Japanese encephalitis (JE) ဂျပန်ဦးနှောက်ရောင်ရောဂါ (၃)
ဂျပန်ဦးနှောက်ရောင်ရောဂါ Japanese Encephalitis ရောဂါသည် Culex tritaeniorhychus ခြင်သယ်ဆောင်သော flavivirus အနွယ်ဝင် Japanese encephalitis virus ကြောင့်ဖြစ်ပွားခြင်း ဖြစ်ပါသည်။ မြန်မာနိုင်ငံအပါအဝင် အရှေ့တောင်အာရှနိုင်ငံများတွင် အများဆုံးဖြစ်ပွားပြီး ဦးနှောက်တစ်သျှူးများရောင်ရမ်းပျက်စီးခြင်းကို ဖြစ်ပေါ်စေပါသည်။ ယနေ့တိုင် ထိရောက်သောကုသဆေးများ မရှိသေးဘဲ ပြင်းထန်သောကူးစက်မှုများတွင် နောက်ဆက်တွဲဆိုးကျိုးများ ဖြစ်ပေါ်စေပြီး ထိရောက်စွာ ကုသမှုမရှိပါက အသက်သေဆုံးသည်အထိ အန္တရာယ်ပေးနိုင်ပါသည်။ အသက်ဆုံးရှုံးမှုမရှိဘဲ ပြန်ကောင်းလာသည့်လူနာများ၏တဝက်ခန့်သည်လည်း နားလေးခြင်း၊ မျက်စိကွယ်ခြင်း၊ ကိုယ်လက်မသန်စွမ်းခြင်း၊ ဥာဏ်ရည်နိမ့်ကျခြင်း၊ စိတ်မူမမှန်ခြင်းစသည့် နောက်ဆက်တွဲများဖြစ်ပေါ်နိုင်ပါသည်။ ဝက်၊ငှက်၊ခို၊ဘဲ၊ လင်းနို့များတွင် ခိုအောင်းနေတတ်ပြီး လူများ၊ နို့တိုက်သတ္တဝါများဖြစ်သောကျွဲ၊ နွား၊ မြင်းများကို ကူးစက်နိုင်ပါသည်။
ဂျပန်ဦးနှောက်ရောင်ရောဂါသည် လူများတွင်ကူးစက်ပါက များသောအားဖြင့် ရောဂါလက္ခဏာ မပြတတ်ဘဲ ကူးစက်ခံရသူ၏ ၁% ခန့်သာ ဂျပန်ဦးနှောက်ရောင်သည့် လက္ခဏာများခံစားရပါသည်။ ရောဂါပျိုးချိန်မှာ ၅ ရက်မှ ၇ ရက်ထိဖြစ်ပါသည်။ ရောဂါကူးစက်ပြီး ရှေးဦးလက္ခဏာများ ProdromalStage ဖြစ်သော ဖျားခြင်း၊ တုံခြင်း၊ ခေါင်းကိုက်ခြင်း၊ ပျို့ခြင်း၊ အန်ခြင်းများမှာ ပထမ ၁ ရက်မှ ၆ ရက်ထိ ဖြစ်လေ့ရှိပြီး တခါတရံ ၂၄ နာရီထက်တိုတောင်းပြီး တခါတရံ ၁၄ရက်ခန့်ထိ ကြာမြင့်တတ်သည်။ ၎င်းနောက် ရောဂါလက္ခဏ၏ပြင်းထန်လာကာ Acute Encephalitis stage လူ၏သတိနှင့် သက်ဆိုင်သောလက္ခဏာ များ ဖြစ်သော စိတ်အာရုံခံစားမှုမကြည်လင်ခြင်း၊ စိတ်လှုပ်ရှားခြင်း၊ စိတ်ရှုပ်ထွေး၍ ဝေခွဲမရဖြစ်ခြင်း၊ စိတ်ဂဏာမငြိမ်ဖြစ်ခြင်း၊ ကယောင်ကတန်းဖြစ်ခြင်း၊ ပတ်ဝန်းကျင်ကိုစိတ်ဝင်စားမှု မရှိဘဲ တချိန်လုံး ငိုက်မြည်းလာခြင်း၊ အခြေအနေပိုဆိုးရွားလာပါက တက်ခြင်း၊ ဇက်ခိုင်ခြင်း၊ ကြွက်သားများတောင့်တင်းလာခြင်း၊ မျက်နှာအကြောများတင်းလာပြီး မိမိပုံမှန်မျက်နှာ အမူအရာဖြင့်ပြသနိုင်မှုမရှိခြင်း Mask face၊ စကားပြောသည့်အခါ လျှာလေးခြင်း၊ ခန္ဓာကိုယ်မှ အကြောများတုတ်ခြင်း၊ ဆွဲခြင်း၊ အရည်ခမ်းခြောက်မှုခံစားရခြင်း Dehydrtion၊ ကိုယ်အလေးချိန်ကျဆင်းခြင်းတို့ဖြစ်ပွားလာပါသည်။
ထို့နောက် အချို့လူနာများမှာ ပြန်လည်ကောင်း မွန်လာပြီး Recovery အချို့မှာ ဦးနှောက်နှင့်အာရုံကြောများ ထိခိုက်သည့်ဒဏ်ကျန်ရှိနေခဲ့နိုင်ပါသည်။ Persistence of signs of CNS injury ဖြစ်သည့် စကားပြောသည့်အခါ အသံလေး၍မပီသခြင်း၊ အသံမထွက်တော့ခြင်း၊ နှင့် ကိုယ်အဂါင်္မသန်စွမ်းတော့ခြင်းတို့ဖြစ်ပွားတတ်ပါသည်။ လူနာသည် အသက်မသေသော်လည်း ကိုယ်အဂါင်္အစိတ်အပိုင်းတခု ချို့ယွင်းမှုများစွဲမြဲစွာ ကျန်ခဲ့လေ့ရှိပါသည်။ သို့ဖြစ်ပါ၍ မိမိနေထိုင်ရာ ပတ်ဝန်းကျင်တွင် ထူးခြားစွာ ကျွဲ၊ နွား၊ မြင်းများ ရုတ်တရက်သေဆုံးခြင်း၊ ဝက်များသားလျောခြင်း၊ ရှိမရှိကို စောင့်ကြပ်ကြည့်ရှုရန် လိုအပ်ပါသည်။ အဆိုပါဖြစ်စဉ်များရှိပါက ချက်ချင်း ကျန်းမာရေးဌာနအဆင့်ဆင့်သို့ သတင်းပေးပို့၍ လိုအပ်သော ကာကွယ်နှိမ်နင်းရေးလုပ်ငန်းများကို ချက်ချင်းဆောင်ရွက်ရန် လိုပါသည်။ ရောဂါဖြစ်ပွားလာပါက ဂျပန်ဦးနှောက်ရောင် ရောဂါဗိုင်းရပ်စ်ပိုး သယ်ဆောင်ထားသည့် Culex ခြင်သက်ကြီးကောင်များကို ချက်ခြင်းသေစေရန် ပိုးသတ်ဆေးမှုတ်ခြင်းလုပ်ငန်းများဆောင်ရွက်ရန်လိုအပ်ပါသည်။အဆိုပါခြင်များသည် ရေမြောင်းများ၊ စပါးခင်းများရှိ ရေတင်ကျန်နိုင်သောနေရာများတွင်ပေါက်ပွားလေ့ရှိပါသည်။
ယခင်က ရောဂါဖြစ်ပွားမှုကို ကာကွယ်ရန်မှာ ခြင်ကိုက်ခံရခြင်းမရှိစေရန် တကိုယ်ရည်ကာကွယ်ခြင်း ဖြစ်ပါသည်။ ယခုအခါ ဂျပန်ဦးနှောက်ရောင်ရောဂါ ကာကွယ်ဆေးများရရှိနိုင်ပြီဖြစ်ပါသဖြင့် ရောဂါဖြစ်ပွားတတ်သည့်နေရာများတွင် ကလေး အသက် ၉ လမှစတင်၍ ထိုးနှံနိုင်ပါသည်။ အသက် ၁၈ နှစ်မှစ၍ လူကြီးများတွင် တလုံးသာထိုးရန် လိုအပ်သော်လည်း ကလေးများတွင်ကာကွယ်မှုပိုမို ကြာရှည်စေရန် ပထမအကြိမ်ကာကွယ်ဆေးထိုးပြီး ၁နှစ်မှ ၂ နှစ် အကြာတွင် နောက်ထပ်တလုံး ထပ်မံထိုးရန် လိုအပ်ပါသည်။
မှတ်ချက်။ စာရိုက်နှင့် သတ်ပုံများ ပြင်ထားပါသည်။
Japanese encephalitis (JE) ဂျပန်ဦးနှောက်ရောင်ရောဂါ (၁) http://doctortintswe.blogspot.com/2017/02/japanese-encephalitis-je_18.html
Japanese encephalitis (JE) ဂျပန်ဦးနှောက်ရောင်ရောဂါ (၂) http://doctortintswe.blogspot.com/2017/02/japanese-encephalitis-je_88.html
Japanese encephalitis (JE) ဂျပန်ဦးနှောက်ရောင်ရောဂါ (၃) http://doctortintswe.blogspot.com/2017/02/japanese-encephalitis-je.html
ဒေါက်တာတင့်ဆွေ
Comments
Post a Comment