DHEA ဆေးဆိုတာ

ဆရာရှင့် ကျွန်မအသက်က ၂၉ နှစ်ပါ။ ကလေးမရသေးလို့ OG ပြတော့ DHEA Plus ကို ကလေးမရမချင်း သောက်ခိုင်းပါတယ်။ DHEA Plus က ဘာအတွက်သောက်ရတာလဲလို့ သိချင်လို့ပါဆရာ။

မနေ့ကလည်း တယောက်က မေးသေးတယ်။ DHEA Tablet ဆေးဟာ (ဟာဗယ်) တိုင်းရင်းဆေးအုပ်စုဝင်ဖြစ်တယ်။ ဟော်မုန်းဆေးလို့ဆိုပါတယ်။ လူတိုင်းရဲ့ကိုယ်ထဲမှာ အလိုလိုထုတ်ပေးနေတဲ့ ဟော်မုန်းကို သစ်ပင်သစ်ရွက်တွေကနေ ထုတ်ယူထားတယ်။ ဆေးကြော်ငြာအဆိုအရ ဟော်မုန်းများရဲ့မိခင်လို့ဆိုပါသေးတယ်။ အသက်ကြီးလာသူတွေ၊ ကိုယ်အလေးချိန် ထိန်းချင်သူတွေကို သောက်ပါလို့ ဆေးညွှန်းကဆိုပါတယ်။ တခါသောက် ၁ တောင့်၊ တနေ့ ၃ ကြိမ်။

ယောက်ျားများအတွက် DHEA သတိပေးချက်
• DHEA ဆေးမသောက်ခင် သွေးထဲမှာ PSA (Prostate Specific Antigen) ဘယ်လောက်ရှိသလဲစစ်ရမယ်။ ၆ လ ဒါမှမဟုတ် တနှစ်တခါ စစ်နေသင့်တယ်။ free testosterone နဲ့ estrogen ကိုလဲသိနေသင့်တယ်။
• Prostate cancer ဆီးကျိတ်ကင်တာ နဲ့ Benign prostate disease ဆီးကျိတ်ကြီးနေသူတွေ မသောက်ရပါ။
• DHEA ဆေးသောက်နေရင်း Vitamin D 5,000 – 10,000 IU, Vitamin E 400 IU, Selenium 200 mcg, Gamma E Tocopherol with Sesame Lignans 200 mg, Lycopene Extract 10 – 40 mg နဲ့ Boron 3 – 10 mg ဆေးတွေပါတွဲသောက်သင့်တယ်လို့ ဖတ်ရပါတယ်။

အမျိုးသမီးများအတွက် DHEA သတိပေးချက်
• Estrogen နဲ့ Testosterone ဟောမန်းတွေ စစ်ရမယ်။
• Estrogen-dependent cancer ရင်သားကင်ဆာတမျိုးရှိမနေရဘူး။
• DHEA ဆေးသောက်နေရင်း Melatonin 300 mcg 3 mg (nightly), Vitamin E (D-alpha tocopheryl succinate) 400 IU, Broccoli Extract, Indole-3-carbinol 80 160 mg, Vitamin D3 5,000 – 10,000 IU နဲ့ Gamma Tocopherol with Sesame Lignans 200 mg ဆေးတွေပါတွဲသောက်သင့်တယ်လို့ ဖတ်ရပါတယ်။

DHEA ဟော်မုန်းက ကိုယ်ထဲမှာ သဘာဝအရရှိနေတယ်။ အသက်ရလာသူတွေ၊ အရွယကြောင့်မှတ်ဉာဏ်နည်းလာသူတွေ၊ သုံးကြတယ်။ အားစကာစသမားတွေလည်းသုံးတယ်။ ဒါပေမယ့် National Collegiate Athletic Association (NCAA) က တားမြစ်ထားတယ်။ ယောက်ျားတွေ ပန်းသေပန်းညှိုအတွက်လည်းသုံးကြတယ်။ အမျိုးသမီးတွေ လိင်စိတ်ပိုအောင်လည်း သုံးကြတယ်။

SLE ရောဂါ၊ osteoporosis အရိုးအားနည်းရောဂါ၊ multiple sclerosis (MS) ရောဂါ၊ Addison’s disease ရောဂါ၊ depression နဲ့ schizophrenia စိတ်ရောဂါတွေ၊ chronic fatigue syndrome (CFS) ရောဂါ၊ Parkinson’s disease ရောဂါတွေအတွက်လည်းပေးတယ်။ တချို့လည်း နှလုံးရောဂါ၊ ရင်သားကင်ဆာ၊ ဆီးချိုအတွက်လည်းသုံးကြတယ်။ သွေးဆုံးချိန်မှာလည်းပေးတယ်။

ဒါပေမယ့် ဆေးသုတေသန မစုံလင်သေးပါ။ ပြောတိုင်းလည်း ကောင်းချင်မှကောင်းမယ်။ FDA က တရားဝင်အသိအမှတ်မပြုသေးပါ။

ဒေါက်တာတင့်ဆွေ
၁၆-၇-၂ဝ၁၅