Luteinizing Hormone (LH) ဟော်မုန်းတမျိုး

ဆရာရှင့် ကျွန်မ ကလေးလိုချင်လို့ OG နဲ့ပြတော့ ရာသီလာအောင် ဆေးတိုက်ပြီး ရာသီ၂ရက်မြောက်နေ့မှာ FSH, LH, prolactin စတဲ့ hormone ဓာတ်တွေကိုသွေးစစ်ခိုင်းပါတယ်။ ကျန်တာတွေကပုံမှန်ဖြစ်ပေမဲ့ LHက များနေတယ်။ ovulation ရက်မဟုတ်ဘဲ သာမန်တောင် 18 လောက်ရှိလို့ များနေတယ် လို့ပြောပါတယ်။အခု ကျွန်မကို သားဥကြွေဆေး ပေးထားပါတယ်။ ovulation test နဲ့စမ်းရင် မျိုးဥမကြွေဘဲနဲ့ positive ဘဲ ပြနေလိမ့်မယ်။ TVS ရိုက်မှဘဲ ovulation ဖြစ်မဖြစ်သိနိုင်မယ်လို့ပြောပါတယ်။ ကျွန်မသိချင်တာကLH hormone ကဘာလို့များတာပါလဲ။balance ဖြစ်အောင် ဘာလုပ်ရပါသလဲ။

Luteinizing hormone (LH) ဆိုတာ ယောက်ျား-မိန်းမတိုင်းမှာရှိပြီး အရေးပါတယ်။ အရွယ်ရောက်ချိန်မှာမလုပ်လုပ်ပေးတယ်။ အမျိုးသမီးတွေမှာ ရာသီဖြစ်စဉ်နဲ့ သားသမီးရစေအောင်မှာလည်း အရေးကြီးတယ်။

ကလေးမရနိုင်သူတွေ၊ ရာသီမမှန်သူတွေ၊ အရွယ်စောပြီး အပျိုဖြစ်သူတွေ၊ အပျိုဖြစ်နောက်ကျသူတွေကို စစ်ခိုင်တယ်။
ဦးနှောက်အောက်ခြေမှာရှိတဲ့ ပစ်ကျူထရီနေရာလေးကနေထုတ်ပေးနေတယ်။ မိန်းမတွေမှာ ရာသီဖြစ်အောင် LH နဲ့ FSH ဟော်မုန်းနှစ်မျိုးကနေလုပ်ပေးနေတယ်။ FSH ဟော်မုန်းကနေ မျိုးဥအိမ်ထဲက ဖေါ်လီကယ်လ်တွေကို လှုံ့ဆောင်ပေးလို့ မျိုးဥထွက်စေတယ်။ နောက်အရးကြီးတဲ့ အီစထိုဂျင်ဟော်မုန်း ထွက်လာအောင်လည်းလုပ်သေးတယ်။ အီစထိုဂျင် လိုသလောက်တက်လာရင် FHS ဆတက်မထွက်တော့ဘူး။ LH တွေများလာမယ်။ အဲတာမှ မျိုးဥအိမ်ကနေ မျိုးဥ ထုတ်ပေးနိုင်တယ်။
ဘာမှမကျန်ရစ်တဲ့ဖေါ်လီကယ်လ်လေးတွေကနေ ကေားပတ်စ်လူတီယန်ဖြစ်ပြီး၊ ပရိုဂျက်စတီရုန်းခေါ် နောက်ဟော်မုန်းတမျိုးထုတ်ပေးပြန်တယ်။ အဲဒီဟော်မုန်းက ကိုယ်ဝန်မြဲဘို့မှာ အရေးပါတယ်။ ကိုယ်ဝန်မရှိရင်တေ့ အဲဒီ ပရိုဂျက်စတီရုန်းနည်းနည်းလာမယ်။
ယောက်ျားတွေမှာ LH ဟော်မုန်းက ကျားအစိကနေ တက်စတိုစတီရုန်းဟော်မုန်းထုစေဘို့ကူညီတယ်။
LH ဟော်မုန်းစစ်အဖြေများ
အမျိုးသမီး ရာသီ ဖေါ်လီကူလာအဆင့် = 1.9 to 12.5 IU/L
အမျိုးသမီး ရာသီလလယ် = 8.7 to 76.3 IU/L
အမျိုးသမီး ရာသီ ယူတီရယ်အဆင့် = 0.5 to 16.9 IU/L
အမျိုးသမီး ကိုယ်ဝန်ဆောင်ချိန် = 1.5 IU/L ထက်နည်း
အမျိုးသမီး သွေးဆုံးပြီး = 15.9 to 54.0 IU/L
အမျိုးသမီး တားဆေးသုံးနေချိန် = 0.7 to 5.6 IU/L
ယောက်ျား အသက် ၂ဝ-၇ဝ အတွင်း = 0.7 to 7.9 IU/L
ယောက်ျား အသက် ၇ဝ ကျော် = 3.1 to 34 IU/L

အမျိုးသမီးတွေမှာ LH များနေရင် မျိုးဥအိမ်မရှိသူ၊ အလုပ်ကောင်းကောင်းမလုပ်သူ၊ သွေးဆုံးသူ၊ PCOS မျိုးဥအိမ်မှာအကျိတ်လေးတွေရှိနေသူ၊ မျိုးဥအိမ်ကိုဓါတ်ကင်ထားသူ။

ယောက်ျားတွေမှာ LH များနေရင် ကျားအစိမရှိသူ၊ အလုပ်ကောင်းကောင်းမလုပ်သူ၊ ဓါတ်ကင်ထားရသူ၊ ထိခိုက်ဟဏ်ရာရထားသူ။

အမျိုးသမီးတွေမှာ LH နည်းနေရင် Anorexia nervosa မစာမသောက်ပိန်ကပ်နေသူ၊ ဦးနှောက်ထဲက ပစ်ကျူထရီဂလင်း အလုပ်ကောင်းကောင်းမလုပ်သူ၊ စိတ်ဖိအားများနေသူနဲ့ ကိုယ်အလေးချိန်နည်းလွန်းသူ။

ဒေါက်တာတင့်ဆွေ
၃၁-၁ဝ-၂ဝ၁၅

Comments

Popular posts from this blog

ကျန်းမာခြင်းသည် လာဘ်တပါး

Furamin BC သံဓါတ်အားဆေး