Harvest season မောင်းညိုချိန်
ကျွန်တော်က ငါးနှစ်သားအထိ တောင်သူလယ်သမားသားဖြစ်ပေမဲ့ တောင်သူလုပ်ငန်းဆိုလို့ ဆော့ချင်လို့ ထွန်းတုံးပေါ် တက်လိုက်ဖူးတာနဲ့ ဆီဆုံပေါ်တက်စီးဖူးတာကလွဲရင် တောင်သူလုပ်ငန်းကို ဘာမှမသိပါ။ သိတဲ့သူတွေကို ငယ်ကတည်းက အလွန်မတန်အံ့သြ အားကျမိတယ်။
၁၉၉ဝ ရွေးကောက်ပွဲမှာ ပြိုင်ဖက် တစညပါတီရဲ့အမှတ်အသားဟာ စပါးနှံဖြစ်ပါတယ်။ ၁၉၇၃-၇၄ ဖေါင်ကြီးသင်တန်း၊ ဇေယျ (၁၉) တက်ရတုံးက စိုက်ပျိုးရေးဘာသာရပ်လက်တွေ့မှာတော့ စပါးရိတ်ခဲ့ရဘူးတယ်။ စပါးရိတ်ချိန်ကျတာကို မောင်းညိုချိန်ကျပြီလို့ခေါ်သတဲ့။ စပါးနှံတွေကလေးလံလာပြီး၊ အနှံတွေက အောက်ကို ငိုက်ကျလာချိန်ဖြစ်တယ်လို့ မှတ်သားရပါတယ်။ ပြည့်မှည့်လာပြီ။
စိုက်ပျိုးရေးသိပ္ပံအရ (စာတွေ့) ရေငွေ့ဓါတ်ပါဝင်မှု ၂ဝ-၂၅% ရှိရမယ်။ အဆံဟာ မာတင်းနေရမယ်။ ဆုပ်ကြည့်ရင် ကျွတ်ဆတ် ကျိုးလွယ်မနေရပါ။ အနှံအရောင်ဟာ ၈ဝ-၈၅% ကောက်ရိုးဝါရောင်ဖြစ်နေရမယ်။ စပါးစိုက်အပြီး သက်နု = ၁၁ဝ ရက်၊ သက်လတ် = ၁၁၃-၁၂၅ ရက်နဲ့ သက်ကြီး = ၁၃ဝ နဲ့ ၁၃၆ ရက်မှာရိတ်ရမယ်။ အခြောက်ဆိုရင် စပါးနှံ စတွက်လာချိန်နောက် ၂၈-၃၅ ရက်နေရင် ရိတ်ရမယ်။ အစိုရိတ်ဆိုရင် ၃၂-၃၈ ရက်နေရင် ရိတ်ရမယ်။
၂ဝ၁၅ ရွေးကောက်ပွဲတုန်းက ရေးခဲ့တယ်။
- တံစဉ်တွေ ပြင်ထားကြတော့။
- မြွေပွေးလည်း သတိထားကြလော့။
- စပါးနှံကို တခါရိတ်ဖူးတော့ အားရှိတာပေါ့။
တမြန်နေ့က ရွာကနှမတယောက်ဆီ ကျွန်တော့်ဇနီးက ဗိုင်ဗာဖုန်းနဲ့ စကားပြောရတယ်။ သူ့ခင်ပွန်းနဲ့သား စပါးရိတ် သွားနေကြတယ်တဲ့။ စပါး စိုက်သူ၊ ရိတ်သူ၊ စားသုံးသူတွေ ကျန်းမာချမ်းသာကြပါစေ။
ဒေါက်တာတင့်ဆွေ
Comments
Post a Comment