Contraceptive Implant ကိုယ်ဝန်တားဆေးချောင်းနဲ့ လက်မောင်း
မရတော့ မရှိပါ။ အကျိုး နဲ့ အပြစ် ချိန်ဆရတယ်။ ပိုကောင်းတာလည်းရှိနိုင်။ သတိပိုထားစရာလည်းရှိနိုင်ပါတယ်။
ဥပမာ Nexplanon ဆိုတာ ၄ စက်တီမီတာရှည်တယ်။ ကွေးနိုင်ဆန့်နိုင်လို့ ထည့်ထားပြီး ကိုယ်လက်လှုပ်ရှားရင် ထိခိုက်မှု မရှိစေပါ။ တကမ္ဘာလုံးမှာ ဘယ်ဖက်လက်မောင်းအတွင်းဖက်မှာ ထည့်ထားကြတယ်။ သုံးနှစ်တခါ အသစ်လဲပေးရမယ်။ အမာရွတ်လည်း မသိသာ။ ချုပ်ရိုးမပါ။ အရုပ်မဆိုးပါ။
မွေးလာတဲ့ကလေးတိုင်းကို အရင်ဆုံးထိုးစေတဲ့ကာကွယ်ဆေးက BCG ခေါ် တီဘီကာကွယ်ဆေးဖြစ်တယ်။ စစ်ဆေးရာမှာ လွယ်ကူပြီး စနစ်ကျအောင် ဘယ်ဖက်လက်မောင်းမှာထိုးပေးတယ်။ အမာရွတ်ကလေးတွေထင်နေမယ်။ အဲတာ ဆေးအောင်တာလို့ အရပ်ပြောပြောကြတယ်။
အရင်က ကျောက်ကြီးရောဂါ မြန်မာပြည်အပါအဝင် တကမ္ဘာလုံးမှာ လူတွေသေဆုံးတဲ့အထိ ကပ်ရောဂါဖြစ်ခဲ့တယ်။ ကျောက်ဆေးခေါ် ကာကွယ်ဆေးပေါ်လာတယ်။ နိုင်ငံတိုင်းမှာ ကျောက်ကြီးရောဂါပပျောက်ရေး စနစ်တကျလုပ်လို့ အခုဆိုရင် တကမ္ဘာပေါ်ကနေ ပျောက်ကွယ်သွားပြီ။ ကျောက်ကြီးရောဂါ ဖြစ်ပြီး အသက်မသေသူတွေမှာ တသက်လုံးအမာရွတ်ထင်ကျန်ရင်တယ်။ ကျောက်ပေါက်မာခေါ်တယ်။ ကျောက်အိုး၊ ကျောက်ဖြုံး၊ မင်းကုသ၊ မယ်ကုသ စသဖြင့် ပြောင်ခေါ်လေ့ရှိကြတယ်။
ကျောက်ရောဂါကာကွယ်ဆေးထိုးတဲ့ အမာရွတ်ကလည်း တသက်လုံးထင်နေတယ်။ အမာရွတ် နှစ်ခုကို လက်မောင်း အပြင်မှာမြင်နေရတယ်။ အမာရွတ်မတွေ့သူကို ကာကွယ်ဆေးထိုးစေတယ်။
အဲဒီခေတ်မှာလည်း အခုခေတ်လို မလှချင်တွေရှိတယ်။ အမာရွတ်ကို လူမမြင်စေချင်ကြဘူး။ ကာကွယ်ဆေးကလည်း မထိုးမဖြစ်။ ကြံဆကြတယ်။ လှချင်လွန်းသူတွေက အတိုအပြတ်ဝတ်တတ်တယ်။ တိုတာကလည်း ဘီကီနီ။ ရေကူးဝတ်စုံ ရိုးရိုးထက် တိုပြတ်သေးတယ်။ နောက်ဆုံးမှာ လိုလျှင်ကြံ နည်းလမ်းရသွားတယ်။ ဘီကီနီဖုံးထားတဲ့နေရာမှာ ကာကွယ်ဆေးထိုးတယ်။ Smile!
ကိုယ်ဝန်တားဆေးချောင်းလေးကို လက်မောင်းအတွင်းဖက်မဟုတ်တဲ့နေရာမှာ ထည့်ရင်ဘယ်လိုနေမလဲ။ ဘာအကျိုးရှိမလဲ။ လေ့လာဆန်းစစ်မှု မတွေ့သေးပါ။ အသားဆေးထိုးသလို တင်ပါးထိုးတာနဲ့ လက်မောင်းထိုးတာ။ ကလေးငယ်လေးတွေ ပေါင်မှာထိုးတာ အတူတူသာဖြစ်တယ်။ အကျိုးအကြောင်းရှိတယ်။ အသေးစိတ်တွေ မရေးတော့ပါ။ ကိုယ်ဝန်တား အရေပြားအောက်ထားရတဲ့ ဆေးချောင်းကိုတော့ ဘီကီနီဝတ်တဲ့နေရာကို မစဉ်းစားလောက်ကြလို့ ထင်ပါတယ်။ Smile!
ဒေါက်တာတင့်ဆွေ
၃ဝ-၅-၂ဝ၁၇
Comments
Post a Comment