Ashoka သူများမင်း ကိုယ့်မင်းမဟုတ်

မြန်မာပြည်မှာ ဗုဒ္ဓဘာသာဝင်ဦးရေက အလွန်များတယ်။ မြန်မာစာပေထဲမှာလည်း ဗုဒ္ဓဝင်စာတွေများတယ်။ ကဗျာတွေ၊  သီချင်းတွေ၊ ဇာတ်တွေနဲ့ ရုပ်ရှင်တွေမှာလည်း လွှမ်းမိုးပါတယ်။ လူကြီးသူမဆုံးမစကားတွေထဲမှာလည်းပါတယ်။ တချို့ အမှတ်လွဲနေကြတာတွေရှိတယ်။

တချို့က အသောကမင်းလို့ရေးတယ်။ တချို့က အာသောကမင်းလို့ရေးတယ်။ အဲဒီဘုရင်စိုးစံခဲ့တဲ့ အိန္ဒိယမှာ Ashoka လို့ ရေးတယ်။ အသံထွက်က အရှောက ဖြစ်တယ်။ မြန်မာ့စွယ်စုံကျမ်းမှာ သီရိဓမ္မာသောကမင်းလို့ ရေးတယ်။ သာသနာပြု မင်းကြီးက မြန်မာပြည်က မဟုတ်ပါ။ ဒေလီမြို့က အရှောကလမ်းမကြီးပေါ်မှာ အခေါက်ပေါင်းများစွာ သွားလာခဲ့ရပါတယ်။

သြရိသဟာ ပါဠိမဟုတ်ပါ။ အိန္ဒိယနိုင်ငံတောင်ပိုင်းက ပြည်နယ်တခုကို Odisha သြရိသလို့ ခေါ်တယ်။ အသံထွက်က အော်ရိသျှလို့ထွက်တာက နီးစပ်တယ်။ အရင်က Orissa လို့ခေါ်တာကို ပြောင်းလိုက်တာ။ ဘင်္ဂလား ပင်လယ်ကမ်းခြေမှာ ရှိတယ်။ ကာလင်္ဂမင်းဆက်စိုးစံခဲ့ရာဖြစ်တယ်။ မောရိယဧကရာဇ် Ashoka အာသောက လာပြီး ထိုးဖေါက် သိမ်းပိုက်တာ ခံခဲ့ရတယ်။ Kalinga War ကာလင်္ဂစစ်ပွဲကြီးဆိုတာအဲတာပဲ။ 261 BCE ခုနှစ်မှာ စစ်ဖြစ်ကြတယ်။ ကလိင်္ဂစစ်ပွဲကြီးမှာ အာသောကဘက်က စစ်သည်တသိန်းကျော်နဲ့ ကလိင်္ဂစစ်သည်နဲ့ အရပ်သား တသိန်းခွဲသေဆုံးတယ်။ အလွန်ရက်စက် ကြီးကျယ်တယ်။ ဒါယာမြစ်ဘေးက ဒေါလီတောင်ကုန်းဟာ စစ်မြေပြင်ဖြစ်ခဲ့ပြီး၊ မြစ်ဟာ သွေးတွေနဲ့ လွှမ်းသွားတော့တယ်။ ကလိင်္ဂပြည်ဟာ စီးပွါးရေးဖွံ့ဖြိုးပြီး အနုပညာသည်တွေရှိတယ်။ အေးချမ်းတယ်။ ဥက္ကလာလို့လည်း ခေါ်တယ်။

ဂယာလား၊ ဂါယာလား မေးကြပါတယ်။ ပါဠိမှာ ဂယာ နဲ့ ဂါယာလို့ မပါ။ ဂါမ ခေါ် ရွာသာပါတယ်။ အိန္ဒိယကနေလာတဲ့ စာလုံးသာဖြစ်ပါတယ်။ အရင်ကတော့ မဇ္ဈိမဒေသလို့သာရေးကြတယ်။ ဘုရားပွင့်ရာနေရာကိုလည်း မဂဓတိုင်းလို့သာ ရေးသားကြတယ်။ နောက်မှာ သာသနာပြုနဲ့ ဘုရားဖူးခရီးစဉ်တွေအရ နိုင်ငံတကာအသုံးတွေကို သုံးလာကြရာကနေ ဂယာ သို့မဟုတ် ဂါယာကို သုံးလာတယ်။

အင်္ဂလိပ်လို Gaya လို့ရေးတယ်။ အိန္ဒိယနိုင်ငံ ဘီဟာပြည်နယ်မှာ ရှိတယ်။ ပတ္တနားမြို့နဲ့ ကီလိုမီတာ ၁ဝဝ အကွာမှာ။ ဗုဒ္ဓဘာသာ၊ ဟင်ဒူဘာသာနဲ့ ဂျိန်းဘာသာတို့အတွက် အမွန်အမြတ်နေရာတခု ဖြစ်တယ်။ မဟာယာနနဲ့ မဟာဘာရတ္ထလို စိတ်ကူးယဉ် အီပစ် ခေါ် ကဗျာရှည် စာရှည်တွေထဲမှာ ဇာတ်လမ်းတွေ ဆင်ထားတယ်။ ရာမ၊ လက္ခဏနဲ့ သီတာတို့ ဇာတ်လမ်းက အဲဒီမှာတဲ့။ အဲတာ ကျွန်တော်တို့ မူပိုင် မဟုတ်ပါ။

ဂါယာဟာ ဗုဒ္ဓဘာသာမှာ တကယ်ဖြစ်စဉ်တော် နေရာဖြစ်တယ်။ မြတ်စွာဘုရား သစ္စာလေးပါး ထိုးထွင်း သိမြင်တော်မူခဲ့တဲ့နေရာ ဗုဒ္ခဂါယာကို Bodh Gaya လို့ရေးတယ်။ မဟာဗောဓိစေတီနေရာကို Mahabodhi Temple complex လို့ရေးတယ်။ Gaya အမည်ရဲ့ ဇစ်မြစ်က Gayasur ခေါ် မကောင်းဆိုးဝါးကနေလာပါသတဲ့။ Asura လို့လည်း ခေါ်ပါသတဲ့။ ဟင်ဒူဘာသာ စာထဲမှာ ပါတာပါ။

ဂါယာဒေသဟာ မောရိယဧကရာဇ်လက်ထက် (321–187 BC) မှာ စည်ပင်ထွန်းကားခဲ့ပါတယ်။ Pataliputra ပါဋလိပုတ် ကိုပါ သိမ်းတယ်။ ကနေ့ ပတ္တနားဝန်းကျင်ဒေသဖြစ်တယ်။ Magadha မဂဓဒေသလို့လည်းခေါ်ပါတယ်။ ဂါယာဒေသ ရာဇဝင်မှာ မင်းဆက်တွေက တက်လိုက်ကျလိုက်။ ဘီစီ ၆ ရာစကတည်းက အေဒီ ၁၈ ရာစုအထိ ကြာတယ်။ မောရိယ ဧကရာဇ် Ashoka (272–232 BC) အာသောကမင်းကြီးက ဗုဒ္ဓဘာသာကို ပြန်လည်ထွန်းကားအောင် ဆောင်ရွက်ခဲ့တယ်။ အေဒီ ၄ နဲ့ ၅ ကြား Gupta ဂုပ္ပတားဘုရင်က ဟင်ဒူဘာသာကို ထွန်းကားအောင်လုပ်တယ်။ အေဒီ ၁၂ ရာစုထဲမှာတော့ Muhammad Bakhtiyar Khilji မိုဟာမက်ဘုရင်က သိမ်းယူတယ်။ ၁၇၆၄ မှာ အင်္ဂလိပ်ကသိမ်းတယ်။ ၁၉၄၇ မှာ အိန္ဒိယ လွတ်လပ်ရေးရတယ်။

Bodh Gaya ဗုဒ္ခဂါယာအသံထွက်နည်း https://www.pronounceitright.com/pronunciation/bodh-gaya-7404
ဗုဒ်ဂါးယာလို့ သံထွက်တယ်။

စာဏကျဆိုတာ အိန္ဒိယနိုင်ငံက အမတ်ကြီးဖြစ်ပါတယ်။ Chanakya ချာနကျလို့လည်း ခေါ်တယ်။ Kautilya နဲ့ Vishnu Gupta လို့လည်း ခေါ်ပါတယ်။ သူဟာ (c. 370–283 BC) တုန်းကပေါ်ထွန်းခဲ့တဲ့ အိန္ဒိယဘုရင့်သုခမိန်တဦးဖြစ်ပါတယ်။ ရှေးခေတ်တက္ကသီလာမှာ စီးပွါးရေးပညာပါမောက္ခဖြစ်တယ်။ တက္ကသီလာဟာ ကနေ့ ပါကစ္စတန်မှာရှိတယ်။ စာဏကျဟာ မောရိယအင်ပါယာ Chandragupta ချန္ဒရဂုပတားထံမှာ အမှုတော်ထမ်းတယ်။ နောက်မင်းဖြစ်တဲ့ Bindusara ဗိန္ဓုသာရ ဆီမှာလည်း ဆက်ပြီးတာဝန်ယူရတယ်။ ဗိန္ဓုသာရမင်းဟာ Ashoka အာသောကရဲ့ အမည်းတော်ဖြစ်ပါတယ်။

တခြားတိုင်းနိုင်ငံတွေကနေ ယူသုံးရတဲ့အမည်နာမတွေကို စာလုံးအဆင့်တွေ ပါဠိစာလုံးတွေနဲ့ ဘာသာပြန်ယူတဲ့အခါ အမှတ်မှားတတ်ကြတယ်။ သူများမင်းကို ကိုယ့်မင်းထင်တတ်ကြတယ်။ သူများရာဇဝင်ကို ကိုယ့်သမိုင်းလို့ ထင်တတ်ကြတယ်

ဒေါက်တာတင့်ဆွေ
၁၄-၁၂-၂၀၁၈

Comments

Popular posts from this blog

ကျန်းမာခြင်းသည် လာဘ်တပါး

Furamin BC သံဓါတ်အားဆေး