မြန်မာနိုင်ငံသားတွေ ဘယ်မှာနေနေ ကျန်းမာကြပါစေ

Photo taken on 19-11-2011 by an Indian photo-journalist at Yamuna Clinic
This Blog is created on 10th October 2014

How to ask ကျန်းမာရေးနဲ့ ဆေးပညာ မေးလိုတာရှိပါက

• ဖေ့စ်ဘွတ် ကွန်မင့်ကနေ မမေးပါနဲ့။
• ဖြစ်တဲ့သူရဲ့ ကျား-မ နဲ့ အသက်ကို အရင်ဆုံးရေးပါ။ နာမည် မလိုအပ်ပါ။
• ဖြစ်နေတာ ၁-၂-၃။ ဖြစ်တာဘယ်လောက်ကြာပြီ။ လိုအပ်ရင် ရာသီ၊ အိမ်ထောင်ရေး၊ ကျန်းမာရေးနောက်ခံ၊ နေတဲ့တိုင်းပြည်။ တိုတိုရှင်းရှင်းသာရေးပါ။
• ဆေးစစ်ချက်တွေနဲ့ ပုံတွေကို အတည့်ပို့ပါ။ လိုတာကိုသာပို့ပါ။ အာလ်ထွာဆောင်းမှာ ပုံမလိုပါ။ မှတ်ချက်သာလိုတယ်။
• SMS အရေးအသားမျိုးကို မဖတ်တတ်ပါ။ မြန်မာစကားကို အင်္ဂလိပ်စာလုံးနဲ့ရေးတာကို မဖတ်ပါ။
• ဖုန်းဆက်ပြီးမေးရင် အချိန်ဇုန်မတူတာရော၊ အသံထွက်လွဲနိုင်တာရောကြောင့် အဆင်မပြေပါ။
• မေးတဲ့သူက မိမိကိုယ်မိမိ သား-သမီးလို့မရေးပါနဲ့။ ဖြေမယ့်ဆရာဝန်ကို ဆရာလို့သာသုံးပါ။
• ဆေးရုံ-ဆေးခန်း-ဆရာဝန်-ဆေးဆိုင်-ဆေးဈေး-ကုန်ကျစရိတ် စတာတွေကို မသိပါ။
• မေးစရာနေရာ (၁) အီးမေးလ် doctortintswe@gmail.com (၂) ဖေ့စ်ဘွတ် https://www.facebook.com/tint.swe.dr (၃) ဖေ့စ်ဘွတ် https://www.facebook.com/drtintswe/
• မေးနည်းစည်းကမ်းအရ မမေးလိုသူများ http://doctortintswe.blogspot.com/ Dr. Tint Swe's Writings မှာ ရှာဖတ်နိုင်ကြပါတယ်။

Monday, December 19, 2016

Sterilization add-on ပိုးသန့်ခြင်း (နောက်ဆက်တွဲ)

ခါတိုင်း အနာတွေကို အရက်ပျံဆွတ်ဂွမ်းနဲ့  သုတ်လိမ်းပေးတာ မလုပ်သင့်ဘူးဆိုတဲ့ သဘောလား ဒေါက်တာ။ ဒါဆိုရင် အနာဝတွေကိုပဲ အရက်ပျံ သုတ်လိမ်းပြီး၊ အနာကို (အန်တီဆက်တစ်-ကရင်မ်) ပဲ ထည့်ပေးသင့်တဲ့ သဘောပေါ့နော်။ အရက်ပျံကို သက်မဲ့မျက်နှာပြင်ထဲ မသုံးရဆိုတာ သိပ်နားမလည်လို့ ထပ်ရှင်းပြပေးပါဦးဗျာ။

အရက်ပြန်ရော အိုင်အိုဒင်းကိုပါ အနာထဲ မထည့်ရပါ။ အကျိုးရှိစေနိုင်ပေမဲ့ ထိခိုက်စေတယ်လို့ ပြောနိုင်တယ်။ အနာရဲ့ ဘေးက အရေပြားကိုသာ ပိုးသန့်ပေးဘို့ သုံးရပါတယ်။ အရေပြားအောက်က အဆီ၊ သူ့အောက်က ကြွက်သားတွေက ဆေးအပြင်းကို ခံနိုင်ရည် နည်းတယ်။ ဒဏ်ရာလေးတခုရလို့ အရက်ပြန်ထည့်ပေးရင် အင်မတန်စပ်တယ် မဟုတ်လား။ စပ်တာကို ခံနိုင်အုံးတော့ အဆီ(တစ်ရှူး)ကို ထိခိုက်စေတယ်။



အနာထဲကို ဆေးဝါရည်၊ Hydrogen peroxide, Eusol ဆေးရည်တွေ ထည့်နိုင်ပါတယ်။ မသန်းတဲ့အနာကို စတွေ့တာနဲ့ ရေနွေးထဲစိမ်ထားတဲ့ ဂွမ်းနဲ့ သန့်နိုင်တယ်။ ညစ်ပေတာတွေ၊ အမှုံအမှိုက်တွေကို ဖယ်ထုတ်နိုင်တယ်။ နောက်ပြီး သွေးထွက် နေရင် ရေနွေး ခပ်ပူပူမှာ စိမ်ထားတဲ့ Handkerchief အဝတ်သန့်၊ Gauze ပိတ်ကျဲစ Cottin wool ဂွမ်းစ နဲ့ ရေပြန်ညှစ်ပြီး၊ ဖိပေးထားရင် သွေးတတ်စေမယ်။ အနာထဲကိုသန့်ပြီးရင် ဘေးက အရေပြားကို အရက်ပြန်နဲ့ ပတ်ပတ်လည်မှာ သုတ်ပေးပါ။ အနာနုတ်ခမ်းသားကနေ ဝိုင်းပတ်ပြီး လုပ်ရတယ်။ ဒါတောင် အနာထဲပြန့်သွားလို့ စပ်လာစေတယ်။ နောက်ပြီးမှ (အိုင်အိုဒင်း) နဲ့ အဲဒီအတိုင်း လုပ်ပေးပါ။ ဒဏ်ရာက ချုပ်ဘို့လိုရင် ချုပ်နိုင်ပြီး။ ညစ်ပေနေတဲ့အနာ၊ တိရစ္ဆာန်ကိုက်၊ လူကိုက်ခံရတာဆိုရင် မချုပ်ရသေးဘူး။ ချုပ်ပြီးရင်တော့ အပေါ်ကနေ (အိုင်အိုဒင်း) လိမ်းလို့ရပြီ။ (အိုင်အိုဒင်း) ပါတာဖြစ်ပေမဲ့ (Povidone Iodine Ointment) ကို အနာထဲထည့်ရင် ရတယ်။ သူက ရေနဲ့စပ်ထားတာ။ (တင်ချာ-အိုင်အိုဒင်း) ခေါ်တဲ့ အရက်ပြန်နဲ့ စပ်တာကိုသာ အနာထဲမထည့်သင့်တာပါ။ Povidone Iodine ကို ချုပ်ဘို့မလိုတဲ့ အနာသေးသေးတွေ၊ ချုပ်ပြီးအနာပေါ်မှာပါ ထည့်ပေးနိုင်တယ်။


ဆေးဆိုင်တွေမှာ အလွယ်ဝယ်လို့ရတဲ့ ပိုးသန့်ဆေးတွေကို ထည့်နိုင်ပါတယ်။ Antiseptic Ointments တွေ အများကြီး ဝယ်လို့ရတယ်။ ဆေးထဲမှာ ဘာပါသလဲသိရင် ကောင်းတယ်။ ဥပမာတချို့ရေးပါရစေ။

Acriflavine ဆေးဝါရည်။ အနာထဲ ထည့်လို့ရတယ်။ အဝတ်အစားတွေကို ဝါစေတယ်။ မျက်စိထဲ မဝင်စေရဘူး။

Betadine (Povidone Iodine Ointment 5 %) (အိုင်အိုဒင်း)ပါတဲ့ဆေး။ အိမ်တိုင်းမှာ ဆောင်ထားရတယ်။ အရေပြားမှာ ပိုးဝင်တာ၊ အနာပေါက်တာ၊ အနာ-ဒဏ်ရာရတာ၊ မီးလောင်နာ၊ ခွဲစိတ်ပြီးအနာ၊ စတာတွေအတွက် အနာထဲကိုပါ ထည့်ပေးနိုင်တယ်။

Betamethasone (ကော်တီဇုံး) ပါတဲ့ဆေး။ နာတာရှည် ပျောက်နိုင်ခဲတဲ့ နှင်းကူနာ Eczema လို အနာတွေ အတွက်ဆေး။

Burnol Plus Antiseptic Cream (Aminacrine, Cetrimide, Thymol, Emulsion Base) မီးလောင်နာ၊ အနာဒဏ်ရာ၊ ပွန်းပဲ့တာတွေအတွက် သုံးနိုင်တယ်။

Chlorocresol (ဖီနော) ပါတဲ့ Antiseptic ဖြစ်တယ်။

Clobetasol Propionate Cream (ကော်တီဇုံး) ပါတဲ့ဆေး။ နာတာရှည် ပျောက်နိုင်ခဲတဲ့ နှင်းကူနာ Eczema လို အနာတွေ အတွက်ဆေး။

Diclofenac နာတာကိုသက်သာဆေး။ စားဆေး။၊ ထိုးဆေးလဲ ဒီနာမည်နဲ့ ရှိတယ်။ ပိုးသန့်ဆေးတွေနဲ့ ရောထား တတ်တယ်။

Gentamicin Sulfate Cream 0.1%w/w Folliculitis, Furunculosis အနာ၊ Paronychia ခြေစွယ်ငုတ်၊ အရေပြားနာတွေအတွက် လိမ်းဆေး။ Gentamicin Sulphate Ophthalmic Ointment 0.03% မျက်စဉ်း။ Gentamicin sulphate ပဋိဇီဝဆေး Antibiotics လိမ်းဆေး။

Lignocaine Gel 2% ထုံဆေး၊ တခြားဆေးတွေထဲမှာ နာတာသက်သာအောင် ရောထည့်ပေးတတ်တယ်။

Miconazole Cream မှို Fungus အားကစားသမားခြေထောက်၊ ပွေး Ringworm အတွက်ဆေး။ Tolnaftate က မှို Fungus ကို နိုင်တဲ့ဆေး။ Iodochlorhydroxyquinoline မှို Fungus ကို နိုင်တဲ့ဆေး။ Clotrimazole Cream မှို Fungus ကိုနိုင်တဲ့ဆေး။

Neomycin Sulphate Ointment 2 mg/gm ပဋိဇီဝဆေး Antibiotics ဆေး။

Penicillin Ointment ကို မွေးစကလေး၊  ကလေးငယ်လေးတွေမှာ ပေါက်တဲ့ Impetigo Neonatorum အနာကို လိမ်းပေးတာကောင်းတယ်။

Silver Sulfadiazine Cream 1% W/W ဆေးကို (ဆာလ်ဖါ) ပါတဲ့ မီးလောင်နာဆေး၊ (ဗက်တီးရီးယား နဲ့ ရိစ်) တွေကို သတ်နိုင်တယ်။ အနာကျက်တာ ကြာလို့ သိပ်မသုံးချင်ကြတော့ဘူး။ Silver Sulphadiazine (ဆာလဖါ) ပါတဲ့ မီးလောင်နာလိမ်းဆေး။ Sulphacetamide Sodium Ophthalmic Ointment 10% w/w ပဋိဇီဝဆေး Antibiotics မျက်စဉ်း။

Chloramphenicol Eye Ointment 1%w/w ပဋိဇီဝဆေး Antibiotics မျက်စဉ်း။ မီးလောင်နာကို ပတ္တီးစည်းတဲ့အခါ ကပ်မနေစေတာမို့ ကောင်းတယ်။

Tetracycline Hydrochloride Ointment 3% ပဋိဇီဝဆေး Antibiotics လိမ်းဆေး။ Tetracycline Hydrochloride Ophthalmic Ointment 1%w/w ပဋိဇီဝဆေး မျက်စဉ်း။

Povidone-iodine ဆေးက (အိုင်အိုဒင်း) ပါတဲ့ နောက်ပေါ်ဆေးဖြစ်တယ်။ (အိုင်အိုဒင်း) က ၁၈၁၁ ကတည်းက အလွန်အသုံးဝင်တာကို သိလာခဲ့တယ်။ Bacteria, Yeasts, Molds, Fungi, Viruses, Protozoans တွေကို နိုင်တယ်။ ဘေးထွက်ဆိုးကျိုးတွေရှိတယ်။ Povidone (9.0% to 12.0% iodine) ပေါ်လာမှ တကယ် အသုံးဝင်လာခဲ့တယ်။ အနာထဲဝင်လည်း ရတယ်။ မွေးလာတဲ့ကလေး ချက်ကိုလည်းထည့်နိုင်တယ်။ မိခင်မွေးလမ်းအနာအတွက်လည်း သုံးနိုင်တယ်။ အိမ်တိုင်းမှာ ရှေးဦးသူနာပြုဆေးအိတ်ထဲ ရှိထားသင့်တယ်။

Zinc oxide cream ကို ကလေးငယ်လေးတွေ အနှီးပူလောင်တာအတွက် စိတ်ချလက်ချ သုံးနိုင်တယ်။

Dr. တင့်ဆွေ

No comments:

Post a Comment

Note: Only a member of this blog may post a comment.