Sperm count သုက်ပိုးများစေနည်း

ဆရာရှင့် အမျိုးသားရဲ့ သုတ်သွေးဓါတ်ခွဲအဖြေကို ပို့ပါတယ်။ ကလေးရဖို့အားနည်းတယ်လို့ သိရပါတယ်။ ဘယ်လိုများ ဆက်လက်ဆောင်ရွက်ရမလဲ လမ်းညွှန်ပေးပါ။

ကလေးရဘို့ဆိုရင် သုက်ပိုးတွေရဲ့ ရှင်သန်နိုင်စွမ်းဟာ ၇၄-၇၅% ရှိသင့်တယ်။ ကလေးမရနိုင်သေးတဲ့ အတွဲတွေမှာ ယောက်ျားဘက်က အားနည်းချက် (၃) မျိုးထဲက တခုဖြစ်တယ်။
၁။ Low sperm count သုက်ပိုးအရေအတွက်နည်းခြင်း၊
၂။ Low sperm motility သုက်ပိုးလှုတ်ရှားနိုင်စွမ်းနည်းခြင်း နဲ့
၃။ Abnormal sperm ပုံမမှန်တဲ့သုက်ပိုးအရေအတွက် ဆိုတာတွေ ဖြစ်ကြတယ်။

သုက်ပိုးလှုတ်ရှားနိုင်စွမ်းဆိုတာ သုက်ပိုးတွေက ရှေ့တည့်တည့်သွားနိုင်စွမ်းကို ပြောတာပါ။ ဒါမှ မ-မျိုးဥရှိရာဆီကို တန်းတန်းမတ်မတ် သွားနိုင်ကြလိမ့်မယ်။ ပုံမှန်သုက်ရည်ဟာ အဖြူနဲ့ မီးခိုးရောင်စပ်ကြားမှာရှိတယ်။ တခါတလေ နဲနဲဝါတယ်။ ပန်းရောင်ရှိတယ်။ အနီရောင် ဖြစ်နေရင် သွေးပါနေလို့ပါ။ ကျားအင်္ဂါကနေထွက်တာနဲ့ သုက်ရည်က ခဲလာတော့ ပြစ်ချွဲလာတယ်။ ၅ မိနစ် ကနေ နာရီဝက်မှာ ပြန်ပြီး အရည်ဖြစ်တယ်။ အဲလိုမဖြစ်ရင် ကလေးရနိုင်စွမ်းကို ထိခိုက်စေတယ်။ ပျမ်းမျှဆိုရင် တခါသုက်ထွက်တာက ၂-၅ စီစီ (မီလီ-လီတာ) ရှိတယ်။ သုက်မလွှတ်တာကြာရင် များပြီး၊ ခဏခဏထွက်ရရင် နည်းမယ်။ ရောဂါမဟုတ်ပါ။

ကမ္ဘာ့ ကျန်းမာရေအဖွဲ့ WHO သတ်မှတ်ချက်ကတော့ -
• သုက်ရည် တခါထုတ်တာဟာ အနည်းဆုံး ၂ စီစီ ထုထည်ရှိရတယ်၊
• ၁ စီစီ သုက်ရည်ထဲမှာ Spermatozoa သုက်ပိုးကောင်ရေ သန်း ၂ဝ ပါရတယ်၊
• တခါထုတ်တာမှာ အနည်းဆုံး သုက်ပိုး သန်း ၄ဝ ရှိရမယ်၊
• သုက်ပိုး ၇၅% ရှင်နေတာ ပုံမှန်ဖြစ်ရတယ်၊
• သုက်ပိုး အနည်းဆုံး ၃ဝ% က ပုံမှန် Morphology ပုံသဏ္ဌာန်ရှိနေတာ ပုံမှန်ဖြစ်ရတယ်၊
• သုက်ပိုး အနည်းဆုံး ၂၅% က Motility အလျင်အမြန် ကူးသန်းသွားလာနေတာ ပုံမှန်ဖြစ်တယ်။
• သုက်ပိုး အနည်းဆုံး ၅ဝ% က ရှေ့ဖက်ဆီကို နှေးချင်နှေးပါစေ ကူးသန်းသွားလာနေတာ ပုံမှန်ဖြစ်တယ်။

Semen analysis သုက်ပိုး အရေအတွက်နဲ့ အရည်အသွေးကို စမ်းသပ်တာဟာ ကလေး ရနိုင်စွမ်းအတွက် လုပ်တာပါ။ ဒါ ကောင်းနေယုံနဲ့တော့လဲ အသေအခြာ ကလေးရမှာဘဲလို့ မပြောနိုင်သေးပါ။ အထက်က ရေးထားတာတွေအပြင် White blood cells သွေးဖြူဥ၊ Fructose သကြားဓါတ်၊ pH အက်စစ်ဓါတ်၊ Liquefaction time အရည်ပျော်ချိန်တွေကိုပါ စစ်ဆေးတယ်။ တခါထဲနဲ့ မမှန်နိုင်ဘူး။ ၂ ခါ ၃ ခါ၊ ၂ ပါတ်၊ ၃ ပါတ်ခြားပြီး ထပ်စမ်းရတယ်။

သုက်ရည်ရဲ့ အရည်အသွေးကို သက်ရောက်စေတဲ့အချက်တွေ အများကြီးရှိတယ်။
• တကယ် လိင်ဆက်ဆံလို့ ထွက်တဲ့သုက်က မာစတာဘေးရှင်း လုပ်လို့ ထွက်တာထက် သုက်ပိုးအရေအတွက် ၁၅% ပိုများတယ်။ လှုတ်ရှားမှု နဲ့ ပုံသဏ္ဌာန်ပါ နဲနဲပိုတယ်။ ထုထည်က ၂၅-၄၅% ပိုတယ်။
• သုက်ရည်ဟာ အပူချိန် သိပ်မခံနိုင်ဘူး။ ပူရင်၊ နွေရောက်ရင် နဲတယ်။
• Depo-Provera, Adjudin, Gossypol ဆေးတွေက ယောက်ျားတွေကို မြုံစေတယ်။
• (SSRI) စိတ်ကျဆေးတွေနဲ့ Marijuana ဆေးခြောက်ကလဲ မကောင်းစေဘူး။
• Penicillin and Tetracycline ပိုးသေဆေးတွေကလဲ နည်းစေတယ်။
• Anabolic steroids Hormones ဟော်မုန်းဆေးတွေသုံးရင် အစွမ်းနည်းစေတယ်။
• ကော်ဖီနဲ့ အရက်ကလဲ နည်းစေတယ်။
• Cola ကိုလာအသောက်များတာလဲ အဲလိုဘဲ။
• Soy ပဲပုတ်များတာလဲ အတူတူဘဲ။
• Zinc သွပ်ဓါတ် နည်းရင် နည်းစေတယ်။
• မနက်ခင်း ထွက်တဲ့သုက်ထက် နောက်ပိုင်းထွက်တာက ကလေးရနိုင်စွမ်း ပိုတယ်။ (ကွဲလွဲချက်ကို သတိထားမိပါလိမ့်မယ်။ သုတေသနတခုက မနက်ခင်းဆက်ဆံတာကို ပိုအမှတ်ပေးထားတယ်။)
• လိင်ဆက်ဆံနေတဲ့အချိန်ကြာရင် ကလေးရနိုင်စွမ်းပိုတယ်။
• အသက်၊ ၆ဝ ကျော်လဲ ကလေးရနိုင်သေးတယ်။

သုက်ပိုးနည်းစေတဲ့အကြောင်းရင်းတွေကတော့ ပိုးဝင်ခြင်း၊ အတွင်းခံဘောင်းဘီတင်းကြပ်ခြင်း၊ အထိုင်များခြင်း၊ ပူလွန်းသည့်ရေချိုးခြင်း၊ အဝလွန်ခြင်း၊ သုက်ရည်ထွက်သည့်အကြိမ်များလွန်းခြင်း၊ ဆေးလိပ်သောက်ခြင်း၊ အရက်များခြင်း၊ စိတ်ကိုယ် ပင်ပန်းလွန်းခြင်း၊ Zinc သွပ်ဓါတ်နည်းခြင်း၊ ဆီးကျိတ်ပိုးဝင်ခြင်း၊ မွေးရာပါ လိင်ပိုင်းအင်္ဂါချို့ယွင်းခြင်း၊ ကျားဟော်မုန်းသုံးခြင်း။ Varicocele ရောဂါ ရှိရင် ခွဲစိတ်ကုသပါ။

သုက်ပိုးများစေနည်း (၁ဝ) နည်း
1. လိင်ဆက်ဆံတာ နဲ့ (မာစတာဘေးရှင်း) အကြိမ် မများလွန်းစေရ၊
2. ဆေးလိပ်၊ အရက်ဖြတ်ပါ၊
3. ပုံမှန်ကိုယ်လက် လေ့ကျင့်ခန်းလုပ်ပါ၊
4. အဆီနည်းတဲ့ အာဟာရ ပြည့်ဝသည့် အစားအစာများစားပါ၊
5. ကျားအင်္ဂါနေရာ အပူမများစေရ၊ အတွင်းခံ မတင်းကြပ်စေရ၊ ခြည်ထည်ကိုသာ ဝတ်ဆင်ပါ၊
6. ကိုယ်အလေးချိန်များနေရင် လျှော့ချပါ၊
7. ကိုယ်-စိတ် ပင်ပန်းမှုတွေ ပြုပြင်ပါ၊
8. ရိုးရာ-အဆီနဲ့ အနှိပ်ခံပါ၊
9. ဗီတာမင်၊ ဓါတ်ဆားတွေ သုံးစွဲပါ၊
10. ဆက်ဆံတဲ့အချိန်ဟာ နံနက်နဲ့ နေ့ပိုင်း ပိုဖြစ်သင့်တယ်။

ကိုယ့်အထင်တခုထဲနဲ့တော့ သုက်အရည်အသွေး၊ အရေအတွက်မကောင်းဘူလို့ သောကမများပါနဲ့။ လူအများတကာ့ အများစုဟာ ပုံမှန်တွေချည်းပါ။ (မာစတာဘေးရှင်း) လုပ်လို့ မစိုးရိမ်ပါနဲ့။ မြန်မာ့အာဟာရဓါတ်စာတွေမှာ သုက်ပွါးစာတွေ ရှိတယ်။
• ယောက်ျားမှာ Varicocele ဆိုတဲ့ ကပ်ပဲ့အိတ်ထဲမှာ သွေးကြောတွေ ထုံးခွေနေတဲ့ရောဂါ ရှိနေသလား စစ်ရမယ်။ ရှိနေရင် ခွဲစိတ်ရမယ်။ ရေးထားပါတယ်
• အလုပ်လုပ်ရမှာ ကပ်ပဲအိတ်နေရာကို သိပ်ပူနေစေတာ မကောင်းဘူး။
• လိင်ဆက်ဆံတဲ့အချိန် သိပ်ကြာလွန်းရင်လဲ သုက်ပိုးတွေ နှေးစေနိုင်တယ်။ တခါဆက်ဆံနေချိန် ကြာလွန်းတာကို ပြောတာပါ။
• ဟော်မုန်းဆေးတွေ (စတီရွိုက်) ဆေးတွေကနေလဲ သက်ရောက်စေနိုင်တယ်။ မသင့်ပါ။
• အထောက်အကူပေးနိုင်တာတွေကတော့ Vitamin C, Vitamin E, Vitamin B12, Selenium, Zinc နဲ့ Lycopene တွေဖြစ်တယ်။
• အထောက်အကူပေးနိုင်သလားလို့ယူဆတဲ့ တိုင်းရင်းဆေးတွေထဲမှာ Panax Ginseng, Lepidium Meyenii, or Maca, Polygonum Cuspidatum နဲ့ Resveratrol တွေ ပါတယ်။
• အားမနာတမ်း ပြောရရင် အထောက်အကူနည်းတွေဟာ ကလေးရစေမယ်လို့ အာမခံတာတွေတော့ မဟုတ်ပါ။
• နောက်ဆုံးမှာ Intrauterine Insemination (IUI) သားအိမ်ထဲကို သုက်ရည်ထည့်ပေးနည်း Vitro Fertilization (IVF) or Intracytoplasmic Sperm Injections (ICSI) ပြင်ပမှာ သန္ဓေတည်စေနည်းတွေနဲ့ ကလေးရအောင် လုပ်ကြရတယ်။

Dr. တင့်ဆွေ