နတ်တော်မှာ စာဆိုကြသည်
စာအုပ်သစ်တွေ အမြင်အရတော့ ဝယ်ချင့်စဖွယ်ကောင်းတာမှန်တယ်။ ကျွန်တော်က စာတရွက်နှစ်ရွက်လှန်ကြည့်ပြီးမှသာ ဝယ်ချင်တယ်။ တစ်ရွက်နှစ်ရွက်ဆိုတာပါလို့ကတော့ လက်ဆောင်ပေးမှာကို ကြောက်တယ်။
ငယ်ငယ်က စာတွေဖတ်ခဲ့ပါတယ်။ အဲတာနဲ့ပဲ လူဖြစ်လာတာ။ တချို့ကို အာဂုံဆောင်တယ်။ ၇ တန်းအောင်ပြီး နွေရာသီမှာ နောက်နှစ်သင်ရမယ့် ဒေဝဂုမ္ဘာန်ကို တအုပ်လုံးအလွတ်ကျက်တယ်။ ဆယ်တန်းမှာ အိုဘီ ခေါ် စိတ်ကြိုက်မြန်မာစာ ကျောင်းသားတွေသင်တာတွေ ယူဖတ်တယ်။ ခုထိ စွဲနေတုန်း။
အဲ့့ နည်းနည်းကြီးလာတော့ ဝတ္ထုစာအုပ်တွေတချို့ကို သဘောမကျတော့ပါ။ မင်းသားနဲ့ မင်းသမီး စကားတွေ ပြောကြတယ်။ ဆက်ပါအုန်း မောင်။ ဆိုပါအုန်း ခင်။ လူ့သက်ရှိလောကမှာ အဲလို မပြောကြပါ။
နောက်မှာ စာရေးဆရာတွေ တယောက်နဲ့တယောက် ငြင်းကြတာကို မဂ္ဂဇင်းတွေမှာ အခန်းဆက်လာတယ်။ အစကတော့ စိတ်ဝင်စားပါရဲ့ နောက်တော့ မကြိုက်တော့ပါ။ ကိုယ်နဲ့ မဆိုင်ဘူးထင်လာတယ်။
နောက်မှာ ကဗျာဆရာတွေ သူတို့အချင်းချင်းသာသိတာတွေကို စပ်ဆိုကြတယ်။ ကျွန်တော်တို့လို လူပြိန်းတွေက နားမလည်ပါ။ သူတို့အချင်းချင်းပဲ ကာရန်နဲ့လျှောက်ပြောနေကြတာ။ ကာရန်ပါ-မပါကလည်း အတင်းငြင်းကြတာ။ အစကတော့ တော်တော်လေးလိုက်ဖတ်သေးတယ်။ အခုတော့ ကောက်ချက်ဆွဲလိုက်ပြီ။ ကလောင်နာမည်နဲ့ရေးတာ ကဗျာ။
ခုခေတ်စာအုပ်တွေနဲ့တော့ လက်လှမ်းမမီပါ။ ကောင်းကြမှာပဲလို့သာ ပြောပါရစေ။ အဲ သတ်ပုံကလွဲရင်ပေါ့။ အတော်များများက ဆင်တူဝတ်ထားကြတယ်။ ယူနီဖောင်းကာရန်လို့ ခေါ်လိုက်မယ်။ ကန်တော့ပါ။
နတ်တော်မှာ စာဆိုတော်တွေ ဟောပြောတာတော့ နားထောင်ချင်တယ်။ သူတို့လက်နဲ့ သတ်ပုံတွေ ဘယ်လိုရေးရေး စကားပြောရင် တစ်သံမထွက်ကြလို့။
ဒေါက်တာတင့်ဆွေ
၂-၁၂-၂ဝ၁၆
၂-၁၂-၂ဝ၁၈
Comments
Post a Comment