Herbal Medicines တာဝန်ကိုယ်စီ ရှိပါသည်
မြန်မာလူမျိုးဆရာဝန် ၃-၄ ယောက်ကနေ မြန်မာတိုင်းရင်းဆေးတွေမှာ အဆိပ်သင့်နေကြောင်း ဆေးသုတေသန အထောက်အထားတွေ ပို့ပေးကြပါတယ်။ ကျေးဇူး။ ပြည်ပနေ မြန်မာဆရာဝန် ၂-၃ ယောက်နေလည်း စာရေးတယ်။ ဗမာဆေးတွေသာမက အထူးသဖြင့် တရုပ်ဆေးတွေမှာ မသင့်တာတွေပါကြောင်း ထောက်ပြကြပါတယ်။ ကျေးဇူး။
တာဝန်ရှိတဲ့ ထက်လင်းကနေလည်း ကွန်မင့်မှာ ဖြေရှင်းချက်ရေးလာတယ်။ ကျေးဇူး။
မြန်မာရုံးတခုက တာဝန်ရှိသူတဦးကလည်း စာရေးပြီး ကိုယ့်တိုင်းပြည်မှာ FDA လုပ်ငန်းတွေပိုကောင်းအောင် ဘယ်လို လုပ်သင့်လဲ အကြံတောင်းတယ်။ ကျေးဇူး။
ကျွန်တော့်သဘောထားက သူများကို မထိခိုက်စေလိုပါ။ ဒါပေမယ့် တာဝန်ရှိဆရာဝန်တယောက်အဖြစ် ရေးစရာရှိရင် အားမနာပါ။ အချက်အလက် အထောက်အထားနဲ့ ရေးပါတယ်။ ကျွန်တော်သုံးတဲ့ဓါတ်ပုံဟာ အဲလိုဆေးရောင်းချတဲ့ စတိုးဆိုင်မှာ အမေရိကန်ပြည်ထောင်စု၊ အင်ဒီယာနာပြည်နယ်၊ မာရီယွန်ကောင်တီ ပြည်သူ့ကျန်းမာရေးဌာနက ကပ်ထားတာဖြစ်ပါတယ်။ သတိပေးစာထဲက မြန်မာဘာသာပြန်ကလည်း ကျန်းမာရေးဌာနက ဘာသာပြန်ထားတာ ဖြစ်ပါတယ်။ ဆေးက ထက်လင်းတခုတည်းမကပါ။ ဆေးတို့ပတ်ဆိုတာလည်း ပါတယ်။
အရင်က ပြည်တွင်းမှာ ဂေါမုတ္တဆေး၊ သွေးဆေး အပါအဝင် မြန်မာဆေးတွေကို မြန်မာပြည် FDA က တားမြစ်ချက် ထုတ်ထားပြီးဖြစ်ပါတယ်။
ကျွန်တော်ရေးသားရတဲ့ရည်ရွယ်ထဲမှာ ထုတ်လုပ်ရောင်းချနေသူတွေက ဆေးတွေထဲမှာပါနေတဲ့ အဆိပ်ဓါတ် ကင်းစင်အောင်လုပ်ပြီး ရောင်းချဘို့နည်းလမ်းရစေချင်တာလည်း ပါတယ်။
ဘယဆေး၊ တိုင်းရင်းဆေးတွေက နိုင်ငံတိုင်းမှာရှိတာပါ။ ကျွန်တော်တို့တိုင်းပြည်မှာ အရာရာတိုင်းမှာ တာဝန်ရှိသလို မလုပ်နိုင်ခဲ့တဲ့ နှစ်ကာလေတွေကကြာတယ်။ ဥပဒေစည်းမျဉ်းတွေက လျော့ရဲတာသာမကာ မပြည့်စုံသေးပါ။
ကျွန်တော်ထောက်ပြတဲ့ တားမြစ်ချက်ကို အမေရိကန် FDA ကထုတ်တာမဟုတ်ပါ။ ပြည်နယ်တခုထဲက မြို့တခုရဲ့ ကျန်းမာရေးဌာနတခုကနေ လုပ်တာပါ။ မြန်မာပြည်မှာ တဆိတ်ရှိ FDA တခုတည်းကိုပဲ လက်ညှိုးထိုးနေကြရသေးတယ်။
ပြုပြင်ရေးလုပ်ရတာက သိမ်မွေ့တယ်။ မကောင်းဂျောင်းလုပ်မရတဲ့ကာလကို ဖြတ်ကြရပါအုန်းမယ်။ ပြစ်တင်တာထက် ဘယ်လို ပိုကောင်းအောင်လုပ်ကြမလဲက အရေးကြီးပါတယ်။ အလွယ်မယုံ၊ အလွယ်မလိုက်သင့်ကြပါ။
ဒေါက်တာတင့်ဆွေ
၁၅-၁-၂ဝ၁၇
၁၅-၁-၂ဝ၁၈
Comments
Post a Comment