Thingyan ငယ်တုန်းကသင်္ကြန်
သင်္ကြန်ကို စိတ်ဝင်စားတာက လူပျိုမဖြစ်ခင်က အကဲဆုံး။ သင်္ကြန်မတိုင်ခင်ကတည်း စိတ်အားတက်ကြွနေကြပြီ။ သင်္ကြန်ကျဖို့က ဘယ်နှစ်ရက်လိုတော့တယ်၊ ပြက္ခဒိန်ကိုနေ့တိုင်းကြည့်ကြ။ ညီအကိုတတွေသာမက၊ သူငယ်ချင်းတွေပါ ကြိုတင်ပြင်ဆင်မှုတွေလုပ်ကြတာ နေ့ညမအားကြပါ။ ဆိုင်ကရောင်းတဲ့ ရေပြွတ်တွေကို မဝယ်နိုင်ကြ၊ ပလပ်စတစ်နဲ့ လုပ်တာတွေကလည်း မပေါ်သေးပါ။ ကိုယ့်ကိုယ်ကိုသာအားကိုးတဲ့အကျင့်က ငယ်ကတည်းကရတာ။ လက်နက်ကိုယ်စီ ရှာရေး စီမံကြတယ်။ တရုပ်လုပ် မဟုတ်၊ မြောက်ကိုရီးယားလုပ် မဟုတ်၊ ဝါးပြွတ် စစ်စတင်းကို ၁၆ နှစ်သား မတိုင်ခင်ကတည်းက ကိုင်ကြတာ။
မုံရွာ ရတနာပုံရပ်ကွက်က ဘေးအိမ်တွေမှာ ဝါးနှီးသပ်ကြတာမို့ ဝါးရှာတာမခက်ပါ။ ခက်တာက ဝါလုံးခပ်သေးသေး အနေတော်ရှာရေး။ ဝါးတဆစ်ကို တဖက်ပွင့်ထား၊ ဝါးကိုကွဲမသွားအောင် ဓါးနဲ့ဖြတ်ရတာကပညာ။ ငယ်တဲ့ကောင်တွေက ကြီးတဲ့သူလုပ်သမျှ ငေးကြည့်ကြ။ အထဲထိုးရမယ့် ပြွတ်တံလုပ်စရာ ဝါးခြမ်းပြားကို အနေတော်ရှာ၊ တဖက်ထိပ်မှာ အဝတ်စုတ်နဲ့ လုံးပတ်ပြီး၊ သားရေကွင်းနဲ့ တင်းနေအောင်စီး။ ပြီးရင် တဖက်ပိတ်ဝါးလုံးထဲ ထိုးထည့်ကြည့်။ ချောင်နေရင် ထပ်တိုး၊ ထိုးမရရင်တော့ လျှော့။ အခက်ဆုံးကတော့ အဆစ်ပါတဲ့ ဝါးလုံးထိပ်မှာ အပေါက်ကို သံချောင်းနဲ့ ကွဲမထွက်အောင် ဖေါက်ရတာ။ မီးထဲမှာ သံချောင်းကို အပူပေးပြီး ချော့ဖေါက်ပါလေ။ စိတ် အတော်ရှည်ရပါကလား။
ကိုင်း နက်ဖြန်မနက်မှာ အကျနေ့တဲ့။ အိပ်မပျော်ခဲ့ကြပါ။ မနက်မှာ အစောကြီးနိုး။ မိုးမလင်းတလင်း အေးမြခြင်းဆိုတဲ့ အတွေ့က ဂွတ်မောနင်း။ ဟင်း ဘယ်နှယ်လုပ် ရေပက်မလည်းကွ။ နေမြင့်အောင် စောင့်ကြရ။ မြို့ထဲ ခြေလျှင်လျှောက်။ နောက်မကျပါ။ တနေ့မှာ တရပ်ကွက်။ လက်ချိုးရေလို့ရတဲ့ သင်္ကြန်မဏ္ဍပ်မှာ ဆိုတာတွေ၊ ကတာတွေ၊ လှတာကို သိပ်စိတ်မဝင်စားကြတဲ့အရွယ်။
နည်းနည်းကြီးလာတော့ သတ္တုလုပ်ရေပြွတ်မျိုး ကိုင်တတ်လာပြီ။ တချို့တွေက စက်ဘီးလေထိုးတံမှာ ဘောလကျွတ် ထပ်ကြတယ်။ ကမ်းနားလမ်းသွားလည်ရင် မီးသတ်ပိုက်နဲ့ ရေပက်တာ အနားမကပ်ရဲပါ။ အိုးမည်းသုတ်တဲ့ အထဲတော့ တခါတလေပါဘူးတယ်။
လူပျိုပေါက်ဖြစ်လာတော့ ရှက်တတ်တာနဲ့ စိတ်ဝင်စားမှုပါ တမျိုးပြောင်းလာတယ်။ ဝါးရေပြွတ်နေရာမှာ ရေဖလား အစားထိုးလာပြီ။ ရပ်ထဲရွာထဲက သက်တူရွယ်တူမိန်းကလေးတွေကို ရေပက်ရမှန်းသိလာကြပြီ။ ရှက်စိတ်ကပိုလို့ သင်္ကြန်ဇာတ်လမ်းဆိုတာတော့ မရှိခဲ့ပါ။ ဒါကြောင့်ထင်ပါရဲ့ တနှစ်တတန်း အောင်တယ်။
ပိတောက်ပန်းကို လွမ်းစရာလို့ သတိမထားခဲ့မိပါ။ မြေသင်းနံ့နဲ့ ဝါးပြွတ်ဟာ ကျွန်တော့်ဘဝမှာ သင်္ကြန်သင်္ကေတ ဖြစ်ပါတယ်။
ဒေါက်တာတင့်ဆွေ
Comments
Post a Comment