Fall ရွက်ကြွေရာသီ
ဟုတ်တယ်။ မြန်မာပြည်လို မုတ်သုန်ရာသီရှိတဲ့ဆီမှာ နွေ၊ မိုး၊ ဆောင်းလို့ ဥတု ၃ မျိုးသာရှိတယ်။ သူတို့ဆီမှာ လေးမျိုး။ Autumn လို့ ခေါ်တာကို အမေရိကန်တွေက Fall လို့ခေါ်တယ်။ ၂၂-၉-၂၀၂၀ ကနေ ၂၁-၁၂-၂၀၂၀ အထိကို ဖေါလ်လို့ သတ်မှတ်တယ်။ Spring ခေါ်နွေဦးက မတ်လ ၁၉ ရက် မှာစပြီး ဇွန် ၂၀ ရက်အထိ။ Summer ခေါ် နွေဥတုက ဇွန် ၂၁ ရက်ကနေ စက်တင်္ဘာ ၂၃ ရက်အထိကြာခဲ့တယ်။ Winter ခေါ် ဆောင်းရာသီက ဒီဇင်္ဘာ ၂၁ ကနေ မတ်လ ၁၉ ရက်အထိ။
ကမ္ဘာ့မြောက်ဖက်ခြမ်း ရွက်ကြွေရာသီမှာ သစ်ပင်တွေမှန်သမျှက သစ်ရွက်တွေ ကြွေကျတဲ့ရာသီလတွေ ဖြစ်တယ်။ Fall ဖေါလ် စကားလုံးကို သုံးတာဟာ သစ်ရွက်တွေ ကြွေတာကျတာအပြင် နှစ်တနှစ် ကုန်ဆုံးမှာတွေကိုပါ ရောထားတဲ့သဘော ဖြစ်လို့ ရင့်ကျက်မှုကနေ ယိုယွင်းလာတဲ့ နိမိတ်လည်းဖြစ်တယ်။
ဖေါလ်မှာ မိုးကလဲရွာပါအုန်းမယ်။ အေးစလဲပြုတော့မယ်။ ဖေါလ်ဘရိတ် ကျောင်း နှစ်ပတ် ပိတ်မယ်။
အရောင်ကပေးတဲ့ အမြင်ခံစားမှုအပြင် သက်ဝင်နေတဲ့ သဘောကိုလဲရစေမယ်။ ကြွေမကျခင်မှာ လှချင်တိုင်းလှနိုင်စွမ်းဟာ ဂုဏ်တရပ်ဖြစ်ပါတယ်။ အရွက်တွေဟာ ကြွေမကျခင်မှာ အင်မတန် လှကြတယ်။ အရောင်ကလဲ ရင့်ရော်လာပြီး၊ စိမ်းရာကနေဝါ၊ ဝါရာကနေ လိမ်မော်၊ နောက်မှာ ဝါညို၊ အညိုနဲ့ ညိုမှိုင်းလာကြမယ်။ နီရဲရဲနဲ့ နီညိုညိုလဲပါတယ်။ ကြားထဲမှာက အစိမ်းနုနဲ့ အစိမ်းရင့် တင့်တင့်တယ်တယ်။ အပင်တိုင်းဟာ တပြိုင်တည်းမှာ အရောင်ပြောင်းကြတာ မဟုတ်ပါ။ ရောင်စုံပန်းချီကားချပ်ကြီးကို လေးဘက်လေးတန်မှာ ချိတ်ထားသလိုနေတယ်။ ဆွဲပြီးသားကို ချိတ်ထားတာလဲ မဟုတ်သေးပါ။ ဆက်ဆွဲနေတဲ့ ပန်းချီကား။
တချို့ရပ်ဒေသ၊ တချို့တိုင်းပြည်တွေမှာ အရွက်တွေဟာ ရင့်ဟောင်းလေလေ တန်ဘိုးလျှော့လာလေလေ။ ပစ်ပယ်ခံရလေလေ။ အကျည်းတန်ကြတယ်။ မြန်မာပြည်မှာ ရွက်သစ်တွေရော ရွက်ဟောင်းတွေပါ လှကြပါစေ။ ဟောင်းနေတာတွေကိုပါ အသုံးချနိုင်ပါစေ။
ဖေါလ်ဥတုဆိုတာ အစိမ်းရောင်ရဲ့ ကျဆုံးခန်းလည်းဖြစ်ပါတယ်။ နိုင်ငံရေးမဟုတ်ပါ။
ဒေါက်တာတင့်ဆွေ
Comments
Post a Comment