UMEH ဦးပိုင်လီမိတက်

UMEH ဦးပိုင်လီမိတက်
(သို့မဟုတ်)
တပ်မတော်လက်ဝါးကြီးအုပ် မဟာစီးပွားရေးလုပ်ငန်းကြီးများ

၁၅-၁-၂ဝ၁၆ နေ့ကလွှတ်တော်မှာ NLD ကိုယ်စားလှယ် ဦးအောင်မိုးညိုဆွေးနွေးချက်ကို လွှတ်တော်ဥက္ကဋ္ဌကနေ သတိတာပေးခံလိုက်ရတယ်။ သူ့ဆွေးနွေးချက်ထဲမှာ စစ်တပ်ပိုင် စီးပွါးရေးလုပ်ငန်းကြီးတွေအကြောင်းပါတယ်။ ကျွန်တော်ရှာဖွေစုဆောင်းထားတဲ့ စစ်တပ်ပိုင်မဟာစီးပွါးရေးလုပ်ငန်းကြီးအကြောင်းက စာမျက်နှာပေါင်း (၃ဝ) ကျော်ရှိလို့ အပိုင်း (၅) ပိုင်းခွဲ တင်ပါရစေ။

အပိုင်း (၁)
Union of Myanmar Economic Holdings Limited (UMEHL/UMEH) ပြည်ထောင်စုမြန်မာနိုင်ငံဦးပိုင်လီမိတက်ကို ဦးပိုင်လို့ခေါ်ပါတယ်။ Myanmar Economic Corporation (MEC) ကိုလည်းစစ်တပ်ကပိုင်တယ်။ UMEHL ကို ၁၉၉ဝ အထူးကုမ္ပဏီများအက်ဥပဒေအရ ဖွဲ့စည်းခဲ့တာဖြစ်တယ်။ ကနဦးရင်းနှီးမြှုပ်နှံ့မှုပမာဏ (၁့၆) ဘီလီယန်ဒေါ်လာရှိတယ်။ စစ်တပ်အစုနှစ်ခုက ခွဲပိုင်ဆိုင်ကြတယ်။ စစ်လက်နက်ပစ္စည်းဝယ်ယူဖြည့်တင်းရေးဦးစီးဌာနက ၄ဝ% နဲ့ စစ်ပြန် စစ်မှုထမ်းဟောင်းများအဖွဲ့က ၆ဝ% ပိုင်တယ်။ ကုန်သွယ်ခွန်နဲ့အမြတ်ခွန်တွေကနေ ကင်းလွတ်ခွင့် ရယူထားတယ်။

၂ဝ၁ဝ မှာ Ruby Mart ကိုဖွင့်လိုက်တယ်။ ရန်ကုန် ကျောက်တံတားမှာ ဧရိယာစတုရန်းပေ ၅ သောင်းကျယ်တယ်။ ကုန်သွယ်ရေးဝန်ကြီးဌာနအောက်က စိုက်ပျိုးထွက်ကုန် ကုန်သယ်မှုကနေပိုင်တယ်။ ဧရိယာစတုရန်းပေ ၅ သောင်း ကျယ်တဲ့ သီလဝါ စက်မှုအထူးဇုန်ကိုပိုင်တဲ့ အစုပေါင်း (၁၈) ခုထဲကတခုလည်းဖြစ်တယ်။ မူးယစ်ဆေးဝါးလုပ်ငန်း ကနေရတဲ့ငွေတွေကို ခဝါချပေးပြီး မြေပေါ်စီးပွါးရေးလုပ်ငန်းတွေလုပ်နေတဲ့ ခရိုနီတွေနဲ့ ဆက်စပ်အလုပ်လုပ်တယ်။ ဘဏ်တွေ၊ ခရီးသွားလုပ်ငန်းတွေ၊ အိုးအိမ်ခြံမြေလုပ်ငန်း၊ ပို့ဆောင်ရေးလုပ်ငန်း၊ သတ္တုလုပ်ငန်းစတာတွေလည်းပိုင်တယ်။ နိုင်ငံခြားရင်းနှီးမြှုပ်နှံမှုတွေအများစုက UMEHL နဲ့ဖက်စပ်လုပ်နေကြတယ်။ ၂ဝ၁၂ ခုနှစ်မေလထဲမှာ အမေရိကကနေ ဆန်ရှင်တွေ အတော်များတွေကို ရုပ်သိမ်းပေးလိုက်ပေမယ့် ဒီစစ်တပ်ပိုင် စီးပွါးရေးလုပ်ငန်းကြီးတွေကို (ဆန်ရှင်) ဆက်ထားသေးတယ်။

ဦးပိုင်ရဲ့လုပ်ငန်းမှားစာရင်းရှည်ကြီးထဲက အစိတ်အပိုင်းတခု -
• Bandula Transportation ဗန္ဓုလပို့ဆောင်ရေးလုပ်ငန်း၊
• Parami Bus ပါရမီဘတ်စ်ကားလိုင်း၊
• Myawaddy Trading မြဝတီထရိတ်ဒင်း၊
• Five Stars Ship Company ကြယ်ငါးပွင့်ကုမ္ပဏီ၊
• Myawaddy Bank မြဝတီဘဏ်၊
• Virginia Tobacco Company Limited ဗာဂျီးနီးယားဆေးကုမ္ပဏီလီမိတက်၊
• Myawaddy Tours & Travel မြဝတီ ခရီးသွားလုပ်ငန်း၊
• Myawaddy Enterprises Group မြဝတီ အင်တာပရိုက်စ်အုပ်စု၊
• Pyininbin Industrial Park စက်မှုပန်းခြံ၊
• UMEH Textile အထည်လုပ်ငန်း၊
• Jade mines ကျောက်စိမ်းလုပ်ငန်း၊
• Ruby and sapphire mines ပတ္တမြားနဲ့ နီလာလုပ်ငန်း၊

Myanmar Brewery Limited (MBL) မြန်မာ့အရက်ချက်လုပ်ငန်းရဲ့ ၄ဝ% ပိုင်တယ်။ စင်္ကာပူ Fraser and Neave Ltd က ၆ဝ% ပိုင်တယ်။ ၁၅ နှစ်စာချုပ်ဖြစ်ပြီး ထိုင်း Charoen Sirivadhanabhakdi ကဆက်ပိုင်တယ်။ Tiger Beer ဘီယာ၊ Myanmar Beer မြန်မာဘီယာ၊ ABC stout and Anchor Beer ဘီယာတွေထုတ်လုပ်တယ်။ မကြာသေးခင်က ဒေါ်လာ ၂၄၆ သန်းတန်တဲ့ဘီယာဈေးကွက်ကြီးရဲ့ ၅၅% ပိုင်ဘို့ရာ UMEH ဦးပိုင်ကလုပ်လာတယ်။ Fraser and Neave နဲ့ အတိုက်အခံဖြစ်တယ်။

တပ်မတော်ရဲ့မဟာစီးပွားရေးလုပ်ငန်း (သို့) ဦးပိုင်၏အစ
၁၉၅ဝ စုနှစ်အစောပိုင်းမှာ တပ်မတော်သားတွေကို စားသုံးကုန်ပစ္စည်းတွေ ဈေးနှုန်းချိုချိုနဲ့ ရောင်းချဘို့ DSI (Defense Services Institute) ကိုတည်ထောင်ခဲ့တယ်။ လုပ်ငန်းကဏ္ဍတွေတိုးချဲ့တယ်။ ၁၉၅ဝ စုနှစ်နှောင်းပိုင်းမှာ DSI ဟာ မြန်မာနိုင်ငံမှာ အကြီးမားဆုံးစီးပွားရေးလုပ်ငန်းကြီးဖြစ်လာတယ်။ တပ်မတော်လုပ်ကွက် အတော်များများဟာ ၁၉၅ဝ ခုနှစ် အထူးကုမ္ပဏီ အက်ဥပဒေအရ တစိတ်တပိုင်းအထူးအဆင့်အတန်းရယူထားလို့ အောင်မြင်လာတယ်။ ဘဏ်လုပ်ငန်း၊ သင်္ဘောလုပ်ငန်း၊ ကုန်သွယ်ရေးလုပ်ငန်း၊ ကုန်ထုတ်လုပ်ငန်း၊ စာအုပ်ထုတ်ဝေရေးလုပ်ငန်းနဲ့ လက်လီစီးပွားရေး လုပ်ငန်းတို့ကိုလည်းလုပ်ကတယ်။

အဲဒီ စီးပွားရေးလုပ်ငန်းတွေကရတဲ့ ဝင်ငွေတွေကို တပ်မတော်သားတွေနဲ့ သူတို့၏မိသားစုတွေ သက်သာချောင်ချိရေးနဲ့ နေထိုင်မှုဘဝ ကောင်းမွန်ရေးတို့အတွက် အသုံးပြုခဲ့တယ်။ လုပ်ငန်းအချို့ကို တပ်မတော်နိုင်ငံရေးအစီအစဉ် ရှေ့ပြေး အနေနဲ့ လုပ်ဆောင်ခဲ့တယ်။ ဥပမာ ၁၉၅ဝ စုနှစ် အစောပိုင်းကာလက DSI ကပိုင်တဲ့ မြဝတီပုံနှိပ်လုပ်ငန်းက လစဉ်ထုတ် မြဝတီစာစောင်ကို ထုတ်ဝေခဲ့တယ်။ ၁၉၅၂ ခုနှစ်မှာ ပထမဆုံးထုတ်ဝေတဲ့မြဝတီမဂ္ဂဇင်းဟာ တပ်မတော်အကျိုးစီးပွားကို ဖော်ထုတ်တဲ့ စိတ်ဓါတ်စစ်ဆင်ရေးလက်နက်တခုဖြစ်တယ်။ Guardian ဂါဒီယန်သတင်းစာနဲ့ ဂါဒီယန်မဂ္ဂဇင်းကိုလည်း ထုတ်ဝေခဲ့တယ်။ စစ်တပ်ကို ထောက်ခံသောအမြင်ကို ကိုယ်စားပြုနေကြတယ်။ စီးပွားရေးအခြေခံပေါ်မှာသာ ထုတ်ဝေဖြန့်ချိတယ်။

၁၉၆ဝ စုနှစ်စောစောပိုင်းမှာ DSI အောက်မှာ လုပ်ငန်းအနည်းငယ်သာကျန်ပြီး အများစုက အသစ်ထူထောင်လိုက်တဲ့ မြန်မာ့စီးပွားရေးဖွံ့ဖြိုးမှုကော်ပိုရေးရှင်း BEDC (ဘီအီးဒီစီ) အောက်ရောက်သွားတယ်။ သွင်းကုန်ပို့ကုန် လုပ်ငန်းနဲ့ အင်းဝဘဏ်၊ အင်းဝစာအုပ်တိုက်မှအစ ဘီးအီးဒီစီအရက်ဆိုင်အထိ ခြေလှမ်းကျဲခဲ့တယ်။ ဗမာ့စီးပွားရေးနယ်ပယ်မှာ အဓိကလွှမ်းမိုးနေရာယူလာတော့မယ့်အဖွဲ့အစည်းတရပ်လို့ စီးပွားရေးအသိုင်းအဝိုင်းက စောင့်ကြည့်နေခဲ့ကြရတယ်။

အဲဒီအရင်းအနှီးက အာဏာနဲ့ပေါင်းစပ်ထားတဲ့ စစ်ဗျူရိုကရက်အရင်းအနှီးတွေဖြစ်လို့ အခွင့်ထူးအခွင့်ကောင်းတွေလည်း အများအပြားခံစားခွင့်ရခဲ့တယ်။ အလွယ်ဆုံးဥပမာမှာ စစ်တပ်အရာရှိများ၏ လစာမှန်သမျှ အင်းဝဘဏ်ကတဆင့် ထုတ်ယူနိုင်အောင် စီစဉ်နိုင်ခဲ့တယ်။ ရန်ကုန်နဲ့ပြည်အကြားရှိ စပါးစက်အချို့နဲ့ စပါးတွေကို လက်ဝါးကြီးအုပ်ဝယ်ပြီး ပြည်ပတင်ပို့ခွင့်ရခဲ့တယ်။ သွင်းကုန်လိုင်စင်များလည်း အမြောက်အများရခဲ့တယ်။

ထိုအချိန်က ဗမာပြည်နိုင်ငံရေးလောကမှာ မတည်မငြိမ် ကသောင်ကနင်းရှိနေသည်။ လက်နက်ကိုင်အင်အားစုတွေ အားကောင်းဆဲရှိနေသလို ဖဆပလအဖွဲ့ကနှစ်ခြမ်းကွဲထွက်သွားခဲ့တယ်။ စစ်ဗိုလ်တွေက ကိုယ့်အစွမ်းကိုယ် စမ်းကြည့်လိုစိတ်တွေပေါ်နေပြီး နိုင်ငံရေးဇတ်ခုံပေါ်တက်အစွမ်းပြဘို့ တာစူလာတော့တယ်။ ၁၉၅၈ အာဏာသိမ်းပွဲဟာ ၁၉၆၂ အာဏာသိမ်းပွဲအတွက် ဝတ်စုံပြည့်ဇတ်တိုက်ခြင်းလို့ဆိုနိုင်သည်။

နိုင်ငံရေးအင်အားစုတရပ်အနေနဲ့ ဗြောင်ထွက်ရပ်ပြဘို့ရာ စစ်ရေးအင်အားသာမက ဓနအင်အားပါ ကျောထောက်နောက်ခံ ရှိဖို့လိုတယ်လို့ ယူဆခဲ့ကြဟန်တူတယ်။ DSI ခေါ် စစ်တပ်ကုန်ပစ္စည်းအရောင်းဆိုင်အတွေ့အကြုံရထားတဲ့ စစ်ဗိုလ်တွေဟာ ဘီအီးဒီစီကိုတည်ထောင်ခဲ့ကြတာဖြစ်တယ်။ အရင်းအနှီးဆိုတာ စစ်သားလစာထဲက လစဉ် ဖြတ်ယူတာလည်းပါခဲ့တယ်။ ဒါပေမယ့် ပြည်ပထွက်ပြီးဆက်သွယ်တာ၊ လာဘ်လာဘနဲ့ အခြားပွဲစားခံစားခွင့်စတဲ့ အခွင့်ထူးတွေကို လက်တဆုပ်စာ ထိပ်ပိုင်းမှအရာရှိကြီးတွေသာ ယူကြတယ်။

ဘီအီးဒီစီကိုဦးစီးတဲ့ စစ်ဗိုလ်တွေက နိုင်ငံတကာနိုင်ငံရေး၊ စီးပွားရေးနယ်ပယ်မှာ ဝင်ဆန့်လာအောင်လုပ်ကြတယ်။ နိုင်ငံခြားက နိုင်ငံရေး၊ စီးပွားရေး၊ အင်အားစုတွေနဲ့ ဆက်သွယ်မှု၊ ရင်းနှီးမှု၊ အထူးသဖြင့် ဂျပန်နိုင်ငံရေးလောက၊ စီးပွားရေးလောကနဲ့ ရင်းနှီးမှုရှိလာအောင် လုပ်ခဲ့ကြတယ်။

ဒါပေမယ့် စစ်အုပ်စုဆိုပြီး နိုင်ငံရေးစစ်မြေပြင်ကိုထွက်လာရာမှာ သူတို့မွေးရာပါရောဂါကို မကုစားနိုင်ပဲ ထွက်ခဲ့ခြင်းသာ ဖြစ်တယ်။ အဲဒီရောဂါက စစ်အုပ်စုကွဲတွေ ထပ်မံကွဲနေခြင်းပင် ဖြစ်တယ်။ ဘီးအီးဒီစီ ပေါ်ခဲ့ခြင်း သည်ပင်လျင် ထိုစဉ်က စစ်အုပ်စုအတွင်းမှာ ဗိုလ်ချုပ်နေဝင်းတဦးတည်း ပြည်မှားပြည်ပ ဝင်ငွေတွေနဲ့ ကြွယ်ဝနေခြင်းကို မကျေနပ်လို့ နောက်အုပ်စုတခုမှ ထိပ်ပိုင်းကစီစဉ်ခဲ့ခြင်းဖြစ်တယ်လို့ဆိုကြတယ်။ အဲတာကြောင့် ဘီအီးဒီစီကို ဗိုလ်ချုပ်ကြီးနေဝင်းက မျက်စိစပါးမွေးစူးခဲ့တယ်လို့ အဆိုရှိခဲ့တယ်။ အဲတာကြောင့် ၁၉၆၂ ခုနှစ် အာဏာသိမ်းပြီးသည့်နောက် ဗိုလ်ချုပ်နေဝင်းက နိုင်ငံတော်အာဏာကို လက်ဝါးကြီးအုပ်သိမ်းပိုက်ပြီး တခြားနိုင်ငံရေးအင်အားစုတွေကို နှိပ်ကွပ်ခြင်းနဲ့အတူ စစ်တပ်ထဲကအုပ်စုတွေကိုလည်း အပြတ်နှိမ်နှင်းတော့တယ်။ ကျနော်ကတော့ ဒီကောင်တွေရဲ့ပါးစပ်တွေထဲကဟာတွေ အကုန်ကော်ထုတ်ပစ်မှာပဲလို့ ဆွေးနွေးပွဲတခုမှာ ဦးနေဝင်းကထုတ်ပြောခဲ့တယ်။ ဘီအီးဒီစီ၊ အင်းဝဘဏ်စတဲ့ လုပ်ငန်းအားလုံး ပြည်သူပိုင်စာရင်းမှာ ပါသွားတော့တယ်။

၁၉၆၂ ခုနှစ်၊ တော်လှန်ရေးကောင်စီနာမည်နဲ့ အာဏာသိမ်းပြီး မြန်မာ့နည်းမြန်မာ့ဟန် ဆိုရှယ်လစ်စီးပွားရေးစနစ်ကို စတင်ချိန်မှာ အဲဒီတပ်မတော်စီးပွားရေးလုပ်ငန်းတွေဟာ ပြည်သူပိုင်လုပ်ရေးအစီအစဉ်အောက်မှာ ပထမဆုံး ခံလိုက်ရတော့တယ်။ ၁၉၆၃ ခုနှစ်၊ အောက်တိုဘာလ (၂ဝ) ရက်နေ့မှာ DSI နဲ့ BEDC ပိုင်ဆိုင်သည့်ပိုင်ဆိုင်မှုနဲ့ ကုမ္ပဏီ (၄၇) ခုကို ပြည်သူပိုင်သိမ်းပိုက်ခဲ့တယ်။ DSI အောက်မှာ ကုမ္ပဏီ (၅) ခုရှိပြီး BEDC အောက်မှာ ကုမ္ပဏီ ၄၂ ခုရှိတယ်။

၁၉၆၂ ခုနှစ်ကနေ ၁၉၈၈ ခုနှစ်အထိ၊ ဆိုရှယ်လစ်ခေတ်တလျှောက်လုံး စစ်တပ်စီးပွားရေးလုပ်ငန်းဆိုတာ မရှိခဲ့ပါ။ ဒါပေမယ့် အခြေခံကုန်ထုတ်လုပ်ရေးမှာပါဝင်ခဲ့တယ်။ အများစုက တပ်မတော်သားတွေနဲ့ သူတို့၏မိသားစု သက်သာ ချောင်ချိရေးလုပ်ငန်းတွေဖြစ်ပြီး အဓိကအားဖြင့် အသေးစားလုပ်ငန်း၊ တဦးချင်းလုပ်ကိုင်ခြင်းဖြစ်တယ်။ တပ်ရင်းရံပုံငွေက ဘဏ္ဍာရေးအထောက်အပံ့ ရယူသည်။ ဥပမာ တပ်ရင်းအလိုက် စပါးနဲ့ အသီးအရွက်စိုက်၊ ကြက်ဝက်ငါး မွေးမြူရေး၊ စားသောက်ဆိုင်၊ အရက်ဆိုင်ဖွင့်ခြင်း၊ ဗီဒီယိုပြခြင်းနဲ့ ဖယောင်းတိုင်လုပ်ငန်းကဲ့သို့ အိမ်မှားမှုလုပ်ငန်းတွေ ဖြစ်တယ်။ အာလုံးကို တပ်ရင်းရံပုံငွေက စိုက်ပေးတယ်။ ၁၉၈၈ ခုနှစ် စက်တင်ဘာလ၊ အာဏာသိမ်းပြီးနောက်မှသာ စစ်တပ် စီးပွားရေးလုပ်ငန်းများ အကြီးအကျယ် ပြန်လည်ရှင်သန်လာခြင်းဖြစ်တယ်။

(မှတ်ချက်။ ဦးဗလအမည်နဲ့ရေးသားချက် + အင်တာနက်ရင်းမြစ်တွေကနေ အခြေခံရေးသားထားတာဖြစ်ပါတယ်။ စစ်တပ်ရဲ့ ထိပ်တန်းလှို့ဝှက်သဘောဆန်တဲ့အကြောင်းအရာဖြစ်လို့ တိကျမှုအားနည်းနိုင်ပါတယ်။)

ဒေါက်တာတင့်ဆွေ