မြန်မာနိုင်ငံသားတွေ ဘယ်မှာနေနေ ကျန်းမာကြပါစေ

Photo taken on 19-11-2011 by an Indian photo-journalist at Yamuna Clinic
This Blog is created on 10th October 2014

How to ask ကျန်းမာရေးနဲ့ ဆေးပညာ မေးလိုတာရှိပါက

• ဖေ့စ်ဘွတ် ကွန်မင့်ကနေ မမေးပါနဲ့။
• ဖြစ်တဲ့သူရဲ့ ကျား-မ နဲ့ အသက်ကို အရင်ဆုံးရေးပါ။ နာမည် မလိုအပ်ပါ။
• ဖြစ်နေတာ ၁-၂-၃။ ဖြစ်တာဘယ်လောက်ကြာပြီ။ လိုအပ်ရင် ရာသီ၊ အိမ်ထောင်ရေး၊ ကျန်းမာရေးနောက်ခံ၊ နေတဲ့တိုင်းပြည်။ တိုတိုရှင်းရှင်းသာရေးပါ။
• ဆေးစစ်ချက်တွေနဲ့ ပုံတွေကို အတည့်ပို့ပါ။ လိုတာကိုသာပို့ပါ။ အာလ်ထွာဆောင်းမှာ ပုံမလိုပါ။ မှတ်ချက်သာလိုတယ်။
• SMS အရေးအသားမျိုးကို မဖတ်တတ်ပါ။ မြန်မာစကားကို အင်္ဂလိပ်စာလုံးနဲ့ရေးတာကို မဖတ်ပါ။
• ဖုန်းဆက်ပြီးမေးရင် အချိန်ဇုန်မတူတာရော၊ အသံထွက်လွဲနိုင်တာရောကြောင့် အဆင်မပြေပါ။
• မေးတဲ့သူက မိမိကိုယ်မိမိ သား-သမီးလို့မရေးပါနဲ့။ ဖြေမယ့်ဆရာဝန်ကို ဆရာလို့သာသုံးပါ။
• ဆေးရုံ-ဆေးခန်း-ဆရာဝန်-ဆေးဆိုင်-ဆေးဈေး-ကုန်ကျစရိတ် စတာတွေကို မသိပါ။
• မေးစရာနေရာ (၁) အီးမေးလ် doctortintswe@gmail.com (၂) ဖေ့စ်ဘွတ် https://www.facebook.com/tint.swe.dr (၃) ဖေ့စ်ဘွတ် https://www.facebook.com/drtintswe/
• မေးနည်းစည်းကမ်းအရ မမေးလိုသူများ http://doctortintswe.blogspot.com/ Dr. Tint Swe's Writings မှာ ရှာဖတ်နိုင်ကြပါတယ်။

Saturday, December 17, 2016

Human Heart လူ့နှလုံး

1. Right Coronary ညာ (ကိုရိုနရီ)
2. Left Anterior Descending ဘယ် ရှေ့-အဆင်း
3. Left Circumflex ဘယ် ပတ်လည်
4. Superior Vena Cava (ဆူပီးရီးယား-ဗီနာကေဗာ)
5. Inferior Vena Cava (အင်ဖီးရီးယား-ဗီနာကေဗာ)
6. Aorta (အေရိုတာ)
7. Pulmonary Artery (ပါလ်မိုနရီ-အာထရီ)
8. Pulmonary Vein (ပါလ်မိုနရီ-ဗိန်း)
9. Right Atrium ညာ (အေထရီယမ်)
10. Right Ventricle ညာ (ဗင်ထရီကယ်လ်)
11. Left Atrium ဘယ် (အေထရီယမ်)
12. Left Ventricle ညယ် (ဗင်ထရီကယ်လ်)
13. Papillary Muscles (ပက်ပလရီ) ကြွက်သား
14. Chordae Tendineae (ခေါ်ဒေး-တင်ဒီနေး)
15. Tricuspid Valve (ထရိုင်ကပ်စ်ပစ်-ဗာ့လ်ဖ်)
16. Mitral Valve (မိုင်ထရယ်-ဗာ့လ်ဖ်)
17. Pulmonary Valve (ပါလ်မိုနရီ-ဗာ့လ်ဖ်)

လူ့ Heart နှလုံးဟာ အခေါင်းပါ-အခန်းပါ-ကြွက်သားနဲ့လုပ်တဲ့အင်္ဂါ ဖြစ်တယ်။ အဖျားရှူးလို့ Cone-shaped ခေါ်တယ်။ ရှေ့မှာ Sternum ရင်ညွန့်ရိုးနောက်မှာ Thoracic vertebral column ရင်ခေါင်းပိုင်းကျောရိုး ရှိတယ်။ ရှေကကြည့်ရင် နှလုံးရဲ့ ၃ ပုံ ၂ ပုံ က ဘယ်ဘက်ခြမ်းမှာ ရှိတယ်။ နှလုံးထိပ်ချွန်တဲ့နေရာကို Apex (အေးပက်စ်) ခေါ်တယ်။ နှလုံးဟာ Pump (ပန့်မ်) စုတ်ထုတ်စက်သဘောဖြစ်တယ်။ အမှန်က စုတ်ထုတ်စက် နှစ်ခုတွဲထားသလို ဖြစ်ပါတယ်။

ယောက်ျားလူကြီးလက်သီးဆုပ် အရွယ်ရှိတယ်။ ၅ x ၃့၅ x ၂့၅ လက္မ။ အမျိုးသမီး နှလုံးက ၉ အောင်စ (၂၅ဝ ဂရမ်)၊ အမျိုးသားတွေမှာ ၁ဝ့၅ အောင်စ (၃၅ဝ ဂရမ်) လေးပါတယ်။ အလွှာ ၃ ထပ်ရှိတယ်။ အတွင်းဆုံး ထပ်ကို Endocardium (အင်ဒိုကားဒီးယမ်)၊ အလယ်ထပ်ကို Myocardium (မိုင်ယိုကားဒီယမ်) နဲ့ အပြင်ဆုံးက အဖုံးကို Pericardium (ပယ်ရီကားဒီယမ်) ခေါ်တယ်။ အဖုံးက နှစ်လွှာပါအိတ်လိုရှိလို့ Pericardial sac (ပယ်ဒီကာဒီရယ်-ဆက်) ခေါ်တယ်။ အိတ်ထဲမှာ အရည်နည်းနည်းရှိနေတယ်။

Chambers of the Heart အခမ်း ၄ ခန်းရှိတယ်။
1. Right atrium (RA) ညာ အထက်ခန်း၊ (ရိုက်-အေထရီယမ်)၊
2. Right ventricle (RV) ညာ အောက်ခန်း၊ (ရိုက်-ဗင်ထရီကယ်လ်)၊
3. Left atrium (LA) ဘယ် အပေါ်ခန်း၊ (လက်ဖ်-အေထရီယမ်)၊
4. Left ventricle (LV) ဘယ် အောက်ခန်း၊ (လက်ဖ်-ဗင်ထရီကယ်လ်)၊

Valves of the Heart အဆို့ရှင် ၄ ခုရှိတယ်။
နှလုံးရဲ့ အခန်းတိုင်းမှာ One-way valve တဖက်သွား အဆို့ရှင်တွေ ရှိတယ်။ သွေးတွေကို သွားစေချင်တဲ့ ဘက်ကိုသာ သွားစေဘို့ ဖြစ်တယ်။ နှလုံးကြွက်သားတွေကို Contract ညှစ်လိုက်ရင် အဆို့ရှင်တွေ ပွင့်လာတယ်။ ပြီးရင် ပြန်ပိတ်တယ်။
1. ညာ-အထက်ခန်းမှာ ရှိတာက Tricuspid valve (ထရွိုင်ကပ်စ်ပစ်-ဗာ့လ်ဖ်)၊ Three-flapped, Three cusps အဖက် ၃ ခု ပါတယ်။
2. ညာ-အောက်ခန်းမှာ ရှိတာက Pulmonary valve (ပါလ်မိုနရီ-ဗာ့လ်ဖ်)၊ Crescent-shaped cusps လခြမ်းပုံ ၃ ခုစီ ပါကြတယ်။ Semilunar valves လို့လဲ ခေါ်တယ်။
3. ဘယ်-အပေါ်ခန်းမှာ ရှိတာက Mitral valve (မိုင်ထရွယ်-ဗာ့လ်ဖ်)၊ Mitral valve မှာ Flaps အဖတ် နှစ်ဖတ် ပါလို့ Bicuspid valve လို့လဲခေါ်တယ်။
4. ဘယ်-အောက်ခန်းမှာ ရှိတာက Aortic valve (အေယိုးတစ်-ဗာ့လ်ဖ်) ခေါ်တယ်။ Flaps အဖတ် နှစ်ဖတ် ပါလို့ Bicuspid valve လို့လဲ ခေါ်တယ်။

Mitral valve (မိုင်ထရယ်-ဗာ့လ်ဖ်) ဆိုတာ ခရစ်ယာန် (ဘစ်ရှော့) ဆောင်းရတဲ့ ဦးထုပ်တမျိုးကို Bishop's mitre ကနေလာတဲ့ အသုံးအနှုံးဖြစ်တယ်။ လေးဘက်နာခေါ်တဲ့ Rheumatic fever (ရူမက်တစ်) အဖျားကနေ ဆက်ဖြစ်တတ်တဲ့ Rheumatic heart disease (ရူမက်စတစ်) နှလုံးရောဂါ ဖြစ်ရင် Mitral stenosis (မိုက်ထရယ်-စတီနိုးဆစ်) အဆို့ရှင်-ကျဉ်းတာ ဖြစ်တယ်။ တချို့ မွေးရာပါလဲ ဖြစ်တယ်။ Mitral regurgitation (မိုင်ထရယ်-ရီဂါဂျီတေးရှုင်း) အဆို့ရှင် ကျယ်-မလုံတာက အမျိုးသမီး အသက်ကြီးသူတွေမှာ ပိုများတယ်။ နှလုံးသွေးလာနည်းလို့ ဖြစ်တဲ့ Ischemic heart disease နှလုံးရောဂါကနေလဲ ဆက်ဖြစ်တတ်တယ်။ Left ventricle ဘယ် အောက်ခန်း ကြီးသူတွေမှာလဲ နောက်ဆက်တွဲ ဖြစ်တတ်တယ်။ Rheumatic fever ကနေလဲ ဖြစ်သေးတယ်။

Blood Flow သွေးလှည့်ပတ်ပုံ
• တကိုယ်လုံးက သွေးအဟောင်းတွေဟာ ကိုယ်အထက်ပိုင်းက Superior vena cava (SVC) (ဆူပီးရီးယား-ဗီနာကေဗာ) သွေးပြန်ကြောကြီးနဲ့ အောက်ပိုင်းကဆိုရင် Inferior vena cava (IVC) (အင်ဖီးရီးယား-ဗီနာကေဗာ) သွေးပြန်ကြောကြီးကနေ နှလုံးဆီကို ဝင်လာကြတယ်။ ညာဘက် (အေထွီယမ်) က လက်ခံတယ်။
• ပြီးတော့ (ထွိုင်ကပ်စပစ်-ဘာ့လ်ဖ်) ကို ဖြတ်လို့၊ အောက်ဖက်က ညာဘက် (ဗင်ထွီကယ်လ်) ကို သွေးတွေ ရောက်လာတယ်။
• ညာဘက် (ဗင်ထွီကယ်လ်) ညှစ်ထုတ်ရင် သွေးတွေဟာ Pulmonary artery (ပါလ်မိုနရီ-အာထွီ) အဆုပ်- သွေးလွှတ်ကြောကတဆင့် အဆုပ်တွေထဲ ရောက်သွားတယ်။ အသက်ရှူတဲ့ လေထဲက အောက်စီဂျင်ကို သုံးပြီး၊ သွေးအသန့် ဖြစ်လာတယ်။
• အောက်စီဂျင်ပါတဲ့ သွေးက Pulmonary veins (ပါလ်မိုနရီ-ဗိန်း) အဆုပ်-သွေးပြန်ကြောကတဆင့် ဘယ်ဘက် (အေထွီယမ်) ကို ရောက်လာတယ်။
• ဘယ်ဘက် (အေထွီယမ်) က Mitral valve (မိုင်ထရွယ်-ဗာ့လ်ဖ်) ကို ဖြတ်ပြီး အောက်က ဘယ်ဘက် (ဗင်ထွီကယ်လ်) ထဲရောက်တယ်။
• ဘယ်ဘက် (ဗင်ထွီကယ်လ်) က ညှစ်ထုတ်ရင် (အေယိုးတစ်-ဗာ့လ်ဖ်) ကိုဖြတ်ပြီး Aorta (အေအိုတာ) သွေးလွှတ်ကြောကြီးထဲ ရောက်တယ်။ သူကနေထွက်တဲ့ သွေးလွှတ်ကြောတွေကတဆင့် တကိုယ်လုံးကို သွေးအနှံ့ ရောက်သွားတော့တယ်။

အထက်ခန်းတွေနဲ့ အောက်ခန်းတွေက သွေးကို တပြိုင်နက်တည်း ညှစ်ထုတ်ကြတယ်။ နှလုံး ညှစ်တာနဲ့ လျှော့တာ အလုပ် နှစ်မျိုးပါတဲ့ ဖြစ်စဉ်တခုကို Cardiac Cycle နှလုံး-သံသရာစက်ဝိုင်း ခေါ်တယ်။ ဖြစ်စဉ် တပါတ်က (ဝ့ဂ) စက္ကန့်သာ ကြာတယ်။ ညှစ်ထုတ်တဲ့ အဆင့်ကို Systolic phase နဲ့ ပြန်လျှော့ပေးတဲ့ အဆင့်ကို Diastolic phase လို့ ခေါ်တယ်။ ဒါ့ကြောင့် Blood pressure သွေးဖိအား တိုင်းတဲ့အခါ အထက်သွေးချိန်ကို Systolic Pressure (ဆစ်စတိုးလစ်-ပရှက်ရှာ) နဲ့ အောက်သွေးချိန်ကို Diastolic pressure (ဒိုင်ယာစတိုးလစ်-ပဂက်ရှာ) လို့ ခေါ်တယ်။ နှလုံးတခါညှစ်ရင် သွေး 70 ml ရှိလို့ တမိနစ်မှာ 5 Liters ရှိတယ်။ လူတယောက်မှာရှိတဲ့ သွေးထုထည် ၅ လီတာနဲ့ အတူတူဘဲ။

Heart sound နှလုံးခုန်သံ
ဆရာဝန်တွေက Stethoscope (စတက်သိုစကုပ်) နားကြပ်နဲ့ နားထောင်ကြတယ်။ ကျွန်တော်တို့က နားက ကြားတာကို ပါးစပ်ကနေ ပြန်ပြောရင် ဒုတ်-ဒုတ်ဆိုပြီး ခပ်လွယ်လွယ် အရင်သံရော နောက်သံကို တမျိုးထဲ ပြောလေ့ ရှိကြတယ်။ အင်္ဂလိပ်တွေကတော့ Lub-Dub လပ်ဖ်-ဒပ်ဖ်လို့ အသံ ၂ မျိုး ခွဲထွက်ကြတယ်။ အသံတွေ ပြန်ပြောကြတာ သူတို့နဲ့ ကျွန်တော်တို့ ကွာတာ ဒီနေရာမှာသာ မဟုတ်ပါ။ ကြက်တွန်တာကို အောက်-အိ-အီ-အွတ်လို့ ပြောတာကို သူတို့က Cock a doodle doo လို့ ရေးကြတယ် မဟုတ်ပါလား။ အသံကို ဖေါ်ပြတာ မတူတာတော့ ထားပါ။ ပဌမသံနဲ့ ဒုတိယသံ ခွဲပြောတာက စနစ်ကျတယ်။

1. First Heart Sound ပဌမသံဟာ (ထရွိုင်-ကပ်စ်ပစ်-ဗာ့လ်ဖ်) နဲ့ (မိုင်ထရွယ်-ဗာ့လ်ဖ်) တွေ ပိတ်တဲ့ အသံနဲ့ အဲဒီအချိန်မှာ ဖြစ်လာနတဲ့ သွေးလှိုင်းတွေကြောင့် ဖြစ်တယ်။
2. Second Heart Sound ဒုတိယသံဟာ (ပါလ်မိုနရီ-ဗာ့လ်ဖ်) နဲ့ (အေယိုးတစ်-ဗာ့လ်ဖ်) တွေ ပိတ်တဲ့ အသံနဲ့ အဲဒီအချိန်မှာ ဖြစ်လာနတဲ့ သွေးလှိုင်းတွေကြောင့် ဖြစ်တယ်။

Pulse ဆိုတာ ရူပဗေဒ နဲ့ ရုက္ခဗေဒမှာတော့ တမျိုးစီ ခေါ်ကြတယ်။ ဆေးပညာမှာ Pulse Rates (ပါ့လ်စ်-ရိတ်) ဆိုတာ လက်ကောက်ဝတ်မှာ စမ်းတဲ့ သွေးခုန်နှုန်းကို ခေါ်တယ်။ အမှန်က နှလုံးခုန်တာကို အလွယ်စမ်းတာ ဖြစ်တယ်။ တခြား နေရာတွေမှာလဲ စမ်းလို့ရပါတယ်။ ဟောလိဝုဒ်-ရုပ်ရှင်တွေမှာတော့ လည်ပင်းစမ်းပြတတ်တယ်။

Heartbeat (ဟာ့တ်-ဘိ-တ်) တမိနစ်မှာ ၇၂ ခါခုန်တယ်။ တနေ့မှာ အခါ ၁ သိန်။ ၁ နှစ် ၃၈ သန်း။ နှလုံးခုန် မြန်တာကို Tachycardia ခေါ်တယ်။ နှလုံးခုန် နှေးတာကို Bradycardia ခေါ်ပြီး နှလုံးခုန်မမှန်ရင် Arrhythmias လို့ ခေါ်တယ်။ Heart rate (Pulse Rate) က အသက် မတူရင် မတူဘူး။ ကိုယ်ဝန် ၅ ပါတ်ရှိရင် အထဲကကလေး နှလုံး စခုန်နေပြီ။ ခုန်ကာစမှာ အမေလို တမိနစ်မှာ ၈ဝ-၈၅ ခုန်ရာကနေ တရက်မှာ ၃ ခါတိုးနှုန်းနဲ့ မြန်မြန်လာတယ်။ ၉ ပါတ်ရှိရင် ၁၇၅ အထိရှိလာတယ်။ ဒိနောက် ပြန်နှေး လာတယ်။ ပုံမှန် Fetal heart rate ဗိုက်ထဲကလေး နှလုံးခုန်နှုန်း တမိနစ်မှာ ၁၂ဝ-၁၈ဝ ရှိတယ်။ မွေးစကနေ ၆ လကလေး = ၁၃ဝ၊ တနှစ်သား = ၁၂ဝ၊ ၃-၆ နှစ်သား = ၁ဝဝ၊ ၈ နှစ်သား = ၉ဝ၊ ၁၂ နှစ်သား = ၈၅၊ လူကြီး = ၆ဝ-၁ဝဝ။

Heart rate in children ကလေး နှလုံးခုန်နှုန်း
ကလေးတွေက လူကြီးတွေထက် နှလုံးခုန်မြန်တယ်။ ဒါ ပုံမှန်ဖြစ်တယ်။
• ၁ နှစ်အောက်ကလေး = တမိနစ်မှာ ၁၁ဝ-၁၆ဝ
• ၁-၂ နှစ် ကလေး = တမိနစ်မှာ ၁ဝဝ-၁၅ဝ
• ၂-၅ နှစ်ကလေး = တမိနစ်မှာ ၉၅-၁၄ဝ
• ၅-၁၂ နှစ်ကလေး = တမိနစ်မှာ ၈ဝ-၁၂ဝ
• ၁၂ နှစ်အထက်ကလေး = တမိနစ်မှာ ၆ဝ-၁ဝဝ

နှလုံးက ဘာလို့ခုန်နေရတာလဲ
Electrical System ကိုယ်ခန္ဓာမှာ လျှပ်စစ်စနစ် နဲ့ လျှပ်စစ်ကို သုံးနိုင်စွမ်းရှိတဲ့ Special cells စပါယ်ရှယ် (ဆဲလ်) တွေ ရှိနေလို့ပါ။ Pacemaker cells (ပေ့စ်-မိတ်ကာ-ဆဲလ်) တွေဆိုတာ နှလုံးထဲမှာ ရှိသေးတယ်။ Electrical impulses လျှပ်စစ် (အင်မ်ပါ့လ်စ်) ကြောင့် နှလုံးကြွက်သားတွေ Contract ညှစ်စေတယ်။ မွေးရာပါ (ပေ့စ်-မိတ်ကာ-ဆဲလ်) ကို Sinoatrial node (SA node) (စိုင်နိုအေရီရယ်-နုတ်) လို့ ခေါ်တယ်။ ညာ-အထက်ခန်းမှာ ရှိတယ်။ သူ့ကို Medulla Oblongata ခေါ် ဦးနှောက်ရဲ့ အစိတ်အပိုင်း တခုက ထိန်းပေးနေတယ်။

SA node ကနေ Specialized fibers (စပါယ်ရှယ်-ဖိုင်ဗာ) အာရုံကြောတွေ ဖြာထွက်နေတယ်။ အပေါ်ခန်းတွေမှာရှိတဲ့ (ဖိုင်ဗာ) တွေကနေ အပေါ်နှစ်ခန်းလုံးကို တပြိုင်ထဲ ညှစ်စေတယ်။ ဝ့၎ စက္ကန့်သာ ကြာတယ်။ နှလုံး အောက်ခမ်းတွေကို သွားတဲ့ (စပါယ်ရှယ်-ဖိုင်ဗာ) ကို Bundle of His (ဘန်ဒယ်လ်-အော့ဖ်-ဟစ်) လို့ နာမယ်ပေးထားတယ်။ သူကနေ ဆက် ဖျာထွက်တာတွေကို Purkinje fibers (ပါကင်ဂျီ-ဖိုင်ဗာ) လို့ ခေါ်ပြန်တယ်။

Autonomic nervous system (အော်တိုနောမစ်-နားဗတ်စ်-ဆစ်စတမ်) အလိုအလျောက် အာရုံကြောစနစ်က အာရုံကြောတွေလဲ ရှိသေးတယ်။ ဒီစနစ်မှာလဲ ၂ မျိုးရှိတယ်။ Sympathetic nervous system (ဆင်ပသက်တစ်-နားဗတ်စ်-ဆစ်စတမ်) နဲ့ Parasympathetic nervous system (ပါရာ-ဆင်ပသက်တစ်-နားဗတ်စ်-ဆစ်စတမ်) တွေ ဖြစ်တယ်။ (ဆင်ပသက်တစ်) စနစ်ကြောင့် နှလုံးခုန်တာ မြန်စေ-အားကောင်းစေပြီး၊ (ပါရာ-ဆင်ပသက်တစ်) ကြောင့် နှေးစေ-အားနည်းတယ်။

လျှပ်စစ်လှိုင်းတွေကို တိုင်းတာလို့ ရတယ်။ (ဂရပ်) မျဉ်းနဲ့ ပြတာကို Electrocardiogram (အလက်ထရို-ကာဒီယို-ဂရမ်) (ECG) (EKG) ခေါ်တယ်။ မျဉ်းတန်းတွေကို တခုချင်း နာမယ်ပေးထားတယ်။
• P wave (ပီ-ဝေ့ဖ်) ဆိုတာ နှလုံးအပေါ်ခန်းတွေမှာ ညှစ်ခါနီးရှိတဲ့ Spread of electrical activity လျှပ်စစ် ပြန့်နှုန်း ဖြစ်တယ်။
• QRS complex (ကျူ-အာရ်-အက်စ်-ကွန်ပလက်စ်) ဆိုတာ နှလုံးအောက်ခန်းတွေမှာ ညှစ်ခါနီးရှိတဲ့ Spread of electrical activity လျှပ်စစ် ပြန့်နှုန်း ဖြစ်တယ်။
• T wave (တီ-ဝေ့ဖ်) ဆိုတာ နှလုံးအောက်ခန်းတွေမှာ Recovery phase ပြန်ကျလာချိန်မှာ တိုင်းတာဖြစ်တယ်။

နှလုံးမှာ သူ့ကိုယ်သူ သွေးလှည့်စနစ်ရှိတယ်။ Coronary arteries (ကိုရိုနရီ-အာထရီ) တွေလို့ ခေါ်တယ်။ နှလုံးသွေးကြော ကျဉ်းရောဂါ Coronary artery disease (CAD) ဆိုတာ အဲဒီသွေးကြောတွေ ကျဉ်းခြင်းတာဖြစ်ပါတယ်။ ဒါတွေမှာ လာပိတ်တာကို Heart attack (ဟတ်-အတက်ခ်) ရတယ်လို့ ခေါ်တယ်။

Dr. တင့်ဆွေ

No comments:

Post a Comment

Note: Only a member of this blog may post a comment.