Midwife သားဖွါးဆရာမ

ဆရာ့့ MW ပါဆရာ။ အောက်ခြေဝန်ထမ်းတွေအပေါ်ထားတဲ့ ဆရာ့စိတ်ထားအတွက် မျက်ရည်ဝဲတဲ့အထိ ခံစား ကျေးဇူးတင်တာပါဆရာ။ မြန်မာပြည်က MW တွေ အလုပ်တွေက လူနဲ့မမျှပါဆရာ။ ရှိသမျှ project တွေအကုန်လုံး MW တွေလုပ်ရပါတယ်။ ဒါပေမဲ့ သားဖွါးဆရာမတွေမှာ စာရင်းဇယားနဲ့ပဲ အချိန်ကုန်နေပါတယ်။ ဗဟုသုလည်းနည်းနေပါပြီ အွန်လိုင်းကနေပဲကြည့်နေရတာပါဆရာ။ သင်ကြားပေးပါဆရာ။

ဆရာ အခုအခြေအနေတွေကို သိပ်မသိဘူး။ ပညာလိုချင်ရင်တော့ပြော။ ဆရာစာတွေ အများကြီးရေးထားတယ်။ ဆရာ ဒေလီမှာဖွင့်ခဲ့တဲ့ ယမုန်နာဆေးခန်းလေးမှာ လာကူညီကြမယ့်ဆရာမတွေကို စာသင်ပေးဘို့ ဆေးစာတွေကို ဘာသာပြန်ရာကနေ ဆေးပညာစာတွေရေးတယ်။ ကြာတော့ ခေါင်းစဉ်တွေကစုံလာတယ်။ မေးလာတာကိုဖြေရင်းနဲ့ အမေးအဖြေပါဖြစ်လာတယ်။ ကြာတော့ သဗ္ဗပေါင်းစုံ အကုန်ရေးဖြစ်လာတယ်။

Midwife သားဖွါးဆရာမရဲ့အဓိပ္ပါယ်ဖွင့်ဆိုချက်က သားဖွါးပညာရပ်ကို ဆေးပညာနည်းကျ သင်ယူတတ်မြောက်ထားသူ ဖြစ်ပါတယ်။ သားဖွါးဆရာမတွေဟာ မွေးဖွားခြင်းဆိုင်ရာကျန်းမာရေးအတွက် ကာကွယ်ရေးနဲ့ ကုသရေးမှာ ရှေ့တန်းက နေကြရတယ်။ စိတ်ချရအောင်နဲ့ ကုန်ကျစရိတ်နဲ့မျှစေတာကို လုပ်ပေးကြရတယ်။

ကိုယ်ဝန်ဆောင်ချိန်၊ မွေးဖွါးချိန်နဲ့ မွေးဖွါးပြီးကာလသုံးပါအတွက် အတတ်ပညာကို သင်ယူထားသူ ဖြစ်တယ်။ တချို့ နေရာတွေမှာ သားဖွါးခြင်းနဲ့တိုက်ရိုက်မဆိုင်တာကိုပါ လုပ်ရတယ်။ ဒါပေမယ့် မျိုးပွါးခြင်းနဲ့ပတ်သက်တဲ့ ပဏာမ ကျန်းမာရေးစောင့်ရှောက်မှုကိုသာ လုပ်စေတယ်။ ဥပမာ မီးယပ်ပိုင်းစမ်းသပ်ခြင်း၊ မိသားစုစီမံကိန်းနဲ့ သွေးဆုံးခြင်းကို ပြုစုပေးခြင်းတွေဖြစ်တယ်။ မဖွံ့ဖြိုးသေးတဲ့ တိုင်းပြည်တွေမှာတော့ လူထုကျန်းမာရေးလုပ်သားတွေ လုပ်ရတာတွေကိုပါ လိုအပ်ရင်လုပ်စေတယ်။ အခုလက်ရှိမြန်မာပြည်ကလိုပေါ့။ အဲလိုလုပ်တာမှာ ကောင်းတာရော အားနည်းတာပါ ရှိတတ်တယ်။

မြန်မာပြည်မှာ အရင်ကတော့ သားဖွါးဆရာမကို တနှစ်ခွဲသင်တန်းပေးတယ်။ ဒိနောက်မှာ အလွတ်သင်ကျောင်းတွေက သင်တန်းကာလ အမျိုးမျိုးလုပ်လာတယ်။ အစိုးရခန့်သားဖွါးဆရာမတွေကို ကျေးလက်ကျန်းမာရေးဌာနအောက်မှာဖြစ်ဖြစ် တိုက်နယ် ကျန်းမာရေးဌာနအောက်မှာဖြစ်ဖြစ် တာဝန်ပေးတယ်။ သူတို့အပိုင်နယ်ဆိုတာ ရွာ ၄-၅ ရွာရှိတတ်တယ်။ သားဖွါးကိရိယာ တစုံထက်ပိုပြီး ထောက်ပံ့ပေးတာ မရှိပါ။

သားဖွါးဆရာမတွေလုပ်ကြရတဲ့ ကျန်းမာရေးစီမံချက်တွေက အများကြီးရှိတယ်။ ကိုယ်ဝန်ဆောင်နဲ့ ကလေးကာကွယ်ဆေး ထိုးလုပ်ငန်းကတော့ သူတို့ရဲ့ ပင်မအလုပ်နဲ့ဆက်စပ်နေတယ်။ ရောဂါတိုက်ဖျက်ရေးလုပ်ငန်းတွေက သွယ်ဝှိုက်ပြီးသာ ဆိုင်တယ်။ ကူးစက်ရောဂါ နှိမ်နင်းရေးထဲမှာ ရောဂါတွေကပေါင်းစုံတယ်။ တန်းစီရေးရင် စာအတော်ရှည်သွားမယ်။ ဝမ်းရောဂါ၊ တီဘီ၊ ငှက်ဖျား၊ အိတ်ခ်ျအိုင်ဗွီ။ စာရေးရတာက စာလုံးလေး ၂ လုံး ၃ လုံး၊ ရောဂါတွေက အကြီးစားတွေ။ လုပ်စရာတွေဆိုတာက တရက်တည်းပြီးမဟုတ်။ တလလည်းမဟုတ်။ တသက်စာအလုပ်။

သားဖွါးဆရာမတွေကို စီမံကိန်းအလုပ်တွေနဲ့ မနိုင်ဝန်ကိုထမ်းရတာကို လေ့လာဆန်းစစ်မှုလုပ်ရင် အကျိုးတွေနဲ့ အဆိုးတွေ တွေ့ပါမယ်။ သားဖွါးဆရာမတိုင်းကနေ မွေးလူနာတွေကို အကောင်းဆုံးလုပ်ပေးနိုင်စေချင်တယ်။ တောသူကိုယ်ဝန်ဆောင်တွေက မြို့သူတွေလိုခွဲမမွေးချင်ကြဘူး။ တောက သားဖွါးဆရာမတွေကလည်း မြို့ကအိုဂျီတွေလို ခွဲဘို့မလိုသူတွေကို ခွဲတာမျိုးမလုပ်တတ်သူတွေဖြစ်ကြတယ်။

သားဖွါးဆရာမတွေကိုပေးထားတဲ့ မလွဲမသွေလိုတဲ့ပစ္စည်းကိရိယာတွေ မစုံဘူးလို့ပြောကြတယ်။ တခါသုံးလက်အိတ် အလုံအလောက် ရှိကြရဲ့လား။ တောမှာ HIV နဲ့ ဘီပိုးမစစ်ကြတာများတော့ ပိုးရှိနေတဲ့လူနာဆီကနေ သားဖွါးဆရာမတွေ ကူးစက်ခံရမှာ သေချာတယ်။ ဘီပိုးကာကွယ်ဆေးတော့ ထိုးထားကြ။ စီပိုးကလည်း သွေးကနေကူးတာ။ ကာကွယ်ဆေး မပေါ်သေးဘူး။ ကံတရားသာ အားကိုးကြ။ HIV အရေးပေါ်ကာကွယ်နည်းလည်း လက်လှမ်းမီအောင် လုပ်ထားကြ။ အဲတာတွေက ကိုယ့်အိတ်စိုက်ပဲ။ သူများတွေက အာလ်ထွာဆောင်း သရီး-ဒီ၊ ဖိုး-ဒီတွေနဲ့ ကိုယ်ဝန်ဆောင် စောင့်ရှောက်ပေးနေချိန်မှာ ဆရာမဆို့မှာ ပုံထဲကလို ထရမ်းပက်နဲ့ လုပ်ပေးနေကြရတယ်။ ဆောရီး။ ဆရာလည်း ဆောရီးပဲ တတ်နိုင်တယ် ဆရာမတို့ရေ။

တမြန်နှစ်က ဒီစာကိုတင်တာထဲမှာ ဒီလိုရေးတာပါခဲ့တယ်။
• Health Assistant = ကျန်းမာရေးမှူး။ မြို့နယ်တခုမှာ ၂-၃-၄ ယောက်ရှိတယ်။ RHC ကျေးလက်ကျန်းမာရေးဌာန တခုကို ဦးစီးရတယ်။ သင်တန်း ၃-၄ နှစ် တက်ထားရသူဖြစ်တယ်။
• PHS I and II = Public health supervisor grade = လူထုကျန်းမာရေးကြီးကြပ်အဆင့် ၁-၂
• Lady Health Visitor အမျိုးသမီးကျန်းမာရေးလှည့်လည်ကြည့်ရှုပေးသူ။ သူနာပြု-သားဖွားဆရာမကနေ ရာထူးတိုးတယ်။ RHC တခုမှာ တယောက်ရှိတယ်။ သူ့အောက်မှာ သားဖွါးဆရာမ ၄-၅ ယောက်ရှိမယ်။
• Midwife = သားဖွါးဆရာမ၊
• Township Health Nurse မြို့နယ် ကျန်းမာရေးသူနာပြု (အသစ်ဖြစ်တယ်)
• TBA = Traditional Birth Attendant အရပ်လက်သည်၊ (့့ သင်တန်းဆင်း)
• CHW = Community Health Worker ကျန်းမာရေးလုပ်သား၊ (၂၁ ရက်သင်တန်းဆင်း)
• AMW (Auxillaiary Midwives) အရံသားဖွါးဆရာမ၊ (တလသင်တန်းဆင်း)

ကွန်မင့်မှာ
Salai HungKee Htang = PHS ဆိုတာကို ပြည်သူ့ကျန်းမာရေးကြီးကြပ်လို့ ပြန်ပါတယ်ဆရာ။ LHV ကို အမျိုးသမီး ကျန်းမာရေးဆရာမလို့ ခေါ်ပါတယ်။ THN ကို ထူးထူးဆန်းဆန်း မြို့နယ်သူနာပြု (၁) လို့ခေါ်သလို TBA ဆိုတာက သင်တန်းဆင်းမဟုတ်ပါဘူး။ TTBA = Trained Traditional Birth Attendance ကျမှသာ သင်တန်းဆင်း အရပ်လက်သည်ပါ။ CHW ကို လကလ လို့ အတိုကောက်ခေါ်သလို လူထုကျန်းမာရေးလုပ်သားလို့ ခေါ်ကြတာ များပါတယ်။ ဆရာ့လို ဖော်လိုဝါအများကြီးရှိတဲ့သူရဲ့ စာတစ်စောင်မှာ အမှားတွေများနေတော့ မဖြစ်သင့်ဘူးထင်လို့ပါ။ စိတ်မရှိပါနှင့်ဗျ လို့ အခုပဲဖတ်ရတယ်။

Tint Swe နောက်အခေါ်တွေတော့ မသိပါ။ အရင်ကတော့ ဆရာ့စာထဲမှာပါတဲ့အတိုင်းခေါ်တယ်။ အမှန်က HA, LHV, CHW, TBA အင်္ဂလိပ်စာလုံးအတိုကောက်နဲ့သာ ပြောလေ့ရှိတယ်။ ဖြီးဖြန်းတာတော့ ဟုတ်ပါ။ အဲဒီတုန်းက TTBA လို့ မခေါ်ခဲ့ပါ။ Visitor ကို တိုက်ရိုက်ဘာသာပြန်ခဲ့တယ်။ ဘယ်သူကမှ အတွန့်မတက်ခဲ့ပါ။ ဖြီးဖြန်းတာတော့ ဟုတ်ပါ။ Attendance တော့ မဟုတ်လောက်။ Attendant ဖြစ်ပါမယ်။

ကျွန်တော့စာတွေမှာ မြန်မာပြည်ကဓါတ်ပုံတွေကိုသာ သုံးချင်တယ်။ ဒါပေမယ့် အဆင်ပြေတာမရလို့ရော ခွင့်ပြုချက်လိုတာ ရှိနိုင်လို့ပါ ဂူဂယ်အင်မေ့ခ်ျကပုံတွေကိုသာ သုံးရတယ်။ သိပ်ကြိုက်တာတော့ မဟုတ်ပါ။

ဓါတ်ပုံ = ၂၄-၈-၂ဝ၁၂ နေ့က ယမုန်နာဆေးခန်းမှာ မွေးလူနာတယောက်ကို ခက်ခက်ခဲခဲမွေးပေးကြစဉ်က

ဒေါက်တာတင့်ဆွေ