Medical coup ဆေးအာဏာသိမ်းခြင်း
လွန်ခဲ့တဲ့ ၂ နှစ်လောက်ကရေးထာတာလေး ပြန်တင်ပါရစေ။
စစ် နဲ့ ဆေး အသက်မွေးမှုနှစ်ရပ်ကို ပြောင်းပြန်လုပ်ကြည့်ပါမယ်။ ဆေးအာဏာသိမ်းခြင်းတရပ် မြန်မာပြည်မှာ ပေါ်ပေါက်လာတယ်။ ရောဂါကပ်ကြီးကျရောက်မဲ့ဘေးကနေ လက်တလုံးအလိုမှာ နိုင်ငံတော်ကို ကယ်တင်ဘို့ရာ ဆရာဝန်တွေကနေ မလွဲသာမရှောင်သာ တိုင်းပြည်ရဲ့အချုပ်အခြာအာဏာကို သိမ်းယူလိုက်ရကြောင်း ပထမဆုံး ထုတ်ပြန်ချက်မှာ ပါရှိတယ်။ အရင်အုပ်ချုပ်နေသူတွေကို ထိန်းသိမ်းတယ်။ နိုင်ငံရေးပါတီတွေကို ဖျက်သိမ်းလိုက်တယ်။ အစိုးရထဲမှာ ဆေးပညာတတ်တဲ့သူတွေချည်းသာပါပြီး ဖွဲ့လိုက်တယ်။
တိုင်းသူပြည်သားမှန်သမျှ ဆေးထိုးအပ်ဆိုရင် ၁ နာနိုမီတာရှည်တာတောင်မှမကိုင်ရလို့ တားမြစ်လိုက်တယ်။ ဆေးပြား တခြားလူလက်ထဲမှာမရှိစေရ။ ဆေးအဖွဲ့အစည်း ကြီးငယ်တွေ ထူထောင်တယ်။ ဗိုက်နာဘူးသူမှန်သမျှအတွက် ဗိုက်နာသင်း။ ခေါင်းကိုက်ဘူးသူတိုင်း ခေါင်းကိုက်သင်း။ ဆေးရုံလာတက်ရင် အဖွဲ့ဝင်ကပ်ပါမှ ကုတင်နေရာရမယ်။
ဆယ်နှစ်လောက်ကြာလာတော့ ပါတီဖွဲ့လိုက်တယ်။ ကျန်းခိုင်ရေးအသင်း။ မြွေတံဆိပ်နဲ့ မဟာအသင်းကြီးထဲမှာ လူသန်းပေါင်းများစွာ ပါစေတယ်။ စိတ်ဓါတ်စစ်ဆင်ရေးဆိုတာ ဆေးပညာကနေလာတယ်။ ဝါဒဖြန့်ချိရေးဟာ တိုင်းပြည် စီးပွါးရေးထက် အရေးကြီးတယ်။ ဆေးကလွဲရင် ဘာမှမကောင်း၊ ဆေးချည်းသာကောင်းတယ်လို့ယုံကြည်လာအောင် နည်းမျိုးစုံလုပ်တယ်။ ဆရာဝန်သာ အမိ၊ ဆရာဝန်သာ အဖ ဆိုင်းဘုတ်ဖြူကြီးတွေ နေရာတကာမှာ ဖွေးဖွေးလှုပ် စိုက်ထူထားတယ်။ တိုင်းပြည်တလွှား ဂျူတီကုတ်တွေ ခေတ်စားစေတယ်။
ကိုယ်ချင်းစာကြည့်ပါဗျာ။ အသက်မွေးမှုတခုကနေ အရာရာကိုအပိုင်စီးတာကို မြန်မာ့သမိုင်းမှာ ရာသက်ပန် ပျောက်ကွယ်ပါစေ။ ဆရာဝန်တံဆိပ်မှာ အဆိပ်မရှိတဲ့မြွေ။
ဒေါက်တာတင့်ဆွေ
၅-၁၁-၂ဝ၁၃
၇-၈-၂ဝ၁၅
Comments
Post a Comment