အိမ်ပြန်ရောက်ပြီ
ဘုန်းကြီးဆွမ်းကျန်ကွမ်းကျန်ဆိုတော့ စားပွဲကြီးနဲ့အပြည့်ပေါ့။ ကျွန်တော်ကတော့ လက်သင့်ရာ စားတေ်ာခေါ်တယ်။ ကိုယ့်ရှေ့က ဟင်းနှစ်ခွက်တည်းသာစားတယ်။ ခရမ်းသီးကို ငရုပ်သီးစိမ်းနဲ့ ပုစွန်ဆိတ်ချက်တဲ့ဟင်းနဲ့ မျှစ်ပါတဲ့ဟင်း၊ အဝစားခဲ့တယ်။
ခေတ္တကျောင်းထိုင်ဘို့ရောက်နေတဲ့ စာလည်းရေးတဲ့ ဘုန်းဘုန်း (သားအေးည) က စာအုပ်တွေ လက်ဆောင်ပေးပါတယ်။ နေပြည်တော်နားမှာ ကျောင်းဖွင့်ပြီးစာသင်ပေးနေတဲ့ ဆရာတော် ဦးမုနိကုမာရက ဓမ္မစာပေဟောပြောပွဲမှာ ဦးဆောင် ဟောပြောတယ်။ ကိုယ်တော်နှစ်ပါးကြားမှာ အာဂန္တုကျွန်တော်ကလည်း ဝင်ပြောရတယ်။
ဓမ္မလည်းမဟုတ်။ စာပေလည်းမဟုတ်။ ကိုယ်တတ်တာလေးသာ ပြောပါတယ်။ ဟင်းနှစ်ခွက်စားပြီး ၃ ချက်ပြောခဲ့တယ်။
ကျွန်တော်က ဆရာဝန်။ ခွဲတာစိတ်တာ ဝါသနာပါတယ်။ ခွဲစိတ်ဆရာဝန်တို့မည်သည်မှာ အင်္ဂါသုံးတန်နဲ့ပြည့်စုံရတယ်။ သိန်းငှက်မျက်စိလို အမြင်စူးရှရတယ်။ ခွဲစိတ်တဲ့ကိုယ်အင်္ဂါတွေကို ကိုင်တွယ1်ရာမှာ အမျိုးသမီးလက်ချောင်းတွေလို ညင်သာရတယ်။ နောက်ဆုံးတချက်က ပိုအရေးကြီးတယ်။ ခြင်္သေ့နှလုံး။ ပြည်ခိုင်ဖြိုး မဟုတ်ပါ။ ရဲရင့်မှုရှိတာလည်း မဟုတ်ပါ။ အသေးစားဖြစ်ဖြစ် အကြီးစားဖြစ်ဖြစ် ခွဲစိတ်ရာမှာ စိုက်ထုတ်အပ်တဲ့ လုံ့လ တူညီရမယ်။ ကျွန်တော်က နောက်တခု ထပ်တိုးချင်တယ်။ အတော်ဆုံး ခွဲစိတ်ဆရာဝန်ဆိုတာ ခွဲစိတ်ဘို့ မလိုအပ်တာကိုသိတဲ့သူ။
ကျွန်တော် ဆေးပညာစာနဲ့ သုတစာလေးတွေအပြင် မြန်မာစာအကြောင်းပါ ရေးဖြစ်နေတယ်။ သတ်ပုံလည်းပါတယ်။ စကားကို ဖျက်ပြောကြတာတွေလည်းပါတယ်။ ကွကို (ကွကိုယ်) နဲ့ ကိုယ့်ကိုယ်ကိုအကြောင်းကို နမူနာပေးပါတယ်။ မြန်မာစာဆရာ၊ စာရေးဆရာ၊ ကဗျာဆရာတွေနာမည်တော့ မပြောပါ။ ကျွန်တော့်ကောက်ချက်က မရေးသင့်တာကို မရေးသူနဲ့ သတ်ပုံလွဲမှားတားကို ရေးနေတဲ့စာတွေရေးနေသူတွေထက် ဘာမှရေးတဲ့သူက စာရေးဆရာကောင်းဖြစ်တယ်။
နောက်ဆုံးတချက်။ ပညာ အလွန်အရေးပါတယ်။ စာတွေသင်ပါ။ စာဖတ်ပြီး သုတတွေ ရသတွေ ရလာမယ်။ ဟောတာ ပြောတာနားထောင်ပြီး အသိတွေတိုးလာမယ်။ အမြီးလို့ပြောကြတဲ့ ဘွဲ့တွေတိုးလာမယ်။ အလေးချိန် တိုးတိုးလာတာမျိုးဟာ ပညာမဟုတ်ပါ။ မသင်ယူခင်က၊ မဖတ်ခင်က၊ နားမထောင်ခင်ကရှိနေခဲ့တဲ့ အလွဲအမှားတွေ၊ မွန်းကြပ်မှုတွေ၊ ရှုတ်ထွေးနေတာတွေ ရှင်းလင်းပေါ့ပါးသွားစေတာကသာ ပညာဖြစ်တယ်။ တနည်းအားဖြင့် ခေါင်းပေါ်မှာရွက်ထားရတာမျိုး မဟုတ်၊ တံမြက်စည်းလို လှည်းကျင်းလို့ရတာကသာ အကျိုးရှိစေတဲ့ပညာ ဖြစ်တယ်။
စာရေးဆရာမဟုတ်တဲ့ကျွန်တော် စာပေဆိုပြီး လူအများရှေ့မှာ တသက်နဲ့တကိုယ် သည်တခါသာ စကားပြောဘူးပါတယ်။ ကန်တော့ပါ။
(ဟောပြောပွဲဓါတ်ပုံ မရသေးပါ။)
ဒေါက်တာတင့်ဆွေ
၂၃-၁-၂ဝ၁၇
ည (နံနက်) ၁၂ နာရီ၊ ၁၈ မိနစ်။
Comments
Post a Comment