Isolated Island တကျွန်းပို့သင့်တယ်

ရေဒီယိုတခုကမေးလို့ အခုပဲဖြေရပါတယ်။ ဇီးပင်ကြီးအကြောင်း။ ရုက္ခဗေဒတော့ မသိပါ။ ဗရုသုက္ခဖြစ်နေခဲ့တာတော့ သိတယ်။

ဖေါင်ကြီးမှာ ဇေယျ ၁၉ တက်ခဲ့ရစဉ်က ကြက်ခြေနီအောင်လက်မှတ်ရခဲ့တာ ရေးထားပြီးပြီ။ ရာထူးဝန်အဖွဲ့ရဲ့ လက်သုံး မေးခွန်းလည်း ရေးထားတယ်။ ရုံးပေါ်တက်လာခဲ့တဲ့လှေကားမှာ ဘယ်နှစ်ထစ်ရှိသလဲ တဲ့။ ဗျူရိုကရက်တွေက အလွန်ကို တော်ကြတာ။ လစာအမြင့်ဆုံးရကြသူတွေ။ ဟိုတုန်းက ရုံးကလည်း မြန်မာပြည်မှာအမြင့်ဆုံး။ ခြောက်ထပ်ရုံးလို့ ခေါ်တယ်။ နတ်ပြည်ကလည်း ခြောက်ထပ်ရှိလို့ စာထဲမှာဖတ်ရတယ်။

နိုင်ငံရေးသင်တန်းမှာ ဘာနိုင်ငံရေးတွေ သင်ပေးနေသလဲ။ ကျွန်တော်တို့တုန်ကတော့ အညမည။ သူ့အစိုးရပေါ်လစီ ဖြစ်တော့ သိပ်မပြောချင်။ အခုဘယ်အစိုးရရဲ့ အိုင်ဒီယော်လော်ဂျီကို သင်နေသလဲ။ အင်နယ်လ်ဒီမှာ အိုင်ဒီယော်လော်ဂျီလို့ ပြောနိုင်တာ အခုထိ မရှိပါ။

နိုင်ငံရေးအိုင်ဒီယော်လော်ဂျီတွေ အမျိုးမျိုးရှိတာ။ နိုငံရေးသိပ္ပံကိုလေ့လာသူတွေအတွက်သာ အသေးစိတ်လိုမယ်။ အခုလိုစာမှာ နည်းနည်းဆိုငုံမိမယ်။ အက္ခရာစဉ်လိုက်သာ ရေးပါမယ်။

Absolutism သက်ဦးဆံပိုင်စနစ်။

Aristocracy မင်းစိုးရာဇာမူးကြီးမတ်ကြီးအုပ်စိုးတဲ့စနစ်။

Autocracy တဦးတည်းလက်မှာ စစ်ဆေးခြင်းမခံရတဲ့ အာဏာတွေ ဆုပ်ကိုင်ထားတဲ့စနစ်။

Capitalism လက်ယာစီးပွားရေး ပုဂ္ဂလိကဦးစားပေး။

Communism ကွန်မြူနစ်စနစ်။ စုပေါင်းပိုင်ဆိုင်၊ စီမံကိန်းချစီးပွါးရေးစနစ်။ လိုသလောက် စွမ်းသလောက်လုပ်ကိုင်ရေး။

Conservatism ရှိရင်းစွဲအတိုင်း ထိန်းသိမ်းရေးစနစ်။ ဈေးကွက်စီးပွါးရေး။ အစိုးရချုပ်ကိုင်မှုနည်းရေး။

Democracy လူတွေက ရွေးချယ်တင်မြှောက်တဲ့ အစိုးရစနစ်။

Dictatorship တဦးတည်း အာဏာရှင်စနစ်။

Egalitarianism နိုင်ငံသားတိုင်း တူညီရေးစနစ်။

Fascism လက်ယာစွန်း။ ဖိနှိပ်အုပ်ချုပ်ရေး။

Imperialism နယ်နိမိတ်ကျော် အရင်းရှင်စနစ်။

Liberalism လွတ်လပ်စွာ ပြောဆို စုဝေးခွင့်ရှိ။ လူအတန်းအစား ခွဲခြားခြင်းမရှိ။

Marxism ကားလ်မတ်စ်နဲ့ အိမ်ဂျဲလ်တို့ရဲ့ ကွန်မြူနစ်ဝါဒ။

Maoism မော်စီတုန်းဝါဒ။ စိုက်ပျိုးရေး အခြေပြုစနစ်။

Monarchy ဘုရင်-ဘုရင်မစနစ်။

Nationalism အမျိုးသားရေးဝါဒ။

Oligarchy ချမ်းသာသူလူတစုလက်ထဲမှာ အာဏာရှိတဲ့စနစ်။

Populism နိုင်ငံရေးနဲ့ စီးပွါးရေးအခွင့်အာဏာတွေကို လူအများစုလက်ထဲမှာထားရေးစနစ်။

Socialism လက်ဝဲဆိုရှယ်လစ်အယူအဆ။ အများအတွက် အများနဲ့သက်ဆိုင်ရေး။

Theocracy ဘာသာရေးဘုရားကျောင်း အုပ်ချုပ်ရေး။

အစိုးရဆိုတာ အမျိုးမျိုး။ ဘုရင်စနစ်၊ အာဏာရှင်စနစ်နဲ့ ဒီမိုကရေစီ။ မြန်မာနိုင်ငံမှာ ဘုရင်စနစ်က နှစ်ပေါင်း ထောင်ကျော်တယ်။ အာဏာရှင်စနစ်က နှစ် ၅ဝ ကျော်တယ်။ အရောအနှောပါနေတဲ့ ဒီမိုကရေစီက ၈ နှစ်သာ။ စီးပွားရေးက လက်ဝဲတော့ မဟုတ်။ လက်ယာလုပ်လာတာ ဦးနေဝင်းထွက်ကာနီးကတည်းက။

အခုဆရာတွေက ဘာတွေသင်ပေးနေကြလဲ။ အစိုးရဆန့်ကျင်ရေးတွေပါနေဆိုလား။ ကျွန်တော်တို့တုန်းကတော့ အဲလိုစကားမျိုးပြောတာကို သူပုန်လို့ခေါ်တယ်။ နိုင်ငံတော်ပုန်ကန်မှု မြောက်တယ်။ ကျွန်တော်တို့အရင်ကတော့ တကျွန်း ပို့တယ်။ ဇီးပင်တွေ ဖောင်ကြီးပေါ်တင်ပြီး ကိုကိုကျွန်းပြောင်းစိုက်သင့်တယ်။

ဒေါက်တာတင့်ဆွေ
၂၆-၁၂-၂၀၁၈