Gallstones သည်းခြေကျောက်

၁။ ကျွန်မသမီးလေးက နှစ်လနှင့်ဆယ်ရက်ပါ။ ခွဲဆိပ်တာကလွဲလို့ဘယ်လိုကုနိုင်ပါသလဲရှင့်။ အသားဝါမျက်လုံးဝါ၍ ဆရာဝန်ပြတာပါ။ သွေးဝမ်းစစ် ultra soundရိုက်ပြီးဆေးရုံတန်းတင်ခိုင်းပါသည်။ ဆေးရုံတွင်သာရှိသော skan စက်တမျိုး နှင့်သေချာရန်ရိုက်ရမည်ဆိုပါသည်။ ကလေးအသက်သုံးလအတွင်းသာ ခွဲဆိပ်ရမည်ဆိုပါသည်။ သည်းခြေအိတ် ပိတ်သည့်ရောဂါဟုပြောပါသည်။ အခြားသောနည်းလမ်းနှင့်ကုသနိုင်ပါသလားရှင့်။ ခွဲဆိပ်လျှင်ရော ရာနှုန်းပြည့် အောင်မြင်ပါသလားရှင်။

ခွဲစိတ်လို့သာ ရေးရမယ်။

၂။ ကျွန်မအသက် ၃၃နှစ်ပါ။ ယောက်ျားရှိ။ ကလေးတယောက်မွေးပြီးပါပြီ အရင်ကတော့ ကျောနဲ့ရင်ညပ်အောက်နေတာ တနှစ်လောက်ရှိပါပြီ။ သက်သာလိုက်ပြောက်လိုက်ဆိုတော့ လေအောက်တာပဲထင်ပြီး ဆေးခန်းမပြဖြစ်ခဲ့ဘူး။ ၃၊ ၇၊ ၂၀၁၇ က မနေနိုင်လောက်အောင် ကျောနဲ့ရင် ညပ်အောက်လာလို့ ဆေးရုံတတ်လိုက်တာ သဲချေမှာ ကျောက်တည်တယ်လို့ သိရပါတယ်ဆရာ။ အခုတော့မခွဲစိတ်ရပဲနဲ့ ဆေးသောက်နေရပါတယ်။ အခုတော့ အရင်လို မအောက်တော့ပဲ ညာဘက် ရင်ညွန့်ကနေ ဆူးခနဲအောက်တတ်လာပြီးတော့ ဗိုက်တပြင်လုံးအောက်လာပါတယ်။ ၁၀ မိနစ်လောက် ခွေနေလိုက်ရင် သက်သာသွားပါတယ်။ အဲ့ဒါဘာရောဂါဆက်ဖြစ်လာနိုင်ပါသလဲဆရာ။

ပျောက်လို့ရေးရတယ်။ လေအောင့်လို့ ရေးရတယ်။ ညှပ်အောက်လာလို့ ရေးရတယ်။ မအောက်တော့ပဲလို့ရေးရတယ်။ စူးခနဲလို့ ရေးရတယ်။ သည်းခြေလို့ရေးရတယ်။ တစ်တွေကို ပြင်လိုက်တယ်။

၃။ ဆရာရှင့် မနေ့က မေးလ်တွေ့လို့ဖွင့်တာ အကြာကြီးလုပ်ပြီး ဖွင့်မရဘူးဆရာ။ အဲ့ဒါနဲ့ပိတ်ပြီးတော့ အခုပြန်ဖွင့်တော့ မရှိတော့ဘူးဆရာ။ ဆရာ့ရဲ့ပြန်စာကိုတွေ့ပြီး ဝမ်းသာနေတာလေး ဘယ်ရောက်သွားမှန်းတောင် မသိတော့ပါဘူး။ အဖြစ်ကထီပေါက်ပြီးလက်မှတ်ပျောက်တဲ့အတိုင်းပဲ။ တတ်နိုင်ရင်ပြန်ပို့ပေးစေချင်ပါတယ်ဆရာ။ သည်းခြေမှာ ကျောက်တည်ရတဲ့အကြောင်းလေးလဲ သိချင်ပါတယ်ဆရာ။

Fat, Female, Forty and Fertile အမျိုးသမီးနည်းနည်းဝ၊ အသက်က သားသမီးမွေးနိုင်သေးတဲ့အရွယ် ၄ဝ၊ သည်းခြေကျောက်ဖြစ်ဘို့နီးစပ်တယ်။

လူတိုင်းမှာ အသည်းအောက်နားမှာ သည်းခြေအိတ်ရှိကြတယ်။ ဗိုက်ရဲ့ အပေါ်ပိုင်း ညာဘက်မှာပါ။ သည်းခြေအိတ်ထဲက အရည်ကနေ ကျောက်ဖြစ်လာတတ်တယ်။ အဲဒီ Bile (ဘိုင်းလ်) အရည်ဟာ စားလိုက်တဲ့ အစာထဲမှာပါမဲ့ ဆီ-အဆီကို ချက်လုပ်ပေးတယ်။ (ဘိုင်းလ်) ကို အသည်းကနေထုတ်ပေးပြီး သည်းခြေအိတ်မှာ လှောင်ထားတယ်။ လိုအပ်ချိန်ကျမှ Common bile duct ဆိုတဲ့ပြွန်ထဲကို သည်းခြေရည်တွေ ထွက်လာစေတယ်။ အူသိမ်အကွေးလေးထဲ ဝင်လာတယ်။ ပြွန်ဆိုတာက (၃) မျိုးရှိတယ်။ Hepatic ducts အသည်းကလာတဲ့ပြွန်၊ Cystic duct သည်းခြေအိတ်ကပြွန် နဲ့ Common bile duct အဲဒီ ၂ ခုပေါင်ပြွန်။ နှစ်ခုပေါင်းပြွန်နဲ့ Pancreatic duct သရက်ရွက်ကလာတဲ့ပြွန်က လာပေါင်းတယ်။

(ဘိုင်းလ်) ထဲမှာ ရေ၊ (ကိုလက်စထော)၊ အဆီ၊ သည်းခြေဆား၊ (ပရိုတင်း) နဲ့ (ဘီလီရူဘင်) ဆိုတာတွေပါနေတယ်။ သည်းခြေဆားကသာ အဆီကိုကျေချက်ပေးပြီး (ဘီလီရူဘင်) ပါနေလို့ ဝမ်းအရောင် ဝါညိုညို ဖြစ်စေတယ်။ (ကိုလက်စထော)၊ သည်းခြေဆား၊ နဲ့ (ဘီလီရူဘင်) များနေရင် Gallstones ကျောက်တည်နိုင်တယ်။

သည်းခြေကျောက် နှစ်မျိုးရှိတယ်။ (၁) Cholesterol stones စိမ်းဝါဝါအရောင်ရှိတယ်၊ ၈ဝ% ရှိတယ်။ (၂) Pigment stones က သေးတယ်၊ အရောင်မဲတယ်၊ (ဘီလီရူဘင်) ပါတယ်။ အရွယ်အစား သဲမှုံလေးလောက်ကနေ ဂေါက်သီးလောက်အထိ ဖြစ်နိုင်တယ်။ တလုံးထဲကနေ ရာဂဏန်းအထိ ဖြစ်နိုင်တယ်။ အမျိုး ၂ ခုတွဲလဲဖြစ်နိုင်တယ်။

• အမျိုးသမီးတွေမှာ ယောက်ျားတွေထက် ၂ ဆဖြစ်ရတယ်။ ကိုယ်ဝန်ဆောင်ရတာ၊ (အီစထိုဂျင်) ဆေးပေးကုသခံရတာ၊ ကိုယ်ဝန်တားဆေးတွေကနေ ပိုဖြစ်စေသလား ယူဆတယ်။
• အမျိုးထဲမှာ တယောက်မကဖြစ်တတ်တယ်။ အသက် ၆ဝ ကျော်ရင် ပိုဖြစ်တယ်။ လူကဝရင် ပိုဖြစ်တယ်။
• အစားအသောက်ထဲမှာ အဆီနဲ့ (ကိုလက်စထော) များတာလဲ အပြစ်ဖြစ်နိုင်တယ်။
• ကိုယ်အလေးချိန် အမြန်လျှော့နည်းတခုဖြစ်တဲ့ Crash diets အစားအသောက်ကို အတင်းလျှော့ချနည်းကနေလဲ ဖြစ်စေနိုင်တယ်။ အသည်းကနေ (ကိုလက်စထော) တွေ အပို ထုတ်ပေးရလိုဖြစ်မယ်။
• (ကိုလက်စထော) ချဆေးတွေကနေလဲ ဖြစ်နိုင်တယ်။
• ဆီးချိုရှိနေသူတွေမှာ Triglycerides (ထရွိုင်ဂလစ်စရွိုက်) တွေ ပိုများနေလို့ ပိုဖြစ်နိုင်တယ်လဲ ယူဆတယ်။
• ကျောက်ရှိနေသူမှာ နောက်ထပ်ကျောက် ထပ်ဖြစ်လာနိုင်တယ်။

အတော်များများ တခြားဟာအတွက် ဆေးစစ်ရင်နဲ့ သည်းခြေကျောက် လာတွေ့တတ်တယ်။ ဘာမှ မခံစားရသူက များတယ်။ အသက် ၆၅ နှစ်ကျော်သူတွေမှာ ၂ဝ% လောက်သာ ရောဂါလက္ခဏာတွေဖြစ်နိုင်တယ်။ ခံစားရရင်လဲ အစာမကျေ၊ ရင်ကယ်နေမယ်။ ဆီ-အဆီများတာကို စားရင် ပိုဆိုးတာ ခံစားရမယ်။ လေအောင့် လေတက်မယ်။

သည်းခြေရည် ထွက်ရမဲ့လမ်းကို လာပိတ်နိုင်တယ်။ ပြွန်တွေထဲမှာ သည်းခြေရည် ပိတ်နေရာကနေ ရောင်လာနိုင်တယ်။ သရက်ရွက်ကိုပါ ရောင်နိုင်သေးတယ်။ ဖြစ်ရင် အတင်းနာပြီးဆိုးတယ်။ ရောဂါလက္ခဏာတွေ ဖြစ်လာရင် ကိုယ်ပူ၊ အသားဝါ၊ တောက်လျှောက်နာတာတွေ ခံစားရမယ်။ Cholecystitis သည်းခြေအိတ် ရောင်ခြင်း၊ Cholangitis သည်းခြေရည်ရောင်ခြင်း၊ Gangrene သည်းခြေအိတ် သွေးမရဖြစ်ခြင်းတွေလဲ ဖြစ်နိုင်တယ်။

ကျောက်က ပြွန်လမ်းကိုလာပိတ်ရင် ရုတ်တရက် ခံစားရတာတွေရှိလာနိုင်တယ်။ အဆီများတဲ့အစာ စားပြီးချိန်မှာ ဖြစ်တတ်တယ်။ ဗိုက်အပေါ်ညာဘက်နေရာ မှန်မှန်နာလာမယ်။ နောက် ပိုနာလာမယ်။ နာရီဝက်ကနေ နာရီများစွာ ကြာနိုင်တယ်။ နောက်ကျောနဲ့ လက်ပြင်ဆီလိုက်နာနိုင်တယ်။ ညာဘက်ပခုံးအောက်ကလဲ နာနိုင်တယ်။ ပျို့ချင် အန်ချင်ဖြစ်မယ်။ ကိုယ်ပူမယ်။ ချမ်းမယ်။ ဆီး-မျက်လုံးတွေဝါလာမယ်။ ဝမ်းအရောင်ပျော့လာမယ်။ ရွံ့ရောင် ခေါ်တယ်။ ပိတ်လို့နာတာကို Biliary colic ခေါ်တယ်။ ၈ဝ% သောလူနာတွေခံစားရတယ်။ ဖြေးဖြေးချင်းပိတ်ရင် အဲလိုမခံစားရဘူး။

သည်းခြေကျောက်ရှိနေပမဲ့ ဘာမှမဖြစ်သလိုနေသူတွေရှိတယ်။ အရွယ်အစား ၈ မီလီမီတာကျော်လာမှ နာလာတယ်။ ဆီးကျောက် နာသလိုဘဲ။ နေရာသာကွာတယ်။ ဗိုက်ညာဘက် အပေါ်ပိုင်းမှာ ၁၅ မိနစ် ကနေ နာရီတော်ကြာထိ တိုးတိုး နာနိုင်တယ်။ နောက်ကျော၊ ညာလက်ပြင်ကလည်းနာနိုင်တယ်။ ပျို့တာ၊ အန်တာလည်း ဖြစ်တတ်တယ်။ “သည်းခြေအိတ် နေရာတည့်တည့်မှာစမ်းတဲ့သူ့ လက်ကိုထား၊ လူနာကိုအသက် ပြင်းပြင်း ရှူခိုင်းရင် အသက်ဆက်မရှူနိုင်ဖြစ်တာ” ကို Murphy's sign လို့ခေါ်တယ်။

သည်းခြေအိတ်မှာတည်တဲ့ ကျောက်မှာ Calcium, Phospholipids, Lecithin, Bilirubin, Bacteria နဲ့ Cholesterol ဓါတ်ဆားတွေ ပါနိုင်တယ်။

သည်းခြေအိတ်မှာ ဖြစ်နိုင်တဲ့ရောဂါတွေ အမျိုးမျိုးရှိတယ်။ Biliary colic သည်းခြေအိတ်ကနာတာ၊ Common bile duct stones သည်းခြေကျောက်က ပြွန်မှာပိတ်နေတာ၊ Gallstones သည်းခြေအိတ်ထဲကျောက် ရှိနေတာ၊ Gallbladder cancer သည်းခြေအိတ် ကင်ဆာ၊ Cholecystitis သည်းခြေအိတ် ရောင်တာ၊ Gallbladder polyp သည်းခြေအိတ် အသားပို၊ Strawberry gallbladder သည်းခြေအိတ် စထောဘယ်ရီရောင် ဖြစ်နေတာ။

အဆီများတဲ့အစာစားပြီးရင် နာတာဖြစ်လာတတ်တယ်။ ဗိုက်ကလေပွသလို၊ အစာမကြေသလိုခံစားရတယ်။ နဲနဲဖျားနိုင်တယ်။ အသားဝါဖြစ်သလိုမျက်စိ-ဆီးဝါလာမယ်။ အသားအရေယားယံမယ်။ ဝမ်းကရွံ့ရောင်ဖြစ်လာမယ်။ အစားပျက်မယ်။ ကျောက်ကထွက်လမ်း (ပြွန်) ကိုလာပိတ်ရင် ဗိုက် အပေါ်ညာဘက်ကနေနောက်ပိုင်းအထိရုတ်တရက်၊ စူးစူးရှရှ နာမယ်။ အစာမကျေ-ရင်ပြည့်သလိုခံစားရမယ်။

ရောဂါ သေခြာအောင် လုပ်နည်းတွေ အမျိုးမျိုးရှိတယ်။ ဗိုက်ကို (အာလ်ထွာဆောင်း) ရိုက်ခြင်း၊ CT scan (စကင်) လုပ်ခြင်း၊ Endoscopic ultrasound or EUS ကရိယာထည့် စစ်ဆေးခြင်း၊ MRI (အမ်-အာရ်-အိုင်) ရိုက်ခြင်း။ ဓါတ်မှန်ရိုက်မယ်။ ဆေးထိုးရိုက်တာလဲရှိတယ်။ Cholescintigraphy scan လဲလုပ်နိုင်တယ်။ Endoscopic retrograde cholangiopancreatography လုပ်ရင်း ကျောက်ကိုပါ ထုတ်ယူနိုင်တယ်။

Heart attack နှလုံး (အတက်ခ်) ရတာ၊ Appendicitis အူအတက်ရောင်တာ၊ Ulcers လေနာ၊ Irritable bowel syndrome အစာလမ်းရောဂါ၊ Hiatal hernia အထဲမှာ (ဟာနီယာ) ဖြစ်တာ၊ Pancreatitis သရက်ရွက်ရောင်တာ နဲ့ Hepatitis အသည်းရောင်တာတွေနဲ့ ဆင်တယ်။ ခွဲခြားရမယ်။

ရောဂါလက္ခဏာတွေ ခံစာရသူတွေကိုခွဲစိတ်နည်းက ၉ဝ% ကောင်းစေပါတယ်။ ခွဲနည်းက ၂ မျိုးရှိတယ်။ သမားရိုးကျ ဗိုက်ကိုခွဲပြီး Cholecystectomy သည်းခြေအိတ်ကိုထုတ်ပြစ်တာနဲ့ Laparoecopeကရိယာသုံးပြီးဗိုက်ကို ၂-၃ နေရာကနေ သေးသေးလေးဖေါက်ပြီး၊ အပြင်ကနေထုတ်နည်းပါ။

သည်းခြေအိတ် မရှိတော့ပေမဲ့ လူကောင်းနီးနီးနေနိုင်ပါတယ်။ အဲလိုလူ ၅-၄ဝ% မှာ Postcholeccystectomy syndrome သည်းခြေအိတ်ခွဲပြီး လက္ခဏာစုဆိုတာ ခံစားရတတ်တယ်။ အစာမကျေသလိုနေတာနဲ့ ဗိုက် အပေါ်ညာဘက်မှာ နာနေတာတွေ ဖြစ်တယ်။ ၂ဝ% လောက်ကတော့ ဝမ်းပျက်နေတာခံစားရတယ်။

Nonsurgical approaches မခွဲတဲ့နည်း
• ခွဲစိတ်ဘို့လိုပေမဲ့ ခွဲဘို့မသင့်သူတွေကိုသာ လုပ်ပါတယ်။ ၅ နှစ်နေရင် ပြန်ဖြစ်တတ်တယ်။
• Oral dissolution therapy ဆေးပေးနည်း။ Ursodiol (Actigall) နဲ့ Chenodiol (Chenix) ဆေးတွေက ကျောက် သေးတာအတွက်သာ ရတယ်။ Bile acid ဖြစ်တယ်။ Cholesterol gallstones ကိုသာရတယ်။ 1-1.5 cm diameter ထက်မကြီးမှရမယ်။ ၁-၂ နှစ် ကြာနိုင်တယ်။ ဆေးဖြတ်လို့ ပြန်ပေါ်နိုင်တယ်။
• Contact dissolution therapy ဆေးထိုးနည်းကို စမ်းသပ်သုံးကြည့်နေတယ်။ သည်းခြေအိတ်ထဲဆေးထိုးပြီး Cholesterol stones ကိုကျေစေမယ်။ Methyl tert-butyl ether ဆေးက ကျောက်ကို ၁-၃ ရက်အတွင်း ကျေစေနိုင်တယ်။
• Extracorporeal shock-wave lithotripsy (ESWL) နည်းကို ကျောက်က ပြွန်မှာပိတ်နောမှာ သုံးနိုင်တယ်။

Surgery ခွဲစိတ်ကုသနည်း
• Cholecystectomy သည်းခြေအိတ်ထုတ်ပြစ်နည်းမှာ Laparoscopy နည်းကိုသုံးတယ်။
• Open surgery သမားရိုးကျခွဲနည်းက ဗိုက်ဖွင့်ပြီးဖြတ်ထုတ်ရတယ်။ သည်းခြေအိတ်ရောင်နေတာဆိုရင်တော့ ဒီနည်းနဲ့ လုပ်ရတယ်။
• Gallbladder သည်းခြေအိတ်ကို ခွဲထုတ်ပေမဲ့ အသက်ရှင်နေနိုင်ပါတယ်။ သည်းခြေရည်ကို အသည်းကနေ လုံလောက်အောင် ထုတ်ပေးနေမယ်။

တခြားကုနည်းတွေ ရှိသေးတယ်။ Cholesterol gallstones အမျိုးအစားကိုUrsodeoxycholic acid ဆေးနဲ့ ကျောက်ကို ပျော်သွားစေနိုင်တယ်။ ဆေးအကြာကြီး (၂ နှစ်) ပေးရတယ်။ ဆေးရပ်ရင် ပြန်ဖြစ်တာတွေရှိတယ်။ သည်းခြေကျောက်က ပြွန်မှာပိတ်နေတယ်ဆိုရင် (ERS) နဲ့ (ERCP) နည်းသုံးကုတာတချို့ကိုကောင်းစေတယ်။ Lithotripsy နည်းနဲ့ ချေဖျက် နိုင်တယ်။

နောက်တနည်းကတော့ သည်းခြေကျောက်မှန်သမျှကို Apple cider vinegar ကိုတခါသောက် ဇွန်းသေး ၃ ဇွန်း၊ တနေ့ ၃ ကြိမ်သောက်ပါ။ ခါးအောက်ပိုင်းကိုရေအေးနဲ့ ချိုးပါ။ နောက် ရေအေးနဲ့ ရေနွေး တလှည့်စီချိုးပါ။ ရေအများကြီးသောက်ပါ။ Cranberry juice နဲ့ Aloe vera juice တွေသောက်ပါ။ အဆီနဲ့ (ကိုလက်စတော) လျှော့စားပါ။ ဖိုင်ဘာများတဲ့ အသီးအနှံတွေ စားပါ။ ပဲပုတ်ကထုတ်တဲ့ Lecithin ခေါ်တဲ့ အဆီတမျိုးစားသုံးပါ။

နောက်တနည်း။ အစာမစားဘဲ ၄ ရက်နေပါ။ မုံလာဥနီဖျော်ရည်၊ နာနတ်ဖျော်ရည်၊ စပျစ်သီးဖျော်ရည်တွေသာသောက်ပါ။ ၄ ရက်မြောက်နေ့မှာသံလွင်ဆီနဲ့ သံပုရာရည်သောက်ပါ။ ၅ ရက်မြောက်နေ့မှာ ကြက်ဆူဆီဇွန်းသေး ၄ ဇွန်းသောက်ပါ။ နောက် အသီအနှံတွေ များများတိုးစားပေးပါ။

Biliary obstruction ဆိုတာ သည်းခြေရည်လမ်းပိတ်တာကိုခေါ်တယ်။ ကျောက်မဟုတ်တာကနေလည်း ပိတ်နိုင်တယ်။ ပြွန်လမ်းရောင်ရောဂါ၊ ပြွန်ထိခိုက်မိတာ၊ အသည်းရောဂါ၊ သည်းခြေအိတ်ရောဂါ၊ ပန်းကရပ်စ် ခေါ် သရက်ရွက်ရောင်ရောဂါ၊ အူသိမ်ရောဂါ၊ သန်ကောင်တွေကနေ ဆက်ဖြစ်နိုင်တယ်။ ကုသတဲ့အခါ အခြေခံရောဂါကိုပါကုသရပါမယ်။

Cholecystectomy Q and A သည်းခြေအိတ် ထုတ်ထားသူ http://doctortintswe.blogspot.com/2015/01/cholecystectomy-q-and.html
Gallstones သည်းခြေကျောက် http://doctortintswe.blogspot.com/2015/01/gallstones.html
Cholecystitis သည်းခြေအိတ်ရောင်ခြင်း http://doctortintswe.blogspot.com/2015/01/cholecystitis.html

Dr. တင့်ဆွေ