Friday, June 23, 2017

Disgusting မသတီစရာပုံတွေ မပို့ပါနဲ့

မေးနည်းစည်းကမ်းထဲမှာ ပုံတွေကို လိုသလားအရင်မေးပြီးမှပို့ပါလို့ ထည့်ထားတယ်။ ဆီး၊ ဝမ်း၊ အန်ဖတ်၊ နှပ်၊ ကိုယ်ဝန်ပျက်၊ ရာသီဆင်းတာတွေကို ပို့ကြတယ်။ အဲလိုဟာတွေကို မျက်စိနဲ့စစ်ရတာ မဟုတ်ပါ။ ဓါတ်ခွဲခန်းမှာ မှန်ဘီလူးနဲ့သာ စစ်ရတယ်။

အသံဖိုင်တွေ၊ ဗီဒီယိုဖိုင်တွေ မဖွင့်ပါ။ ဖုန်းဆက်မေးရင် မကိုင်ပါ။ ကျား-မ လိင်အင်္ဂါပုံတွေကိုလည်း လိုအပ်သလား အရင်မေးပြီးမှသာပို့ပါ။

မသတီစရာပုံတွေ၊ အော့နှလုံးနာစရာပုံတွေနဲ့ မေးကြတယ်။ မနှစ်မြို့တဲ့ မြင်ကွင်းဆိုတာ တယောက်နဲ့တယောက် မတူပါ။ လှတယ်ဆိုပြီး ဒီဇိုင်းလုပ်ထားတဲ့ ဆံပင်ကွက်ကြားတို့ တက်တူးရုပ်တို့ကို သူများတွေမြင်ရင် အန်ချင်တယ်။ အင်တာနက်ကပုံတွေပြပြီး မေးကြတယ်။ ပုံတွေက အစစ်မဟုတ်ပါ။ ကျွန်တော့်မှာ တချို့ပုံတွေကို ခေါင်းထဲကနေ အခုထိဖျောက်လို့ မရသေးပါ။ တကယ့်ရောဂါကိုမေးတာလည်း မဟုတ်။ အကြီးအကျယ် ဒုက္ခပေးတယ်။

ကျွန်တော်က တခါတလေ မနက်စာစားရင်း၊ တခါတလေ အဆာပြေစားရင်း မေးခွန်းတွေကို ဖြေရပါတယ်။ တော်သေးတယ်၊ ဖေ့စ်ဘွတ်မှာ အနံ့ရတာလုပ်မထားသေးလို့။

ကျွန်တော့်မှာ နိုင်ငံရေးတာဝန်မရှိကတည်းက သီးသန့်ရုံးခန်း မရှိပါ။ ကိုယ့်အိမ်ခန်းထဲမှာပဲ အလုပ်လုပ်ရတယ်။ အိမ်ကို အမျိုးအဆွေတွေ ဧည့်သည်တွေလာကြတယ်။ သွားလေရာကို ကွန်ပြူတာ ယူသွားပြီး၊ မေးခွန်းတွေကို ဖြေရတယ်။ တခါတလေ စာသင်ကျောင်းမှာ။ တခါတလေ ဘုန်ကြီးကျောင်းမှာ။ တခါတလေ ကားပေါ်မှာ။ တခါတလေ လက်ဖက်ရည်ဆိုင်မှာ။ ကျွန်တော့်ဘေးမှာ လူမပြတ်ပါ။ အဲလိုဟာတွေကို သူများမြင်ရင် ကျွန်တော့်သိက္ခာကျစေတယ်။

လူ့သဘာဝနဲ့ လူ့ယဉ်ကျေးမှုကို နားလည်ကြစေချင်တယ်။ ဆရာဝန်တွေမှာ လူနာရဲ့လျို့ဝှက်ချက်တွေကို ထိန်းသိမ်းတဲ့ ကျင့်ဝတ်ကို လိုက်နာရတယ်။ ဖတ်တဲ့သူတွေ ကန်တော့ပါ။

ဒေါက်တာတင့်ဆွေ

No comments:

Post a Comment

Note: Only a member of this blog may post a comment.

ဖူးပွင့်ကြတဲ့ ပန်းမာလာ သင်းရနံ့ကဖြာ

ဆရာ ရနံ့ နဲ့ အနံ့ကို ဘယ်လိုသုံးပါလဲ ရှင်းပြပေးပါ။ ရနံ့ထုံသင်းလို့ ကဝိဓဇသတ်ပုံကျမ်းမှာပါတယ်။ အနံ့ကတော့ အ ထည့်လို့ နာမ်စာလုံးဖြစ်လာတဲ့ အနံ...