Imperforate hymen အပျိုမြှေးပိတ်နေခြင်း
နှစ်ပတ်လည်ပို့စ်တွေက တိုက်ဆိုင်မှုရှိတာများတယ်။ အခါရာသီအလိုက်ရောဂါဖြစ်ကြတဲ့သဘော။ မနေ့က နှစ်ပတ်လည်စာတွေထဲမှာ ဒီစာလည်းပါတယ်။ အားနာတာနဲ့ ပြန်မတင်ခဲ့ပါ။ အခု မေးခွန်းလာတယ်။
၁။ ဆရာရှင့် ကျွန်မသမီးလေး အသက် ၁၁ လရှိပါပြီ။ မွေးပြီးထဲက သန့်ရှင်းရေးကို ကျွန်မကိုယ်တိုင်လုပ်တာများပါတယ်။ ဒီနေ့မနက် ၄ နာရီလောက် ဆီးခံလဲရင်းနဲ့ ဓာတ်မီးနဲ့ထိုးကြည့်မိတော့ မိန်းမအဂါင်္မှာ အပေါက်မပါတာ တွေ့မိတယ်ဆရာ။ ခုမှတွေ့မိတော့ ကုလို့ရမယ်ဆိုရင် နောက်ကျနေပြီလား သိချင်လို့ပါ၊ ကျေးဇူးပြုပြီး ညွှန်ကြားပေးပါဆရာ။
၂။ ဆခရင်ရှော့ စာတခုကို အီးမေးနဲ့ပို့တယ်။ အတော်ဖတ်ယူရတယ်။ သိပ်တော့မရှင်းပါ။ ခွဲစိတ်ဆရာဝန်က လိုတာညွှန်ပါမယ်။ ဆရာက မရှင်းပါ။
ပြန်ကြားပေးတာ ကျေးဇူးတင်ပါတယ်ဆရာ။ သမီးမိန်းမကိုယ်နေရာလေးက အမြှေးပါးလေးကပ်ပြီး ပိတ်သွားသလို ဖြစ်နေတာပါဆရာ။ စအိုပေါက်ရော ဆီးသွားပေါက်ရော ပုံမှန်ပါပဲ။ ခွဲစိတ်ဆရာဝန်က မနက်ဖြန်မှပြရမှာမို့ပါ။ ဆီးသွား ဝမ်းသွားတာလဲပုံမှန်ပါပဲဆရာ။ သမီးတို့လဲ ညီမတွေမွေးထားတာပါ။ တူမတွေမှာလဲ မဖြစ်ဖူးမမြင်ဖူးလို့ပါ။ မြန်မာနိုင်ငံက ဆရာဝန်တွေရဲ့ထုံးစံက များများမေးရင် လူနာရှင်နားလည်အောင်ပြောဖို့ သိပ်အချိန်မပေးချင်ကြလို့ပါ။ သမားဂုဏ် ပြည့်စုံကြတဲ့ ဆရာဝန်တချို့တော့ အနည်းစုကျန်ပါသေးတယ်။ ဆရာသက်ရှည်ကျန်းမာပါစေလို့ အမြဲဆုတောင်းပါတယ်။
၃။ ဆရာရှင့် ကျွန်မသမီးလေးက ၁ နှစ်ခွဲပါရှင့်။ မိန်းမကိုယ်မှာ အပေါက်မပါဘဲ အရာလေးဘဲပါပါတယ်။ ဆီးလမ်းကြောင်းကတော့ အပေါက်ပါပါတယ်။ ဆီးသွားတာအဆင်ပြေပါတယ်ရှင့်။ အဲဒါဘယ်ချိန်လောက်ခွဲစိတ်သင့်လဲရှင့်။ Menstration လာတဲ့အချိန်မှ ခွဲခန်းဝင်လို့ရလားရှင့်။ ကျေးဇူးပြု၍ရှင်းပြပေးပါရှင့်
၎။ မင်္ဂလာပါဆရာ။ ကျနော့်သမီးကအသက် ၃ နှစ်ရှိပါပြီ။ မအဂါင်္ပေါက်ပိတ်တယ်လို့ ပြောပါတယ်။ ကျနော်က့့ မှာ၊ သမီးက မြန်မာပြည်မှာ ဓမ္မတာလာတဲ့အပေါက်လို့ပြောပါတယ်။ သွားပြီးဆရာဝန်နဲ့ ဖောက်ရတာ၂ခါရှိပြီ၊ ပြန်ပြီးပိတ်လို့တဲ့။ အခုလဲပိတ်ပြန်ပြီးတဲ့။ ဘာလို့ဖြစ်တာလဲ သိချင်လို့ပါဆရာ။
၅။ ဆရာ တူမလေးအသက် ၃ နစ်ပါ။ သူ့ရဲ့မိန်းမကိုယ်အပေါက်က ပိတ်ပိတ်နေလို့ nurse နင့်ပြပြီး ဖေါက်ပေးတာ နစ်ခါရှိပြီ။ ဖေါက်ပြီးပြန်ပြန်ပိတ်တယ်တဲ့။ ဆရာမကနောက်တခါဆို သူမဖေါက်ပေးတော့ဘူးပြောတယ်တဲ့။ အဲ့ဒါမဖေါက်ပဲ နေရလား။ အသက်ကြီးလာမှ ဖောက်ရမှာလား။ ဘယ်လိုလုပ်ရမယ်ဆိုတာကို ပြောပြပေးစေချင်ပါတယ်။
အမျိုးသမီး မွေးလမ်းကြောင်းမှာဖြစ်တဲ့ မွေးရာပါပြဿနာတွေကတော့ အပျိုမြှေး လုံးဝပိတ်နေတာနဲ့ မွေးလမ်းကြောင်းမှာ အကန့်ပါနေတာတွေဖြစ်တယ်။ မွေးလမ်းကြောင်းမှာ မွေးရာပါ အကန့်ရှိနေတာကို ခပ်ရှားရှား ဆေးကျောင်းဘဝမှာ တွေ့ဘူးတယ်။ ပါမောက္ခတွေက ဆေးကျောင်းသားတွေကို သင်ကြားဘို့ ရှားတာမှန်သမျှ စုထားကြရတာ။ အာစရိရေက်းဇူး၊ ဂိလာနေက်းဇူး အထူးမေမ့ပါ။
အပျိုမြှေးလုံးဝပိတ်နေတာကို သည်အတိုင်းတော့ ထားလို့မရပါ။ ငယ်စဉ်မှာတော့ ထားနိုင်ပါသေးတယ်။ စိုးရိမ်စရာမရှိပါ။ အပျိုမဖြစ်ခင် လုပ်ရင်ရတယ်။ ခွဲနည်းမမှန်ရင် ပြန်ပိတ်တယ်။ လိုတာထက်လည်း မကျယ်စေသင့်ပါ။ အတွေ့အကြုံရှိတဲ့ ဆရာဝန်နဲ့က ပိုကောင်းတယ်။
အပျိုမှေး ထူလွန်းနေတာလည်းရှိတယ်။ အပေါက်ကလေးက မဖြစ်စလောက်ကျဉ်းလွန်းတာလည်းရှိတယ်။ အခုဟာက လုံးဝပိတ်နေတာ။ တခြား မျိုးပွါလမ်း မူမမှန်တာရှိသေးလား စစ်ရတယ်။ တချို့မှာ ဗဂျိုင်းနားခေါ် မွေးလမ်း နှစ်ခန်း ဖြစ်နေတယ်။ ဆက်ပတန် ခေါ် အကန့်ပါလို့။ တချို့မှာ သားအိမ်နှစ်ခွဖြစ်နေတယ်။ တချို့ သားအိမ်ကသေးနေတယ်။ ထူနေတယ်။ ဖြစ်တာရှားပါတယ်။
ဒေလီမှာနေခဲ့တုံးက ယမုန်နာဆေးခန်းလေးမှာ အပျိုမှေးပိတ်နေတဲ့ကလေး အနည်းဆုံး ၇ ယောက်လောက်တွေ့ခဲ့ရတယ်။ ငယ်ငယ်လေးတွေကို ခွဲစိတ်ပြုပြင်ရတာ ပိုပြီး လက်ဝင်တယ်။ ပြန်ပိတ်နိုင်တယ်။ ကလေးကရှူပေါက်တာနဲ့ သန့်အောင် လုပ်ခိုင်းရတာခက်တယ်။ ဆီးပိုက်နဲ့ထားလည်း မရသေးတဲ့အရွယ်။ အရွယ်လေးနည်းနည်းရမှာ စနစ်တကျလုပ်သင့်တယ်။ အရပ်နည်းတွေ မလုပ်သင့်ပါ။
ကျွန်တော်ဆရာဝန်ဖြစ်စ တောနယ်တခုမှာတာဝန်ကျစဉ်က အသက် ၁၆ နှစ်မိန်းကလေးတယောက် အရွယ်ရောက်ချိန် လွန်တာတောင် ရာသီတခါမှမလာဘူးသေး၊ ဗိုက်ကလေးကလည်းဖေါင်းလာလို့ မိဘတွေက ခေါ်လာပြီးပြတယ်။ စစ်ဆေးကြည့်တော့ အပျိုမြှေး လုံးဝပိတ်နေတာ ဖြစ်နေတယ်။ ဒီအရွယ်မှာ လွယ်ပါတယ်။ ပိုးသန့်နည်း ၁-၂-၃ လုပ်။ အပျိုမြှေးမှာ ထုံဆေးလေးထိုး၊ ခွဲစိတ်ဓါးနဲ့ ဒေါင်လိုက်တချက် ကန့်လန့်တချက် ခွဲပေးလိုက်တာနဲ့ အမည်း-အညိုရောင်၊ နောက်မှာ နီညိုညို-အနီရောင် ရာသီသွေးဟောင်းတွေ ဒလဟောဆင်းလာတယ်။ ခုချိန်ဆို အဲဒီကလေးမ ကလေး ဘယ်နှစ်ယောက် မွေးပြီးလဲ မသိ။ လူနာကိုရော နယ်ကိုပါ သတိရတယ်။
ဒေါက်တာတင့်ဆွေ
၅-၁၂-၂ဝ၁၇
Comments
Post a Comment