Crow Pheasant ရွှေဘုတ်ကယ်အိုးအီ
တမြန်နှစ်က ဒီနေ့မှာ ရာသီဥတုသာယာ နေပူပါတယ်။ လေလည်းလာ အပြင်မှာထွက်လို့ ချွေးစို့ချင်တယ်။ ငှက်သံတွေက အများကြီးနဲ့ အမျိုးမျိုး၊ ငှက်ဆိုးတော့မရှိပါ။ တခါမှသတိမထားဘူးတဲ့ ငှက်မည်သံလည်းကြားတယ်။ တောမှာ အနေများခဲ့ပေမဲ့ အခုလို နိုင်ငံအကြီးကြီးက မြို့မှာနေရသူ အံ့သြယူရတယ်။ တောသူအန်တီကတော့ သိတယ်။ ဘုတ်ငှက်အသံတဲ့။
ဘုတ်ငှက်ကို အင်္ဂလိပ်လို Greater Coucal နဲ့ Crow Pheasant (Centropus sinensis) လို့ခေါ်တယ်။ ဘုတ်ရိုသေ၊ ကျီးရိုသေစကားပုံရှိတယ်။ ကျီးငှက်ကလည်း ဘုတ်ငှက်ရဲ့ အမောက်အရောင်ကို ထုတ်ဖေါ်ချီးကျူး၊ ဘုတ်ငှက်ကလည်း ကျီးငှက်ရဲ့အမွှေးအရောင်ကို ထုတ်ဖေါ်ချီးကျူးတာ မှတ်သားလိုက်နာစရာဖြစ်တယ်။
ကိုယ့်ဂုဏ်ကိုယ်ဖော် မသူတော်ခုနစ်ပါးဆိုတာလည်းရှိထားတယ်။ တောက်တဲ့၊ ဇီးကွက်၊ ရွှေပြည်စိုး၊ ယောက်ဖခွေးခေါ်၊ တီတီတူးငှက်၊ ဥသြနဲ့ ဘုတ်ငှက်။ တသက်တာရှောင်စရာလို့ မှတ်ယူရမယ်။
ငါ ဒေါက်တာ၊ ဒေါက်တာလို့များ အော်မိနေသလား။ Smile!
လေပြေငယ်သုတ်ပါလို့၊ ရွှေဘုတ်ကယ်အိုးအီ၊ အုံ့မှိုင်းငယ်ရီ၊ နေမှီအောင်တခိုလှမ်းခဲ့ရဆိုတဲ့ ဆရာမင်းသုဝဏ်ရဲ့ကဗျာကို ပြန်အမှတ်ရတော့ ဘုတ်မည်သံကို နားထောင်နေရင်း မြန်မာပြည်ကို ချက်ချင်းသတိရစေတယ်။
ဒေါက်တာတင့်ဆွေ
၂၂-၅-၂ဝ၁၅
၂၂-၅-၂ဝ၁၇
Comments
Post a Comment