မြန်မာနိုင်ငံသားတွေ ဘယ်မှာနေနေ ကျန်းမာကြပါစေ

Photo taken on 19-11-2011 by an Indian photo-journalist at Yamuna Clinic
This Blog is created on 10th October 2014

How to ask ကျန်းမာရေးနဲ့ ဆေးပညာ မေးလိုတာရှိပါက

• ဖေ့စ်ဘွတ် ကွန်မင့်ကနေ မမေးပါနဲ့။
• ဖြစ်တဲ့သူရဲ့ ကျား-မ နဲ့ အသက်ကို အရင်ဆုံးရေးပါ။ နာမည် မလိုအပ်ပါ။
• ဖြစ်နေတာ ၁-၂-၃။ ဖြစ်တာဘယ်လောက်ကြာပြီ။ လိုအပ်ရင် ရာသီ၊ အိမ်ထောင်ရေး၊ ကျန်းမာရေးနောက်ခံ၊ နေတဲ့တိုင်းပြည်။ တိုတိုရှင်းရှင်းသာရေးပါ။
• ဆေးစစ်ချက်တွေနဲ့ ပုံတွေကို အတည့်ပို့ပါ။ လိုတာကိုသာပို့ပါ။ အာလ်ထွာဆောင်းမှာ ပုံမလိုပါ။ မှတ်ချက်သာလိုတယ်။
• SMS အရေးအသားမျိုးကို မဖတ်တတ်ပါ။ မြန်မာစကားကို အင်္ဂလိပ်စာလုံးနဲ့ရေးတာကို မဖတ်ပါ။
• ဖုန်းဆက်ပြီးမေးရင် အချိန်ဇုန်မတူတာရော၊ အသံထွက်လွဲနိုင်တာရောကြောင့် အဆင်မပြေပါ။
• မေးတဲ့သူက မိမိကိုယ်မိမိ သား-သမီးလို့မရေးပါနဲ့။ ဖြေမယ့်ဆရာဝန်ကို ဆရာလို့သာသုံးပါ။
• ဆေးရုံ-ဆေးခန်း-ဆရာဝန်-ဆေးဆိုင်-ဆေးဈေး-ကုန်ကျစရိတ် စတာတွေကို မသိပါ။
• မေးစရာနေရာ (၁) အီးမေးလ် doctortintswe@gmail.com (၂) ဖေ့စ်ဘွတ် https://www.facebook.com/tint.swe.dr (၃) ဖေ့စ်ဘွတ် https://www.facebook.com/drtintswe/
• မေးနည်းစည်းကမ်းအရ မမေးလိုသူများ http://doctortintswe.blogspot.com/ Dr. Tint Swe's Writings မှာ ရှာဖတ်နိုင်ကြပါတယ်။

Sunday, December 11, 2016

Burns မီးလောင်ခံရခြင်း

၁။ ဆရာ လောင်စာဆီကြောင့် ခန္ဓာကိုယ်မီးလောင်ရင် မီးလောင်တုန်းအသက်မသေပေမယ့် နောက်ရက်တွေမှာ သေကြပါတယ်။ အဲဒါဘာကြောင့်ပါလဲ (ဟိုတလောက ရခိုင်ပြည်မင်းပြားကလူနာတွေလိုပေါ့။)

၂။ ဆရာရှင့် သမီးအသက် ၃၄ နှစ်အိမ်ထောင်သည်ပါ ပြီးခဲ့တဲ့ ၃ ရက်လောက်က မီးဖိုချောင်ဝင်လိုက်တာ ဘယ်ဘက်လက်ကို ဆီပူလောင်ပါတယ်ရှင့်။ ဖြစ်ဖြစ်ချင်း နေ့လည် ရှားစောင်းလက်ပတ် အနှစ်အုပ်ထားပြီး ညနေမှ Bioplacenton လိမ်းဆေးသွားဝယ်လိမ်းပါတယ်။ ခု ၄ ရက် မြောက်နေ့မှာ အပေါ်ယံအရည်ကြည်ဖု ပေါက်သွားပြီး အရမ်းနာနေပြီးရောင်နေလို့ ဘယ်လိုဆက်လုပ်ရပါမလဲရှင့်။ သောက်ရမည့်ဆေးဝါး နှင့် လိမ်းရမည့်ဆေး ညွှန်ကြားပေးပါဆရာရှင့်။ ကျေးဇူးတင်ပါတယ်ဆရာ။ ဆရာအမြဲကျန်းမာရွှင်လန်းပါစေရှင့်။

၃။ ဆရာ ကျွန်မ့့ ကပါ။ မ အသက် ၄ဝ။ မနေ့က မနက် ၁၁ နာရီလောက် မုန့်နှစ်နဲ့ အရွက်ကြော်တာ ဆီထပေါက်ပြီး ညာဘက်လက်မှာ ဆီပူလောင်သွားပါတယ်။ ရေအေးနဲနဲလောင်းချပြီး သွားတိုက်ဆေးလိမ်းပါတယ်။ အသစ်ဝယ်တဲ့ သွားတိုက်ဆေးက ပူရှိန်း ပါလို့ စပ်ဖျင်းဖျင်းဖြစ်တာနဲ့ ဆေးချလိုက်ပါတယ် ဒီက အနာလိမ်းတဲ့ဆီတမျိုးလိမ်းပါတယ်။ ည ၇ နာရီအလုပ်ရောက်တော့ အရည်ကြည်ဖု ထလာပါတယ်။ အလုပ်ကလူတွေပြောတာနဲ့ အရည်ကြည်ဖု အပ်မီးနဲ့ရှို့ပြီး ဖောက်ပြီး လိမ်းဆေးလိမ်းပါတယ်။ အရည်ကြည်ဖုက အရည်တွေနဲ့ ပြန်ပြန်ဖောင်းလာပါတယ်။ ဆရာဆီက အကြံဉာဏ်လေး လိုချင်ပါတယ်။ ခု ဘာဆက်လိမ်းရမလဲ၊ ဘယ်လိုလုပ်ရမလဲ။ နောက်ဆီပူလောင်ရင် ဘာအရင်ဆုံး ဘယ်လိုလုပ်ရမလဲ။ ဆရာအားရင်ဖြေပေးပါ။ ဆရာ့ကိုကျေးဇူးတင်လျက်။ ဆရာကျန်းမာပါစေ။ ဖြစ်ဖြစ်ချင်းပုံပို့ပါတယ်။

ချက်ချင်းရေအေး၊ ရေခဲရည်လောင်းတာ နည်းလမ်းမှန်ပါတယ်။ အပူဖူးကိုဖေါက်လိုက်တာတော့ လွဲသွားတယ်။ အပူဖူးက အဖုံးလွှားပါးပါးလေးလောက် ဘယ်ပတ်တီးမှ ပိုမကောင်းပါ။ မတော်တဆပေါက်သွားရင်တော့ ဆေးထည့်ရမယ်။ ပူလောင်ထားတဲ့အနာကို ပိုးမဝင်သေးပါ။ ပေါက်သွားလို့ ရဲနေတာကိုသာ ပိုးဝင်လာနိုင်တယ်။ သွားတိုက်ဆေးမသင့်ပါ။ အပူလောင်တာက ၂ မျိုးရှိတယ်။ မီးတောက်လောင်တာနဲ့ အပူရည်ပူ-ဆီပူလောင်တာ။ ဒါ့အပြင် အပူငွေ့၊ လျှပ်စစ်၊ ဓါတ်ရောင်ခြည်၊ ဓာတုပစ္စည်းတွေကနေလည်း လောင်စေနိုင်တယ်။

ပထမအဆင့်၊ ဒုတိယအဆင့်၊ တတိယအဆင့် ၃ ဆင့်ခွဲထားတယ်။ တစ်ရှူးတွေကို ဘယ်လောက်ထိခိုက်သလည်း စစ်ဆေးရမယ်။ လက်၊ မျက်နှာ၊ တင်ပါးဆုံဝန်းကျင်၊ အဆစ်တွေမှာဖြစ်ရင် အရေးကြီးတယ်။

ပထမအဆင့်
အပေါ်ယံဖြစ်တယ်။ ရောင်မယ်။ နီမယ်။ နာမယ်။ အရည်ကြည်အဖု မထွက်ပါ။ ဖိကြည့်ရင် ဖြူသွားမယ်။ ၃-၆ ရက်အတွင်း ပျောက်မယ်။ အပူလောင်စေတယ့်အရာက ဖယ်ထုတ်ပါ။ မီးလောင်နေတဲ့အဝတ်တွေ ဖယ်ပြစ်ပါ။ ရေအေးအေးလောင်းပေးပါ။ ခပ်ဖေါ့ဖေါ့သန့်ရှင်းပေးပါ။ ခြောက်သွားအောင် လုပ်ပါ။ ပိုးသန့်ဆေးတမျိုးမျိုး ထည့်ပါ။ ပိုးသန့်ထားတယ့် ပတ်တီးစည်းပေးပါ။ မေးခိုင်ကာကွယ်ဆေးထိုးပါ။

ဒုတိယအဆင့်
အရေပြားအပေါ်ယံမက ထိခိုက်မယ်။ ရောင်မယ်။ နီမယ်။ ထိလိုက်ရင်ဖြူသွားမယ်။ အရည်ကြည်အဖု blisters ထွက်မယ်။ အနာရွတ် ကျန်ရစ်မယ်။ အဆစ်မှာဖြစ်ရင် မလှုပ်နိုင်ဖြစ်မယ်။ အရည်-ဆားဓာတ် နည်းမယ်။ ပျောက်ချိန် ကြာမယ်။ သန့်ရှင်းပေးပါ။ ညင်ညင်သာသာခြောက်သွေ့ပေးပါ။ ပိုးသန့်ဆေး လိမ်းပါ။ လူနာကို လှဲနေစေပါ။ ဖြစ်တယ့်နေရာကို အထက်မြှင့်ထားပါ။ အရေပြား အစားထိုးရနိုင်တယ်။ အဆစ် လှုပ်ရှားမှုအတွက် ဖီဇီယိုသာရာပီ လိုနိုင်တယ်။ အဆစ် မလှုပ်စေရန် ကြပ်စည်းရန် လိုနိုင်တယ်။ ဆေးရုံတင်ရနိုင်တယ်။

တတိယအဆင့်
အရေပြားတလွှာ (၃ ထပ်) လုံးထိခိုက်မယ်။ ချွေးထွက်အိတ်တွေ၊ ဆံပင်မွှေးတွေ ပျက်စီးမယ်။ အာရုံကြောတွေ ပျက်စီးသွားလို့ နာမမှာမဟုတ်။ ဖိကြည့်ရင် ဖြူသွားမှာ မဟုတ်။ အရည်ကြည်အဖု မထွက်။ ရောင်မယ်။ သားရေပြားလို ဖြစ်သွားမယ်။ အရောင်ပြောင်းမယ်။ အနာရွတ် ကျန်ရစ်မယ်။ သွေးအသွားအလာ ပျက်စီးမယ်။ အရည်-ဆားဓါတ် နည်းမယ်။ (ရှော့ခ်) ရနိုင်တယ်။ ပုံပန်းပျက်စီးသွားမယ်။ လူကြီးဆိုရင် ၆ဝ % ဖြစ်လျှင် သေနိုင်တယ်။

ကုသရန်
ဆေးရုံတင်ရမယ်။ ရေ-ဆား နည်းတာကို သွေးကြောကသွင်းရမယ်။ အောက်ဆီဂျင်ပေးရနိုင်တယ်။ ခွဲစိတ်ပြုပြင်ဘို့ လိုနိုင်တယ်။ အာဟာရဓါတ်ဖြည့်ရန်၊ စောင့်ကြည့်ရန်၊ စိတ်ပိုင်းကုသမှု လုပ်ပေးရန်လိုနိုင်တယ်။ ထိခိုက်မိလို့ ဒဏ်ရာတွေ အရေပြားကိုရှခြင်း၊ ကုတ်မိခြင်းအတွက် ကုသရန် မလိုနိုင်တယ်။ ပိုးမဝင်အောင် လုပ်ပေးရမယ်။ အနာကို ရေသန့်သန့်ဖြင့် သန့်ရှင်းပေးပါ။ ဆပ်ပြာကို အမြဲသုံးရန် မလို။ သွေးယိုနေပါက ဖိပေးပါ။ ၁ဝ မိနစ် အတွင်း ရပ်မယ်။ အနာထဲဝင်နေတယ့် ပစ္စည်းများ ဂရုတစိုက် ရှင်းထုတ်ပါ။ အနာထဲ နက်ဝင်နေတယ့် ပစ္စည်းများကို ကြိုးစား၍ ဖယ်မပြစ်ရ။ ပတ်တီးစီးရမယ်။ ဆေးကို နေ့တိုင်း ထည့်ရမယ်။ အနာက အထဲနက်ပါက သွေးပိုထွက်မယ်။ အရေပြားအောက်ထိ ထိခိုက်မယ်။ ချုပ်ပေးရန် လိုနိုင်တယ်။ မေးခိုင်ကာကွယ်ဆေး ထိုးရန်လိုတယ်။ ပြည်တည်နိုင်တယ်။ ဖျားနိုင်တယ်။

ဘယ်လောက်ကျယ်သလဲ၊ ဘယ်လောက်နက်သလဲ အပေါ်မူတည်ပါမယ်။ ဖြစ်တဲ့နေရာက အရေးကြီးတာထဲမှာပါတယ်။ (ပလပ်စတစ် ဆာဂျရီ) အထူးကုကို ပြသင့်ပါတယ်။

မီးလောင်တာမှာ (၉) ဥပဒေသဆိုတာရှိတယ်။ အရေပြားမျက်နှာပြင်ဧရိယာဘယ်လောက်ကိုမီးလောင်ခံရသလည်း။
ဦးခေါင်း = ၉%
ရင်ခေါင်းရှေ့ = ၉%
ရင်ခေါင်း နောက် = ၉%
ဗိုက် = ၉%
ကျော = ၉%
ပေါင် = ၉%
ပေါင် = ၉%
လက် = ၉%
လက် = ၉%
ခြေထောက် = ၉%
ခြေထောက် = ၉%
လိင်အင်္ဂါ = ၁%

အလာအလာ
<10% = 0.6%
10–20% = 2.9%
20–30% = 8.6%
30–40% = 16%
40–50% = 25%
50–60% = 37%
60–70% = 43%
70–80% = 57%
80–90% = 73%
>90% = 85%
မီးခိုးငွေ့ရှူမိခြင်း = 23%

မျက်နှာပြင်ဧရိယာများလေ ဆိုးလေ။ အသက်ကြီးလေ ဆိုးလေ။ အမျိုးသမီး ပိုဆိုးတယ်။ ဆောရီး။

နောက်ဆက်တွဲဖြစ်နိုင်တာတွေလည်းရှိတယ်။
ပိုးဝင်ခြင်း။ နူမိုးနီးယား။ ဆယ်လူလိုက်တစ်။ ဆီးလမ်းပိုးဝင်ခြင်း။ အသက်ရှူလမ်းအလုပ်မနိုင်တော့ခြင်း။ ၃ဝ% ကျော်ရင်၊ အရေပြားထုတခုလုံးလောင်ရင်၊ အသက် ငယ်လွန်း ကြီးလွန်းရင်၊ ခြေထောက်နဲ့ တင်ပါးဆုံနေရာလောင်ရင် နောက်ဆက်တွဲတွေဆက်ဖြစ်နိုင်တယ်။
၁ဝ% ကျော်လောက်ခံရရှု သွေးအားနည်းနိုင်တယ်။ လျှပ်စစ်ဓါတ်လိုက်ခံရရင် သွေးကြောထဲ သွေးခဲတာဖြစ်လာနိုင်တယ်။ ကြွက်သားတွေပျက်စီးလို့ဖြစ်တာကို compartment syndrome နဲ့ rhabdomyolysis လို့ခေါ်တယ်။ အရိုး၊ ကြွက်သာထုထည်၊ အမာရွတ်၊ စိတ်ထိခိုက်မှုတွေလည်း ဆက်ဖြစ်လာနိုင်တယ်။ ဆောရီး။

Severe Burn Treatment ဆိုးဝါးတဲ့ မီးလောင်နာ http://doctortintswe.blogspot.com/2015/03/severe-burn-treatment.html
Burns မီးလောင်ခံရခြင်း http://doctortintswe.blogspot.com/2015/03/burns.html

ဒေါက်တာတင့်ဆွေ

No comments:

Post a Comment

Note: Only a member of this blog may post a comment.