မြန်မာနိုင်ငံသားတွေ ဘယ်မှာနေနေ ကျန်းမာကြပါစေ

Photo taken on 19-11-2011 by an Indian photo-journalist at Yamuna Clinic
This Blog is created on 10th October 2014

How to ask ကျန်းမာရေးနဲ့ ဆေးပညာ မေးလိုတာရှိပါက

• ဖေ့စ်ဘွတ် ကွန်မင့်ကနေ မမေးပါနဲ့။
• ဖြစ်တဲ့သူရဲ့ ကျား-မ နဲ့ အသက်ကို အရင်ဆုံးရေးပါ။ နာမည် မလိုအပ်ပါ။
• ဖြစ်နေတာ ၁-၂-၃။ ဖြစ်တာဘယ်လောက်ကြာပြီ။ လိုအပ်ရင် ရာသီ၊ အိမ်ထောင်ရေး၊ ကျန်းမာရေးနောက်ခံ၊ နေတဲ့တိုင်းပြည်။ တိုတိုရှင်းရှင်းသာရေးပါ။
• ဆေးစစ်ချက်တွေနဲ့ ပုံတွေကို အတည့်ပို့ပါ။ လိုတာကိုသာပို့ပါ။ အာလ်ထွာဆောင်းမှာ ပုံမလိုပါ။ မှတ်ချက်သာလိုတယ်။
• SMS အရေးအသားမျိုးကို မဖတ်တတ်ပါ။ မြန်မာစကားကို အင်္ဂလိပ်စာလုံးနဲ့ရေးတာကို မဖတ်ပါ။
• ဖုန်းဆက်ပြီးမေးရင် အချိန်ဇုန်မတူတာရော၊ အသံထွက်လွဲနိုင်တာရောကြောင့် အဆင်မပြေပါ။
• မေးတဲ့သူက မိမိကိုယ်မိမိ သား-သမီးလို့မရေးပါနဲ့။ ဖြေမယ့်ဆရာဝန်ကို ဆရာလို့သာသုံးပါ။
• ဆေးရုံ-ဆေးခန်း-ဆရာဝန်-ဆေးဆိုင်-ဆေးဈေး-ကုန်ကျစရိတ် စတာတွေကို မသိပါ။
• မေးစရာနေရာ (၁) အီးမေးလ် doctortintswe@gmail.com (၂) ဖေ့စ်ဘွတ် https://www.facebook.com/tint.swe.dr (၃) ဖေ့စ်ဘွတ် https://www.facebook.com/drtintswe/
• မေးနည်းစည်းကမ်းအရ မမေးလိုသူများ http://doctortintswe.blogspot.com/ Dr. Tint Swe's Writings မှာ ရှာဖတ်နိုင်ကြပါတယ်။

Wednesday, November 23, 2016

CD4 T-cells အိတ်ခ်ျအိုင်ဗွီ

ဆရာ HIV ဝေဒနာရှင်ပါ။ 03.04.2016 မှာ ART စသောက်ပါတယ်။ ဆေးသောက်ပြီးနောက်မှာ အကြောအားနည်းပြီး လေဖြတ်သွားတယ်။ ဆီးချိုလဲရှိတယ်။ CD 40   ကနေ ယခု ၁၆၆ ရှိနေပါပြီ။ လေ့ကျင့်ခန်းလဲပုံမှန်လုပ်ပါတယ်။ CD 4 ဘယ်လောက်ဆို ပုံမှန်အခြေအနေပြန်ရောက်နိုင်မလဲ။ကျေးဇူးတင်ရှိစွာဖြင့်။

အသက်-ကျား-မ မသိပါ။ CD4 များလေကောင်းလေဖြစ်တယ်။ ART ဆေး အမြဲသောက်နေရမယ်။

HIV/AIDS ရောဂါအကြောင်း ကောင်း-ဆိုး သိချင်ရင် စမ်းသပ်တဲ့နည်းတခုကို CD4 (Cluster of differentiation 4) လို့ ခေါ်တယ်။ အလွယ်ခေါ် T4 count; T-helper cells; T-suppressor cells; Cytotoxic T-cells နဲ့ တရားဝင်အခေါ်က CD4 lymphocyte count; CD8 lymphocyte count; CD4/CD8 ratio; CD4 percent ဖြစ်ပါတယ်။

လူတိုင်းမှာ ခုခံနိုင်စွမ်းရှိအောင်လုပ်ပေးနေတဲ့ (ဆဲလ်) တွေ အမျိုးမျိုးရှိတယ်။ အဲဒီဟာတွေထဲက (လင်ဖိုဆိုက်) ခေါ်တဲ့ သွေးဖြူဥတမျိုးဖြစ်တယ်။ HIV ပိုးဝင်လာရင် T-cells ကို တိုက်ခိုက်တယ်။ CD4 က T cells ထဲကို HIV-1 ဝင်လာစေဘို့ ဧည့်ကြိုတာဝန်ယူသလို ဖြစ်နေတယ်။ အဲဒီ (ဆဲလ်) တွေကို အသုံးချပြီး၊ ပုံတူပွါးတာမို့ ခုခံအားစနစ်ကို ဖျက်ဆီးရာ ရောက်စေတယ်။ ဒါ့ကြောင့် ဒီ (ဆဲလ်) တွေ နည်းနေတာဟာ ခုခံစွမ်းအားတွေ ကျဆင်းတယ်လို့ သွယ်ဝှိုက်ပြီး ပြောတယ်။ ရောဂါဖြစ်စပိုင်းမှာတော့ လူဟာ ပျက်စီး-ပြောင်းသွားတဲ့ CD4 ကို အစားထိုးပေးနိုင်သေးတယ်။ နောက်ပိုင်းကြ ဒီလို မလုပ်နိုင်တော့ဘူး။ CD4 တွေ နည်းလာလေလေ ခုခံအားကျဆင်းလေ။ နောက်ဆုံးမတော့ ဘာဆိုဘာမှ မခုခံနိုင်တော့ပါ။

CD4 Count ကို တခါထဲ စမ်းရတာ မဟုတ်ပါ။ နောက်စမ်းရင် အဖြေ မတူတာတွေ ထွက်မယ်။ ယှဉ်ကြည့်ရတယ်။ တယောက်တည်းမှာတောင် မနက်ခင်းမှာ ညနေထက် နည်းတတ်တယ်။ HIV မဟုတ်ဘဲ နူမိုးနီးယား၊ ရေယုံ၊ တုပ်ကွေး တို့လို ရောဂါ တခုခု ရနေရင်လည်း CD4 count ခဏတဖြုတ် နည်းတယ်။ ကင်ဆာဆေး သောက်နေရရင်လည်း နည်းတယ်။

CD4 500 -1500/mm3 အတွင်းရှိတယ်။ ပုံမှန်အရေအတွက်က ဓါတ်ခွဲခမ်း တခုနှင့်တခု မတူပါ။ 500-1200 x 106/L လို့ သတ်မှတ်တာလဲ ရှိတယ်။ CD4 Count 200 cells/mm3 ရှိတာတွေ့ရင် AIDS ရောဂါသည်လို့ ပြောတယ်။ တချို့ ဆေးရုံတွေက 350 cells/mm3 ရှိကတည်းက ရောဂါလက္ခဏာ ရှိရှိ- မရှိရှိ ဆေးပေးတယ်။ CD4 နည်းပေမဲ့ ကျန်းမာနေသူလဲ ရှိတယ်။ မနည်းပေမဲ့ နေမကောင်း ဖြစ်နေသူလဲ ရှိပြန်တယ်။

HIV ပိုးဝင်လာရင် CD4 အရေအတွက် ကျဆင်းတယ်။ ART ဆေးပေးပြီးနောက် နလံထမှာ ပြန်တက်လာတယ်။ CD4 နဲ့ Viral load (VL) ဆက်စပ်နေတာ ရှိသလို တခါတလေ အဲလို မဟုတ်တာလဲ တွေ့နေရတယ်။ ၁ဝ% လောက်မှာ VL ကျနေပေမဲ့ CD4 မတက်ဘူး။ ဒါ့ကြောင့် CD4 တုံ့ပြန်မှု မရှိတာနဲ့ ဆေးကုတာ မထိရောက်ဘူးလို့ မပြောနိုင်ပါ။ VL ဟာလဲ CD4 လောက်တော့ မတိကျပါ။

CD4 ဟာ HIV ပိုးက ဘယ်လောက် ဖျက်ဆီးထားပြီလဲ ဆိုတာကို သိစေနိုင်ပြီး၊ VL ကတော့ သွေးထဲမှာ HIV ပိုး ဘယ်လောက် များများ ရှိနေသလဲကို သိစေတယ်။ VL များနေတာ မကောင်းဘူး။ 100,000 ကျော်ဆိုရင် ဆေးကုပါလို့ ဆိုတယ်။ အခြေခံ အကျဆုံးအချက်ကို ပြောရရင် ဆေးစစ်နည်းတွေဆိုတာ လူတွေလိုဘဲ ပါဖက်မဖြစ်ကြပါ။

VL နည်းလေလေ ကောင်းလေလေဖြစ်တယ်။ ၅ သောင်း၊ ၁ သိန်းသာမက၊ ၁ သန်း အထိလဲရှိနိုင်တယ်။ VL ရှာမတွေ့တိုင်းလဲ ရောဂါပျောက်ပြီလို့ မသတ်မှတ်ပါ။ သူများကိုလဲ ကူးစေနိုင်တယ်။ သွေးထဲမှာ နည်းနေရင် စမ်းမတွေ့ပါ။ HIV ပိုးကလဲ သွေးထဲမှာနေတာက ၂% သာရှိတယ်။ HIV မဟုတ်တဲ့ တခြားရောဂါ-အခြေအနေတွေမှာလည်း ဒီနည်း သုံးပါသေးတယ်။

CD4 count အရေအတွက် 500 cells/cumm အောက်နည်းလာတာနဲ့ ဆေးပေးရပါမယ်။ ၂ဝ၁ဝ ခုနှစ် လမ်းညွှန်ချက်ဟာ CD4 ၃၅ဝ ဖြစ်ပါတယ်။ ၁ဝ နှစ်ကျော်တုံးကတော့ ၂ဝဝ ဆိုမှ ဆေးဝယ်ကြရပါတယ်။ သီးခြား အုပ်စုတွေကိုတော့ HIV ပိုးတွေ့တာနဲ့ CD4 အရေအတွက် ဘယ်လောက်ရှိနေနေ၊ ဆေးသောက်စေရပါမယ်။ တီဘီပိုးရှိနေသူတွေနဲ့ အသည်းရောင် (ဘီ) ရောဂါရနေသူတွေကို ပြောတာပါ။ နောက်ပြီး လိင်အတူနေဘက်မှာ ပိုးရှိနေပြီး ကိုယ့်မှာမရှိသေးသူတွေ၊ ကိုယ်ဝန်ဆောင်နေသူတွေနဲ့ ကလေးနို့တိုက်နေရသူတွေလဲ ဒီစာရင်းထဲမှာပါသလို အသက် ၅ နှစ်အောက် ကလေးတွေကလဲ ပါပါသေးတယ်။

Antiretroviral therapy (ART) ဆေးဆိုတာ Antiretroviral (ARV) ဆေးတွေကိုရောပေးတာဖြစ်ပါတယ်။ တချို့ ဆရာဝန်တွေကတော့ CD4 levels ကိုကြည့်မနေတော့ဘဲ ဆေးပေးပါမယ်။ ဒီလိုလပ်နိုင်ရင် ကူးစက်ရောဂါပိုးတွေ ဝင်မှာကို တားဆီးနိုင်မယ်၊ အသက်ပိုရှည်နိုင်မယ်လဲ ထင်ရတယ်။

လမ်းညွှန်သစ်အရ ရိုးရှင်းတဲ့ဆေး ၃ မျိုးကို ဆေးတတောင့်ထဲမှာသာ ထည့်ထားတာကို သုံးပါမယ်။ Tenofovir + Efavirenz နဲ့ Lamivudine ဒါမှမဟုတ် Emtricitabine ကိုရောထားပါတယ်။ လမ်းညွှန်သစ်ကနေ ကူးနိုင်ခြေ ရှိနေသူတိုင်းကိုတော့ ဆေးသောက်ဘို့ ပြောမထားပါ။ ဥပမာ မူးယစ်ဆေးစွဲနေသူတွေ၊ လိင်လုပ်ငန်း လုပ်နေသူတွေ၊ ဂေးတွေ၊ ယောက်ျား အကျဉ်းသားတွေ၊ ဖနီးခင်ပွန်းမှာ ပိုးရှိသေူတွေဖြစ်ပါတယ်။ သူတို့ကို နေ့စဉ် Tenofovir pill ပေးနေရင် ကူးလာမှာကို တားနိုင်ပါတယ်။ ကာကွယ်ဆေးရော၊ ပျောက်ကင်းစေမဲ့ဆေးပါ မရှိသေးပါ။ လူတွေများများကြီးကို HIV ပိုး ရှိ-မရှိ စမ်းသပ်နိုင်မှသာ၊ ဆေးကုသမှုကိုလည်း ခံယူနိုင်မှသာ ကူးစက်ပြန့်ပွါးမှုကို ထိုးကျသွားစေအောင် လုပ်နိုင်မှာဖြစ်ပါတယ်။

မြန်မာပြည်မှာ HIV/AIDS ရောဂါ ကျဆင်း၊ ပပျောက်ပါစေ။

ဒေါက်တာတင့်ဆွေ
၂၃-၁၁-၂ဝ၁၆

No comments:

Post a Comment

Note: Only a member of this blog may post a comment.