မြန်မာနိုင်ငံသားတွေ ဘယ်မှာနေနေ ကျန်းမာကြပါစေ

Photo taken on 19-11-2011 by an Indian photo-journalist at Yamuna Clinic
This Blog is created on 10th October 2014

How to ask ကျန်းမာရေးနဲ့ ဆေးပညာ မေးလိုတာရှိပါက

• ဖေ့စ်ဘွတ် ကွန်မင့်ကနေ မမေးပါနဲ့။
• ဖြစ်တဲ့သူရဲ့ ကျား-မ နဲ့ အသက်ကို အရင်ဆုံးရေးပါ။ နာမည် မလိုအပ်ပါ။
• ဖြစ်နေတာ ၁-၂-၃။ ဖြစ်တာဘယ်လောက်ကြာပြီ။ လိုအပ်ရင် ရာသီ၊ အိမ်ထောင်ရေး၊ ကျန်းမာရေးနောက်ခံ၊ နေတဲ့တိုင်းပြည်။ တိုတိုရှင်းရှင်းသာရေးပါ။
• ဆေးစစ်ချက်တွေနဲ့ ပုံတွေကို အတည့်ပို့ပါ။ လိုတာကိုသာပို့ပါ။ အာလ်ထွာဆောင်းမှာ ပုံမလိုပါ။ မှတ်ချက်သာလိုတယ်။
• SMS အရေးအသားမျိုးကို မဖတ်တတ်ပါ။ မြန်မာစကားကို အင်္ဂလိပ်စာလုံးနဲ့ရေးတာကို မဖတ်ပါ။
• ဖုန်းဆက်ပြီးမေးရင် အချိန်ဇုန်မတူတာရော၊ အသံထွက်လွဲနိုင်တာရောကြောင့် အဆင်မပြေပါ။
• မေးတဲ့သူက မိမိကိုယ်မိမိ သား-သမီးလို့မရေးပါနဲ့။ ဖြေမယ့်ဆရာဝန်ကို ဆရာလို့သာသုံးပါ။
• ဆေးရုံ-ဆေးခန်း-ဆရာဝန်-ဆေးဆိုင်-ဆေးဈေး-ကုန်ကျစရိတ် စတာတွေကို မသိပါ။
• မေးစရာနေရာ (၁) အီးမေးလ် doctortintswe@gmail.com (၂) ဖေ့စ်ဘွတ် https://www.facebook.com/tint.swe.dr (၃) ဖေ့စ်ဘွတ် https://www.facebook.com/drtintswe/
• မေးနည်းစည်းကမ်းအရ မမေးလိုသူများ http://doctortintswe.blogspot.com/ Dr. Tint Swe's Writings မှာ ရှာဖတ်နိုင်ကြပါတယ်။

Monday, December 19, 2016

You can do it! အင်္ဂလိပ်စာ

ဆရာရှင့် ပထမဦးစွာ သမီးလို့ ကိုယ့်ကိုယ်ကိုသုံးပါရစေ။ သမီးအခုပြောမှာက ကျန်းမာရေးနဲ့ မဆိုင်ပါဘူး။ သမီးအရဲစွန့်ပြီး ပြောပြချင် တောင်းဆိုချင်တာပါ။ သမီ့း့ တခုမှာ့့ အနေနဲ့ အလုပ်လုပ်ခဲ့ပါတယ်။ သူငယ်ချင်းအပေါင်းသင်းတွေက ဘာသာစကား နှစ်မျိုးလောက်ပြောတတ်ကြပါတယ်။ သမီးရဲ့ အခက်ခဲက ကိုယ့်ကိုယ်ကို ယုံကြည်မှုမရှိဘူးဖြစ်နေတယ်။ ငါပြောလိုက်ရင်မှားသွားမလား မှားရင်ရှက်စရာကြီးဆိုတဲ့စိတ်အမြဲဝင်ပါတယ်။ သင်တန်း ဘယ်လောက်ပဲတတ် တတ် English စကားမပြောထွက်လာပါဘူး။  ဒီလိုပဲ စာရေးရင်လဲ ငယ်ငယ်ကတည်းက Grammer မပိုင်ခဲ့ဘူး။ နယ်မှာ ရွာမှာကျောင်းတတ်ခဲ့တေ့ာ မှားသွားမလားဆိုတဲ့စိတ်နဲ့ မြန်မာလိုပဲရေးတာများပါတယ်။ အင်္ဂလိပ်လို ရေးတတ် ပြောတတ်ချင်ပါတယ်။ ကိုယ်တိုင် self-study လုပ်ပေမယ့်လဲ ရတယ်မထင်ပါ။ ဆရာ့ကို အရဲစွန့်ပြီး တောင်းဆိုချင်တာက သမီးကို အင်္ဂလိပ်စာ အထူးသဖြင့် ရေးတတ်အောင် သင်ပေးစေချင်ပါတယ်။

စာရေးပြီး ပြန်ပို့မလို့ မေးတဲ့သူကို မှတ်မထားလိုက်မိပါ။ ဆောရီး။

ကျနော်က အင်္ဂလိပ်စာတော်သူ မဟုတ်ခဲ့ပါ။ ဆယ်တန်းမှာ (၄၇) မှတ်သာရတယ်။ ဦးသူတော် တပည့်မွေးသလို ဖြစ်တော့မယ်။ ဆေးကျောင်းမှာ စာအုပ်တိုင်းက အင်္ဂလိပ်လိုချည်းဖြစ်လို့ အတော်ကြိုးပမ်းရတယ်။ မီးလုံးအရောင်နဲ့ ပြောင်ချောနေတဲ့ စာရွက်ကနေ ရောင်ပြန်ဟပ်နေတာကို စိတ်ကတိုရတဲ့အထဲ ရောဂါဗေဒစာအုပ်ထဲမှာ ဒီရောဂါဟာ အဖြစ်မများတာ မဟုတ်ပါလို့ ရေးတာကိုဖတ်ရတာ အတော်ကသိကအောက်နိုင်ခဲ့တယ်။ နိုင်ငံရေးထဲရောက်တော့ အဲလိုစကားနဲ့ အရေးအသားမှာ ဝေ့ဝိုက်တာမျိုးတွေကို သွားလေရာ ကြားရတယ်။ ကိုယ်တိုင်လည်း ပြောတတ်လာတယ်။

မြန်မာပြည်အကြောင်း ဆွေးနွေးတဲ့ပွဲတခုမှာ မြန်မာပြည်ဆိုင်ရာ အိန္ဒိယသံအမတ်ကြီးတယောက်နဲ့ တွဲပြောရတော့ သူက စစ်အစိုးရကို ယုံရတာမဟုတ်ဘူး ကောက်ချက်ချတယ်။ ကျနော်က (အိတ်ဇယ်လင်စီ) ရဲ့ ဆွေးနွေးချက်ကို သဘောမတူစရာမရှိပါနဲ့ စပြီးဆွေးနွေးလိုက်တယ်။ အဲလို အင်္ဂလိပ်လို လူကြားထဲပြောနိုင်အောင် ကြိုးစားရတဲ့ ကိုယ်ပိုင်နည်းလေး ရေးပါရစေ။ အိန္ဒိယ-မြန်မာနယ်စပ်ကို စဖြတ်ကျော်ကတည်းက နယ်စပ် (စိုင်ဟား) မြို့လေးမှာ တာဝန်ကျတဲ့ ရဲအရာရှိနဲ့ အင်္ဂလိပ်လို စပြောရတာပါ။ (မဆလ) ခေတ်မှာ ပညာရေးအားမပေးတာကိုတော့ လူတိုင်း သိကြတယ်။ အင်္ဂလိပ်လိုပြောတာကိုလည်း ရှုတ်ချသေးတာ။ အဲဒီခေတ်မှာ တချို့ကလည်း စကားပြောရင် ယူနဲ့ အိုင်နဲ့ပြောတဲ့သူတွေက ရှိတာကိုး။ နောက်ကနေ ဗိုလ်ရူးလို့အပြောခံကြရတယ်။ ဆေးကျောင်းသားဘဝမှာ အင်္ဂလိပ်လိုဆိုလို့ ပါမောက္ခချုပ်နဲ့ ကော်ရီဒါမှာဆုံရင် ဂွတ်တမောနင်းပဲ လုပ်ခဲ့ရပါတယ်။ ဖတ်ရတာသာ အင်္ဂလိပ်လိုချည်းဖြစ်ပေမယ့် စာမေးပွဲဖြေရင် ကပြားဖြေရတော့ အင်္ဂလိပ်စာဘယ်တော်ပါ့မလဲ။

အိန္ဒိယကို ၁၉၉ဝ ဒီဇင်ဘာလကုန် ရောက်ကတည်းက ငါ အင်္ဂလိပ်စကားပြောနိုင်အောင် ဘယ်လိုလုပ်မလဲ နည်းလမ်း ရှာပါတယ်။ ဈေးဝယ်ရာ လမ်းသွားရာမှာ သုံးဖို့မဟုတ်ပါ။ ကိုယ့်လာရင်း ရည်ရွယ်ချက်ဖြစ်တဲ့ မြန်မာ့ဒီမိုကရေစီရေးကို သူများတွေကို သိအောင်ပြောရမယ်။ မေးရင်ဖြေရမယ်။ ဖြစ်စေချင်တာကို ရေရေလည်လည် ပြောတတ်မှ ဖြစ်တော့မယ်။

အခွင့်ကောင်းတခုကတော့ လမ်းဘေးဆိုင်းဘုတ်တွေပါ။ အားလုံးကို အင်္ဂလိပ်လိုချည်းပဲ ရေးထားတယ်။ အိုက်ဇောမြို့ထဲ သွားစရာရှိတိုင်း လမ်းဘေးက မြင်မြင်သမျှ မသိတဲ့အင်္ဂလိပ်စာလုံးတိုင်းကို အိတ်ကပ်ထဲက မှတ်စုစာအုပ်လေးမှာ ရေးမှတ်ခဲ့တယ်။ ယာယီနေထိုင်ရာစခန်းရောက်မှ (ပေါ့ကပ် ဒေရှင်နရီ) ကို လှန်တယ်။ အင်္ဂလိပ်သတင်းစာတစောင်မှာပြီး ဖတ်တယ်။ ပညာတွင်းကနက်ပါတယ်။ စာအုပ်တို့ အဘိဓာန်တို့ ဝယ်နိုင်အောင် မနည်းလုပ်ရတဲ့ဘဝပါ။ (ဂွတ်အင်္ဂလိခ်ျ) ကို စာအုပ်ရော ကက်ဆက်ခွေပါ ယူလာတယ်။ အတူလာသူတွေကို အင်္ဂလိပ်စာသင်ပေးတယ်။ (ဘီဘီစီ)၊ (ဗွီအိုအေ)၊ ရေဒီယိုတွေက သတင်းအတွက်နဲ့ ဘီဘီစီအင်္ဂလိပ်ပိုင်းကိုတော့ ကိုယ့်ညံ့တဲ့အင်္ဂလိပ်စာအတွက် နားထောင်ပါတယ်။

တစစနဲ့ တိုးတက်လာပါတယ်။ အကြား၊ စကား၊ နောက် အရေးအသားပါ လုပ်ကြည့်တယ်။ ကွန်ပျူတာ မပေါ်သေးပါ။ ဗလာစာအုပ်ကစာရွက်ဆုပ်ပြီး မြန်မာ့နိုင်ငံရေးဆောင်းပါးစရေးတယ်။ အိန္ဒိယအရှေ့မြောက်ဒေသမှာ ထုတ်ဝေနေတဲ့ အပတ်စဉ်ဂျာနယ်တခုကို ပို့တယ်။ သဘောကောင်းကြတယ်၊ ထည့်ပေးတယ်။ တပုဒ်မှာတော့ ခံလိုက်ရတယ်။ (ဟော်စ်ပီတယ်လ်တီ) ဧည့်ဝတ်ကျေပွန်မှုကို ကျေးဇူးတင်ကြောင်းရေးတာကို သူတို့က (ဟော့စ်တယ်လ်တီ) လို့ စာရိုက်တော့ ရန်လိုမှုဖြစ်သွားရော။ သဘောကောင်းကြတယ်၊ ကျွန်တော်ကလည်း ပြန်ပြီးရန်မတွေ့ပါ။

၁၉၉၂ အစကတည်းက ဒေလီကိုရွှေ့နေတော့ ဆိုက်ကားစီးတာ၊ ခရမ်းချဉ်သီး ဝယ်တာကအစ အင်္ဂလိပ်လို ရလာတယ်။ နိုင်ငံရေးကိစ္စတွေကို အင်္ဂလိပ်လိုမပြောဆိုရတဲ့နေ့ရယ်လို့ မရှိပါ။ အစည်းအဝေးတွေ၊ အခမ်းအနားတွေ၊ ဆီမီနာတွေ၊ ကွန်ဖရင့်တွေက များမှများ။ အဲဒါနဲ့ အိုးနင်းခွက်နင်းအဆင့်ကနေ တက်လာတယ်။ စကားလည်းကြွယ်လာတယ်။ နိုင်ငံရေးစကားပြောရာမှာ ဘာသာစကားကျွမ်းကျင်မှုလိုတယ်ဆိုတာတော့ ပြောစရာမလိုပါ။ ထပ်လိုတာ ရှိသေးတယ်။ စကားပြောကောင်းရင် နားထောင်တဲ့သူများမယ်။ ဖြစ်စေချင်တာကို ပြောတတ်ရင် ဖြစ်လာဖို့ မျှော်လင့်နိုင်တယ်။ ထပ်လိုသေးပါတယ်။ အပြောကောင်းရုံနဲ့တော့ တပွဲတိုးပဲရမယ်။ အချက်ကျကျ ပြောတတ်ရတယ်။ ပရိသတ်ကို သိရမယ်။ အချိန်အခါ ရွေးတတ်ရမယ်။ ကိုယ်ပိုင်အမြင်ကို တင်နိုင်ရမယ်။ အဲတော့ ဆက်ကြိုးစားရတယ်။

စစ်အစိုးရလက်အောက်မှာရှိတဲ့ မြန်မာပြည်ကို (အာဆီယံ) အဖွဲ့ဝင်အဖြစ် လက်မခံရေး လုံးပန်းခဲ့ကြတယ်။ ၁၉၉၆ မှာ ဥက္ကဋ္ဌမဖြစ်ရေးလည်း ချကြတယ်။ AIPMC ဖွဲ့ပြီး (အာဆီယံ) နိုင်ငံတွေထဲကအမတ်တွေနဲ့ လက်တွဲလုပ်ရတယ်။ ဆွေးနွေးပွဲတွေအပြင် ဧည့်ခံပွဲတွေကိုလည်း တက်ရတယ်။ တခါက ထိုင်းနိုင်ငံခြားရေးဝန်ကြီး (ဆူရင် ပစ်ဆဝမ်) နဲ့ ညနေပွဲတခုမှာ မိတ်ဆက်ပေးတော့ မြန်မာစစ်အစိုးရကို ဆန့်ကျင်နေတဲ့ဘက်ကလို့ ဆိုတော့ အာ့း့ အတော်ခက်တဲ့ အလုပ်ပဲလို့ သူက မှတ်ချက်ပေးတယ်။ အဲဒီစကားကို ကောက်တတ်ရင် မြန်မာစစ်အစိုးရကို ဆန့်ကျင်ရတာ တကယ်ကို ခက်ခဲတာကို ပိုခိုင်မာစေပါတယ်။ (နက်ကတိုင်) မဖြုတ်ကြနဲ့ပေါ့လို့ မှတ်ယူလိုက်တယ်။

နိုင်ငံတကာကွန်ဖရင့်လည်း ပေါင်းစုံတက်ရတယ်။ စကားတွေ ပိုပြောတတ်လာပြီ။ နိုင်ငံတကာအထာလည်း သိလာပြီ။ အသံထွက်ကတော့ ငါးပိသံမပျောက်ပါ။ တချို့ပွဲတွေမှာ လက်တန်းပြောနိုင်လာပါတယ်။ စာကိုလည်း အင်္ဂလိပ်လိုရေးနည်း တိုးတက်အောင် လုံးပန်းရပြန်တယ်။ အိန္ဒိယမီဒီယာကို ကျေးဇူးတင်ရတယ်။ ပို့တာကို ထည့်ပေးပါတယ်။ လုပ်ရင်းကိုင်ရင်းနဲ့ တတ်အောင်လုပ်ရတာပါ။

အိန္ဒိယ-အင်္ဂလိပ်ကတမျိုး၊ ဗြိတိသျှ-အင်္ဂလိပ်က တမျိုး၊ အမေရိကန်-အင်္ဂလိပ်ကတမျိုး။ အိန္ဒိယမှာ အနေကြာသွားသူတွေ အင်္ဂလိပ်စာ တော်လာကြပါတယ်။ ဒါပေမယ့် အတော်များများ အိန္ဒိယ-အင်္ဂလိပ်ကို စွဲသွားကြတာကို သတိထားမိတယ်။ အသံထွက်သာမဟုတ် အသုံးအနှုန်းပါ ဆင်တူ ယူမိလိုက်ကြတယ်။ ကျနော်ကတော့ အိန္ဒိယ-အင်္ဂလိပ်ရော မြန်မာ-အင်္ဂလိပ်ကိုပါ မယူပါ။

နိုငံရေးအင်္ဂလိပ်စာမှာ မီဒီယာသုံး၊ သံတမန်သုံး၊ ပညာရှင်သုံး သီးခြားစီရှိပြီး ကျနော်တို့က တမျိုးသုံးရတယ်။ ကျနော်တို့ ဆိုတာမှာလည်း တက်ကြွလှုပ်ရှားသူတွေနဲ့ နိုင်ငံရေးပါတီကိုကိုယ်စားပြု စကားပြောကြရသူ မတူကြပါ။ စကားလုံး ရွေးကြရတယ်။ သံတမန်တွေက ယဉ်ကျေးတာ၊ မရေရာတာကို ရွေးပြောကြတယ်။ သွယ်ဝိုက်ပြောကြတယ်။ မီဒီယာသမားတွေကတော့ နားထောင်တဲ့သူ မျက်လုံးပြူး၊ ပါးစပ်ဟောင်းလောင်း ဖြစ်စေတာမျိုး ကြိုက်ကြတယ်။ နိုင်ငံရေးသမားတွေထဲမှာလည်း ကိုယ်ပိုင်ကိုယ်ရည်ကိုယ်သွေးအရ မတူကြပြန်ပါ။ ကိုယ့်စတိုင်နဲ့ ကိုယ်ပါပဲ။
ဒေလီမှာရှိတဲ့ (ဂျေအင်ယူ) တက္ကသိုလ်မှာ ခဏခဏစကားပြောရပါတယ်။ တခါတလေ အိန္ဒိယအစိုးရလုပ်တာကို အလိုမကျရင် အပြစ်တင်စကားတွေကိုချည်း ပြောမိတော့ ရင်းနှီးတဲ့ ပါမောက္ခတွေကို အားနာရမှန်းမသိတဲ့ အမှားမျိုး ကျူးလွန်ခဲ့ဖူးတယ်။ စကားလုံးအပြင် ပရိသတ်ရွေးပြောသင့်တဲ့ အင်္ဂလိပ်စာကိုပါ ကြိုးစားလာရပါတယ်။

နောက်ပိုင်းမှာ အင်္ဂလိပ်မီဒီယာပါ ဝင်တိုးလာရတယ်။ ဒေလီအခြေစိုက် တီဗွီတွေအပြင် လန်ဒန်အခြေစိုက်တီဗွီ၊ ဒိုဟာ အခြေစိုက်တီဗွီ စသဖြင့်တွေကနေ ခေါ်ကြပါတယ်။ ၂ဝဝ၇ သံဃာတော်အရေးအခင်းတုန်းကဆိုရင် စတူဒီယိုတွေကို လှည့်ပြေးနေရတယ်။ အဆာပြေအစာကို တက္ကစီပေါ်မှာသာစားရတယ်။ မြို့တကာလည်း လှည့်ပြောရဟောရတယ်။ ဒေါ်အောင်ဆန်းစုကြည် လွတ်မြောက်လာတော့လည်း မထူးဘူး။ (အင်ဒီ-တီဗွီ) ကတော့ ကျနော်နေတဲ့အိမ်အထိ စလောင်းဝိုင်းကြီး အမိုးပေါ်တင်ထားတဲ့ ကားနဲ့ တီဗွီ အင်တာဗျူးလာလုပ်တယ်။ အရပ်ထဲကလူတွေ ဘောလိဝုဒ် ရုပ်ရှင်ရိုက်တာ မှတ်နေကြတယ်။

ကြွားသလိုဖြစ်နေတာကိုတော့ နားလည်ပေးကြပါ။ အဲလို ကိုယ့်နိုင်ငံအကြောင်း စကားမတူသူတွေကို သိစေအောင် ပြောပြနိုင်ဖို့ရာ ဆယ်တန်းမှာ အင်္ဂလိပ်စာကို အောင်မှတ်သာရခဲ့သူ ဘယ်လို အဆင့်ဆင့်ကြိုးစားရသလဲဆိုတဲ့ သင်ခန်းစာလေးကို ရေးတာပါ။ အင်္ဂလိပ်စာကို မွှတ်နေအောင် ပြောတတ်ရုံနဲ့ မပြီးတာကိုပါ သိစေလိုပါတယ်။

ကြိုးစားရတယ်ဆိုတာ နိစ္စဓူဝအလုပ်ပါ။ အခု နေရာသစ်ကို ရောက်ပြန်ပြီ။ အမေရိကန်အင်္ဂလိပ် အစစ်နဲ့ နပန်းလုံးရပါပြီ။ လေ့လာလို့ မကုန်နိုင်ပါ။ လူသစ်တွေကို အားပေးတယ်။ အရွယ်မကြီးသေးသူတွေက ပိုပြီး သွက်လက်ကြတယ်။ ပိုပြီး ထက်မြက်ကြတယ်။ You can do it!

ဒေါက်တာတင့်ဆွေ
၁၉-၁၂-၂ဝ၁၆

No comments:

Post a Comment

Note: Only a member of this blog may post a comment.