Etiquette လောကဝတ်
ကျွန်တော့်ဇာတိက တောရွာလေး၊ အရွယ်အစားလည်းသေး၊ ဈေးတောင်မရှိတဲ့ရွာ။ နွေရာသီတိုင်းမှာ ရွာပြန်တယ်။ ရွာကလူကြီးတွေက အလိမ်မာသင်ပေးကြတယ်။ ထမင်းဝိုင်းမှာ ဖိနပ်ချွတ်စားရတယ်။ လူကြီးကို ဦးချရတယ်။ ဟင်းခပ်ဇွန်းကို ထမင်းစားတဲ့လက်နဲ့ မကိုင်ရ။ အသံမည်အောင်မစားရ။ ဟင်းခပ်ပြီးရင် ဇွန်းကို ဟင်းပန်းကန်မှာ အနေတော်အောင် ပြန်ထားရ စသဖြင့်။ အိပ်ရင် အရှေ့ဖက်သာခေါင်းပြုအိပ်ရတာ၊ လူကြီးနဲ့ပေးစရာယူစရာရှိတိုင်း လက်နှစ်ဖက်သုံးရတာ၊ ခေါင်းငုံ့ရတာ စတဲ့နီတိတွေလည်းပါတယ်။ ဘုန်းကြီးတွေနဲ့ ဆက်ဆံရေးစည်းမျဉ်းတွေလည်း ပါတယ်။
ကျွန်တော် ပြည်ပနိုင်ငံရေးတာဝန်နဲ့ ဟိုနိုင်ငံသည်နိုင်ငံတွေဆီ အတော်ကြီးခရီးသွားခဲ့ရတာ၊ အများအားဖြင့်တော့ အနောက်နိုင်ငံတွေပါ။ သူတို့တိုင်းပြည်မှာ ဝတ်စားဆင်ယင်တာ၊ စားတဲ့သောက်တဲ့အခါ လိုက်နာစရာတွေကို အနည်းအကျဉ်းတော့ မသွားခင်လေ့လာထားရတယ်။ Etiquette စာအုပ်ပါဝယ်ထားတယ်။ အရှေ့တောင်အာရှ နိုင်ငံတွေကိုသွားတော့ များများစားစားလေ့လာဖို့မလိုပါ။ အဲဒီစာလုံးကို အဘိဓါန်မှာ ကျင့်ဝတ်၊ ထုံးတမ်း၊ ယဉ်ကျေး ပြူငါမှုလို့လည်း ဘာသာပြန်ပါတယ်။
တရုပ်ပြည်ကို သွားရမယ်ဆိုတော့ လေ့လာမှုအသစ်ပြုရပြန်တယ်။ တူနဲ့တော့ စားတတ်ပါရဲ့ တူကို ပန်းကန်ပေါ်မှာ ဘယ်လိုထားမလည်း အပါအဝင် မသွားခင်မှာကြိုတင်ဖတ်မှတ်တယ်။ ဟိုရောက်တော့ စကားစပ်မိပြီး အဲလို လေ့လာခဲ့တဲ့အကြောင်းပြောပြတယ်။ အဲတာတွေ မလိုပါဘူးဗျာ၊ ထားချင်သလိုထားတဲ့။ အဲဒီနည်းက ပိုကောင်းတယ်။
အနောက်နိုင်ငံတွေမှာ ကြိုက်တာကို ကြိုက်သလောက်ယူစားရတဲ့ ဘရိတ်ဖတ်စ်နဲ့ ဘူဖေးတို့မှာ မကုန်လို့ ပန်းကန်ထဲ ကျန်နေရင် အထင်သေးခံရတယ်။ ကိုတရုပ်တွေကတော့ တူကိုလည်း တင်ချင်သလိုတင်တယ်။ အရိုးတွေ အခွံတွေကို စားပွဲအောက်ပြစ်ချတယ်။ အိန္ဒိယမှာကတော့ တမျိုး။ ကျွန်တော့်မျက်စိနဲ့ မတည့်တာကများတယ်။ ရေဖန်ခွက်တို့ လက်ဖက်ရည်ခွက်တို့ကို သောက်ပြီးရင် ကြမ်းပေါ်မှာချကြတယ်။
ဘယ်နိုင်ငံ ဘယ်လိုပွဲလမ်းရောက်ရောက် ကျွန်တော့်ရွာကနေသင်ပေးတဲ့ အက်တစ်ကက်ကိုတော့ လိုက်နာပါတယ်။ သူတို့စာအုပ်ထဲမှာ အဲတာတွေမပါ။
ဒေါက်တာတင့်ဆွေ
၂၇-၅-၂ဝ၁၇
Comments
Post a Comment