Singapore မွေးနေ့အတူ စင်္ကာပူ
စင်္ကာပူဟာ ၂ ရာစုမှာ သီရိဗီဂျေးယာ စုမာတြာအင်ပါယာထဲမှာပါတယ်။ ၁၁ ရာစုမှာ အိန္ဒိယ ချိုလာ အင်ပါယာထဲမှာ ပါတယ်။ ၁၆၁၃ မှာ ပေါ်တူဂီကသိမ်းတယ်။ ဒတ်ခ်ျနဲ့ ဗြိတိသျှတွေရောက်လာတယ်။ ၁၈၁၉ မှာ ဂျိုဟာစူလတန်နဲ့ အရှေ့အိန္ဒိယကုမ္ပဏီနဲ့စာချုပ်တယ်။ ၁၈၂၄ မှာ ဗြိတိသျှနဲ့ စူလတန်နဲ့စာချုပ်သစ်အရ စင်္ကာပူကို ဗြိတိသျှကအပိုင်ရတယ်။ လူ ၁ဝဝဝ လောက်သာရှိတယ်။ မလေးနဲ့တရုပ်နည်းနည်း။ ၁၈၅ဝ မှာ ၈ သောင်းရှိလာတယ်။ တရုပ်တဝက်ကျော်တယ်။ ပထမကမ္ဘာစစ်အပြီး ဗြိတိသျှက ရေတပ်စခန်းကြီးဆောက်တယ်။ ဒုတိယကမ္ဘာစစ်မှာဂျပန်ကသိမ်းတယ်။ ၁၉၄၅ မှာ မဟာမိတ်တွေက ဗုံးအကြီးအကျယ်ကြဲချတယ်။ ဂျပန်လက်နက်ချတယ်။ ဗြိတိသျှလက်ထဲပြန်ရတယ်။
၁၉၅၉ မှာ ကိုယ်ပိုင်အုပ်ချုပ်ရေးရလာတယ်။ လီကွမ်ယုကဝန်ကြီးချုပ်ဖြစ်လာတယ်။ ၁၉၅ဝ ကျော်မှာ တရုပ် ကွန်မြူနစ်တွေက လက်နက်ကိုင်ပုန်ကန်တယ်။
၁၉၆၂ ပေါင်းစည်းရေးဆန္ဒခံယူပွဲအရ ၃၁-၈-၁၉၆၃ မှာ စင်္ကာပူက မလေးဖက်ဒရေးရှင်းနဲ့ပူးပေါင်းခဲ့တယ်။ မလေး + ဆာရာဝပ် + မြောက်ပိုင်းဘော်နီယိုတွေပါတယ်။ အရွယ်အစားငယ်လွန်းလို့ လုံခြုံရေးစိုးရိမ်မှုကြောင့်ပေါင်းတာနဲ့ ကွန်မြူနစ်နိုင်ငံဖြစ်မှာစိုးတာလည်းပါတယ်။ မလေးနဲ့ စင်္ကာပူခေါင်းဆောင်တွေကြား သဘောမတူတာတွေများတယ်။
၁၉၆၄ စင်္ကာပူမှာ အဓိကရုဏ်းဖြစ်တယ်။ ၉-၈-၁၉၆၅ မှာ မလေးပါလီမန်က ၁၂၆ မဲ၊ သုညမဲနဲ့ မလေးထဲကနေ စင်္ကာပူကို ထုတ်ပယ်လိုက်တယ်။ အဲတာကို စင်္ကာပူလွတ်လပ်ရေးနေ့လို့ သတ်မှတ်တယ်။ ၁၉၆၉ မှာ လူမျိုးရေးအဓိကရုဏ်း တကြိမ်မကဖြစ်တယ်။ ၁၉၆၇ မှာ ASEAN အာစီယန်ထူထောင်တော့ ပူးတွဲတည်ထောင်သူတွေထဲမှာပါတယ်။ ၁၉၇ဝ မှာ NAM ဘက်မလိုက်အုပ်စုထဲပါတယ်။
စင်္ကာပူတည်ထောင်ခြင်းကို ၆-၂-၁၈၁၉ လို့မှတ်တမ်းတင်ထားတယ်။ ၃-၆-၁၉၅၉ မှာ ကိုယ်ပိုင်အုပ်ချုပ်ရေးရတယ်။ ၃၁-၈-၁၉၆၃ မှာ ဗြိတိသျှကိုလိုနီကနေ လွတ်လပ်တယ်။ ၁၆-၉-၁၉၆၃ မလေးရှားဖက်ဒရေးရှင်းထဲဝင်တယ်။ ၉-၈-၁၉၆၅ နေ့မှာ လွတ်လပ်ရေးရပြီးကတည်းက ဗြိတိသျှဓနသဟာယထဲမှာပါတယ်။ စင်္ကာပူဟာ City-state မြို့နိုင်ငံတခုဖြစ်တယ်။ ဧရိယာ ၇၁၈့၃ ကီလိုမီတာကျယ်တယ်။ ၂ဝ၁၄ လူဦးရေစာရင်းအရ ၅၄၆၉၇ဝဝ ရှိတယ်။
လီကွမ်ယုကို ကမ္ဘာ့ခေါင်းဆောင်တွေက ချီးကျူးကြတယ်။ သဘောမတူစရာမရှိပါ။ ကျွန်တော် အိန္ဒိယမှာနေစဉ်က မဏိပူပြည်နယ်၊ အင်ဖါးမြို့မှာ အစည်းအဝေးတခုသွားတော့ ပုဂ္ဂလိကကျောင်းတခုက ကျောင်းအုပ်ဆရာကြီးကနေ ကျွန်တော့်ကို လက်ဆောင်ပေးတာ လီကွမ်ယုအကြောင်းစာအုပ်ပါ။
လီကွမ်းယူ သူ့နိုင်ငံအတွက် အလွန်တော်တဲ့သူဖြစ်ပါတယ်။ ကျွန်တော်တို့ဆီမှာ ဗိုလ်ချုပ်အောင်ဆန်းက တိုင်းပြည် လွတ်လပ်ရေး ရအောင်လုပ်ပေးသွားတယ်။ လီကွမ်ယုက စင်္ကာပူတိုးတက်သွားအောင်လုပ်ပေးသွားတယ်။ သူဟာ မလေးရှားကနေခွဲထွက်အပြီး၊ ရန်ကုန်ကိုလာကြည့်တယ်။ မြန်မာပြည်ကိုမီအောင် ၁၅ နှစ်လောက်လုပ်ယူရမယ်လို့ အားခဲသွားခဲ့တယ်။ မျက်စိအောက်တင် စင်္ကာပူကို တကယ်တိုးတက်သွားတယ်။ အာရှကျားလေးကောင် (တိုင်ဝမ်၊ တောင်ကိုရီးယား၊ စင်္ကာပူ၊ ဟောင်ကောင်) ဖြစ်လာနိုင်စေခဲ့တယ်။
ဒါပေမယ့် လီကွမ်ယုလက်ထက်မှာ ဒီမိုကရေစီမရှိသလောက်ပဲ။ တိုင်းပြည်ကောင်းစားရေးအတွက် နာမည်ပျက်ခံသွားတာ လူ့သက်တမ်း လေးပုံတပုံလောက်နဲ့ တကယ်တိုးတက် ချမ်းသာသွားတယ်။ မြန်မာပြည်မှာ ဒီမိုကရေစီမရှိတာ လူ့သက်တမ်းတဝက်ကြာပေမဲ့ ချမ်းသာဖို့နေနေသာသာ LDC မှာ တပ်စွဲထားတုံးပဲ။ လီကွမ်ယုက သူ့နိုင်ငံအတွက်သာမက မြန်မာပြည်က စစ်ဗိုလ်ချုပ်ကြီးတွေအတွက်လည်း အလွန်ကောင်းခဲ့သူပါ။ စစ်ဗိုလ်ချုပ်ကြီးတွေ သူတို့ကိုယ်ပိုင်ငွေတွေ သွားထားလို့ရတယ်။ ငွေမည်းခဝါချပေးတယ်။ လက်နက်ဝယ်ဖို့ ကြားခံလုပ်ပေးတယ်။ စစ်ရေးအမြင်ရှိသူတွေက စင်္ကာပူကို ဆေးသွားကုနိုင်ကြတယ်။
လီကွမ်ယု ထားဝယ်စီမံကိန်းအထိလာကြည့်တာဟာ မြန်မာပြည်မှာ နိုင်ငံခြားကုမ္ပဏီကြီးတွေကနေ စီးပွါးရေး လုပ်ကွက်ကြီးတွေလာလုပ်တော့ သူ့နိုင်ငံရဲ့လုံခြုံရေးကို စိုးရိမ်လို့ပါ။ စစ်ရေးအမြင်ရှိပါတယ်ဆိုတဲ့ စစ်ဗိုလ်ချုပ်ကြီးတွေ ကတော့ သူတို့အတွက်ဘယ်လောက်ရမလည်းသာ ကြည့်ကြတယ်။ မြန်မာစစ်ဗိုလ်ချုပ်ကြီးတွေ လီကွမ်ယုခြေဖျားမမီပါ။
စင်္ကာပူနေ မြန်မာတွေ ကျန်းမာချမ်းသာကြပါစေ။
ဒေါက်တာတင့်ဆွေ
၉-၈-၂ဝ၁၆
Comments
Post a Comment