Maturity ရင့်ကျက်မှု

• ကနေ့ ကျန်းမာရေးမေးခွန်းတွေ အတော်များတယ်။ အီးမေးလ်နဲ့ရော၊ ဖေ့စ်ဘွတ် ပေ့ခ်ျ မက်ဆေ့ခ်ျကရော၊ ဖေ့စ်ဘွတ်ချတ်ကနေရော မေးကြတယ်။ ဘယ်နှစ်ယောက်လဲ ပြန်ရေတွက်ဘို့ အချိန်ကြာမယ်။ မေးတာတွေကလဲ စုံလှတယ်။ သားသမီးရချင်သူက ၃ ယောက်အနည်းဆုံးရှိမယ်။ ကိုယ်ဝန်မလိုခင်သူကလဲ ၃ ယောက်လောက်။ ယောက်ျားအားနည်းတာက ၂-၃ ယောက်၊ သားအိမ်ကင်ဆာကာကွယ်နည်း၊ နှလုံးသွေးကြောရောဂါ၊ ဘေလုံး ထုတ်ထားရသူ စသဖြင့် မေးကြပါတယ်။ မေးခွန်းမေးနည်းစည်းကမ်း ပို့ပေးရတာက ၄ ယောက်လောက်။ အတော်များများက မေးနည်းစည်းကမ်းအတိုင်းဖြစ်လို့ ဖြေရတဲ့သူမှာသက်သာတယ်။ ရေးထားပြီးသားစာတွေ ပြန်ပို့ပေးရတာမို့လဲ အချိန်မကုန်လှပါ။

• လူ့သဘာဝဆိုတာ အဲလိုပဲ။ အမျိုးတူတာတွေ စုပုံလာတတ်တယ်။ နိုင်ငံရေးသတင်းပူတွေ ဆုံကျတတ်တယ်။ ကျန်းမာရေးအရေးပေါ်တွေ ပေါ်တတ်တယ်။ ပေါက်ကွဲမှုတွေလဲ စုလာတတ်တယ်။ သာယာနာပျော်ဘွယ်တွေလဲ ဆက်တိုက်လာတတ်ပါတယ်။
• ကိုယ့်မှာ အကျသဘော၊ အနုတ်သဘောဖြစ်နေတဲ့အခါ စိတ်အားတင်းရမယ်။ ပျော်စရာမှာလဲ မလွန်ကဲသင့်ပါ။ ဒါမှသာ နာစရာကြုံရင် သက်လုံကောင်းမယ်။ အဲတာဟာ တည်ငြိမ်မှုရအောင်ကြိုးစားနည်းဖြစ်တယ်။

• လောကဓံဆိုတာ ဆင်းရဲတာ၊ ကဲ့ရဲ့ခံရတာ၊ အခြံအရံနည်းတာ၊ လာဘ်လာဘရှားပါးတာတွေချည်းမဟုတ်ပါ။ ချမ်းသာတာ၊ ချီးမွမ်းတာ၊ ခြွေအရံများတာ၊ လာဘ်ပေါတာတွေလဲပါတယ်။ ဒီလေးစုံအကုန်လုံးမှာ တည်ငြိမ်အောင် ကြိုးစားနေကြရတယ်။ လူတိုင်းမှာ အချိန်တိုင်းရဘို့ဆိုတာ လွန်မြောက်သူမဖြစ်သေးသ၍ မဖြစ်နိုင်ဘူး။ ဒါကြောင့် တည်ငြိမ်ပြီး ရင့်ကျက်မှုကိုသာ အချိန်တိုင်း (မိနစ်တိုင်း၊ စက္ကန့်တိုင်း) မှာ ကြိုးစားကြရတယ်။

• စိတ်ပညာမှာ Maturity ရင်ကျက်မှုဆိုတာ မွေးရာပါမဟုတ်၊ လေ့လာသင်ယူရတယ်လို့ဆိုပါတယ်။ ဖြစ်လာ၊ တွေ့လာတာကို ဆီလျှော်အောင် တုန့်ပြန်နိုင်စွမ်းလို့ အဓိပ္ပါယ်ဖွင့်တယ်။ ကာလံဒေသံကိုလဲကြည့်ရတယ်။ ရည်ရွယ်ချက်၊ ဦးတည်ရာ၊ မှန်ကန်မှုတွေနဲ့အတူ အဓိပ္ပါယ်ရှိနေရမယ်။ ရင်ကျက်မှုက အသက်အရွယ်နဲ့ အချိုးကျချင်မှကျတယ်။ ငယ်ရွယ်သူတွေလဲ သူတို့ထက် အသက်ကြီးသူတွေထက် ရင့်ကျက်တည်ငြိမ်နိုင်ကြပါတယ်။

ဒေါက်တာတင့်ဆွေ
၇-၁-၂ဝ၁၅

Comments

Popular posts from this blog

ကျန်းမာခြင်းသည် လာဘ်တပါး

Furamin BC သံဓါတ်အားဆေး