Ethnic nationalities တိုင်းရင်းသားလူမျိုးစုံ
• ကရင်ပြည်နယ် စစ်အစိုးရထိန်ချုပ်ရာနေရာကို မရောက်ဘူးပါ။ မာနယ်ပလောကိုတော့ ၃ ခေါက်ရောက်တယ်။ KNU ထိန်းချုပ်ရာနေရာတွေကို အကြိမ်ကြိမ်သွားဘူးတယ်။ ကရင်နိုင်ငံရေးခေါင်းဆောင်တွေနဲ့ လက်တွဲခဲ့ရတယ်။ ကရင်ထဲမှာ စကောကရင်ရော ပိုးကရင်တွေကိုပါတွေ့တယ်။
• ကယားပြည်နယ်ကို မရောက်ဘူးပါ။ ကရင်နီ၊ ကယန်း နိုင်ငံရေးခေါင်းဆောင်တွေနဲ့တော့ ရင်းရင်းနှီးနှီးလက်တွဲခဲ့ရတယ်။ ကယန်း (ပဒါင်) တွေကိုပါတွေ့ပါတယ်။ ကရင်နီဒုက္ခသည်စခန်းကိုတော့ ကျွန်တော့်သမီးနဲ့အတူ ရောက်ဘူးတယ်။
• ကချင်ပြည်နယ်ကို မရောက်ဖူးပါ။ ကချင်အဖွဲှ့စည်းတွေက တာဝန်ရှိသူတွေနဲ့ အစည်းအဝေးတွေကို အတူတက်ရတယ်။ ကချင်ဒုက္ခသည်တွေနဲ့လည်း ၂၄ နှစ်အတူနေခဲ့ရတယ်။ ကချင်ထဲမှာလည်း ဂျိန်းဖော၊ ရဝမ်၊ အဇီး၊ လီဆူးစတာတွေကို တွေ့ပါတယ်။
• ကူကီးအဖွဲ့တာဝန်ရှိသူတွေနဲ့ ဆွေးနွေးဘူးတယ်။ ကူကီးဒုက္ခသည်တွေနဲ့လည်း ၂၄ နှစ်အတူနေခဲ့ရတယ်။
• ချင်းပြည်နယ်ကို မြန်မာပြည်ကနေထွက်ပြေးရစဉ်ကဖြတ်သွားဘူးတယ်။ ချင်းနိုင်ငံရေးလုပ်သူတွေနဲ့တွဲခဲ့ဘူးတယ်။ ချင်းဒုက္ခသည်တွေနဲ့လည်း ၂၄ နှစ်ကြာအတူနေခဲ့ရတယ်။ ချင်းပြည်နယ်တခုလုံးက လူမျိုးစုမကျန်နဲ့သိတယ်။ ဇိုမီး၊ ဟားခါး၊ ဖလမ်း၊ မတူပီ၊ မင်းတပ်၊ ခူမီး၊ မရာ။ လူမျိုး ၁၃၅ စာရင်းမှာတော့ တမျိုးရေးထားတယ်။ ခမီ၊ ဂန်ဘဲ၊ ဂွေးတဲ၊ ဇို၊ ဇန်ညှပ်၊ တာ့ဒိုး၊ ဒိုင်၊ မီရမ် (ခေါ်) မရာ၊ လူရှိုင်း (မီဇို)၊ လိုင်၊ အရှို (မြေပြန့်ချင်း) စတာတွေပါတယ်။ တီးတိန်ချင်းလို့ ခေါ်တာက ဇိုမီးတွေဖြစ်တယ်။
• မွန်ပြည်နယ်ကို မရောက်ဘူးပါ။ မွန်နိုင်ငံရေးခေါင်းဆောင်တွေနဲ့တော့ လက်တွဲခဲ့ရတယ်။
• ရခိုင်ပြည်နယ်ကို မရောက်ဘူးပါ။ ရခိုင်နိုင်ငံရေးခေါင်းဆောင်တွေနဲ့တော့ လက်တွဲခဲ့ရတယ်။ ရခိုင်ဒုက္ခသည်တွေနဲ့လည်း ၂၄ နှစ် အတူနေခဲ့ရတယ်။
• ပအို့ဒေသကို မရောက်ဘူးပါ။ ပအို့နိုင်ငံရေးလုပ်သူတွေနဲ့တော့ နိုင်ငံရေးမှာ ၂၄ နှစ်တွဲခဲ့ဘူးတယ်။
• ပလောင်ဒေသ မရောက်ဘူးပါ။ ပလောင်နိုင်ငံရေးလုပ်သူတွေနဲ့တော့ နိုင်ငံရေးမှာ ၂၄ နှစ်တွဲခဲ့ဘူးတယ်။
• ဝ ဒေသကို မရောက်ဘူးပါ။ ဝ တာဝန်ရှိသူအချို့နဲ့ အစည်းအဝေးတွေမှာ ဆုံပါတယ်။ ကိုးကန့်တော့ မဆုံဘူးပါ။
• နာဂတောင်တန်းကို မရောက်ဘူးပါ။ နာဂနိုင်ငံရေးလုပ်သူတွေနဲ့ အတော်ရင်းနှီးတယ်။
• ရှမ်းပြည်နယ်ကို မရောက်ဘူးပါ။ ရှင်းအဖွဲ့အစည်းအမျိုးမျိုးက နိုင်ငံရေးခေါင်းဆောင်တွေနဲ့တော့ ၂၄ နှစ်ကြာ အတူလုပ်ကိုင်ခဲ့ပါတယ်။ ရှမ်းထဲမှာ ခန္တီးရှမ်း၊ ဓနု၊ ရှမ်းကြီး၊ တိုင်းလျမ်စတာတွေပါတယ်။
• ကပြားတွေအမျိုးမျိုးနဲ့လည်း မိတ်ဆွေတွေပဲ။ အိန္ဒိယ-မြန်မာ၊ ပါကစ္စတန်-မြန်မာ၊ ဗိုလ်-မြန်မာ၊ ပေါ်တူကီ-မြန်မာ။
• ဗမာတွေတော့ ပြောမနေနဲ့ပေါ့။ ဗမာစုထဲထည့်ထားတဲ့ ထားဝယ်လည်းပါတယ်။ ယောသားကတော့ ကိုယ့်နယ်သားလိုပဲ။ အညာသားရော အညာသမားသူတွေရော။ အောက်သားရော အောက်သွားသူတွေရော။ အဲ့့ နေပြည်တော်သားနဲ့တော့ တခါမှ မတခါဘူးပါ။
အမျိုး-ဘာသာ ကိုယ့်လူမျိုးကိုကာကွယ်ပါဆိုတာ ဘာကိုပြောချင်တာလည်း တချို့က သိကြပုံမရပါ။ ကျွန်တော့်အတွက်တော့ ၁၃၅ မျိုးထဲက အနည်းဆုံး ၅ဝ လောက်နဲ့သက်ဆိုင်ပါတယ်။
ဒေါက်တာတင့်ဆွေ
၁၂-၉-၂ဝ၁၅
Comments
Post a Comment