Stay Home နေထိုင်မှုပုံစံကြောင့်ဖြစ်ရတဲ့ ရောဂါသစ်

ကရိုနာဗိုင်းရပ်စ်ကြောင့် ကာကွယ်ရေးနည်းလမ်းတွေ တိုင်းပြည်တိုင်းမှာ နေ့မအားညမအား လုံးပမ်းနေကြရတယ်။ အိမ်ပြင်မထွက်ပါနဲ့ဆိုတာ နှာခေါင်းစည်းထက် စွမ်းတယ်။

တသက်လုံးအပြင်သွားလာနေခဲ့ရသူတွေ အနေရခက်နေကြတယ်။ မခက်စေချင်ပါ။ လူနေမှုပုံစံဆိုတာ ပြင်သင့်အချိန်မှာ ပြင်ရတယ်။ တသက်လုံးဖြစ်ခဲ့ နေခဲ့တာနဲ့ အခု မတူပါ။ ပြင်ပါ။ ကိုယ်တယောက်ကြောင့် လူဘယ်နှစ်ယောက်ကို ဒုက္ခပေးနိုင်သလဲ စဉ်းစားပါ။ ခြေဖဝါးယားခြင်းကို အလိုလိုက်တဲ့ ကိုယ်ကျိုးတခုတည်းသာ မကြည့်ပါနဲ့။

Lifestyle Diseases နေထိုင်မှုပုံစံကြောင့်ဖြစ်ရသည့် ရောဂါတွေ ဆက်ရေးပါမယ်။ မလိုအပ်ရင် မဖတ်ပါနဲ့။ အထက်ကစာကိုသာ လိုက်နာပါ။

လူတို့၏လူနေမှုပုံစံကြောင့်ဖြစ်ရသောရောဂါများရှိသည်။ ကမ္ဘာတွင် စက်မှုလက်မှု၊ စက်ရုံများထွန်းကားခြင်းကြောင့်လည်း အသက်ပိုရှည်လာရာ အသက်ကြီးရောဂါများ ပေါလာရသည်။ ပတ်ဝန်းကျင်နှင့် လူဆက်စပ်မှုကြောင့် ၎င်းရောဂါများ တဖြေးဖြေးအဖြစ်များလာသည်။ သူဌေးရောဂါလို့တော့ မခေါ်သင့်ပါ။ ဆင်းရဲမွဲတေသူတွေမှာလည်း လူနေမှုဘဝအရ ဖြစ်တာတွေကိုပါခေါ်တယ်။

နေထိုင်မှုပုံစံကြောင့်ဖြစ်ရသည့် ရောဂါများ
1. Heart disease, Stroke နှလုံးရောဂါ၊
2. Type 2 Diabetes ဆီးချိုရောဂါ၊
3. ဆေးလိပ်-အရက်-မူးယစ်ဆေးဝါးများကြောင့်ဖြစ်ရသည့် ရောဂါများ၊
4. Alzheimer's disease အဇာမိုင်ယာရောဂါ၊
5. ပန်းနာ၊
6. Atherosclerosis သွေးကြောကျဉ်းရောဂါ၊
7. သွေးတိုး၊
8. Cirrhosis အသည်းခြောက်ရောဂါ၊
9. Osteoporosis အရိုးအားနည်းရောဂါ၊
10. Depression စိတ်ကျရောဂါ၊
11. Obesity အဝလွန်ရောဂါ၊
12. Cancer ကင်ဆာ၊
13. Acne ဝက်ခြံ၊
14. Nephritis or Chronic Renal Failure ကျောက်ကပ်ရောဂါများ ပါဝင်သည်။

အနောက်နိုင်ငံများတွင် လွန်ခဲ့သော၂ဝ ရာစုနောက်ပိုင်း အစားအသောက်ပုံစံ အပြောင်းအလဲကြောင့် ဘဝပုံစံကြောင့် ဖြစ်ရသည့် ရောဂါများဖြစ်လာခဲ့သည်။ ယခင်စားနေကြ ပေါင်မုံ့၊ အာလူး၊ ပြောင်း၊ ပြောင်းဖူးတို့အစား၊ အသား၊ နို့ထွက် အစာများ၊ သစ်သီးရည်များ၊ အရက် ပိုမိုစားသုံးလာကြသည်။ အဝလွန်ခြင်းရောဂါ ဖြစ်လာစေသည်။ ၁ဝ၇ဝ နောက်ပိုင်း အဆီ၊ သကြား၊ အသားစားသုံးမှု များခြင်းကြောင့် အူမကြီး-နို့၊ ဆီးကျိတ်-သားအိမ်-အဆုတ်ကင်ဆာ အဖြစ်များလာ စေသည်။

ဥပမာ အမေရိကန် ပြည်ထောင်စုတွင် လူများသေစေရသည့် ရောဂါများမှာ ယခင်က နူးမိုးနီးယား၊ တုပ်ကွေး၊ တီဘီ၊ ဝမ်းလျော-ဝမ်းပျက်တို့ ဖြစ်ခဲ့ရာမှ၊ နှလုံးရောဂါနှင့် ကင်ဆာတို့ ဖြစ်လာခဲ့သည်။ နောက်ပိုင်း ကူးစက်ရောဂါများကြောင့် သေရခြင်းများလာခဲ့သည်။ နောက်ပိုင်းတွင် အင်ဖက်ရှင် ခေါ်ပိုးဝင်ခြင်း၊ ထိခိုက်ဒဏ်ရာ၊ စစ်ဖြစ်ခြင်း၊ အဆိပ်သင့်ခြင်း တို့ဖြစ်လာသည်။ ကာကွယ်ဆေးများ၊ ပိုးသေဆေးများ ပေါ်လာခြင်းကြောင့် ကုသရန်ခက်ခဲ့သည့် ကင်ဆာနှင့်နှလုံးရောဂါ တို့ကြောင့်သာ သေရတာများသည်။ သေရသည့်အသက်အရွယ်နှင့် ရောဂါအချိုးအစားများလည်း ပြောင်းလာပြန်သည်။ ထိခိုက်မှုများကြောင့် အသက် ၄ဝ၊ ကင်ဆာကြောင့် ၇ဝ နှင့် နှလုံးရောဂါများကြောင့် အသက် ၈၅နှစ်။

အဖြစ်များ ဘဝပုံစံကြောင့်ဖြစ်ရသည့်ရောဂါများ
၁။ Alzheimer's Disease ဦးနှောက်ရောဂါတမျိုး

၂။ Arteriosclerosis သွေးကြောကျဉ်းရောဂါ

၃။ Cancer ကင်ဆာ၊

၎။ Chronic Liver Disease/Cirrhosis အသည်းခြောက် သို့မဟုတ် နာတာရှည်အသည်းရောဂါ

၅။ COPD နာတာရှည်အဆုပ်ရောဂါ

၆။ Diabetes ဆီးချိုရောဂါ

၇။ Heart Disease နှလုံးရောဂါ

၈။ Nephritis/CRF ကျောက်ကပ်ရောဂါ

၉။ Stroke နှလုံးသွေးကြောကျဉ်းရောဂါ

လူနေမှုပုံစံနဲ့ဆိုင်တဲ့ရောဂါတွေကို ကာကွယ်ဘို့ ကုသရာမှာ လူနေမှုပုံစံကို ပြင်ရမယ်။ ဆေး + အစားသောက် + ကိုယ်လက်လှုပ်ရှားမှု သုံးခုသာဖြစ်သည်။ ရောဂါရှိမှန်းသိကတည်းက ငါ အရင်လူမဟုတ်တော့ဘူးလို့ သဘောပိုက်ပါ။ အရင်က စားသောက်ခဲ့တာတွေကို အရင်လို မမက်ပါနဲ့တော့။ လူသစ်စိတ်သစ်နဲ့ ကြိုက်-မကြိုက်ပါ အသစ်ဖြစ်လာတာကို ကိုယ်တိုင်နားလည် သဘောပေါက်ပြီး ကိုယ်တိုင်စောင့်ရှောက်ရပါမယ်။ ဖြစ်တော့ ကိုယ်ပဲခံရတာ မဟုတ်ပါလား။ စိတ်ကို နိုင်အောင် ကြိုးစားနိုင်ပါစေ။

ဒေါက်တာတင့်ဆွေ
၇-၄-၂၀၂၀

Comments

Popular posts from this blog

ကျန်းမာခြင်းသည် လာဘ်တပါး

Furamin BC သံဓါတ်အားဆေး