ဖုဿတီမိဖုရားကြီး နတ်သမီးဘဝက သိကြာမင်းထံတောင်းသော ဆုဆယ်ပါး
၁။ အကျွန်ုပ်သည် ဤကိုယ်အဖြစ်မှ စုတေ့လျှင် သိဝိရာဇ်မင်းကြီး၏ နန်းတော်ကို အစိုးရသော မိဖုရားကြီး ဖြစ်လို၏။
၂။ တနှစ်မြောက်သော သမင်မငယ်၏ မျက်စိနှင့်တူသော ညိုသောမျက်စိ ရှိသည်လည်း ဖြစ်ရလို၏။
၃။ ညိုသော မျက်မှောင်တံ ရှိသည်လည်း ဖြစ်လို၏။
၎။ အမည်အားဖြင့် ဖုဿဒေဝီဟူ၍ပင် အမည်ရှိလို၏။
၅။ တန်းဆာဆင်အပ်သော ဦးခေါင်းကို၎င်း၊ မျက်စိအစုံကို၎င်း၊ နှလုံးသည်းပွတ်ကို၎င်း၊ ထီးဖြူကို၎င်း၊ သားသမီးကို၎င်း၊ အလိုရှိသော ယာစကာတို့သည် တောင်းခံလာသည်ရှိသော် ထိုယာစကာတို့ကို အလိုရှိတိုင်း ပေးလှူစွန့်ကြဲတတ်သည်ဖြစ်၍ ဝန်တိုပိတ်ပင် စဉ်းလဲဖြင်းမရှိ၊ မင်းတပါးတို့ ပူဇော်ထိုက်သော ကျော်စောခြင်းနှင့် ပြည့်စုံသော သားကောင်းရတနာ ကိုလည်း ရလို၏။
၆။ ကိုယ်ဝန်ဆောင်လေသော်လည်း အကျွန်ုပ်ဝမ်းသည် မယမ်းမစုန့် ပုံ့ပုံ့မထင် လေးအတတ်၌ ကျွမ်းကျင်လိမ်မာသော လေးသ္မားသည် ကောင်းစွာသတ်အပ်သော လေးပျဉ်းကဲ့သို့ ညီညွတ်စွာ ပြကတေ့အတိုင်း ရှိစေလို၏။
၇။ သားများစွာပင် ဖွားမြင်သော်လည်း အကျွန်ုပ်၏ သားမြတ်အစုံသည် မတွဲမကျ အရွယ်ရောက်ဦးစအတိုင်း တည်စေသတည်း။
၈။ အရွယ်လွန်သည်တိုင်အောင် ဆံပင်မဖြူ ငယ်မူငယ်သွေး သွေးအတိုင်း တည်စေသတည်း။
၉။ အကျွန်ုပ်၏ ကိုယ်အဆင်းသည်လည်း ချေးညှိမတင် စင်ကြယ်သော ကိုယ်ရှိသည်လည်း ဖြစ်လို၏။
၁၀။ မင်းပြစ် မင်းမျက်သင့်၍ သေခြင်းအနီးသို့ ရောက်ပြီးသော သူကိုလည်း အကျွန်ုပ်၏ အစွမ်းဖြင့် နုတ်ယူ ကယ်ဆောင်နိုင်လို၏။
မင်းပူးဆရာတော် ဦးသြဘာသရေးသားတဲ့ ဝေဿန္တရာဇာတ်တော်ထဲက ဖြစ်ပါတယ်။ ဆရာတော်ရေးခဲ့တာ မြန်မာစာပေမှာ ဂန္ထဝင်မြောက်တယ်။ စာအရေးအသား နုလွနက်နဲပြီး သတ်ပုံမှန်တယ်။ ရသဆိုတာ သတ်ပုံမှန်နဲ့ ရေးသားတဲ့စာကိုသာ ခေါ်အပ်တယ်။
ဆုတောင်းတပါးတည်းသာရလိုပါ၏။ မြန်မာစာသတ်ပုံမှန်ကန်လာပါစေသတည်း။ မိခင်မြန်မာစာ၏ ဝမ်းသည် မယမ်းမစုန့် ပုံ့ပုံ့မထင် လေးအတတ်၌ ကျွမ်းကျင်လိမ်မာသော လေးသ္မားသည် ကောင်းစွာသတ်အပ်သော လေးပျဉ်းကဲ့သို့ ညီညွတ်စွာ ပြကတေ့အတိုင်း ရှိစေလို၏။
ဒေါက်တာတင့်ဆွေ
၂၈-၅-၂၀၂၀
Comments
Post a Comment