Where there is no doctor
အဲဒီစာအုပ်ကို ၁၉၇ဝ ကတည်းက David Werner ဒေးဗစ် ဝါနားကနေ သူ့ရဲ့ မက်ဆီကိုအနောက်ပိုင်းဒေသ အတွေ့အကြုံတွေကို အခြေခံပြီး စပိန်ဘာသာနဲ့ရေးတဲ့စာအုပ်ဖြစ်ပါတယ်။ အကြိမ်ပေါင်းများစွာ မွမ်းမံပါတယ်။ ဘာသာပေါင်း ၁ဝဝ ကျော် ပြန်ဆိုထားတယ်။ မြန်မာလိုလည်းရှိတယ်။ မြန်မာပြန်ကတော့ ပြည်ပနိုင်ငံရေးလှုပ်ရှားမှုရဲ့ အသီးအပွင့်တခု ဖြစ်ပါတယ်။ (ကျွန်တော် မဟုတ်ပါ။)
ဝမ်းလျှောဝမ်းပျက်လို့ ဓါတ်ဆားထုပ်ဝယ်မရနိုင်ရင် အိမ်မှာတင် ဘယ်လိုဖျော်မလည်းစတဲ့ နည်းတွေပါတယ်။ ဆရာဝန်တွေကလည်း အသိအမှတ်ပြုပါတယ်။ ဆရာဝန်တွေကိုယ်တိုင်လည်း ဒီနည်းတွေသုံးကြရပါသေးတယ်။ တောနယ်တွေမှာ ဆေးဝါးတွေက ရှားလို့ပါ။
မြန်မာ့ဆိုရှယ်လစ်ခေတ်တုံးက မြန်မာပြည်မှာ မြို့တွေမှာတောင် ဆေးရှားတော့ ဒီထဲကနည်းတွေသုံးပြီး ဆေးကုသပေးခဲ့ကြရတယ်။ ကျွန်တော် မြို့သာတိုက်နယ်ဆေးရုံမှာလုပ်ရတုံးက (၁၉၇၅-၁၉၈၁) ဆေးသယ်တဲ့ သတ္တာခွံထဲမှာ သဲထည့်၊ မြွေဆိပ်ဖြေဆေးအပါအဝင် ကာကွယ်ဆေးတွေထည့်မယ့် စဥ့်အိုးလေးကို အလယ်မှာမြှုပ်ထားပြီး၊ သဲကို ရေလောင်းလောင်းပေးရတယ်။
ဒီခေတ်ရောက်တော့ ဆေးတွေဝယ်ရတာလွယ်လာပါပြီ။ ပိုက်ဆံတော့ကုန်မယ်။ ဆရာဝန်တွေလည်းများပါရဲ့ ဒါပေမယ့် လက်လှမ်းမီသူကနည်းတယ်။ ဆေးကုသမှုကိုလည်း မတတ်နိုင်သူတွေက များနေတယ်။ မြန်မာပြည်တွင်းမှာတော့ ကုန်ကျစရိတ်ကြောင့်။ ပြည်ပထွက်အလုပ်လုပ်နေသူတွေအဖို့မှာ ဘာသာစကားအခက်အခဲက တံတိုင်းကာထားသလိုပဲ။ အဲတာနဲ့ ကျွန်တော့်ဆီကို မေးခွန်းတွေမေးကြတာများလာတယ်။
စာတွေရေးဖြစ်တာလည်း မနည်းတော့ပါ။ စာအုပ်ဖြစ်အောင်အားခဲနေပြီ။ ကျွန်တော့်စာအုပ်ကို Where there are doctors ဆရာဝန်တွေရှိတဲ့နေရာလို့ ခေါ်ချင်နေတယ်။ ရွဲ့ပြောရာတော့ကျမယ်။
ဒေါက်တာတင့်ဆွေ
၁၆-၇-၂ဝ၁၅
Comments
Post a Comment