိမသာ အလစ်သုတ် ခိုးတတ်ခြင်းကိုလည်း လက်ဆော့တတ်တယ်ဟု သုံးခဲ့ကြပါသည်။ ခုတော့ တိုင်းတပြည်လုံး တဆော့တည်း ဆော့နေကြပါတော့သည်။

Spelling errors လူတွေသတ်ပုံအောက်က ကွန်မင့်တချို့
• ဆရာရေ ဒီနေ့ဂျာနယ်တွေမှာ စာလုံးပေါင်းသတ်ပုံအမှားတွေ ရေးထုံးအမှားတွေက မိုးမွှန်နေတာပါ။ အချို့ ဆောင်းပါးတွေမှာဆိုရင် အကြောင်းအရာကပါ မှားနေတတ်ပါသေးတယ်။ ဥပမာ ကုလားပြည်ကို ထွက်ပြေးတဲ့မင်းကို ကုလားကျမင်းလို့တွင်ခဲ့ပြီး၊ တရုတ်ပြည်ကို ထွက်ပြေးတဲ့မင်းကို တရုတ်ပြေးမင်းလို့ တွင်ခဲ့ပါတယ်လို့ ဆောင်းပါးထဲမှာဖတ်လိုက်ရတာ ဆရာရယ်။ ပါးစပ်အဟောင်းသားနဲ့ ဘာပြောရမှန်းကို မသိတော့ပါဘူးဆရာ။

• စာရိုက်ကြတာကတော့ အများနားလည်လွယ်ပြီး မြန်မြန်ရောက်စေချင်လို့ရယ်၊ ထွင်တာရယ်၊ သိသိနဲ့ ရိုက်ကြတာများပါတယ်။ ဟုတ်ပါသည်၊ စာပေယဉ်ကျေးမှု တခု (များ) သည် မသည်သူစခဲ့သည်မသိပါ၊ အဓိပ္ပါယ်ရှိပြီး၊ အကျိုးရှိသောကြောင့် လိုက်ပြီးသုံးစွဲသူများ ဆက်လက်ရှိလာကာ အချိန်ကြာမြငိ့သောအခါ ရှိပြီးသား ယဉ်ကျေးမှုတခုကဲ့သို့ဖြစ်လာပါသည်။ တချို့ယဉ်ကျေးမှုမှားမှာလည်း ပြောင်းလဲသုံးစွဲခြင်း ခံရပါသည်။ အစဉ်သုံးစွဲသွားသည်လည်းရှိပါသည်။ အများကသုံးလာလျှင် လက်ခံရပါမည်။ အသိအမှတ်ပြုရပါမည်။ ဥပမာ ကျနော်ကိုယ်တိုင် ငယ်တုံးက လေထွားသည်ကို အာလူးပေးသည်ဟု ဗန်းစကားအနေနဲ့ အတော်ကြာ သုံးဘူပါသည်။ ယခုတိုင် ယံဖန်ယံခါ (ရံဖန်ရံခါ လို့ပြင်ပါရစေ) သုံးတတ်ကြပါသည်။ အင်္ဂလိပ်စာတွင်လည်း နှစ်စဉ် စာလုံးအသစ်များ ထွက်ပေါ်လျှက်ရှိနေသည်ကိုသတိပြုမိပါသည်။ ဥပမာ email, facebook, google it, infomercial စသည်ဖြင့် သိသမျှသာ (မတတ်ပါ) ဖြစ်ပါသည်။

• စကားပြောနဲ့အမေးတွေမှာ (လဲ) အစား (လည်း) ကိုသုံးနေတာလဲ သဘောမတွေ့ပါဘူး။ မြန်မာသတ်ပုံဟာ ခုထိ အတည်တကျမရှိသေးတဲ့ မြန်မာနိုင်ငံ။ (ကျွန်လည်း မကြာမကြာမှားပါတယ်။ သိတော့ပြန်ပြင်ပါတယ်။)

Mistakes and Blunders အမှားတွေပြင်ကြအောင်အောက်က ကွန်မင့်တချို့
• မှားနေတာကို သည်အတိုင်းကြည့်မနေချင်တဲ့ (နိုင်ငံရေးဗီဇက) မနေနိုင်ပါဗျာ။ အဲဒီစာကို တမျိုးပြင်ရေးရင် အမှန်တရားရဲ့ တမန်တော်တယောက်လို့ရေးရင် ရမလား။ (တရုပ်သိုင်းစကားကို ဆီလျှော်အောင် ပြန်ပေးလိုက်ပါသည်။)

• ဆရာမကြီးဒေါ်ခင်မျိုးချစ်ပြောသလို ဒီကနေ့လူငယ်တွေ မြန်မာစာ မြန်မာစကားကို ဆရာယုဒသန်ထံက ပြန်ပြီးသင်ယူသင့်တယ်။ တကယ်တော့ မြန်မာစာ မြန်မာစကား ရေစုန်မျောခဲ့တာ ကြာပါပြီ။

ကျွန်တော် ၂ဝဝဝ ဧပြီ၊ ဂျော်ဒန်နိုင်ငံ အာမန်မြို့တော်မှာ ကျင်းပတဲ့ အပြည်ပြည်ဆိုင်ရာ လွှတ်တော်များသမဂ္ဂ အစည်းအဝေးကိုသွားပြီး၊ အကျဉ်းကျနေရတဲ့ မြန်မာလွှတ်တော်ကိုယ်စားလှယ်များအရေး တင်ပြခဲ့ရတယ်။ ကွန်ဖရင့် တခုမှာ ဂျော်ဒန်ဘုရင် အဘဒူလာ မိန့်ခွန်းပြေတာလဲ တက်ပြီး နားထောင်ခဲ့ရတယ်။ ကျွန်တော်နဲ့အတူ အမေရိကန် ကွန်ဂရက်မင်းဟောင်း တွမ် အင်ဒရူးလဲပါတယ်။ သူကပြောတယ် ဂျော်ဒန်ဘုရင့် အင်္ဂလိပ်စကားက သူ့ထက် ကောင်းတယ်တဲ့။

ဒေါက်တာတင့်ဆွေ
၂၃-၁-၂ဝ၁၇

Comments

Popular posts from this blog

ကျန်းမာခြင်းသည် လာဘ်တပါး

Furamin BC သံဓါတ်အားဆေး