Spelling အစိုးရသတ်ပုံတော့ ပြောမနေနဲ့
သူများကိုအပြစ်ရှာတာက မကောင်းပေမဲ့ အတော်လွယ်တယ်။ နမူနာ တချို့တော့ပေးပါရစေ။ ၂ဝ၁၁ မေလထုတ်မှာ ၁၉၃၇ ဒဂုံမဂ္ဂဇင်းပါ သန်းထွန်းကလောင် နာမည်နဲ့ရေးတဲ့ မြန်မာရာဇဝင် လမ်းကွေ့လမ်းကောက်ကို ပြန်ပြီး ထုတ်ဖေါ်ပေးတာ တန်ဘိုးရှိလှတယ်။ ဒါပေမဲ့ (ပဒေသရာဇာ ရေးထန်းတက်သမား အကြောင်း) လို့ စာရိုက်ထားတယ်။ ရေးမြို့က ထန်းတက်သမားလို့ ထင်ကြလိမ့်မယ်။ ရေးမှာ ထန်းပင်ရှိသလား စဉ်းစားနေရတယ်။
နွေဦးကာလ၊ မြူထသောအခါ၊ ရင်းထောင်း ရင်းဆွဲ၊ ဆောင်မြဲအိုးလွယ်ကာ၊ ဓားနှီးထက်စွာ၊ ခါးမှာချပ်လျက်၊ ထန်းပွင့် ထန်းခိုင်၊ ရွှန်းမြိုင်မြိုင်၊ ကလိုင်သာလွယ်လို့ တက်သည်နှင့်လေး တျာချင်းကို သီချင်းလုပ်ဆိုတာမျိုး ခုခေတ် လူရွယ်တွေ နားမထောင်ချင်ကြတော့ဘူး။
နောက်ပြီး (စလေဦးပုည ရေးသော ကဝလ္လိယ တို့အကြောင်း) ဆိုတာ ပါသေးတယ်။ အမှန်က (ကာကဝလ္လိယ) သာ ဖြစ်ပါတယ်။ ၂ဝ၁၁ မတ်လထုတ် မဂ္ဂဇင်းတအုပ်မှာ (ဆရာဇော်ဂျီ၏ ပြည်ထောင်စု သမိုင်းပုံပြင်များ) ကိုလည်း ဖတ်ရသေးတယ်။ (ကင်းဝန်မင်းကြီး နှင့် သံအဖွဲ့ဝင်များသည် လန်ဒန်တွင် အင်္ဂလိပ် ဧကရီ ဝိတိုရိယ ဘုရင်မင်းကြီးထံသို့ ဝင်၍) လို့ စာရိုက်ထားတယ်။ သမိုင်းမှာ ဝိတိုရိယဘုရင်မကြီးသာ ရှိပါတယ်။ တနေရာမှာလဲ အင်္ဂလန်နိုင်ငံက (ယော့ခ်မြို့) ကို မြန်မာမှု အဓမ္မပြုလိုက်တာ Duke of York (အက်ဒ်ဝပ်) မင်းသားဟာ ယောမြို့စားဖြစ်သွားတယ်။
(ဆဌသံင်္ဃာရတနာတင်ကမ္ဘာအေးလိုင်ကူ။ သာသနာကြီးဆက်လက်တည်တန့်ပွားများပါစေ) လို့ တင်ထားတာကို ဖတ်ရပါတယ်။ အဲဒီထဲမှာ သတ်ပုံပြင်စရာ (၃) ခုရှိပါတယ်။ (ဆဋ္ဌမ)၊ (သင်္ဂါယနာ) နဲ့ (လိုဏ်ဂူ) ဖြစ်ပါတယ်။
ကိုယ်ပိုင် ဘလော့ခ်မှာ ကိုယ့်ဖါသာရေးတာမျိုးမှာ စာပြင်ဆရာမပါ၊ ဆင်ဆာဗလာမို့ ချွတ်ချော်တာကို နားလည် ခွင့်လွှတ်နိုင်ကြပါမယ်။ စာအုပ်စာစောင်တွေကမှားရင် ပညာရှာဆဲလူငယ်တွေကို ကျက်အောင် ချက်မထားတဲ့ထမင်းဟင်း ကျွေးနေကြသလိုဘဲ။ မြန်မာပြည်မှာ ထမင်းကောင်း ဟင်းကောင်း စားနိုင်ကြပါစေ။ ။
ဒေါက်တာတင့်ဆွေ
Comments
Post a Comment