How to live with HIV-positive person အတူနေမယ် မကူးစေရ
၂။ ဆရာရှင့် HIV/AIDS ရောဂါ ဘယ်နှနစ်ကြာမှ ရောဂါပိုး ရှိမရှိသိနိုင်ပါလဲဆရာ။ ကျွန်မက ရိုးရိုးသားသား နေထိုင်သူပါ။ ကျွန်မချစ်သူက အပျော်အပါးလိုက်စားသူပါ။ ချစ်သူနဲ့ လွန်ခဲ့တဲ့ ၂ နှစ်လောက်က တကြိမ်အတူတူနေမိပါတယ်။ ခုချိန် သူ့မှာ AIDS ဖြစ်နေပီဆရာ။ ကျွန်မလည်း သူ့ရောဂါ ကူးစက်ခံရမှာ စိတ်ပူမိပါတယ်။ လွန်ခဲ့တဲ့ ၂နှစ်တုန်းက အတူနေမိပီး ခုချိန်မှာ စိတ်ချရပါ့မလားဆရာ။ ကျွန်မ ဘာဆက်လုပ်ရမလဲဆရာ။ ၂ နှစ်ဆိုတဲ့အချိန်အတွင်း ရောဂါကူးစက်ခံရနိုင်ခြင်း ရှိမရှိဖြေပေးပါနော်ဆရာ။ ပြီးတော့ ရောဂါရှိသူနဲ့ အတူနေစဉ်မှာ ကွန်ဒုံးနဲ့ အတူနေရင် ကူးစက်ခံရနိုင်ပါသလားဆရာ။
၃။ ဆရာခင်ဗျာ HIV ပိုးရှိတဲ့သူနဲ့ တစ်အိမ်ထဲအတူနေနိုင်ပါသလား။ ရေအတူတူသောက်တာ ထမင်းပန်းကန် အတူတူ စားတာတွေကနေ ရောဂါကူးနိုင်ပါသလား။ မကူးနိုင်ဘူးဆိုရင်လဲ။ ဘယ်လောက်အထိ စိတ်ချရပါသလဲ။ ဘယ်လို အခြေအနေတွေကနေ ရောဂါကူးစက်နိုင်ပါသလဲ သိချင်ပါတယ် ဆရာခင်ဗျာ။
၎။ ကျွန်တော်က HIV ပိုးရှိတဲ့သူတယောက်ပါဆရာ။ အသက်က ၂၄ နှစ်ရှိပါပြီ။ လက်ရှိ ART ဆေးသောက်နေတာ ၂ နှစ်ရှိတော့မှာပါဆရာ။ အိမ်ထောင်မပြုရသေးပါဘူးဆရာ။ လူ့သဘာဝအရ အိမ်ထောင်ပြုပြီး မျိုးဆက်သစ်တွေရှိချင်ပါတယ်။ ကျွန်တော့အနေနဲ့ အိမ်ထောင်ပြုပြီး အိမ်ထောင်ဖက်နှင့်တကွ မွှေးဖွားလာတဲ့ကလေးမှာပါ ရောဂါပိုးမကူးဆက်ပဲ အိမ်ထောင်ပြုပြီး ကလေးယူမယ်ဆိုရင် ရနိုင်ပါသလားဆိုတာ သိလိုပါသဖြင့် ဆရာ့ဆီဆွေးနွေးအကြံတောင်း၊ အကူအညီတောင်းလိုက်ရတာပါဆရာ။
၅။ ဆရာရှင့် AIDS နဲ့ ပတ်သက်ပြီးသိချင်လို့ ပါရှင်။ သမီးတို့ အမတယောက် သူ့ အမျိူးသားစီက အဲဒီရောဂါကူးခဲ့ပါတယ်။ သူ့အမျိူးသားကတော့ အဲဒီရောဂါနဲ့ ဆုံးသွားပါပြီ။ အမကို သမီးတို့နဲ့အတူ ပြန်ခေါ်ထားခဲ့တဲ့အတွက် အတူနေမိသားစု အနေနဲ့ ရောဂါမကူးအောင် ဘယ်လိုရှောင်ရန်ဆောင်ရန်လေးတွေ ရှင်းပြပေးစေချင်ပါတယ်။ ရောဂါသယ်လည်း သက်တမ်းရှည်အောင် ဘယ်လိုနေရမလည်း ဘယ်လိုကုပေးရမလည်းဆိုတာလေးတွေကို ကျေးဇူးပြု၍ ပြောပြပေးစေချင်ပါတယ်ရှင့်။
HIV ပိုးရှိတဲ့သူနဲ့ တအိမ်ထဲ နေရတာဟာ ပိုးမရှိသူနဲ့နေရတာနဲ့က ဘာမှသိပ်မထူးလှပါ။ ဒီအချက်ကို သုတေသနက ပြောတာ ဖြစ်ပါတယ်။ ပုံမှန်-သာမန် ထိတွေ့မှုတွေကြောင့်တော့ ဒီရောဂါပိုး ကူးတယ်ဆိုတာမရှိဘူး ပြောရလောက်အောင် စိုးရိမ်စရာ ကင်းပါတယ်။ ဒါပေမဲ့ အရမ်းကာရောတော့ မဟုတ်ဘူး။ တကယ်မကူးအောင် အချင်းချင်းဆက်သွယ်မှုနဲ့ အသိပညာတွေက သော့ချက်တွေ ဖြစ်ပါတယ်။ သံမဏိစည်းကမ်း ၁ ကနေ ၅ အထိ ပြောပါမယ်။
၁။ အခြေအနေမှန်ကို ရှင်းရှင်း သိနေကြအောင် ပွင့်ပွင့်လင်းလင်း ပြောပါ။ စိုးရိမ်တာ ရှိသမျှ ထုတ်ပြောပါ။ တယောက် အပေါ် တယောက် ရိုးသားပါ။ ကိုယ်ထင်တာကို တရားသူကြီးလုပ် ဆုံးဖြတ်ချက် မချပါနဲ့။
၂။ အကြောက် မလွန်ပါနဲ့။ မီးဖိုနဲ့ အိမ်သာ အတူသုံးရတာနဲ့ ပိုးက ကိုယ့်ဆီ ကူးမလာနိုင်ပါ။ အတူနေလေ့ရှိကြတဲ့ ညီအကိုလို၊ မောင်နှမလို၊ သားအမိ-သားအဖလို၊ အခန်းကို (ရှယ်) လုပ်နေလေ့ရှိတဲ့ သူငယ်ချင်းလို နေကြတာက စိုးရိမ်စရာ နတ္ထိပါ။
၃။ HIV အကြောင်း ကျန်းမာရေး-လူမှုရေးသုတတော့ လေ့လာထားပါ။ တိတိပပပြောပါ့မယ်။ သွေး၊ မိခင်နို့၊ ကျား-သုတ်ရည်၊ မ-ဗဂျိုင်းနားကအရည်၊ ဤလေးမည်ကနေသာ ကူးပါတယ်။ လက်ခြင်းထိ၊ ပါးခြင်းအပ်၊ ကျောခြင်းကပ်ယုံနဲ့ လုံးဝမကူးပါ။ သွားထိလို့ ဓါတ်လိုက်မှာလား ကြောက်စရာမထားပါနဲ့။ စာအတူဖတ်ပါ၊ တီဗွီအတူထိုင်ကြည့်ပါ။ ထမင်း တစားပွဲထဲ ထိုင်စားပါ။ ညောင်းလို့ နှိပ်နင်းပေးလဲ ရောဂါမရပါ၊ ကုသိုလ်သာရပါမယ်။
၎။ စည်းကမ်းကလနား သတ်မှတ်ထားပါ။ ကိုယ့်ပစ္စည်း လာသုံးတာကို အပြတ်ငြင်းပါ၊ အားမနာပါနဲ့။ ဆောရီး လောက်နဲ့ မရပါ။ ပိုးရှိသူကနေ ချတဲ့ စည်းကမ်းကိုလည်း တခြားလူတွေက လိုက်နာကြပါ။
၅။ သူ့အတွင်းရေးလုံခြုံမှုကို လေးစားပါ။ တစိမ်းတရံတွေကို သူကရောဂါသည်လို့ မလိုအပ်ဘဲနဲ့၊ နှိမ်ချင်တဲ့သဘောနဲ့ မပြောပါနဲ့။
HIV ပိုးရှိနေတဲ့ကိုယ်ဝန်ဆောင်ကနေ မွေးလာမဲ့ကလေးကို ကူးစက်နိုင်တဲ့ အခွင့်အလမ်း ၂ဝ-၄၅% ရှိတယ်။ ကူးနိုင်တဲ့ နည်းတွေက (၁) ကိုယ်ဝန်ဆောင်နေတုံး၊ (၂) မွေးဖွါးဖြစ်စဉ် ဖြစ်နေတုံး နဲ့ (၃) နို့တိုက်နေတုံး၊ သုံးခုလုံးကနေ ဖြစ်နိုင်တယ်။ နိုင်ပြောတာပါ။ သက်သာအောင်လုပ်နည်း ရှိပါသေးတယ်။ ကိုယ်ဝန်ဆောင်နေတုံး အချင်းကနေ သန္ဓေသားဆီ များသောအားဖြင့်မရောက်ပါ။ မိခင်က ကျန်းမာရေး ကောင်းနေရင် အချင်းကအကာကွယ်ပေးရာကျတယ်။ ဒါ့ကြောင့် (၁) မိခင်လောင်းက အစာအာဟာရ ကောင်းဘို့လိုတယ်။ (၂) တခြားရောဂါ (ငှက်ဖျား၊ တီဘီ၊ ဆီးအောင့်၊) မဝင်အောင် ဂရုစိုက်ရမယ်။ (၃) မိခင်က HIV ဆေးကုနေရင် ကလေးကို ကူးစရာအခွင့်အလမ်း ၂% ဘဲ ရှိလို့ ဆေးကုနေပါ။
အမေရိကားမှာ Zidovudine (ZDV, AZT, Retrovir) ဆေးကို စသုံးခဲ့တယ်။ အခု တခြားဆေးနဲ့ တွဲပေးနေတယ်။ ZDV ဆေးကို ကိုယ်ဝန် ၃ လနောက်ပိုင်းမှာ ပေးရတယ်။ မွေးပြီးတဲ့အထိပါ။ ဘာ အကာအကွယ်မှ လုပ်မထားရင် ကလေး ဖွါးနေတုံးမှာ မိခင်ကနေ ကလေးကူးဘို့ ၁ဝ-၂ဝ% ရှိတယ်။ သွေးနဲ့ ရေမြွှာရည်နဲ့ ထိရင် ကူးတယ်။ ဒါ့ကြောင့် ဆရာဝန်-ဆရာမကနေ ရေမြွှာအိတ်ကို စောပြီးဖေါက် မွေးမပေးရဘူး။ မွေးလမ်းချဲ့ မွေးတာလည်း ရှောင်ရမယ်။ LSCS ခွဲမွေးနည်းက ကူးစရာလမ်း နည်းစေတယ်။ အရင်က ဆေးပေးမထားရသေးရင် မွေးတော့မဲ့ အချိန်မှာ ZDV နဲ့ 3TC or Nevirapine ဆေး ပေးရတယ်။
မွေးပြီးတာနဲ့ ကလေးကိုလည်း ZDV ဆေး ၁ လခွဲအထိ ပေးရမယ်။ ပိုးရှိမိခင်က နို့တိုက်လို့ ကလေးကူးရတာ ၁၅% ရှိတယ်။ နို့စောစော ဖြတ်သင့်တယ်။ နို့မတိုက်လေ ကူးဘို့အခွင့် နည်းလေ။ မကြာသေးခင်ကဘဲ HIV ပိုးရှိသူ မိခင်တွေက နို့တိုက်တာကို WHO က တားမြစ် လိုက်ပါတယ်။ မအေကို ဆေးကုသမှုခံဘို့နဲ့ ကလေးမှာ ရောဂါပိုး ရှိ-မရှိ စောနိုင်သမျှ စောပြီး (၆ ပတ်အတွင်း) ဆေးစစ်ဘို့ပါ အကြံပြုတယ်။ ကလေးက ရောဂါပိုးရှိလို့ စောစော ဆေးမကုရင် ၂ နှစ်ထက် အသက် မရှည်ဘူးလဲ ဆိုပါတယ်။
တအိမ်သားလုံး ပိုးရှိ-မရှိ စစ်ပါ။ ပိုးရှိနေသူရဲ့ နှာရည်၊ သွားရည်၊ ဝမ်း၊ ဆီး၊ တံတွေး၊ ချွေး၊ အန်ဖတ်တွေမှာ သွေးမပါရင် မကူးစေပါ။ တအိမ်လုံး လက်အိတ် သုံးပါ။ ပိုးရှိသူမှာ အနာအဆာ၊ ဒဏ်ရာရရင် အမြဲ ပလာစတာ-ပတ်တီးစည်းထားပါ။ လူတိုင်းက လက်ဆေးတဲ့ အကျင့် လုပ်ကြပါ။ ပိုးမရှိတဲ့သူ ဒဏ်ရာရရင် အထူးဂရုစိုက်ပါ။ ပိုးမရှိတဲ့သူ နေထိုင်မကောင်း ဖြစ်ရင် ရှိသူနဲ့ အနေဝေးပါစေ။ သွားတိုက်တံ၊ သွားကြားထိုးတံ၊ မုတ်ဆိတ်ရိတ်ဒါး၊ လက်သည်းညှပ်၊ နားကပ်၊ စတာတွေ လုံးဝ လဲတာ၊ ငှားသုံးတာ၊ အတူသုံးတာ မလုပ်ရပါ။ သွေးထွက်နိုင်တဲ့ ဆော့ကစားတာမျိုး ရှောင်ပါ။ ကွန်ပြူတာ-ဂိမ်း ကစားလို့တော့ ရပါတယ်။ မိခင်နဲ့ ကလေး လက်ပွန်းတတီး နေယုံနဲ့တော့ ရောဂါမရပါ။ ကလေးချစ်လို့ မွှေးမွှေး များများ ပေးနိုင်ပါတယ်။
ပိုးရှိထား သူတွေ နိုင်ငံလှည့်ပြီး၊ ကမ္ဘာလှည့်ပြီး၊ ရောဂါကာကွယ်ရေး အသိပေးသူတွေ မနည်းတော့ပါ။ ဒီလိုအစာမျိုး ရောဂါက ဆရာဝန်မှ မဟုတ်ပါ၊ အလွန်တော်တဲ့၊ အင်မတန် စိတ်ထားမြင့်တဲ့ “ဆိုရှယ်-ဝပ်ကား” တွေ ဖြစ်နိုင်ကြပါတယ်။
HIV ကာကွယ်ရေး
HIV ကိုသုတေသနတွေ အများကြီးလုပ်နေပါတယ်။ အခုနောက်ဆုံး သတင်းကတော့ ဥရောပမှာ စမ်းသပ်နေတဲ့ ကာကွယ်ဆေးသောက်နည်းဖြစ်ပါတယ်။ Pre-exposure prophylaxis (PrEP) ပိုးနဲ့ မတွေ့ခင် ဆေးကြိုတင်သောက်နည်း ဖြစ်တယ်။ လူတယောက်ဟာ HIV ကူးစက်နိုင်တဲ့လိင်အပြုအမူရှိမယ်လို့ထင်တာတဲ့ ဆေးသောက်လိုက်တာပါ။
သံသယရှိတဲ့ လိင်မှုပြုမယ်ဆိုသူတိုင်း Truvada (tenofovir + emtricitabine) ဆေး ၂ ပြားကို ၂၄ နာရီ ကြိုတင် သောက်ထားလိုက်ပါ။ တကယ်ပဲအဲလိုအမှုပြုပြီးရင် တရက် ၁ လုံး၊ ၂ ရက်ဆက် သောက်လိုက်ပါ။ အခုလေ့လာမှုကို IPERGAY trial လို့ခေါ်ပါတယ်။ ပြင်သစ်နိုင်ငံမှာ ၆ နေရာနဲ့ ကနေဒါမှာ ၁ နေရာ စမ်းသပ်ခဲ့ပါတယ်။ သိသိသာသာ ထိရောက်တယ်လို့ ကောက်ချက်ချပါတယ်။ ပိုးရှိထားသူတွေ နိုင်ငံလှည့်ပြီး၊ ကမ္ဘာလှည့်ပြီး၊ ရောဂါကာကွယ်ရေး အသိပေးသူတွေ မနည်းတော့ပါ။ ဒီလိုအမျိုးအစားရောဂါက ဆရာဝန်မှမဟုတ်ပါ၊ အလွန်တော်တဲ့၊ အင်မတန် စိတ်ထားမြင့်တဲ့ ဆိုရှယ်ဝပ်ကားတွေပါ ဖြစ်နိုင်ကြပါတယ်။
HIV Prevention ကာကွယ်ဆေး http://doctortintswe.blogspot.com/2014/10/hiv-prevention.html
ဒေါက်တာတင့်ဆွေ
၆-၉-၂ဝ၁ဝ
Comments
Post a Comment