Old Books ခြစားနေတဲ့စာအုပ်များ
နောက်ထုတ်စာအုပ်တွေမှာ နောက်ထုတ်သူတွေကနေ သတ်ပုံတွေပြင်ထားကြတော့ အဖတ်ရခက်၊ အနေရခက်တယ်။ မူရင်းစာအုပ်တွေထဲက အရေးအသားတွေကို တည်းဖြတ်သုတ်သင်တယ်ဆိုတာကတမျိုး။ သတ်ပုံပြင်တာကတမျိုး။ ခဏခဏထောက်ပြရပါတယ်။ ကနေ့ပဲ သိပ္ပံမောင်ဝရေးခဲ့တာတွေကို (တ) နေရာမှာ (တစ်) လုပ်ထားတာရေးဖြစ်တယ်။
သိပ္ပံမောင်ဝကနေ ထားပြမှုဆိုတဲ့ဆောင်းပါးရေးခဲ့ပါတယ်။ ခုခေတ်မှာ ဓါးပြလို့ရေးကြတယ်။ စာဘတ်လို့သာ မူရင်းစာမှာ ပါတယ်။ ခုခေတ်မှာ ဖတ်လို့သာရေးတယ်။ အဲဒီ နောက်ပြင်သတ်ပုံ ၂ ခုကို အတွန့်မတက်လိုပါ။ ခေတ်အလျှောက် ပြင်သင့်တဲ့ သတ်ပုံတွေရှိပါတယ်။ (ကျွန်တော့်အထင်ပါ။)
လယ်တီဒီပနီပေါင်းချုပ် စတုတ္ထတွဲကို ဒေလီမှာနေစဉ်က ဓမ္မမိတ်ဆွေ မစ္စတာဗားမားကလက်ဆောင်ပေးလို့ရထားတယ်။ ၂ဝဝ၃ ခုနှစ်စက်တင်္ဘာမှာရိုက်နှိပ်ထားတဲ့ကွန်ပြူတာစာစီစာအုပ်ဖြစ်ပါတယ်။ အဲဒီစာအုပ်မှာ (တစ်ဆူတည်းသာ ကိုးကွယ်ရာအစစ်) လို့ရိုက်နှိပ်ထားတယ်။ ဆရာတော်ဘုရားကြီးရဲ့မူရင်းစာနဲ့တိုက်ကြည့်ချင်နေတယ်။ အဲဒီအခွင့်အရေးမျိုး ပြည်ပမှာ လက်လှမ်းမမီပါ။
အရှင်ဇနကာဘိဝံသ ဆရာတော်ကြီးရဲ့ အလင်္ကာဘာသာဋီကာစာအုပ်ကို ၁၃၂၁ ခုနှစ်မှာရိုက်နှိပ်ခဲ့တယ်။ အဲဒီစာအုပ်ထဲမှာ (ဆက်ပါဥူးမည်) လို့ရိုက်ထားတယ်။ ဆရာတော်ကြီးစာအုပ်ကို ပြန်ရိုက်ထားတာမှာ မူရင်းစာသားနဲ့သတ်ပုံကို ပြင်မထားပါ။
ကျွန်တော့်အမြင်ကတော့ မူရင်းအရေးအသားတွေကို နောက်လူတွေကနေ ကြိုက်သလိုမပြင်သင့်ကြပါ။ အဲလိုလုပ်တာဟာ သူများရေးထားတာကို ကိုယ်ရေးတာလိုလုပ်သူမျိုးနဲ့ သိပ်မကွာခြားလှပါ။
မူလလက်ဟောင်းစာအုပ်တွေကို တမ်းတနေမိတယ်။ ငယ်ငယ်က ကျွန်တော့်အကိုကြီးရဲ့ ထင်းရှူးသေတ္တာကြီး ၃-၄ လုံးကိုအမှတ်ရနေတယ်။ ပိုးဟပ်ကိုက် ခြစားနေတဲ့စာအုပ်ဟောင်းတွေကို နောက်ထုတ် ဂျပ်ထူ၊ ကြွေစက္ကူ၊ ကွန်ပြူတာစာစီတွေထက် တန်ဖိုးထားပါတယ်။
ဒေါက်တာတင့်ဆွေ
၂၁-၆-၂ဝ၁၆
Comments
Post a Comment