Controversial issue ပညာပေးမှာ အငြင်းပွါးစရာ

ကျွန်တော့်ပို့စ်တခု = Advice for Water festival သင်္ကြန်တွင်းကြ ယူကြုံးမရမဖြစ်ရအောင်

ကွန်မင့်တခု= Saw Minn Htun ဆရာ ညစ်ညမ်းဆေးအမည်တွေကို အတိအကျမဖော်ပြပေးစေချင်ပါ။ နဂိုဆေးနာမည် မသိသေးတဲ့သူတွေ သိသွားပြီး လက်တဲ့စမ်းမှာ စိုးရိမ်မိလို့ပါခင်ဗျာ။ အကယ်၍များ ကျွန်တော်ဟာ မသမာသူ တယောက်ဆိုရင်၊ ခုဒီဆေးနာမည်တွေကို လိုက်ရှာဝယ်နေမလား မပြောတတ်ပါ။ ယခု post လိုမျိုး ဆေးအမည် မဖော်ပြပဲ သတိပေးတာက ပိုပြီးသင့်လျော်တယ်လို့ထင်မိပါတယ်ခင်ဗျာ။ အမှားတစ်စုံတစ်ရာပါခဲ့မယ်ဆိုရင် တောင်းပန်ပါတယ်ခင်ဗျာ။

ဒီလိုစာရေးတိုင်း သည်အတိုင်းပြောတဲ့သူမျိုးပေါ်စမြဲ။ ဒီကွန်မင့်ကတော့ ယဉ်ယဉ်ကျေးကျေး စိုးရိမ်တဲ့ဖက်နေရေးပါတယ်။ တချို့က ကျွန်တော့်ကို သူခိုးလမ်းပြတဲ့။ ကိုယ်တိုင်စမ်းသုံးပြီးပြီလားဆိုသူကိုတော့ ဘလော့လိုက်ပါတယ်။ တချို့က ဘယ်မှာဝယ်ရမလည်းတဲ့။ တချို့ကလည်း ပြောပါအုန်း ဒါမှရှောင်နိုင်မှာတဲ့။ ရဲထက် သူခိုးဓါးပြက ပိုကျွမ်းကျင်တယ်။ သူတို့ဆီကနေ သင်္ခန်းစာယူရတယ်။ အကြမ်းဖက်သမားတွေ ဘယ်လို သတ်ကြဖြတ်ကြ၊ ဗုံးထာင်ဗုံးခွဲကြသလည်းကို လေ့လာပြီး နှိမ်နင်းရေးနည်းနာတွေ ရှာကြံကြရတယ်။ သင်တန်းတွေပေးရတယ်။ မုဆိုးလည်း စိုင်ကသင်တယ်။

ကျွန်တော့် လျှောက်လွှဲချက်ကတော့ အနုမြူအကြောင်းကို ကျောင်းတွေမှာ အလယ်တန်းကစသင်ပေးလာရတယ်လို့။

ဆရာဝန်တွေက အဲလိုလူမျိုးတွေနောက်ကနေ လိုက်ရေးရတာပါ။ ဒါပေမယ့် ဆရာဝန်တွေထဲမှာ အလိုတူအလိုပါတွေ ရှိပါတယ်။ ဥပမာ ဟစ်တလာရဲ့ အော့နှလုံးနာစရာ နာဇီ ဆေးပညာစမ်းသပ်မှုကြီးမှာပါတဲ့ ဆရာဝန်တွေကတော့ Dr. Josef Mengele (ဒေါက်တာ ဂျိုးဇက် မင်ဂလေး)၊ Dr. Carl Clauberg (ဒေါက်တာ ကားလ် ကလောဘဂ်)၊ Dr. Herta Oberheuser (lady) (ဒေါက်တာ ဟာတာ အိုဘာဟော်ဆာ) နဲ့ Dr. Karl Brandt  (ဒေါက်တာ ခါးလ် ဘရန့်) တို့ဖြစ်ပါတယ်။ စာတပုဒ်ရေးထားပါတယ်။

ကနေ့ခေတ်မှာ ဘယ်ပညာမဆို အင်တာနက်မှာ တိတိကျကျ အကိုးအကား အထောက်အထားတွေကို စာသား၊ ရုပ်သေပုံ၊ ဗီဒီယိုတွေနဲ့ ရှာနိုင်ကြတယ်။

အဲတော့ ဆရာဝန်တွေက တိတ်တိတ်လေး ကြိတ်ပုန်းပညာပေးလို့ မရတော့ဘူးထင်ပါတယ်။ ကျွန်တော်က စာတွေကို အဆင့်တော့ ခွဲထားပါတယ်။ တချို့စာတွေကို လူမှုရေးကွန်ရက်တွေမှာ မတင်ပါ။ ကိုယ်ပိုင်ဘလော့ခ်မှာသာ တင်ပါတယ်။ ကျွန်တော် အဲလိုလုပ်တာ ၁ဝဝ% မှန်တယ်တော့ မပြောလိုပါ။ စာကြောင့် အပြစ်မရှိတဲ့ မိန်းကလေးတယောက်လောက်ကို အရှက်ကနေ ကာကွယ်ရာရောက်တယ်ဆိုရင် ကျေနပ်ပါတယ်။

Nazi Medical Experiments အော့နှလုံးနာစရာ နာဇီ ဆေးပညာ စမ်းသပ်မှုကြီး http://dts-medicaleducation.blogspot.com/2014/03/nazi-medical-experiments.html

ဒေါက်တာတင့်ဆွေ
၁၁-၄-၂ဝ၁၆