Mushroom မှိုဋီကာ

ပုံနဲ့အတူမေးခွန်း ၂ ခု ရှေ့ဆင့်နောက်ဆင့်လာတယ်။ ဆရာ့အမြင်လေး မျှဝေပေးပါဆရာ။ ခု ကျမတို့ဆီမှာ လူတွေ အရမ်းစားနေကြတဲ့အစားအစာဖြစ်နေတော့ တကယ်ပဲလား မသိလို့ပါဆရာ။ ပြောတဲ့အတိုင်းဆိုရင် စိုးရိမ်စရာမို့ လေးစားစွား မေးပါတယ်ဆရာရှင့်။ အပ်မှိုက ရောဂါရစေသတဲ့။

အရင်ကတော့ ပယောဂတွေမပါဘဲမေးကြလို့ မှိုဋီကာရေးထားပါတယ်။

၁။ ဆရာရှင့် ငှက်စွတ်မှိုလို့ ခေါ်တာမှန်ပါသလား၊ ဖက်ဆွတ်မှိုလို့ ခေါ်တာမှန်ပါလား၊ ရှမ်းပြည်မှာတော့ ငှက်စွတ်လို့ ခေါ်ကြပါတယ်။

၂။ ငှက်စို့မှိုလား၊ ငှက်စွတ်မှိုလား၊ ငှက်စွပ်မှိုလား။

• ငှက်စွေ့မှို = မှိုဦးနက် = ထိပ်မှာ အနက်ရောင်အကွက်ပါတယ်။ ဖိုလ်ဝင်းတောင်မှိုလို့လည်းခေါ်တယ်။ တမိုးတွင်းလုံးပေါက်တယ်။ အညာဒေသမှာတော့ အကောင်းဆုံးဖြစ်တယ်။
• တောင်ပို့မှို = မှိုခြေတံရှည် = တော်သလင်းလမှာ ပေါက်တာများပြီး၊ တမိုးတွင်းလုံးပေါက်တယ်။
• ဖက်သွတ်မှို = မြန်မာပြည်အထက်ပိုင်းမှာ ငှက်ကွေ့စာမှိုလို့ခေါ်တယ်။ မှိုဖြူလို့လည်း ခေါ်တယ်။ နယုန်လမှာ လှိုင်လှိုင်ပေါက်တယ်။ မြင်တပြေးကျယ်အောင်ပေါက်တယ်။ ဖက်သွတ်မှိုခင်းကိုတွေ့လို့ ပြုံးရွှင်တာကို မှိုရတဲ့မျက်နှာလို့ ခေါ်ကြတယ်။
• ဝါမှိုလည်းရှိတယ်။
• မှိုကြက်တောင်က ဝါဆိုလမှာပေါက်တယ်။
• ကောက်ရိုးမှို = မိုးဦးကျမှာပေါက်တယ်။
• ဆန်ကွဲမှို = မြက်ကြားမှိုလို့လည်းခေါ်တယ်။
• ငှက်ပျောမှိုကလည်း ငှက်ပျောတုံးပေါ်မှာ ဆန်ကွဲပက်ပြီးပျိုးရတယ်။
• မှိုဥက အဆိပ်ကင်းတယ်။ တချို့မှိုဥက ခါးသက်တဲ့အရသာရှိတယ်။ တချို့အဆိပ်ရှိတဲ့ မှိုတွေက ပေါက်ကာစမှာ ဥလိုဖြစ်နေလို့ ခွဲခြားရမယ်။ မှိုဥတွေက ရင့်လာချိန်မှာ ပေါက်ကွဲပြီး မျိုးမှုံတွေက မီးခိုးလိုထွက်တယ်။ မှိုဥကို ဘုတလင်နယ်က ကြွက်မျက်လုံးမှိုလို့လည်းခေါ်ကြတယ်။

မှိုကို ရုက္ခဗေဒအရ Agaricus အက်ဂါရိကတ် ကမ်ပက်စထရစ်လို့ခေါ်တယ်။ မျိုးစိပ်ပေါင်း ၃၈ဝဝဝ လောက်ရှိတယ်။ မှိုဟာ ဖန်းဂတ်စ်အုပ်စုဖြစ်တယ်။ ကလိုရိုဖီးလ် ခေါ် အစိမ်းရောင်မရှိ။ မှိုဟာ ရေငွေ့ဓါတ်များချိန်မှသာ မှိုပေါက်တယ်။ အပူချိန် သင့်တင့်တာ လိုအပ်တယ်။ Agaricus bisporus အမျိုးအစားက ကမ္ဘာမှာ စားသုံးသူအများဆုံးဖြစ်တယ်။

အဆိပ်ရှိတဲ့မှိုတွေက အမန်နီတာအုပ်စုကဖြစ်တယ်။ ဖြူတဲ့မျိုးမှုံနဲ့ အလွှာတန်းလေးတွေ ပါတယ်။ ငယ်သေးတဲ့အဆိပ်ရှိမှိုမှာ အမြှေးဖုံးနေတယ်။ မှိုရှည်လာချိန်မှာ အမြှေးက ခြေရင်းမှာ ခွက်လိုဖြစ်နေတယ်။ အက်ဂါရိကပ်မှိုအမျိုးမှာလည်း မကြီးရင့်မီမှာ အဖြူရောင်အလွှာတန်းပါလို့ ခွဲခြားရမယ်။ အဆိပ်ရှိ မရှိ ခွဲခြားရတာ တခါတလေ ခက်တယ်။ အတိအကျ သတ်မှတ်ချက် မရှိပါ။ အနီရောင်၊ အညိုရောင်၊ အဆန်းတကြယ်ဆို မစားကောင်းပါ။ စားရတဲ့မှိုကို တချို့မတည့်လို့ အလာဂျီရတယ်။ အဆိပ်ဆိုတာလည်း အမျိုးမျိုး။ တချို့က အစာဆိပ်သင့်စေတယ်။ တချို့ကစိတ်ကို ပြောင်းလဲစေတယ်။ ဗက်တီးရီးယားသေစေတာနဲ့ ဗိုင်းရပ်စ်သေစေတာ ရှိတယ်။ လူကိုသေစေလောက်တာ နည်းနည်းသာရှိတယ်။
မှိုကို အဆိပ်ရှိ မရှိသိရမဲ့အပြင် အဆိပ်မရှိလည်း လတ်ဆတ်မှသာ စားသင့်တယ်။

စားကောင်းတဲ့မှို 100 g (3.5 oz) ရဲ့ အာဟာရတန်ဖိုး
• Energy 94 kJ (22 kcal)
• Carbohydrates 4.3 g
• Fat 0.1 g
• Protein 2.5 g
• Thiamine (B1) (9%) 0.1 mg
• Riboflavin (B2) (42%) 0.5 mg
• Niacin (B3) (25%) 3.8 mg
• Pantothenic acid (B5) (30%) 1.5 mg
• Vitamin B6 (8%) 0.11 mg
• Folate (B9) (6%) 25 μg
• Vitamin C (0%) 0 mg
• Calcium (2%) 18 mg
• Iron (3%) 0.4 mg
• Magnesium (3%) 9 mg
• Manganese (7%) 0.142 mg
• Phosphorus (17%) 120 mg
• Potassium (10%) 448 mg
• Sodium (0%) 6 mg
• Zinc (12%) 1.1 mg
• Selenium 26 ug
• Copper 0.5 mg

ဆေးရောင်ဆိုးဘို့ သုံးနိုင်တဲ့မှိုရှိတယ်။ ဆေးကုသရာမှာသုံးနိုင်တဲ့မှိုလည်းရှိတယ်။ မှိုအများစုမှာ ဆီးအိမ်ကို ကောင်းစေတာပါတယ်။ ဆီးအက်စစ်ဓါတ်များစေတဲ့ အရွက်တွေထဲမှာ ကညွတ်၊ မုံလာ၊ ဟင်းနုနွယ်ရွက်နဲ့ မှိုလည်းပါပေမဲ့ အသင့်အတင့် စားနိုင်ပါတယ်။

ဆေးတွေလိုပဲ မှိုမှာလည်း ဘေးထွက်သက်ရောက်မှုတွေ ရှိတယ်။ မျက်နှာထုံနိုင်တယ်။ နှလုံးခုန်မြန် သွေးတိုးနည်းနည်း တက်မယ်။ အာခေါင်ခြောက်မယ်။ ပျို့အန်ချင်မယ်။ ကြွက်သားအားနည်းမယ်။ ချွေးထွက်မယ်။ နည်းနည်းပူပြီး အေးပြီး ချမ်းမယ်။ အဲဒီသုတေသနတွေထက်တော့ စားကောင်းတဲ့မှိုတွေမှာ ဆိုးတာ အခုထိ မတွေ့သေးပါ။

မေးခွန်းနဲ့အတူပို့တဲ့စာထဲမှာ ယူရစ်အက်စစ်များတယ်လို့ ဖတ်ရတယ်။ ယူရစ်အက်စစ်များရင် ဂေါက် ခေါ် အဆစ်နာတာ ဖြစ်စေတယ်။ တိတိကျကျပြောရရင် Purines ပြူရင်းဓါတ်ပါတဲ့အစားအသောက်တွေနဲ့ ဂေါက်ရှိနေသူတွေက မတည့်ပါ။ ပြူရင်းဓါတ်များတဲ့အစားအသောက်တွေဆိုတာ ဘာတွေလဲ။
• Organ meats ကလီစာတွေဖြစ်တဲ့ အသည်း၊ အမြစ်၊ ကျောက်ကပ်၊ ဦးနှောက်။
• Red meat အသားတွေဖြစ်တဲ့ အမဲသား၊ ဝက်သား၊ ဆိတ်သား၊ သိုးသားနဲ့ ကြက်ဆင်သား။
• Anchovies, sardines, herring, mackerel, and scallops ပင်လယ်ငါးတွေ။
• Sugary drinks ခေါ် အချိုရည်တွေ။
• Asparagus ကညွတ်။
• Beer ဘီယာဖြစ်ပါတယ်။

ဖြဲခြောက်တဲ့မှိုကိုတော့ ရှောင်ပြီး ဘီယာကို ကြက်မြစ်ကြက်သည်းကြော်နဲ့သောက်လို့ကတော့့

ကျွန်တော် ဒေလီမှာနေခဲ့စဉ်က အနီးအနားမှာဝယ်လို့ရတဲ့မှိုအမျိုးအစားက ခပ်ပုပုတိုသာရှိတယ်။ အိုင်အင်အေဈေးအထိ သွားဝယ်မှ ရိုးတံလေးနဲ့ အပွင့်ကားကား အဖြူရောင်မှိုမျိုးရတယ်။ အဲတာကို ပိုကြိုက်တယ်။ နီပေါနိုင်ငံကို ခဏခဏရောက်တယ်။ ခတ္တမန္ဒူဈေးထဲက တောသည်တွေလာရောင်းကြတဲ့ မြန်မာပြည်ကလို မှိုပွင့်တွေကို လေယာဉ် ထွက်မယ့်မနက်မှာ သွားဝယ်ခဲ့တာ အမှတ်ရနေတယ်။ မြန်မာပြည်မှာ မှိုရတဲ့မျက်နှာကိုယ်စီရှိကြပါစေ။

ဒေါက်တာတင့်ဆွေ
၂၆-၁၂-၂ဝ၁၇