မြန်မာနိုင်ငံသားတွေ ဘယ်မှာနေနေ ကျန်းမာကြပါစေ

Photo taken on 19-11-2011 by an Indian photo-journalist at Yamuna Clinic
This Blog is created on 10th October 2014

How to ask ကျန်းမာရေးနဲ့ ဆေးပညာ မေးလိုတာရှိပါက

• ဖေ့စ်ဘွတ် ကွန်မင့်ကနေ မမေးပါနဲ့။
• ဖြစ်တဲ့သူရဲ့ ကျား-မ နဲ့ အသက်ကို အရင်ဆုံးရေးပါ။ နာမည် မလိုအပ်ပါ။
• ဖြစ်နေတာ ၁-၂-၃။ ဖြစ်တာဘယ်လောက်ကြာပြီ။ လိုအပ်ရင် ရာသီ၊ အိမ်ထောင်ရေး၊ ကျန်းမာရေးနောက်ခံ၊ နေတဲ့တိုင်းပြည်။ တိုတိုရှင်းရှင်းသာရေးပါ။
• ဆေးစစ်ချက်တွေနဲ့ ပုံတွေကို အတည့်ပို့ပါ။ လိုတာကိုသာပို့ပါ။ အာလ်ထွာဆောင်းမှာ ပုံမလိုပါ။ မှတ်ချက်သာလိုတယ်။
• SMS အရေးအသားမျိုးကို မဖတ်တတ်ပါ။ မြန်မာစကားကို အင်္ဂလိပ်စာလုံးနဲ့ရေးတာကို မဖတ်ပါ။
• ဖုန်းဆက်ပြီးမေးရင် အချိန်ဇုန်မတူတာရော၊ အသံထွက်လွဲနိုင်တာရောကြောင့် အဆင်မပြေပါ။
• မေးတဲ့သူက မိမိကိုယ်မိမိ သား-သမီးလို့မရေးပါနဲ့။ ဖြေမယ့်ဆရာဝန်ကို ဆရာလို့သာသုံးပါ။
• ဆေးရုံ-ဆေးခန်း-ဆရာဝန်-ဆေးဆိုင်-ဆေးဈေး-ကုန်ကျစရိတ် စတာတွေကို မသိပါ။
• မေးစရာနေရာ (၁) အီးမေးလ် doctortintswe@gmail.com (၂) ဖေ့စ်ဘွတ် https://www.facebook.com/tint.swe.dr (၃) ဖေ့စ်ဘွတ် https://www.facebook.com/drtintswe/
• မေးနည်းစည်းကမ်းအရ မမေးလိုသူများ http://doctortintswe.blogspot.com/ Dr. Tint Swe's Writings မှာ ရှာဖတ်နိုင်ကြပါတယ်။

Wednesday, December 31, 2014

Polycystic Ovarian Syndrome (PCOS) မျိုးဥအိမ်အကျိတ်များရောဂါ

၁။ ဆရာရှင့် သမီးရိုသေစွာစာရေးလိုက်ပါတယ်။ အမျိုးသမီးကျန်းမာရေးမို့ အဟြေအဆိုရိုင်းသလိုဖြစ်သွားရင် ခွင့်လွှတ်ပေးပါ။ သမီးအခု အသက် ၂၆ နှစ်ရှိပါပြီ။ အပျိုဖော်ဝင်စမှစပြီး ရာသီလာတာ အကြိမ်ရေတောင် ရေတွက်မယ်ဆို ရေတွက်လို့ ရပါတယ်။ တခါမှလဲပုံမှန်မလာပါဘူး။ အခုနောက်ဆုံးအကြိမ် လာပြီးတဲ့နောက် မလာတာ ခြောက်လ မကတော့ပါဘူး။ OG နဲ့ပြပေမယ့် မထူးခြားပါဘူး။ အသက် ၂ဝ လောက်က ပြတုန်းကတော့ ကိုယ်ဝန်တားဆေးလိုမျိုးနဲ့ သံဓါတ်အားဆေး တွဲတိုက်ပါတယ်။ အဲဒါတားဆေးတွေက သမီးနဲ့မတည့်လို့လားတော့မသိဘူး၊ အန်ပါတယ်။ စိတ်ညစ်တာနဲ့ ဆက်မပြဖြစ်ခဲ့ပါဘူး။ ၂၃ နှစ်လောက်မှာတခါပြဖြစ်ပါတယ်။ အဲအချိန်ကစလို့ EPO ပဲတိုက်ပါတယ်။ ဒါပေမယ့် တခါမှကို မမှန်ခဲ့ပါဘူး။ ultrasound ရိုက်တော့လည်း ရေအိတ်နဲ့အလုံးသေးသေးတွေရှိတယ်လို့တော့ ဟြေပါတယ်။ ရာသီလာမယ့် လက္ခဏာတော့ နှစ်လကိုတခါလောက်တော့ပြပါတယ်။ ရင်သားနာတာနဲ့ ခါးဆစ်တွေ ကိုက်တာမျိုးပါ။ ဒါပေမယ့် နှစ်ရောက်လောက်နေရင်တော့ အဖြူတွေအများကြီးလာပြီး ရာသီမလာတော့ပါဘူး။ တခါတလေတော့ သွေးရည်အကြည်တွေလာပြီး ပြီးသွားတယ်။ တခါတလေ တကယ်လာရင်တော့ အများကြီး လာတတ်ပါတယ်။ သွေးဖိအားကလဲ အမြဲပုံမှန်ပါပဲ။ အဲဒါအခုသမီးအနေနဲ့ ဘာတွေလုပ်ဖို့လိုအပ်သလဲ။ ဆောင်ရန် ရှောင်ရန်နဲ့ ကုသနည်းလေးများရှိရင် ဟြေပြပေးပါနော်။ ဒီအတိုင်းသာ ဆက်ဖြစ်နေခဲ့မယ်ဆိုရင် သမီးရဲ့ ကျန်းမာရေးက တခြားဆိုးကျိုးတွေဖြစ်လာနိုင်ပါသလား။ ကလေးရော ရနိုင်ပါဦးမလား။

၂။ ဆရာရှင့် ကျွန်မ အသက် ၂၉ နှစ်ပါ။ ရန်ကုန်၊့့ မြို့ နယ်တွင်နေထိုင်ပါသည်။ အိမ်ထောင်သက် ၄ နှစ်ရှိပါပြီ။ မည်သည့်တားဆေးမှ မသောက်သုံးပါ။ ကလေးလဲမရရှိသေးပါ။ အသက် ၁၃ နှစ်အရွယ်ကတည်းက ဓမ္မတာလာစဉ်တွင် ကိုက်ခဲသည့်ဝေဒနာကို လစဉ်ခံစားရပါသည်။ အသက် ၁၇ နှစ်နောက်ပိုင်းတွင်တော့ နာကျင်ကိုက်ခဲခြင်းများ  ရံဖန်ရံခါတွင်သာ ဖြစ်ပါတော့သည်။ လစဉ်ပုံမှန်လာပါသည်။ သွေးဆင်းများပါသည်။ ရက်ကတော့ တစ်ခါတစ်လေ စောလိုက် နောက်ကျလိုက်ဖြစ်တတ်ပါသည်ရှင်။ အသက် ၂၃ နှစ်အရွယ်နှင့် အိမ်ထောင်ကျပြီး အသက် ၂၆ နှစ်တွင် မိန်းမကိုယ်ယားယံ၍ အဖြူဖတ်များဆင်းခြင်းနှင့် အနံဆိုးထွက်ခြင်းများ ဖြစ်ပေါ်ဖူးပါသည်။ အသက် ၂၇ နှစ်တွင် ၄င်းရောဂါ ထပ်မံဖြစ်ပေါ်ပြန်သည့်အတွက် အသားစစစ်ဆေးခြင်း၊ သားအိမ်အတွင်းအပြင် Ultrasound ရိုက်စစ်ဆေးရာ မည်သည့် ရောဂါမျှတွေ့ရှိခြင်းမရှိခဲ့ပါ။ ၂ လအကြာ ရာသီလာချိန်တွင် ဝမ်းဗိုက်အောက်ပိုင်း မခံမရပ်နိုင်နာကျင်ခြင်းကို ခံစားလာရပါသည်။ အတွင်းခံကိုပင်မဝတ်နိုင်၊ အလုပ်ပျက်၍ လမ်းမလျှောက်နိုင်အောင်ပင် ဖြစ်လာပါသည်။ ၁ နှစ်ကျော်ခန့် ကြာအောင် ၄င်းဝေဒနာအား ခံစားခဲ့ရပါသည်။ ထိုကဲ့သို့ ဖြစ်ချိန်တွင် Dolfenal 500 ဆေး တစ်နေ့ကို ၃ ကြိမ်၊ ၃ ရက် သောက်ရာ သက်သာသော်လဲ နောက်ပိုင်းမသက်သာတော့သည့်အတွက် ဆေးရုံမှာထပ်မံ၍ သားအိမ်အတွင်းအပြင် Ultrasound ရိုက်စစ်ဆေးရာ သားအိမ်နှစ်ဘက်စလုံးတွင် အရည်အိတ်သေးသေးလေးများ တွေ့ရှိသည်ဟုသိရပါသည်။ ကလေးရဖို့လဲခက်သည်ဟုသိရပါသည်။ ၄င်းရောဂါအားမည်သို့ ကုသပျောက်ကင်းနိုင်ကြောင်း၊ ရေရှည်တွင် မည်သို့ ဆိုးကျိူးများဖြစ်ပုံနိုင်ကြောင်းနှင့် ခွဲစိတ်ကုသရန်လိုအပ်ပါသလား သိလိုပါသည်ဆရာရှင်။ ကလေးမရမှာလဲ စိုးရိမ်ပါသည်။

၃။ ဆရာရှင့် သမီးရိုသေစွာစာရေးလိုက်ပါတယ်။ သမီးရောဂါ pcos ရောဂါပါရှင် ခုလောလောဆယ် metformin 500mg ကို တစ်ရက် ၂ လုံးသောက်နေပါတယ်။ သမီးရာသီလဲမလာနိုင်ပါ။ သမီးသိချင်တာကသားသမီးရနိုင်မရနိုင်ကိုပါရှင့်။

၎။ ဆရာရှင့် သားဥအိမ်ထဲမှာရှိသော cyst ခေါ် အရည်အိတ်ကလေးများ (Polycystic ovary syndrome) အကြောင်း သိချင်လို့ပါဆရာ။ သား၊ သမီးယူတဲ့အချိန်မှာ အနှောက်အယှက် ဖြစ်နိုင်လား။ ကိုယ်ဝန်ဆောင်တဲ့ အချိန်မှာရော သန္ဓေသားကို ထိခိုက်နိုင်ပါသလား ဆရာ။

၅။ သမီး အသက်က အခု ၂၇ နှစ်ပါ။ ကိုယ်အလေးချိန်ကတော့ 48 KG လောက်မှာပဲ ရှိပါတယ်။ အပျိုပေါ်ဝင်စ ၁၅ နှစ် လောက်ကတည်းက ရာသီသွေး မမှန်တတ်ပါ။ အခုထိ တခါတလေ ၂ လ ၃ လ ခြားပါတယ်။ ကြာချိန် ၃ ရက် လောက်ဘဲ ရှိတတ်ပြီး၊ အရမ်း ဗိုက်နာခြင်းတော့ မရှိသလောက်ပါ။ အသက် ၁၉ နှစ်တုန်းကတော့ ၆ လ အထိ ထိန်ဖူးပြီး၊ နုတ်ခမ်းမွှေး ရေးရေးလဲ သတိထားမိပါတယ်။ ပြီးတော့ အမွေး (ခြေသလုံး၊ ဂျိုင်း) လဲ နည်းနည်း ကြမ်းသလို၊ Areola နို့အရောင်ရင့် အဝိုင်း ပတ်ပတ်လည်မှာလဲ အမွေးလေးတွေက ခပ်ကြမ်းကြမ်းနဲ့ ရှည်ပါတယ်။ ကျား-ဟော်မုန်းသတ္တိ ကဲတာပါလားရှင်။ အဲ့လိုတွေရှိလို့ ကလေးမရမှာ အရမ်းစိုးရိမ်မိပါတယ်။ ၆ လ လောက်နေရင် ကလေး ယူချင်လို့ ဘယ်လို တားဆေးက အဆင်ပြေမလဲ။ သုံးလခံထိုးဆေးဆိုရင်လဲ ကလေးပြန်ရဖို့ ကြာမှာ စိုးရိမ်လို့ပါ။

အမေးများလို့ မြန်မာပြည်ကအမျိုးသမီးတွေမှာ အဖြစ်များနေတာသိရပါတယ်။ ဆေးရီး။ PCOS ရောဂါဆိုတာ အမျိုးသမီး မီးယပ်ရောဂါတခု ဖြစ်တယ်။ အမျိုးသမီး ၅-၁ဝ% မှာ ဖြစ်နိုင်တယ်။ ကလေးမရဖြစ်ရတဲ့ အဓိကအကြောင်းတရားလဲ ဖြစ်တယ်။ ရောဂါလက္ခဏာက ဆယ်ကျော်သက်ကတည်းကစတယ်။ ရာသီမမှန်တာ၊ ရာသီမလာတာ၊ ဝက်ခြံထွက်တာ၊ ကိုယ်အလေးချိန်များတာ၊ အမွှေးပေါက်များတာ၊ လူအဝလွန်လာတာ၊ ဆီးချို-သွေးတိုး-နှလုံးရောဂါတွေ ဖြစ်လာနိုင်တယ်။ ဆေးကုသမှု သေသေခြာခြာလုပ်ရင် အများကြီး သက်သာစေတယ်။ ရောဂါလက္ခဏာ တခုချင်းကို ကုသရတယ်။

PCOS ရောဂါကို Stein-Leventhal syndrome လို့လဲ ခေါ်တယ်။ မျိုးဥအိမ်တွေမှာ အကျိတ်လေးတွေ အများကြီး ဖြစ်နေတယ်။ ဘာလို့ဖြစ်သလဲ၊ အကြောင်းအမျိုးမျိုး ရှိနိုင်တယ်။ တခါတလေ မသိနိုင်ဘူး။ မျိုးရိုးနဲ့ ပါတ်ဝန်းကျင်ကနေလဲ ဖြစ်နိုင်တယ်။ တချို့ ဒီရောဂါရှိတဲ့ အမျိုးသမီးတွေမှာ ဦးနှောက်ထဲက Pituitary gland ကနေ ထုတ်ပေးတဲ့ LH ဟော်မုန်း လဲများနေတာ တွေ့ရသေးတယ်။

ဒီရောဂါရဲ့ ပင်မလက္ခဏာကတော့ -
1. Menstrual disturbances ရာသီမမှန်တာ နဲ့
2. Androgens ကျား-ဟော်မုန်းများနေတာ ၂ ခု ဖြစ်တယ်။

ရာသီမမှန်ဘူးဆိုတာ -
1. Primary amenorrhea မွေးကတည်းက ရာသီတခါမှ မလာတာ၊
2. Oligomenorrhea ရာသီအလာနည်းတာ၊
3. Secondary amenorrhea ရာသီထိန်တာ၊
4. Anovulatory cycles ရာသီလာပေမဲ့ မျိုးဥ မထွက်တာ နဲ့
5. Heavy bleeding သွေးအများကြီး ဆင်းတာ၊ ဖြစ်နိုင်တယ်။

ကျား-ဟော်မုန်းများနေလို့ ဖြစ်လာမဲ့ လက္ခဏာကတော့ -
1. Acne ဝက်ခြံပေါက်တာ၊
2. Hirsutism အမွှေးပေါက်များတာ၊
3. Male-pattern hair loss ယောက်ျားတွေလို ဆံပင်ကျွတ်တာ (ထိပ်ပြောင်တာ) တွေ ဖြစ်တယ်။

တခြား လက္ခဏာကတော့ -
• Obesity and weight gain ကိုယ်လေး-လူဝမယ်၊
• Elevated insulin levels and insulin resistance ဆီးချိုထိန်းတဲ့ (အင်စူလင်) ဟော်မုန်း များနေမယ်၊
• Oily skin အရေပြား အဆီပြန်မယ်၊
• Dandruff ခေါင်းမှာ ဘောက် ပေါက်မယ်၊
• Infertility ကလေးမရဖြစ်မယ်၊
• Skin discolorations အရေပြား အရောင်ပြောင်းတာ တချို့နေရာတွေမှာ ဖြစ်မယ်၊
• High cholesterol levels (ကိုလက်စထော) များနေမယ်၊
• Elevated blood pressure သွေးဖိအားများနေမယ်၊
• Multiple, small cysts in the ovaries မျိုးဥအိမ်မှာ အကျိတ်တွေ ဖြစ်နေတာတွေ ဖြစ်တယ်။

ရောဂါလက္ခဏာတွေကသာ ရောဂါနာမယ် တပ်တာနဲ့ ကုသတာအတွက် အရေးကြီးတယ်။ မျိုးဥအိမ်မှာ အကျိတ်လေးတွေ တွေ့တာနဲ့တော့ ရောဂါမဟုတ်သေးဘူး။ ရောဂါ ဟုတ်-မဟုတ်ကို ရောဂါလက္ခဏာတွေ ကြည့်ရမယ်။ Androgen ကျား-ဟော်မုန်း (အင်ဒရိုဂျင်) စစ်ရတယ်။ DHEA နဲ့ Testosterone တွေ ကဲနေတတ်တယ်။ ကျား-ဟော်မုန်း (တက်စတိုစတီရုံး) များနေတာ တခုထဲနဲ့တော့ PCOS ရောဂါလို့ မပြောပါ။ Hypothyroidism လည်ပင်းကြီး ဟော်မုန်းနည်းတာ စစ်ရတယ်။ Prolactin ခေါ်တဲ့ နို့ထွက်-ဟော်မုန်း စစ်ရတယ်။ မျိုးဥအိမ် Ovary နဲ့ Adrenal glands ကျောက်ကပ်အထက်က (အဒြီနယ်လ်) အိတ်တွေ Tumor အလုံး ဖြစ်နေသလား စစ်ရတယ်။

Ultrasound ရိုက်ရင် Ovary မျိုးဥအိမ်မှာ အရည်အောင်းနေတဲ့ Cysts အိတ်လေးတွေ တွေ့မယ်။ (CT scan) နဲ့ (MRI) တွေရိုက်ရင်လဲ တွေ့မယ်။ CT scans ရိုက်တာက X-rays နဲ့ Dyes သုံးရလို့ လူတိုင်းကို မလုပ်ပါ။

PCOS ကို ဘယ်လို ကုသမလဲ -
အမျိုးသမီး အသက်ကိုကြည့် ကုရတယ်။ ငယ်သူတွေကို ကိုယ်ဝန်တားဆေး ပေးနိုင်တယ်။ ရာသီမှန်စေမယ်၊ သားအိမ်ကင်ဆာ အဖြစ်နည်းစေမယ်။ နောက်တနည်းကတော့ Progesterone ဟော်မုန်းကို ပေးလိုက်-ရပ်လိုက် လုပ်တယ်။ ကိုယ်ဝန်ကိုတော့ တားပေးမှာ မဟုတ်ဘူး။ ဝက်ခြံပေါက်နေသူ၊ အမွှေးများနေသူတွေကို ဆီးသွားဆေး Spironolactone (Aldactone) ပေးနိုင်တယ်။ သူတေို့ကို ဒီဆေးပေးရင် (ပိုတက်ဆီယမ်) စစ်နေရမယ်၊ Kidney function ကျောက်ကပ် စစ်နေရမယ်။ မျက်နှာ အမွှေးပေါက်သူတွေက Eflornithine (Vaniqa) (ခရင်) လိမ်းရတယ်။ ကလေးရချင်သူတွေဆိုရင် Clomiphene (Clomid) ဆေးပေးရင် မျိုးဥထွက်စေနိုင်တယ်။ လိုအပ်ရင် Gonadotropin ဟော်မုန်း ပေးမယ်။ တခြား ကလေးရစေနည်းတွေ သုံးနိုင်တယ်။ ကိုယ်အလေးချိန် ချရမယ်။ ဆီးချိုအမျိုးအစား (၂) ရှိနေရင် Metformin (Glucophage) ဆေးပေးမယ်။ ခွဲစိတ်ကုသဘို့လိုရင် Ovarian drilling နည်း လုပ်ရမယ်။

ဆေးကျောင်းမှာ ရောဂါဗေဒသင်ရတုံးက လူတွေမှာဖြစ်တဲ့ရောဂါဘယတွေကအလွန်များတယ်။ ကူးစက်နိုင်တာတွေကလဲ ပေါလွန်းလှတယ်။ အဲဒီအထဲက ရောဂါမရဖြစ်နေတာက အံ့သြဘို့ကောင်းတယ်လို့ မှတ်သားရဘူးတယ်။ အခုရောဂါလိုက ဘာလို့ကိုယ့်မှာလာဖြစ်ရသလဲ သိဘို့လဲခက်တယ်။ ကုရတာလဲမလွယ်ပါ။ အဲတာကြောင့် မြန်မာပြည်သူပြည်သားတွေ ကံတရားကောင်းအောင် နေ့စဉ် (အချိန်တိုင်းမှာ) ကြိုးစားနေကြဘို့ရာ အကြံပေးချင်ပါတယ်။

Dr. တင့်ဆွေ

No comments:

Post a Comment

Note: Only a member of this blog may post a comment.