OB ဆရာဝန်
ကျွန်တော်လို ရိုးရိုးဆရာဝန်တွေက ဆေးပညာဘွဲ့တခုတည်းသာရကြတယ်။ ဘွဲ့ကတခုတည်းပေမဲ့ နှစ်မျိုးပါတယ်။ MB က ဆေးပညာဝိဇ္ဇာဘွဲနဲ့ BS က ခွဲစိတ်ပညာဝိဇ္ဇာဘွဲ့။ ဆရာဝန်တွေ MBBS ဘွဲ့ရပြီးနောက်မှာ တယောက်တမျိုးစီ ဖြစ်လာကြတယ်။ ကျွန်တော်လို ရတဲ့ဘွဲ့လေးတခုနဲ့ အရိုးထုတ်ကြရသူကများတယ်။ အဲလိုဆရာဝန်တွေထဲမှာလည်း ဆေးကုတာ အားသန်သူနဲ့ ခွဲစိတ်တာမှာ စိတ်ပါသူလို့ မတူကြပြန်ဘူး။ ကျွန်တော်က အစုံသုပ်လုပ်ပါတယ်။
ကျွန်တော် ထိုင်းနိုင်ငံ မဲဆောက်က ဒေါက်တာဆင်သီယာမောင် ဆေးခန်းရောက်တိုင်း ခွဲစိတ်ခန်းဝင်ပေးသေးတယ်။ ကေအင်န်ယူခေါင်းဆောင် ဗိုလ်ချုပ်မြရွာမှာရှိတဲ့ ဆေးရုံလေးမှာလဲ ခွဲစိတ်ပေးဘူးတယ်။ ထိုင်း-မြန်မာနယ်စပ် ချောင်းကလေးဘေးမှာ ပါတီစည်းရုံးရေးမှူးတယောက်ကို အစည်းအဝေးနာချိန်မှာ မိုင်နာဆာဂျရီ လုပ်ပေးဘူးတယ်။ အိန္ဒိယနိုင်ငံ၊ အိုက်ဇောမှာလဲ မြန်မာယက်ကန်းသမားတွေကို ခွဲစိတ်တာအပါအဝင် ဆေးကုပေးတယ်။ တမူးဟိုဖက်က မိုးရေးဆေးခန်းလေးမှာလည်း အဲလိုဘဲ။ ဒေလီမြို့ ယမုန်နာဆေးခန်းမှာလည်း အတော်များများခွဲစိတ်ခဲ့တယ်။
၁၉၈၁ တုန်းက ရန်ကုန်မှာ တနှစ်တည်း ဆေးကျောင်ဆင်း သူငယ်ချင်းတွေစုဝေးခဲ့တုံးက ကျွန်တော့်လက်နဲ့ ခွဲတာကိုခံရဲတဲ့ သတ္တိအကောင်းဆုံးသူငယ်ချင်းကိုယ်တိုင်က ပြန်ပြောမှ အဲတာကိုအမှတ်ရတယ်။
အစစအရာရာရှာပါးလွန်းလှတဲ့ ဆိုရှယ်လစ်ခေတ်ကြီးထဲမှာ တိုင်းပြည်ကနေထွက်ပြေးရတော့ ကိုယ်ပိုင်စုဆောင်းထားခဲ့တဲ့ ခွဲစိတ်ကိရိယာတွေကိုပါ ထားခဲ့ရတယ်။ နှမြောလိုက်တာ မပြောပါနဲ့တော့။ ဒေလီကို ရောက်တော့ ခွဲစိတ်လူနာတွေ တွေ့ပြန်တဲ့အခါ လက်နက်သာရှိပြီး ကျည်ဆံမရှိပြန်လို့ ခွဲစိတ်ကိရိယာတွေ ပြန်စုရပြန်တယ်။
နိုင်ငံရေးထဲရောက်မှ တိုင်းပြည်နဲ့ခွဲရတယ်။ ခွဲစိတ်လူနာတွေနဲ့ပါ ခွဲရတယ်။ ကိုယ်ပိုင်စုဆောင်းထားခဲ့တဲ့ ခွဲစိတ်ကရိယာတွေနဲ့ရော မြန်မာပြည်နဲ့ အိန္ဒိယပြည်ကို ခွဲခဲ့ရတယ်။ အခုတတိယနိုင်ငံရောက်တော့ ခွဲစရာဆိုတာ ပြည့်စုံသွားတယ်။ အရာရာကို ခွဲခွါထားရစ်ရတဲ့ ခွဲဆရာဝန်အစစ်ဖြစ်လာပါတော့တယ်။
ဒေလီက ပုဂ္ဂလိကဆေးခန်းတခုမှာ ဗိုက်ခွဲမွေးပေးတာတွေလုပ်တော့ အိုဂျီဘွဲ့ရ ကုလားမဆရာဝန်က အဆစ်စ်လုပ်တယ်။ Smile! ဒေလီ ယမုန်နာဆေးခန်းမှာ ကလေးပေါင်း ၃၅ဝ ကို မွေးပေးလို့ အိုဂျီလို့ အမှတ်မှားနေကြတယ်။ အမှန်က အိုပြီ ဆရာဝန်ပေါ့ဗျာ။ လက်မတုန်သေးပါ။ စိတ်မကုန်သေးပါ။
ဓါတ်ပုံ = ၂၆-၉-၂ဝ၁၁ နေ့က ဒေလီ ယမုန်နာဆေးခန်းမှာ ကလေးလူနာတယောက်ကို ခွဲစိတ်ကုသပေးစဉ်က
ဒေါက်တာတင့်ဆွေ
၃၁-၁၂-၂ဝ၁၆
၃၁-၁၂-၂ဝ၁၈
Comments
Post a Comment