Surgical wound care ခွဲစိတ်နာ

ဆရာ ကျွန်မ အူအတက်ခွဲပြီး ၆ ပတ် ပြည့်ပြီဆရာ။ အဲ့ဒါ အရေပြားပေါ်မှာ အပေါက်မပိတ်သေးပဲ နဲနဲကျန်နေသေးတယ် ဆရာ။ ပြီးတော့ ချက်ပတ်လည်မှာ တခါတလေ တော်တော်နာနေတတ်တယ်။ ပြန်ပျောက်လိုက် နာလိုက်ဖြစ်တယ်ဆရာ။ ဘာလို့လဲဆရာ။

ခွဲစိတ်နာ၊ ဒဏ်ရာ၊ အနာရောဂါကြောင့် (ဆဲလ်) နဲ့ (တစ်ရှူး) တွေ ထိခိုက်ပျက်စီးသွားရင် Healing process ပြန်ပြီး ကုစားမှုဆိုတာ သူ့အလိုလို ရှိနေပါတယ်။ အရေပြားဆိုတာ မှန်ဘီလူးနဲ့ကြည့်ရင် အထပ်ထပ်ရှိတယ်။ Epidermis, Dermis နဲ့ Hypodermis ၃ ထပ်လို့ အကြမ်းပြောနိုင်တယ်။ အမာရွတ်ဆိုတာ Dermis အရေပြားရဲ့ အောက်အလွှာကို ထိခိုက်လို့ ဖြစ်တာပါ။ အပေါ်ယံသာ ဖြစ်ရင် အမာရွတ်ပေါ်တောင် မပေါ်ဘူး။ ပေါ်တာလဲကြာရင် နဂိုအနေ ပြန်ရောက်မယ်။

အသစ် ပြန်မဖြစ်နိုင်တဲ့ (တစ်ရှူး) တွေလဲရှိတယ်။ Cardiac muscle cells နှလုံးကြွက်သား နဲ့ Neurones အာရုံကြောတွေ ဖြစ်တယ်။ Heart attack ရပြီး၊ သွေးကြောပိတ်လို့ နှလုံးကြွက်သားမှာ ထိခိုက်ရင် သူ့အလုပ်သူ မလုပ်နိုင်တော့တာ ဖြစ်တယ်။ လေဖြတ်ရင် သွားပြီ။

အနာကျက်ဘို့ အဆင့် ၃ ဆင့် ဆက်တိုက် ဖြစ်လာတယ်။ Inflammation ရောင်ခြင်း၊ Proliferation ပွါးခြင်းနဲ့ Maturation or Remodeling ကြီးရင့်ခြင်း (ပုံပြန်ဖေါ်ခြင်း) တို့ဖြစ်တယ်။ ပဌမအဆင့်မှာ ရောဂါပိုးတွေကို ခံတိုက်နေမယ်။ ပွါးတဲ့အဆင့်ကို အသားနုတက်တယ်လို့ အလွယ်ခေါ်တယ်။ ဆိုပါစို့ ခွဲစိတ်ကုသတဲ့ ဒါးချက် စလိုက်တာနဲ့ သွေးထွက် လာတယ်။ သွေးကို တိတ်စေမဲ့ အဆင့်တွေ တခုပြီးတခု လုပ်လာမယ်။ တခါထဲ ရောင်ရမ်းခြင်းဖြစ်စဉ် ဝင်လာတယ်။ ၆-၈ နာရီအတွင်းမှာ အနာကျက်ဘို့ဖြစ်စဉ် တကယ်စပြီ။ နောက်မှ Granulation အသားနုတက်တယ် ဆိုတာလာတယ်။ နောက်ဆုံးမှာတော့ Remodeling ပြန်ပုံဖေါ်ပါမယ်။

ခွဲစိတ်ကုသပြီး ခွဲတဲ့နေရာက တော်တော်နဲ့မပျောက်သေးတာမှာ အကြောင်းအမျိုးမျိုးကနေဖြစ်စေနိုင်တယ်။
• ချုပ်ရိုးကြောင်း တခုလုံးပွင့်ထွက်သွားတာက ချုပ်ရိုးဖြေတာနဲ့ဆက်ဖြစ်တယ်။ ချက်ချင်းပြန်ချုပ်ပေးရတယ်။
• ချုပ်ရိုးနေရာ တခု၊ ဒါမှမဟုတ် တခုကမနေရာလေးမှာ အနာမကျက်နိုင်သေးတာကတော့ ချုပ်ရိုးကြိုးစ၊ ဒါမှမဟုတ် သွေးကြောဖမ်း အပ်ခြည်စလေးတွေ ထွက်စရာရှိနေလို့ဖြစ်တယ်။ ထွက်မဲ့နေရာလေးမှာ စူနေသလို ရှိတယ်။ ပန်းရောင်လေးနေမယ်။ တချို့အစလေးတွေက အထဲနက်နက်မှာရှိတတ်တယ်။ ကြိုးစမှာ အပ်ခြည်၊ ကက်ဂတ်ကြိုးရယ်လို့ ရှိတယ်။ ပိုးသန့်ပြီး ဆွဲထုတ်လိုက်လို့ ထွက်ပြီးတာနဲ့ အနာကျက်လိမ့်မယ်။
• ခွဲစိတ်တာမှာ ပိုးသန့်အောင်လုပ်ပြီး၊ ပိုးသန့်ထားတာတွေသုံး၊ ပိုးသန့်နည်းကို အစအဆုံးသတိထားပေမဲ့ ပိုးဝင်လာနိုင်တယ်။ ပိုးဝင်တာရှိရင် ချုပ်ရိုးတခုလုံးဖြစ်ဖြစ် တပိုင်းတစမှာဖြစ်ဖြစ် အနာရင်းသလိုဖြစ်လာမယ်။ နီမယ်၊ နာမယ်၊ ရောင်မယ်၊ ကာရံမသင့်ရင် မန်းရည် ပြည်ထွက်မယ်။ ချုပ်ရိုးအဖြေခင်ကတည်းကဖြစ်နိုင်တယ်။ အဲတာမျိုးဖြစ်လာရင် ဖြစ်တဲ့နေရာကို ကွက်ပြီး ချုပ်ရိုးဖြည်ပေးရတယ်။ ထွက်စရာအရည်ထွက်ရင် သက်သာမယ်။ အဲလိုဖြစ်ထားသူမှာ ချုပ်ရိုးမလှတာ ဖြစ်နိုင်တယ်။

ခွဲစိတ်ထားတဲ့နေရာကို ပြုစုတာမှာ နေရာအလိုက်မတူပါ။ အထူးလုပ်ပေးနိုင်တဲ့နေရာတွေမှာတော့ ခွဲပြီးတာနဲ့ ချုပ်ရိုးနေရာကို အလုံဖုံးမဲ့ ပိုးသန့်ပြီး တခါသုံးကပ်စရာနဲ့ဖုံးပေးထားပြီး ချုပ်ရိုဖြေမှသာခွါတယ်။ တချို့နေရာတွေမှာတော့ ပိုးသန့်ထားတဲ့ပတ်ကျဲစနဲ့သာ ဖုံးပေးပြီး တတိယမနက်ခင်းမှာ ဆေးပြန်ထည့်မယ်။ အဲဒီရက်မှာ ချုပ်ရိုးကိုစစ်ရင် နီနေတာ၊ ရောင်တာ၊ ပူတာ၊ သွေး-အရည်ထွက်တာတွေကို စစ်ရမယ်။ ပိုးဝင်ရင် လူကလဲဖျားနိုင်တယ်။

ခွဲစိတ်နာကို ဆေးခန်းသုံးအရက်ပြန်နဲ့သာ သန့်ရှင်းဘို့လိုအပ်တယ်။ သုံးတာအားလုံးက ပိုးသန့်ထားတာဖြစ်ရမယ်။ ချုပ်ရိုးဖြေပြီးအနာကိုလဲ အဲလိုပဲ။ အနာမကျက်သေးတာဆိုရင် အနာထဲကို ဆေးထည့်ဘို့လိုနိုင်တယ်။ Cipladine/Betadine/Pivodine ဆေးကိုအသုံးများတယ်။ အနာနေရာထဲကို အရက်ပြန်မဝင်စေရပါ။ ပြည်လို၊ မန်းရည်လိုရှိတဲ့အနာဆိုရင် Hydrogen peroxide ဆေးရည်နဲ့ဆေးတယ်။ ပိုးသေဆေး တချို့မှာလိုမယ်။

ခွဲစိတ်နာကို stitches ချုပ်ရိုး၊ staples ချုပ်အပ်နဲ့ surgical glue ကော်ကပ်နည်းတွေနဲ့ ချုပ်-ပိတ်ပေးတယ်။ အနာကို ဆေးထည့်မဲ့သူက လက်ဝတ်လက်စားတွေချွတ်ပါ။ လက်ဆေးပါ။ လက်ကိုခြောက်သွေ့ပါ။ တခါသုံး ဆေးခန်းသုံး လက်အိတ်စွပ်ပါ။ ကပ်ထားတဲ့ပလာစတာတွေခွါပါ။ အနာကပ်ပိတ်ကျဲစ၊ ပတ်တီးကို ပိုးသန့်ထားတဲ့ဆားရည်၊ ဒက်တောရည်နဲ့ စိုစွပ်စေပြီး ခွါပါ။ ဆရာဝန်ကခိုင်းရင် ပိုးသေဆေးသုတ်ပါ။ မဟုတ်ရင် ပိုးသန့်ဂွမ်းသုံးပြီး ချုပ်ရိုးကို သန့်ရှင်းပါ။ ပိုးသန့် တခါသုံးအနာကပ်စရာနဲ့ ပြန်ကပ်ပါ။ လက်ပြန်ဆေးပါ။ သုံးထားတဲ့အရာတွေကို ပလပ်စ်တစ်အိတ်မှာ ထည့်ပြီး စွန့်ပြစ်ပါ။

ခွဲစိတ်နာဟာ ဆီးချိုရှိသူ၊ ဆေးလိပ်သောက်သူ၊ ခုခံအားနည်းသူ၊ အဟာရဓါတ်နည်းသူ၊ အရေးပေါ်ခွဲစိတ်ရသူ၊ ခွဲစိတ်ချိန် ကြာသူတွေမှာ နောက်ဆက်တွဲတွေ ရှိတတ်တယ်။

အဲလို နောက်ဆက်တွဲတခုခုဖြစ်ပြီးမှ အနာကျက်သူတွေမှာ ချုပ်ရိုးမလှတာဖြစ်နိုင်တယ်။ အလှအပလိုမဲ့နေရာမှာဖြစ်နေရင် အနာသစ်လုပ်ပြီး ချုပ်ရိုးတကြောင်းတည်းသာဖြစ်အောင် ပြန်ပြုပြင်ချုပ်ပေးနိုင်တယ်။ ပိုးသန့်ဘို့ အရင်ကထက် ပိုဂရုစိုက်ရမယ်။

Dr. တင့်ဆွေ