My assignment in Myotha မြို့သာ
ဆေးရုံကော်မတီလူကြီးတွေနဲ့အတူ ထွန်စက်ပေါ်မှာ ခေါင်းမြီးခြုံနဲ့ ဆီးဖြူသီး လှိမ့်သလိုစီးရပြီး၊ တရွာဝင်တရွာထွက် အလှူခံထွက်ရတယ်။ မြို့သာ-ငါန်းဇွန်-ရွာသစ်ကြီး-မုံရွာအထိ ၃-၄ ခေါက်လာပြီး၊ မုံရွာ သလ္လာဝတီသစ်စက်က သစ်မာတွေ ဝယ်ခဲ့ရတယ်။ (မဆလ) ခေတ်မှာ ဘာပစ္စည်းမဆိုအလွန်ရှားတာ။ သူငယ်ချင်းရှိလို့ တော်သေးတယ်။
အခက်အခဲတွေလည်း အများကြီးရှိခဲ့တယ်။ ဆေးရုံဖွင့်ပွဲရောက်မှ ပါတီ-ကောင်စီကလူကြီးတွေ ဦးစီးတာကို ကျွန်တော်က သဘောမကျခဲ့ဘူး။ ဖွင့်ပွဲမှာသာလာကြတာလို့မြင်တယ်။ ကျွန်တော်ကလည်း ငယ်သေးတယ်။ တောင်းပန်ပါတယ်။
ဆေးရုံဆောက်ပြီးကာလေးမှာ လေပြင်းဒဏ်ကြောင့် ဆေးရုံသွပ်မိုးတွေလှန်ကုန်တယ်။ ခေါင်မိုးတစိတ်တပိုင်း
ပျက်တယ်။ အပျက်အစီးထဲမှာပဲ မျက်ခမ်းစပ်ရောဂါတိုက်ဖျက်ရေး မျက်စိခွဲစိတ်ပေးတာတွေ လုပ်ခဲ့သေးတယ်။
အခုပဲ လက်ရှိမြို့သာဆေးရုံဆရာဝန် ဒေါက်တာငြိမ်းငြိမ်းအိကနေ ကျွန်တော့်သမီးဆီကို ဓါတ်ပုံတွေပို့ပေးလို့ အများကြီး ကျေးဇူးတင်ပါတယ်။ ဓါတ်ပုံထဲကလူကြီးတချို့ မရှိကြတော့ပါ။ တချို့လည်း ကျန်းမာရေး အတော်ခြူခြာနေကြပြီ။ မြို့သာကို အလွန်သတိရတယ်။ တနယ်လုံးကိုလည်း ကျေးဇူးတင်ပါတယ်။
ဓါတ်ပုံ = ကျွန်တော်၊ ဦးချစ်မောင်၊ ဦးလှသောင်း၊ ဦးဆင်၊ ဦးဘလှိုင်။ ကျွန်တော့် ဂျစ်ကား ဂ/၂ဝ၆၅
ဒေါက်တာတင့်ဆွေ
၂၇-၁-၂ဝ၁၅
Comments
Post a Comment